Sigagayagan Nandaragup so “Maseseg Iran Manangiyabawag na Panarian”
SARAY problema ed moral, ekonomya, tan politika so mangogonigon ed mundo. Balet, anggaman ed ontan ya inkagulo et nandaragup iray Tastasi nen Jehova parad mareen a taloy-agew iran Distriton Kombension a “Maseseg Iran Manangiyabawag na Panarian.” Ginmapo nen Mayo 2002 ya agawa irayan pandaragup ed sankagloboan.
Apaneknekan a saray kombension so talagan magayaga iran okasyon. Repasoen tayo pan magano so makapabiskeg a programan nibase ed Biblia.
Nidanet ed Inmunan Agew so Inkaseseg nen Jesus
Say tema na inmunan agew na kombension et “Aligen so Seseg na Katawan Tayo, si Jesus.” (Juan 2:17) Ampetang ya inabrasa na paliwawan “Manliket Diad Pandaragup Bilang Manangiyabawag na Panarian” iramay inmatendi pian minabang ed gayaga a lawas pakabidbiran ed saray kombension na totoo na Dios. (Deuteronomio 16:15) Sayan paliwawa so tinumbokan na impanginterbio ed saray maseseg a manangipulong na maong a balita.
Bersikulo por bersikulo ya akobrian so Salmo 37:1-11, NW diad paliwawan “Manggayagan Tuloy ed si Jehova a Mismo.” Apaseseg itayon agmagmaliw a ‘mapetang’ nisesengeg ed ompatnag ya itatalona na saray marelmeng. Anggaman sikatayo so papaugesen na saray mauges, onsabi panaon et ipabitar nen Jehova no siopan talaga iray matoor a totoo to. Siningbat na paliwawan “Ipatnag a Sikayoy Misalsalamat” no panon tayon napisalamatan so Dios. Amin a Kristiano so nepeg a mangisaklang na “bagat a panangidayew” ed si Jehova. (Hebreos 13:15) Siempre, say panaon ya itatalaga tayo parad serbisyo ed si Jehova so mandedependi ed apresasyon tan saray sirkumstansya tayo.
Say pinagkateman paliwawa so apauloan na “Asagyat Iray Manangiyabawag na Panarian Tekep na Seseg.” Impabitar na satan a si Jesu-Kristo so sankaabigan ya alimbawa na seseg. Kayari inkiletneg na mangatatawen a Panarian nen 1914, kaukolan na saray tuan Kristiano so seseg pian iyabawag itan a maong a balita. Sinaglawi na espiker so kombension ed Cedar Point, Ohio, E.U.A., nen 1922 tan pinanonotan to itayo ed maawaran a tawag: “Iyabawag so Ari tan say Panarian to”! Diad kaunoran et say inkaseseg na matoor iran lingkor na Dios so amakiwas ed sikara pian iyabawag iray makapakelkelaw a katuaan na Panarian ed amin a nasyon.
Impabitar na paliwawan “Ag-Ontakot Diad Pakaamtan Kaiba Tayo si Jehova” diad ngarem na inmunan agew, a saray totoo na Dios so manunan puntirya nen Satanas. Balet, anggaman nidudunget itayo ed isusumpa, makmakpel tan andi-takot tayon aarapen iray subok tan tukso lapud panangonsidera tayo ed dakel iran uliran na pananisia ed Biblia tan ed modernon panaon.—Isaias 41:10.
Tinmumbok ed programa et say nankatlon-parte a simposium ya atemaan na “Pabiskegen Itayo na Propesiya nen Miqueas a Mankurang ed Ngaran nen Jehova.” Inkompara na inmunan espiker so inkagba ed moral, apostasya ed relihyon, tan materyalismo ed agew nen Miqueas ed say mismon panaon tayo. Inkuanto: “Magmaliw a segurado so ilalo tayo ed arapen no bayuboan tayoy matulok a puso tan seguroen a masanto so kondukta tayo tan panoen tayo so bilay tayo na saray gawa na maridios a debosyon—tan no agtayon balot lingwanan a say agew nen Jehova et peteg ya onsabi.”—2 Pedro 3:11, 12.
Say komaduan espiker ed simposium so angipabitar ed impangondena nen Miqueas ed saray lider na Juda. Inabuso daray duruka, pakaskasin totoo. Balet impasakbay met nen Miqueas so itatalona na tuan panagdayew. (Miqueas 4:1-5) Lapud apabiskeg itayo na masanton espiritu nen Jehova, determinado itayon mangiyabawag na sayan makarepreskon mensahe na ilalo. Balet anto so nepeg ya awawey tayo no sikatayoy napupugeran nisesengeg ed sakit odino nalilimitaan lapud arum nin rason? Oniay inkuan na komatlon espiker: “Saray kakaukolanen nen Jehova et makatunongan tan sarag a dampoten.” Intuloy ton siningbat iray nanduruman aspekto na Miqueas 6:8, a nabasa tayo ditan: “Anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios mo?”
Lapud say inkagba ed moral na mundo et nayarin mangapekta ed saray Kristiano, amin tayo so agunggonaan ed paliwawan apauloan na “Mansiansian Malinis ed Moral Diad Panalwar ed Puso Yo.” Singa bilang, say pansiansia tayon masimpit so ontulong ed sikatayon nawalaan na maliket a panamaley. Bilang Kristiano, nepeg ya agtayo anggan nonoten so pangagamil na seksual ya imoralidad.—1 Corinto 6:18.
Impabitar na “Manbantay Sumpad Panamalikdo” a nepeg tayon moriaen a samal iray panagpikewet, balikas ya alaokan na tila, tan sigpot a katilaan ya ikakayat na saray apostata. (Colosas 2:8) Ontan met, nepeg ya agtayo papalikdoen so inkasikatayo ed panisip a napenek tayo iray makasalanan a pilalek tayo ya anggapoy makapuy iran pansumpalan.
Say tema na unor a paliwawa ed inmunan agew et “Dayewen so Alenleneg a Tuan Dios.” Legan ya onuuges iray kipapasen ed mundo, agaylan makapaseseg so pakaamtan asingger lan itarok nen Jehova so matunong a balon mundo to! Sioparay manayam ed satan? Saraman lambengat so mandadayew ed si Jehova. Pian natulongan itayo, iray ananak tayo, tan saray iyaaralan tayo na Biblia a nadampot iyan kalat, angipaway so espiker na balon panaralan a libron Dayewen so Alenleneg a Tuan Dios. Agaylay liket tayon angawat ed satan!
Nipabitar ed Komaduan Agew so Seseg ed No Anto so Maabig
Say komaduan agew ed kombension so atemaan na “Magmaliw a Maseseg ed No Anto so Maabig.” (1 Pedro 3:13) Siningbat na inmunan espiker so teksto ed Biblia ed satan ya agew. Indanet to a say regular, makabaliksan a panangonsidera ed inagew-agew a teksto so lalon mamaseseg ed sikatayo.
Insan sinmublay so simposium a “Saray Manangiyabawag na Panarian a Mangiglogloria ed Ministeryo Ra.” Indanet na inmunan parte a kaukolan so suston pangusar ed Salita na Dios. (2 Timoteo 2:15) Say epektibon panangusar tayo ed Biblia so ‘mangisekar na pakayari’ ed bilay na totoo. (Hebreos 4:12, NW) Kaukolan tayon ipaarap so imano ed Biblia tan makakombinsin mikatunongan unong ed satan. Pinaseseg itayo na komaduan parte na simposium a maminpiga a pawilen iray interesado. (1 Corinto 3:6) Say panagparaan tan inkakpel so nakakaukolan pian napawil a tampol iray interesado. Inrekomenda na komatlon parte a moriaen so kada toon naabet tayo bilang potensyal a babangatan tan nipanengneng a say panangiyopresi na panagaral na Biblia diad unonan dalaw so manresulta ed magayagan panulong ed saray indibidual a magmaliw a babangatan.
Say tema na ontumbok a paliwawa et “No Akin ya ‘Andi-Tundan Manpikasi’.” Sisimbawaen na Biblia iray Kristiano a manilalo ed Dios parad panangigiya ed amin ya aspekto na bilay. Kaukolan tayo so mangigana na panaon parad personal a panagpikasi. Niarum ni, nepeg a mantultuloy itayo ed panagpikasi, lapud nayarin iyabuloy nen Jehova a sikatayo so mantultuloy nin manpikasi sakbay tayon nanengneng so ebat to.—Santiago 4:8.
Say paliwawan “Mamabiskeg so Pantotongtong Nipaakar ed Espiritual” so amaseseg ed sikatayon mangusar ed abilidad tayon mansalita pian sikatayo tan saray arum ni so nagunggonaan. (Filipos 4:8) Kaukolan na saray sanasawa tan ananak so inagew-agew a pantotongtong nipaakar ed espiritual. Pian nadampot itan, kaukolan a saray pamilya so mandurungo anggan maminsan ed kada agew, diad ontan et niwalay makapabiskeg a tongtongan.
Say programa ed kabuasan so anampot ed makapaseseg a paliwawan “No Panon a say Dedikasyon tan Bautismo so Mangitonton ed Kilalaban.” Saray kandidato ed bautismo so ginmamor na pikakabat, angagamil na pananisia, nagbabawi, tan nampataoli manlapud gawan-mauges, tan indedika ra so inkasikara ed Dios. Imbaga na espiker a kayari na bautismo ra, nepeg a sikaray mantultuloy ya ombulaslas ed espiritual tan pansiansiaen day seseg tan maabig a kondukta ra.—Filipos 2:15, 16.
Diad saman a ngarem, duaran punto so nidanet ed paliwawan “Magmaliw a Mapaabeba, tan Pansiansiaen Yon Simpli so Mata Yo.” Say pagmaliw a mapaabeba et kabaliksan toy pakawalaan na realistikon panmoria ed saray limitasyon tayo tan talindeg tayo ed arap na Dios. Natutulongan itayo na inkamapaabeba a pansiansiaen a “simpli” so mata tayo—ya akasentro ed Panarian na Dios, aliwan diad materyal iran bengatla. No gawaen tayo iya, agtayo kaukolay manpaga lapud itarya nen Jehova iray pankaukolan tayo.—Mateo 6:22-24, 33, 34, NW.
Impabitar na tinmumbok ya espiker no akin a kaukolan itayon “Sigpot a Manmatalek ed si Jehova Diad Makapagonigon a Panaon.” Panon tayon natalonaan iray bengatlan singa saray personal a kakapuyan tan problema ed pinansyal odino bunigas? Onkerew itayo ed si Jehova na praktikal a kakabatan tan patulongan ed arum. Imbes ya abuloyan a nasigensigen odino nadismaya, nepeg a pabiskegen tayo so panagmatalek tayo ed Dios diad pambasa ed Salita to.—Roma 8:35-39.
Say unor a simposium ed kombension et atemaan na “Say Kalidad na Pananisia Tayo a Sinubok na Nanduruman Subok.” Say inmunan parte so angipanonot ed sikatayo ya amin a tuan Kristiano so nipapaarap ed panamasegsegang. Onkakana itan bilang pantasi, mamapabiskeg ed pananisia tayo, tan mangiiter ed sikatayo na pankanawnawa pian nipatnag tayo so katooran tayo ed Dios. Anggaman agmet kaukolan ya irisga tayoy bilay tayo, agtayon balot usaren iray agmakasulatan a paraan pian paliisan so panamasegsegang.—1 Pedro 3:16.
Say komaduan espiker ed sayan simposium so angebat ed saray tepet a misiglaotan ed neutralidad. Saray inmunan Kristiano so aliwan pacifists odino managpareen, noagta bidbiren da a say manunan pampapauleyan da et say Dios. Ontan met natan, bebembenan a malet na saray Tastasi nen Jehova so prinsipyon: “Agkayo kabiangan na mundo.” (Juan 15:19, NW) Lapud saray subok ed neutralidad tayo so mainomay ya onlesa, nepeg ya iyeskedyul na saray pamilya so panrepaso ed saray giya na Biblia nipaakar ed sayan tema. Unong ya impabitar na komatlon paliwawa ed sayan simposium, say gagala nen Satanas et aliwan say pamatey ed sikatayo, noagta pian desdesen to itayon magmaliw ya agmatoor. Diad sitotoor a pansungdo tayo ed panagludlurey, desdes ed panggawa na imoralidad, ot-ot ed emosyon, tan kaleteyan, nidayew tayo si Jehova.
Say makapasagyat ya imbitasyon ya “Onapit ed si Jehova” so pinagkapaulo na pinal a paliwawa ed satan ya agew. Say pakatalos ed manuna iran atributos nen Jehova so mamaasingger ed sikatayo ed sikato. Uusaren to so ag-agetaran a pakapanyari to a manalimbeng ed totoo to, nagkalautla diad espiritual. Say inkahustisya to so aliwan maruksa noagta mamapakiwas ed sikaton mangiter na magnayon a bilay parad amin a matunong. Napatnagan so kakabatan na Dios diad impangusar to’d saray ag-ayadyarin totoo a mangisulat ed Biblia. Mas makapasagyat et say aro to, ya amakiwas ed sikaton manggawa na probisyon parad kilalaban na katooan panamegley nen Jesu-Kristo. (Juan 3:16) Sinampotan na espiker diad impangipaway na makapalikliket a balon libron Onapit ed si Jehova.
Niyapasakey so Komatlon Agew ed Seseg Parad Maabig Iran Kimey
Say tema na komatlon agew a kombension et “Totoo a Maseseg ed Maabig Iran Kimey.” (Tito 2:14, NW) Ginmapo so programa ed kabuasan diad impaningbat na sakey a pamilya ed teksto ed satan ya agew. Insan tinmumbok so paliwawan “Kasin Panmamatalkan Yo si Jehova?” Aliwa so panmamatalkan na saray nasyon diad paniilalo ra ed dilin ran kakabatan tan biskeg. Balet, diad kasunian to et saray lingkor nen Jehova so makmakpel tan magayagan maniilalo ed sikato anggaman walaray kalamidad.—Salmo 46:1-3, 7-11.
Say parte ya apauloan na “Sikayoran Kalangweran—Manparaan Parad Arapen a Kaiba so Organisasyon nen Jehova” so angebat ed sayan tepet: Panon a nagamoran na sakey a kalangweran so sankaabigan ed bilay to? Ag-iya posibli diad pangegemtan na kuarta, kaykayarian, tan inkabantog. Maaron mamapaseseg so Manamalsa tayo ed saray tobonbalo a sikato so nodnonoten da legay kaugawan da. Ininterbio na espiker so pigaran angisekar na inkasikara diad serbisyo ra bilang Kristiano legan na inkatobonbalo ra, tan alikna tayo so liket da. Tan agaylan makagunggona so impakaawat ed balon tract a Sikayoran Kalangweran—Anto so Gawaen Yo ed Bilay Yo?, ya adesinyon ontulong ed saray kalangweran a Tastasi a mangiletneg na pundasyon parad andi-anggaan ya arapen da kaibay organisasyon nen Jehova!
Insan tinmumbok so makapasagyat a tuloy a drama ed Biblia ya “Ontalindeg a Malet ed Makapagonigon a Panaon.” Sinegek na satan so andukey a karera nen Jeremias manlapud inkaugaw to ya anggad inkaderal na Jerusalem, a maseseg ton impropesiya. Liknaen nen Jeremias a sikato so agkualipikado ed asainmin to, balet ta sinumpal to itan anggaman ed isusumpa kanian sikatoy inliktar nen Jehova.—Jeremias 1:8, 18, 19.
Say drama so tinumbokan na paliwawan “Magmaliw a Singa si Jeremias—Andi-Takot ya Iyabawag so Salita na Dios.” Saray peles a manangiyabawag na Panarian so mabetbet a puntirya na agsuston impormasyon tan tilan propaganda. (Salmo 109:1-3) Balet singa si Jeremias, natalonaan tayo so pakadismaya no panggayagaan tayo so Salita nen Jehova. Tan matalek itayon ag-ontalona iramay onsusumpa ed sikatayo.
Talagan nipanpanaon so mapublikon paliwawa, ya apauloan na “Manguuman so Kipapasen ed Sayan Mundo.” Nabibidbiran ed panaon tayo a walay baleg a pananguman. Impasakbay na Biblia a saratan a kipapasen et lalaktipen toy pangikelyaw na “kareenan tan andi-paga,” a mangipaarap ed makapataktakot ya agew na panangukom na Dios. (1 Tesalonica 5:3) Satan so mangitarok na makapakelkelaw iran pananguman—say pangangga na amin a bakal, krimen, karawalan, tan anggan say sakit. Sirin, imbes a panmatalekan iyan sistema na bengabengatla, saya la so panaon pian gegemtanen so maridios a debosyon tan pansiansiaen so masimpit a kondukta.
Say sumaryo na panagaral ed satan a simba ed Panag-Bantayan so tinumbokan na pinal a paliwawa ed kombension, ya apauloan na “Ondaak ed Maabig Iran Kimey Bilang Maseseg Iran Manangiyabawag na Panarian.” Indanet na espiker no panon a say programa so anagyat ed sikatayo ed espiritual tan amaseseg ed sikatayon manmatalek ed si Jehova. Diad konklusyon, sikatayo so apaseseg a magmaliw a malinis, maaro, tan maseseg iran manangiyabawag na Panarian na Dios.—1 Pedro 2:12.
Tekep na awawey a singa ed saramay lingkor nen Jehova diad panaon nen Nehemias, seguradon sinmempet itayon malikeliket lapud espiritual iran bendisyon ya agamoran tayo ed saray Distriton Kombension a “Maseseg Iran Manangiyabawag na Panarian.” (Nehemias 8:12) Agta sayan makapasagyat a kombension et pinagmaliw to kan magaygayaga tan determinadon mantultuloy bilang maseseg a manangiyabawag na Panarian?
[Kahon/Litrato ed pahina 23]
Sakey a Balon Katulongan ed Panagaral!
Diad pansumpal na inmunan agew na kombension, aliketan iray inmatendi diad inkipaway na balon libron Dayewen so Alenleneg a Tuan Dios. Adesinyo itan pian iyaral ed saramay asumpal da lan inaral so libron Pikakabat a Mangitonton ed Andi-Anggaan a Bilay tan seguradon mamabiskeg itan ed pananisia na saramay “suston nikiling ed andi-anggaan a bilay.”—Gawa 13:48, NW.
[Credit Line]
Retrato ed apis na libro: U.S. Navy photo
[Kahon/Saray litrato ed pahina 24]
Tulong Pian Lalon Onapit ed Dios
Inyanunsio na unor ya espiker ed komaduan agew na kombension so kipaway na balon libron Onapit ed si Jehova. Lalaktipen na satan so apatiran manunan seksion, sakey ed kada manunan atributos nen Jehova—pakapanyari, inkahustisya, kakabatan, tan aro. Balang seksion na libro so walaan na kapitulon mangipapanengneng ed no panon a mabitar ya impatnag nen Jesu-Kristo iray kalidad na Dios. Say manunan gagala na sayan balon libro et pian sikatayo tan saray iyaaralan tayo na Biblia so nawalaan na mas maapit tan mabiskeg a relasyon ed si Jehova a Dios.
[Kahon/Saray litrato ed pahina 26]
Espiritual a Giya Parad Saray Kalangweran
Say komatlon agew na kombension so nikaduma lapud inkipaway na sakey ya espisyal a tract ya apauloan na Sikayoran Kalangweran—Anto so Gawaen Yo ed Bilay Yo? Saya so adesinyo pian tulongan iray kalangweran a Tastasi a makapandesisyon na duga nipaakar ed arapen da, sayan balon tract so mangiiter na Makasulatan a simbawa ed pangiletneg na magnayon a karera diad serbisyo ed si Jehova.