Nanduroypo Ira Bilang Magayagan Manangidayew

SANEN nanduroypoy totoo na Dios nensaman parad panagdayew, sikaray inganggan a “magmaliw ya anggapolay arum noagta magayaga” sano manduruypo ira parad panagdayew. (Deuteronomio 16:15) Saray “Magayaga Iran Manangidayew” a Distriton Kombension ed 1995/96 so maseguron angiter ed Tastasi nen Jehova na maabig iran rason pian manggayaga.

Nanlapulad inggapo na sayan serye na saray kombension, nipapaalagey so pananisia ra. Nipapanengneng da met no panon so pakaromog na gayaga ed mundon agmagayaga. Sansasakeyen tayo pan konsideraen so kada agew na kombension.

‘Idayew si Jehova, Sikayon Totoo . . . Manggayaga!’

Say tema ed tagey ed inmunan agew na kombension so nibased Salmo 149:1, 2. Say diskurson “Walaan Tayo na Rason Pian Onkelyaw ed Gayaga” so angusisa ed kausaran na propesiya’d Isaias kapitulo 35. Satan so asumpal diad kadaanan ya Israel tan nagkalalo la diad agew tayo ed kipawil ed aligwas tan bunigas na saray managdayew nen Jehova diad sakey ya espiritual a paraiso. Kanian, saray kombensionista so walaan na rason pian onkelyaw ed gayaga lapud gagala na Dios parad totoo to diad sakey ya espiritual a paraiso tan diad onsasabin literal a Paraison asingsingger la.

Say keynote a paliwawa a, “Nibiig Bilang Magayaga Iran Manangidayew ed Sankamundoan,” so angebat ed tepet ya: Anto so mangibibiig ed sikatayo manlapud sayan mundo? Satan et say nankakasakey a panagdayew tayo ed si Jehova. Inerman so panaayaman na Tastasi nen Jehova ed sayan dalin, mantutunosan ira ed isasalita tan ibabangat da. Panggayagaan da met so engranden gagala nen Jehova a pasantosen so masanton ngaran to tan alangonen so inkasoberano to diad panamegley na Panarian to. Balet, panon itayon tutulongan nen Jehova a nawalaan na pasen ed gagala to? Inmatalek to ed sikatayo so katuaan na masanton Salita to. Inikdan itayo na Dios na masanton espiritu to. Benendisyonan to itayo na sankamundoan ya impanaagi tan sakey ya uksoyan ed puron panagdayew. Say internasyonal a pamilya tayo so ontutulong ed sikatayo pian lingkoran si Jehova tekep na baleg a gayaga na puso.

“Mansiansian Sian tan Andian na Matik Manlapud Mundo” so angidanet a nakaukolan a paliisan so pakamatikan ed panangidumaduma tan manangibiig iran klase. (Santiago 2:5-9) Say arum so nayarin milimog lambengat ed saramay kapara ray abenegan odino kipapasen ed pinansyal, bangta ibabaliwa daray kaparan Kristianon mairap odino gipit. Arum so onkiling a paboran iramay walaay posisyon na responsabilidad ed kongregasyon. Nalilingwanan dan say sankabalgan a pribilihyon niwala ed sakey et say pagmaliw ton sakey a Tasi nen Jehova. Kanian, agtayo nepeg ya abuloyan a namatikan itayo na minumundo iran tendensya tan mamuyak ed kareenan na kongregasyon.​—2 Pedro 3:14.

Say paliwawan “Kasin Akaparaan Ak lan Mangasawa?” so angipabitar a dakel so maganat a mangasawa. Arum so mangasawa ta pian naarawian so mairap a situasyon ed ayaman odino lapud nanaasawa laray kaedaran da. Anggaman ontan, saray importantin rason parad pangasawa et lalaktipen to so pilalek dan duan gegemtanen iray teokratikon kalat, puron aro, pankaukolan parad piuulop tan inkaligen, tan say pilalek a pamabaleg na ananak. Say inkipasal diad espiritual a paraan so importanti diad panagparaan ed panamaley. Sakey ni, wadtan so pankaukolan a bayuboan iray kalkaliktanen a kualidad diad pangisulong na balon personalidad. Makabat met so pamaseguro no kasin say prospektibon kapareha so napapaneknekan ton walaan na peteg a pisiglaotan ed si Jehova tan sirerespeton mideneng ed arum. Say ikerew na konseho ed matatken iran Kristiano so makabat met.​—Uliran 11:14.

Sayan pakaliwawaan a diskusyon so tinumbokan na sakey ya apauloan na “Atateng a Makakaromog na Liket ed Ananak Da.” Say kianak na sakey ya ugaw so kaslakan a panaon na baleg a panggayaga. Anggaman ontan, say pamabaleg na ananak so mangitatarok met na baleg a responsabilidad. (Salmo 127:3) Kanian, importantin kaukolan ya ibangat iray anak ya aroen da si Jehova. Nagawaan na atateng iya diad regular a pangitongtong ed ananak da nipaakar ed si Jehova tan diad pangiyaplika ed saray prinsipyo na Salita to diad loob na pamilya.

Say inmunan agew na kombension so anampot tekep na sakey a surprisa​—say inkipaway na balon brosyur a Jehovah’s Witnesses and Education. Malinlinew ya isasalaysay to a “mamapaseseg [so Tastasi] ed saray anak da ya impasyan mankimey tan manseryoso ed saray kimey a nipabtang ed sikara ed eskuelaan.” Isasalaysay met na sayan palapagan iray makatantandan resulta na saray klase na panagsulat tan panagbasa ya ipapakurang na Tastasi nen Jehova ed dakel lan taon diad Nigeria, Mexico, tan arum nin daldalin. Makatulong iyan brosyur a nanengneng na saray edukador a no parad say sikatayo et baleg so kaimportantian na edukasyon.

“Lawas Mangiyapay ed Dios na Bagat na Panangidayew”

Say tema ed tagey na onkomaduan agew so nibased Hebreos 13:15. Imparungtal na programa ed kabuasan so simposium a “Panangebat ed Tawag ya Idayew si Jehova.” Aliwan babeng so edad ed panangebat ed sayan tawag. Sisimbawaen na Salmo 148:12, 13 iray balolaki, mamarikit, mamasiken, tan ugugaw a lalaki ya idayew si Jehova. Dakel ed magayagan ariripen nen Jehova so akapanpadaak ed panangidayew da. Diad sankamundoan, masulok a 600,000 so mibibiang ed sigpot-panaon a panagpulong, odino panaglingkor bilang payunir. Masulok a 15,000 so mibibiang ed special pioneer a kimey, tan masulok a 15,000 so manlilingkor ed Bethel.

“Sitotoor a Manlilingkor a Kaibay Organisasyon nen Jehova” so paliwawan angipanengneng a say katooran so makana parad ariripen na Dios. Say pagmaliw a matoor ed si Jehova et kabaliksan toy ipeket ed sikato tekep na aralem a debosyon a singano mapeket a kola. Kakaukolanen na katooran ya arawian tayo so sigagalan panumlang ed saray ganggan na Biblia, balanglan nanenengneng itayo odino andi na arum. Kakaukolanen to met a sitotoor tayon suportaan iray bangat na Biblia a naromog diad saray magasin a Watchtower tan Awake! ontan met ed amin nin espiritual a taganon itatarya na Watch Tower Society. Tinumbokan iyan paliwawa na diskurso ed bautismo. Agaylay gayaga sanen pinaneknekan na saray kandidato ed bautismo so dedikasyon da ed si Jehova!

Saray salita ed Oseas 4:1-3 so angiletneg na padron parad paliwawa ed ngarem “Kaabigan odino Bisyo​—Dinan so Gegegemtanen Yo?” Anggaman say panmoria na mundo ed kaabigan so inmuges la, nepeg a mangipatnag na “masimoon a sagpot” iray Kristiano a gegemtanen so moral a karlangan. (2 Pedro 1:5) Onggagapo iya ed paraan na panag-isip na sakey. No saray kanonotan to et maabig, sikatoy mansalita na malinis, mabunigas, tan makapaalagey iran salita tan panbanikelan to so magmaliw a matua ed saray pidedeneng to ed arum. Sasaglawien met na panggegemtan na kaabigan so panbanikel a talosan tan abageyen so kaparan Kristianon manasagmak na gonigon odino depresyon.​—1 Tesalonica 5:14.

Sakey nin paliwawa, “Manbantay Sumpad Saray Patit na Diablo,” so amasakbay ed Kristianos sumpad pangiparangtal day inkasikara ed demoniko iran impluensya. Diad lawak na panagtambal parad sakit, kaukolan na Kristianos a manalwar ed saray teknik, a singa say hipnotismo, ya alaokay okultismo. Diad arum a kipapasen, say pangaasikaso na sinansakey ed pisikal a bunigas da et personal a pamaakaran.

Anampot so komaduan agew tekep na magaygayagan surprisa​—say inkipaway na balon ibubulsan palapagan ya adesinyon ontulong ed matuan-impanpuson totoo pian maples ya onaligwas ed dedikasyon tan bautismo. Sayan balon 192-pahinan libro so apauloan na Pikakabat a Mangitonton ed Andi-Anggaan a Bilay. Say libron Pikakabat so mangipaparungtal ed katuaan diad makapaalagey a paraan. Agto sisingbaten so agpiabobon ed saray palson doktrina. Say inkalinew na saray salita tan lohikon inkatibukel so mamainomay ed panangusar ed sayan libro diad panangikondukta na saray panangiyaral na Biblia tan ed panulong ed totoon talosan so makapaligsan pikakabat na Dios.

“Manliket, Sikayon Totoo, tan Manggayaga ed Ando lan Ando”

Sarayan salitan nanlapud Isaias 65:18 so tema na komatlon agew na kombension. Say kasumpalan na propesiya ed Biblia so mangituturo ed 1914 bilang say taon sanen linmoob iyan marelmeng a sistema ed kaunoran iran agew to. Kanian, say simposium na saray paliwawa ya apauloan a “Magayaga Iran Manangidayew Legan na Konklusyon na Sayan Sistema” so angalay antentibon imano na saray dumerengel. Impanengneng na saray espiker no panon a binilyon so naiimpluensyaan a tuloy na agum tan marawal ya espirituy mundo. Nasabi panaon, sikaray naukom bilang kabiangan na mundon uuleyan nen Satanas. Kanian, natan la so panaon pian manpili. Dinan so pidapagan tayo? Kasin labay tayo so mandayew ed si Jehova tan suportaan so inkasoberano to, odino abuloyan tayo si Satanas a magmaliw a manuley tayo diad panggawa’d saray bengatlan mamaliket ed sikato? Amin tayo so nepeg ya anggapoy-pananguman ya ondapag ed si Jehova.

Say publikon diskurso ed kombension ya “Idayew so Ari na Inka-magnayon!” so angiter ed amin ya inmatendi na anawet a taganon nepeg a dalepdepen. Anggaman say ideya na inka-magnayon so ompatnag a labas ni nen say natalosan na makabos a totoo, sigpot a natatalosan itan nen Jehova. “Si Jehova so Ari ed panaon ya andi-getar, anggan ando lan ando,” so inkanta na salmista. (Salmo 10:16) Sayan Ari na inka-magnayon so angilukas na dalan pian panggayagaan na katooan so bilay a magnayon diad panamegley na Anak to, si Jesu-Kristo. (Juan 17:3) “On, nagamoran tayon makasalanan a totoo so andi-anggaan a bilay diad panamegley na madibinon edukasyon tan pananisia ed dondon bagat nen Jesus,” inkuan na espiker.

Diad pansamposampot na kombension, saramay wadman so apabiskeg ed unor a paliwawan apauloan na “Sigagayagan Mangidayew ed si Jehova Diad Inagew-agew.” Makapaligsa so pakaawat na saray report ed iyaabante na panaggaway-babangatan ed interon mundo. Tan apakiwas iray kombensionista a ‘benditoen si Jehova ed interon agew tan idayew so ngaran to ed ando lan ando.’​—Salmo 145:2.

Saray agnibalikas ya inaayep a kiwas so manasamsam na gayaga ed mundo. Anggaman kuan, saray sinansakey a walaay sigpot a pananisia ed si Jehova so makapankayarian na maridios a gayaga. Bilang sankamundoan ya impanaagi, nayari sirin ya uliten na Tastasi nen Jehova so onggendan iran salita na Salmo 35:27, 28: “Onkelyaw komon a sigagayaga tan manggayaga ed saray maligsa ed inkatunong ko, tan abuloyan iran naynay a mangibagan: ‘Nitandoro komon si Jehova, a panliketan toy kareenan na aripen to.’ Tan abuloyan ya ibesngaw na dilak a makalna so inkatunong mo, amin ya agew so dayew mo.”

[Saray litrato ed pahina 7]

Saray pamilya so nagunggunaan manlapud brosyur a “Jehovah’s Witnesses and Education”

[Saray litrato ed pahina 8, 9]

Say balon libron, “Pikakabat a Mangitonton ed Andi-anggaan a Bilay,” so mangipaparungtal na saray katuaan ed Biblia diad makapaalagey a paraan

[Litrato ed pahina 9]

Dakel so abautismoan bilang simbolo na dedikasyon da ed si Jehova

[Litrato ed pahina 9]

Apakiwas a tuloy iray kombensionista ed draman “Panamagalang ed Saray Makanepegan Sano Matatken La Ra”