No Kapigan Dan Babasaen Itan Tan No Panon a Nagugunggunaan Ira

Kab-Kabuasan:

Sakey a sanasawa, a namparan mantatrabaho ed paway na ayaman da, so nandesiden ombangon a masasakbay na samploran minuto ed kada kabuasan pian usaren itan ed panbasa ran dua na Biblia sakbay na apuradon itaynan ed abung. Say abasa ra so mangitatarok na basiyan parad mabunigas a tongtongan kataynan da’d abung.

Sakey a matatken diad Nigeria so manguusar ed programan nidatak parad Eskuelaan na Teokratikon Ministeryo bilang basiyan parad panagbasay pamilya ed Biblia diad sankaabungan to. Babasaen da so kabiangan na satan ed inagew-agew kayari paningbat da ed teksto ed saman ya agew, genda-gendat diad kabuasan. Kekerewen ed ananak so pansusublayan a panbasa na pigaran nipabtang a seksion na Biblia. Insan sikaray naiimbitaan a mantepet ed saray bersikulon binasa.

Sakey ya asawan bii diad Hapon so makakapanbasa ed interon Biblia maminsan ed sakey taon nanlapulad 1985. Say programa to et manbasa ed loob na 20 anggad 30 minuto ya onggapo ed 5:00 n.k. ed kada agew. Nipaakar ed saray gungguna, kuanto: “Say pananisiak so napapabiskeg. Tutulongan to ak a nalingwanan so sakit ko tan iyapasakey koy imanok ed ilalo ed Paraiso.”

Sakey ya agin bii a manpapayunir la ed loob na 30 taon balet say asawa to et aliwan Tasi so ombabangon ed ala-singko ed kada kabuasan pian manbasay Biblia. Kakaukolanen na eskedyul to a manbasa na ngalngali apatiran pahina manlapud Hebreon Kasulatan, sakey a kapitulo manlapud Kristianon Griegon Kasulatan, tan sakey a bersikulo manlapud Uliran. Abasa ton interoy Biblia ed kada taon nanlapulad 1959. Kuanto: “Bilang resulta na panagbasak, naliliknak so panangaro nen Jehova . . . siak so napapaseseg, naliligliwa, tan nakokorehi.” Iyarum to: “Say panagbasay Biblia et singa papaeleten nen Jehova so ispring na bilay ko ed kada agew.”

Sakey ya agin bii a naaralan toy katuaan ed sakey a dalin ya asebelay aktibidad na Tastasi nen Jehova so walaan met na asawan onsusumpa ed saray sisiaen to. Asarag ton gawaen so panagbasa toy Biblia manlapud Lunes ya anggad Biernes, ed baetan na 6:00 tan 7:00 n.k. Saya so angiter ed sikato na akindalem a biskeg. Diad panuumameng ed no panoy impangapekta na panagbasa to, kuanto: “Naaralan tayon aroen si Jehova tan si Jesus tan manbilay a sililiket, anggano walaray problema tan kairapan, diad pakaamtan saray sipan nen Jehova et ag-onsaew.”

Sakey ya agin biin inmatendi ed Eskuelaan na Payunir a Serbisyo so determinadon onkiwas unong ed niiter a simbawa a kaukolan ya iyugaliy inagew-agew a panagbasay Biblia. Diad inmuna et agawaan to itan ed baetan na 5:00 tan 6:00 n.k. Sanen anguman na trabaho a sinmalet ed satan, inyalis to ed baetan na 9:00 tan 10:00 n.l. Sanen linmesa niray arum a makapaangat a situasyon, kuanto, “Naynay kon iyaarunsay eskedyul ko unong ed saray sirkumstansya.”

Diad Ngarem:

Duaran sanagin bii a membro na Bethel ed Brazil so angiyugali panagbasay Biblia a saniba ed ngalngali 20 minuto ed kada agew kayari panangugto. Abasa dan interoy Biblia ed ngalngali 25 danay; ingen insulat da: “Lawas kamin makakaromog na bengatlan balo, kanian say panagbasay Biblia so agbalot makapasawa ed sikami.”

Amoria na sakey ya agin biin walad kasuloan diad Hapon, ya anggaman binmaleg bilang sakey a Tasi et agto amtan maong so Kasulatan; sanen nagmaliw a pioneer, denitermina ton basaen a maparanay so Biblia. Natan et gagawaen toy panagbasa parad say Eskuelaan ed Teokratikon Ministeryo legan a manbibiahen paarap ed ospital a panpapatambalan to sakey ya agew ed kada simba. Saginonor, diad ayaman, gawaen toy katuloyan a panagsukimat. Diad pansampot na simba, gawaen to so malaglaem a panagbasay Biblia, a pipilien iray libron unong ed uksoy ya inkisulat da.

Sakey a mantaon na 13 ya akabasa lan intero ed Biblia ya amitlon danay so manbabasa ed kaplesan na sakey a kapitulo ed kada agew sano onsempet manlapud eskuelaan. Saya so, kuanto, ontutulong ed sikato a “manliknay nagkalalon aro parad si Jehova.”

Sakey a Tasin walaan na onkupadon tuloy ya eskedyul bilang trabahador, sakey a matatken, sakey ya asawa, tan sakey ya ama so ontatalineng ed saray audiocassette na Biblia legan na panbibiahe ed tren a paarap ed trabaho to. Insan diad ayaman, gagawaen toy personal a panagbasa ed parehon materyal.

Niarum ni ed personal a panagbasa to, sakey a pioneer diad Pransya so ontatalineng ed saray audiocassette na Biblia sano ipaparaan iray panangan, sano manmamaneho, sano susungdoan iray mairap a panaon, odino diad kaligliwaan lambengat.

Sakey a mantaon na 21 a pioneer ed Hapon et natandaan to ni ya impilit na ina to’d sikaton mangamor na espiritual a bengatla ed kada agew, tan babasaen toy Biblia ya inagew-agew, anggaman aliwan naynay a pare-parehon panaon, nanlapulad edad ton taloy taon. Kayari pamasa to na kabiangan na Biblian pinili to ed satan ya agew, seguroen ton basaen-lamet iray manunan bersikulo, tan insan mangigetar na pigaran minuto pian repasoen ed kanonotan so abasa to.

Sananey a Tasi, sakey a pioneer so akabasa la ed interon Biblia a ngalngali aminsamplon danay diad apalabas a 12 taon. Say masiken to so sakey ya agmananisia, kanian iyeeskedyul toy panagbasa to ed ngarem.

Labi:

Sakey a matatken tan regular pioneer diad Hapon so manbabasa manlapud Biblia to a nilabi-labi sakbay ya onugip a gagawaen to iya ed apalabas lan waloran taon. Kuanto: “Nagkalautlan panliketan koray kasulatan a mangipanengneng no panoy paniisip nen Jehova, no panoy liknaan to nipaakar ed saray pamaakaran, tan no panon so pangasikaso ed saray situasyon. Diad pandalepdep ed sarayan kasulatan, natutulongan ak a gawaey panagisip nen Jehova a kien ko tan aasistian so Kristianon agagi tan saray membro na pamilyak.

Sakey a matatken diad Pransya so manbabasa la ed Biblia ed loob na sakey oras a nilabi-labi nanlapulad 1979. Mabetbet a walaan na limara odino anemiran patalos a niiyan ed arap to parad panangikumpara. Kuanto a say maalwar a panagbasa to so ontutulong ed sikaton manebek “no panon ya iyaplikay pikakabat ed Biblia diad saray situasyon ed inagew-agew.” Saya met so mamapakayari ed sikaton magmaliw a lalon epektibo sano manisimbawa manlapud Kasulatan.

Diad apalabas a 28 taon, sakey ya agin laki diad Nigeria et inyugali toy panbasa ed labi ed tekstoy Kasulatan a nitarok ed Usisaen ya Inagew-agew so Kasulatan parad diskusyon ed kaimbuasan. Tekep na satan et babasaen toy interon kapitulo diad Biblia ya angaonan na satan a teksto. Kayari kasal to, intuloy to iyan ugali, panbasa tan paningbat ed materyal a kaibay asawa to.

Sakey a tinedyer a saray ateng to et aliwan Tasi so mangiyuugalin manbasa ed loob na limara ya anggad samploran minuto ed kada labi sakbay na iyugip to. Saraman so mablin panaon parad sikato, tan manpipikasi sakbay tan kayari panbasa to. Say kalat to et say pakaamta ed mensahen impairekord nen Jehova ed kada managsulat na Biblia.

Kuan na sakey ya agin laki a walaay asawa, diad serbisyo ed Bethel, ya abasa toy Biblia a maminsan ed sakey taon ed loob na apalabas a waloran taon. Babasaen to itan ed loob na 20 ya anggad 30 minuto sakbay na iyugip ed labi. Anggano sikatoy naknaksawan, naiimano ton agmakaugip no agmakapanbasa. Kaukolan toy onbangon tan asikasoen itan ya espiritual a pankaukolan.