“Magayaga Iran Manangidayew” a Kombension Kasin Wadman Kayo?

GAYAGA! Kasin satan a salita so agkabisado, dayo ni ingen diad sayan apusek na gutgutan a panaon? Maseguron saray peryodiko so agmangiiter na dakel a rason parad panggayaga. Panlalaban na saray tribu, ilalaknab na eras, kaandiay-trabaho, mapeligron polusyon, agmakaligen a pulitika, krimen​—saraya so aliwan bengatlan mamapano ed puso tayo na gayaga, agta ontan?

Aanamoten na kaslakan a totoo natan so antokaman a liket a nagawaan da ed bilay. Balet say gayaga? Say gayaga so adeskribe bilang “kipapasen na liket; sayaksak.” Aliwan tanton dakel so makakaeksperiensia na peteg a gayaga, tan sano naeksperiensia ra, mabetbet a temporaryo lambengat.

Ingen, diad inenengneng ed agew tayo, impasakbay na Biblia: ‘Onia so inkuan nen Soberanon Katawan a Jehova: “Nia! Say dilin ariripen ko so manliket. Nia! Say dilin ariripen ko so sigagayagan onkelyaw lapud maabig a kipapasen na puso.”’ (Isaias 65:13, 14) Panon ya ontan?

Pian naromog so ebat, imbitaan mi kayo ya onatendi ed sakey ed saray distriton kombension na Tastasi nen Jehova a nagawa ed 1995. Say tema na sarayan kombension et “Magayaga Iran Manangidayew,” tan libre so onatendi. Say programa na taloran-agew a kombension so tugyopen na nibase’d-Biblia iran paliwawa, demostrasyon, diskusyon, tan dakel ni. Diad interon programa, ipabitar so teman gayaga.

Sayan serye na kombension so ginmapo ed Estados Unidos nen Hunyo tan mantultuloy ed saray syudad ed interon mundo anggad kagapo na 1996. Nayarin wala so asingger ed sikayo. Akin ya agmantepet ed Tastasi nen Jehova a manaayam ed lugar yo? Ampetapetang mi kayon imbitaan ya onatendi.