Sigpot a Pagunggonaan ed “Maseseg Iran Manangiyabawag na Panarian” a Distriton Kombension
1 Makapasagyat a Programa: Agaylan makapasagyat a programa so nanggayagaan tayo diad apalabas a distriton kombension tayo! Sikatayoy nandaragup parad saksakey a gagala, salanti magmaliw a lalon akinlongan a mangiyabawag ed Panarian na Dios tekep na seseg. Kasin nanonotan mo no panon ya inukeran na inmunan espiker so balikas a ‘mangiyabawag’? Kasin nanonotan mo no antoy nipaseseg ed sikatayo a sukimaten diad paliwawan “Ag-ontakot Diad Pakaamtan Kaiba Tayo si Jehova”? Dinan iran peteg ya istorya ed bilay so nausisa yo la?
2 Say simposium a “Say Kalidad na Pananisia Tayo a Sinubok na Nanduruman Subok” so angiter na taloran rason no akin ya aabuloyan nen Jehova so panamasegsegang. Kasin nipaliwawa yo no anto iratan? Anto so Makasulatan a basiyan na neutralidad tayo bilang Kristiano? Antoray nipaseseg ed sikatayon gawaen pian niparaan tayoy inkasikatayo ed saray onlesan subok nisengeg ed neutral a talindeg tayo? Panon a say matoor a pansungdo tayo ed saray subok so kidayewan nen Jehova?
3 Dinan iran eksena ed draman “Ontalindeg a Malet ed Makapagonigon a Panaon” so nagkalautlan amabiskeg ed sikayo? Panon tayon naalig si Jeremias?
4 Say publikon paliwawa a, “Manguuman so Kipapasen ed Sayan Mundo,” so aneskribe ed antoran nagawa a makatantandan pananguman a mansumpal ed makapataktakot ya agew na Dios? Legan yon tatalinengen so sampot a paliwawan, “Ondaak ed Maabig Iran Kimey Bilang Maseseg Iran Manangiyabawag na Panarian,” panon yon insiglaot so impormasyon ed dilin ministeryo yo?
5 Manuna Iran Punto ya Iyaplika: Unong a nipalinew diad paliwawan “Ipatnag a Sikayoy Misalsalamat,” panon tayon nipatnag so aralem a pisasalamat tayo ed si Jehova? Diad pinagkateman paliwawa, ya “Asagyat Iray Manangiyabawag na Panarian Tekep na Seseg,” siopan alimbawa so akapasesegan tayon aligen? Anton dilin-pangusisa so kinerew ed sikatayon gawaen?
6 Anto so taloran kakaukolanen a nipabitar diad simposium a “Pabiskegen Itayo na Propesiya nen Miqueas a Mankurang ed Ngaran nen Jehova” a nepeg tayon kapeten pian abobonan itayo nen Jehova? Sarag tayo kasi irayan dampoten? (Miq. 6:8) Unong ed paliwawan “Mansiansian Malinis ed Moral Diad Panalwar ed Puso Yo,” diad antoran dalan a nepeg tayoy mansiansian malinis ed moral? Diad antoran aspekto a pinasakbayan itayo na paliwawan “Manbantay Sumpad Panagpalikdo” ta pian ag-itayo napalikdo tan agtayo palikdoen so arum?
7 Dinan iran praktikal a punto ed simposium a “Saray Manangiyabawag na Panarian a Mangiglogloria ed Ministeryo Ra” so niyaplika yo la diad ministeryo yo? Say Filipos 4:8 so inusisa diad paliwawan “Mamabiskeg so Pantotongtong Nipaakar ed Espiritual.” Panon a makatulong ed sikatayo itan a teksto pian magmaliw a maespiritual so pantotongtong tayo, tan kapigan so nepeg a panggawa tayo ed satan?
8 Siningbat ed paliwawan “Sigpot a Manmatalek ed si Jehova Diad Makapagonigon a Panaon” no panon tayon natalonaan iray makapasinagem a nagagawa, kairapan ed pinansyal, inkamasakit, tan problema ed pamilya, tan agnaandi iran kakapuyan. Panon tayon nipatnag so panagmatalek ed si Jehova sano nipaarap itayo ed oniaran situasyon?
9 Balo Iran Espiritual a Kayamanan: Malikeliket itayon angawat ed balon libron Dayewen so Alenleneg a Tuan Dios. Panon a say pakabat ya angipalinew ed gagala na satan so angapekta ed sikayo? Akin a makatulong itan ed kimey tayo a panaggaway-babangatan bilang onkomaduan iyaral a libro?
10 Tinmumbok et naawat tayo so marakdakep a libron Onapit ed si Jehova. Antoray nikaduman kabiangan na satan? Dinan iran ilustrasyon so labalabay yo? Kasin napapaapit kayo ed si Jehova sano babasaen yo itan? Siopa nira so nayarin nagunggonaan ed satan?
11 Say “Maseseg Iran Manangiyabawag na Panarian” a Distriton Kombension so angitarya ed sikatayo na maespiritual a panamaseseg a nakaukolan tayo pian natalonaan irayan makapaangat a panaon. Ta pian sigpot a nagunggonaan ed sayan alay abig ya espiritual a probisyon, gawaen tayo so anggaay nayarian tayo a nodnonoten iray nipaliwawa, apresyaen iray naawat, tan iyaplika iray naaralan tayo. (2 Ped. 3:14) Diad ontan et napabiskeg itayo pian mantinien so integridad tayo tan magmaliw a maseseg a manangiyabawag na Panarian bilang pangalig ed Katawan tayo a Jesu-Kristo, ya amin et diad kigloriaan nen Jehova.—Fil. 1:9-11.