Inkawalad-Kasuloan ed Panaon na Kairapay Panagbilay

“LABAY koy mangasawa sanen siak so mantaon na 25,” inkuan nen Chuks, a manaayam ed Sagur ya Aprika. “Walay napupusoan kon marikit, tan interesado met ed siak. Say problema et say kuarta. Anggapoy trabaho nen amak tan say kuyak, tan saray yogtan ko so maneeskuela. Amin da so maniilalon siak so manuportay pamilya. Kayari to et pinmalalo niray bengatla sanen nansakit so atateng ko, tan mankaukolan na dakel nin kuarta pian gastosen ed panpatambal.”

Si Chuks, a sakey a Tasi nen Jehova et agto nilabay so onloob ed panamaley lapud agni makasuporta’d asawaen to. Sikatoy sinononot ed saray salita nen Pablo a naromog ed 1 Timoteo 5:8: “Balet no wala so ag managano ed anak to, tan lalo la ed saray kakaamong to a dili, pinaandi to la so pananisia, et sikato so lalo’n mauges nen say ag manisia.”

“Impasyay impantrabahok,” so intuloy nen Chuks, “balet siansian agni magenap so kuarta. Kanian say plano min pankasal so aminpigan impaleen. Diad kaunoran et akaawat ak na sakey a sulat a nanlapud marikit a walay inmasingger ed ama to pian kerewen ton ikasal. Inmabuloy so ama. Pigaran agew lambengat ed impakaawat ko’d sulat to, say pamilya so awalaan na party parad paknaan dan dua.”

Singa si Chuks, dakel a Kristianon lalaki so sinmaew odino nipaleen so plano ran mangasawa lapud kairapay panagbilay. Diad dakel a daldalin et grabe implasyon. Alimbawa, diad sakey a bansa ed sentral Aprika, saray presyo na sasaliwen so inmatagey na 8,319 a porsiento ed sakey taon! Diad pigaran bansa, mairap so pakalmo na trabaho. Mabetbet met a saray sueldo so talagan melag a mairap parad sakey a lakin a manuporta ed sarili to, ya agni ibabagay sakey ya asawa tan ananak. Sakey a laki ed Nigeria so angitagleey a say sigpot-panaon a trabahon inyopresi ed sikato ed sakey a pabrika so manpapasueldoy $17 labat ed sakey bulan​—kulang ni parad binulan a pamasahe to ed bus a papawil-patubo ed pantrabahoan!

Dakel a Kristianon mamarikit so agmakapiasawa lapud irap na panagbilay. Mabetbet a nepeg day mantrabaho pian nasuportaan iray membro na pamilya. Say arum a babalolaki, sano naimano da iyan kipapasen, so masuyat a mangasawa, lapud namoria ran say lakin mangasawa ed silong na saratan a kipapasen so kaukolan a walaay magenap ya almo pian manuporta aliwa lambengat ed asawa to noagta pati ed pamilya na bii. Si Ayo, a nangraduar ed unibersidad, so mipupuligesgesan pian suportaan toy sarili to, say ina to, tan yogtan toran lalaki tan bibii. “Labay ko komoy miasawa,” so tagleey to, “balet sano nanengneng na arum a dakel so susuportaan ko [responsabilidad ed pinansyal], sikaray onaarawi.”

Anggaman ed problema ed pinansyal, dakel a Kristianon anggapoy asawa so dedesdesen na kakanayon tan arum nira ya onloob ed panamaley tan nawalaan na ananak. No maminsan sayan desdes so walad pormay panagludlurey. Alimbawa, diad pigaran parti ed Aprika, niyugali a sano komustaey sakey so nipaakar ed asawa tan ananak to sano ibabanoy sakey ya adulto. No maminsan, say ontan a panangibano so uusaren pian balawen iray anggapoy asawa. Si John, a masulok lan 40 taon, so nankuan: “Sano siak so lulureyen tan babagaan a, ‘Komusta lay akulaw mo?,’ oneebat ak na, ‘Onsabi la.’ Say katuaan to et panon koy mangasawa no sikatoy agko nasuportaan?”

Parad si John tan ed dakel niran kapara to, onia so kipapasen unong ed sakey a proberbio ed Yoruba: “Say panapurastan pangasawa so agnepeg ya ipasirayew; say problema et say gastosen ed tagano.”

Anamotey Situasyon Mo

Agaylan mainomay a nadismaya sano agsinmabi sakey a bengatlan iilaloan mo. Kuan na Uliran 13:12: “Say ilalo a nitantan pabeblayen to so puso.” Nayarin onia so naliliknam no kaliktan moy mangasawa balet agmo ni nayarin legpeten. Nayarin saya so nagkalautlan tua no sika so sakey ed tutukoyen nen apostol Pablo a ‘napopoolan.’​—1 Corinto 7:9.

Say itatalona ed saray problema so nayarin mairap, balet walay nagawaan mo pian naanosan tan makaromog na gayaga ed kipapasen mo. Si Jesu-Kristo, a sakey a lakin anggapoy-asawa, so angiter na sakey a praktikal a prinsipyo ed Biblia a makatulong ed sika pian natalonaan so inkadismayan resulta na panilalon nipapaleen. Inkuanto: “Lalo a mapalar so mangiter nen say mangawat.”​—Gawa 20:35.

Niyaplikam iya diad panggawam na maong iran bengatla parad pamilyam tan ed arum diad kongregasyon. Anganko ta napadaak mo met so Kristianon ministeryom. No sigpot mon isekar so inkasika ed agsinisiblet a panangiter, naromog mon sika so ‘mabiskeg ed pusom ya anggapo so pankaukolan mon mabiskeg nipaakar ed linawam a dili.’​—1 Corinto 7:37.

Sakey nin anggapoy asawa et si apostol Pablo, ya angisulat ed sayan makatulong a simbawa: “Nengneng yo sirin a tinekepan na panlikas no panon so panakar yo, aliwan singa andi kalakal, no ag ingen singa makalakal; ya anamoten yo so panaon, ta saray agew sikara so mauges.” (Efeso 5:15, 16) Dakel a Kristianon anggapoy asawa so akaromog la na ‘inawa nipaakar ed saray kamarerwa ra’ diad panguusar ed panaon da pian lalon napaapit ed si Jehova diad panamegley na pikakasi, panagaral ed Salita na Dios, tan pibibiang ed saray Kristianon miting. (Mateo 11:28-30) No gawaen mo iya, sika so nayarin makatalona ed irap na panagbilay. Ontulong met iya ed sika a napaaligwas moy espiritualidad mo, a sika so magmaliw a magmaong ya asawa no diad kaunoran et makapangasawa ka la.

Agbalot lilingwanan a manmamalasakit si Jehova ed amin a manlilingkor ed sikato. Amta toray problema tan kairapan a sasagmaken mo. Amta met na maaron Ama tayo no antoy sankaabigan parad sika ed manbayag, namparan diad espiritual tan emosyonal. No siaanos mon iyaaplika iray prinsipyo na Salita to ed kabibilay mo, makaseguro ka ya ikdan to ka na inawa ed dugan panaon tan peneken toray pankaukolan tan pilalek mo ed paraan a pankaabigan mo ed andi-anggaan. Ipapaseguro na Biblia: “Angapo so maong a bengatla ya isiblet [nen Jehova] ed saraman so manakar a mapmaptek.”​—Salmo 84:11.

Onnengneng ed Positibon Dapag na Bengabengatla

Tandaan met a walaray pihon bentaha diad pagmaliw a walad kasuloan. Nansulat si apostol Pablo: “Kanian say mamaasawa ed anak to’n marikit maong so gawaen to; tan say ag mamaasawa ed sikato, magmaong so gawaen to.”​—1 Corinto 7:38.

Akin et say walad kasuloan so “magmaong” nen say walad panamaley? Insalaysay nen Pablo: “Say ag angasawa panpagaan to so saray kien na Katawan, no panon kasi pamalike’to ed Katawan. Balet say angasawa panpagaan to so saray kayarian na mundo, no panon kasi pamalike’to ed asawa to. Tan wala met so pandumaan na bi-i ya akiasawa tan say marikit. Say ag ni akiasawa panpagaan to so saray kayarian na Katawan, ta pian nayarian to so onsanta ed laman tan espiritu met. Et say akiasawa panpagaan to so saray kayarian na mundo, no panon kasi pamalike’to ed asawa to.”​—1 Corinto 7:32-34.

Diad arum a salita, saray Kristianon walaay asawa so mapaga nipaakar ed saray pankaukolan, labay, tan aglabay na kaasawaan da. Balet saray walad kasuloan a Kristiano so mas makapangiyapasakey na imano ed panaglingkor ed si Jehova. No ipareng ed saray walad panamaley, saray walad kasuloan so walad mas maabig a kipapasen a magmaliw a “makapanlingkor ed Katawan ya anggapoy pakasbel.”​—1 Corinto 7:35, NW.

Aglabay ya ibaga nen Pablo ya anggaporay pakasbel ed Kristianon walad kasuloan. No sika so nabebelatan ed kabibilay, nayarin isipen mon dakel a bengatlan manigensigen ed sika ed ministeryom. Anggaman kuan, say kawayangan ed panlingkor ed Dios so gendagendat a babaleg parad toon anggapoy asawa nen say saramay walaay asawa.

Bangta irerekomenda so pagmaliw a walad kasuloan bilang magmaong a kurso, aglabay ya ibaga nen apostol Pablo a mauges so mangasawa. Insulat to: “Et angan mangasawa ka, ag ka makapankasalanan.” Ingen, impaimano to: “Saraya wala naani irap da ed laman.”​—1 Corinto 7:28.

Anto ta so labay ton ibaga? Say panangasawa so mangitatarok na pigaran kapagaan. Diad panaon na kairapay panagbilay, katekep na ontan a kairapan so panisip na ama nipaakar ed no panon ton legpeten so asawa tan ananak to. Say pansakit met so kaaruman ya problema ed pinansyal tan emosyonal iran mamebelat ed say pamilya.

Kanian legan a say kipapasen mo so nayarin agmo lablabayen, nayarin wala ka’d magmaong a kipapasen nen say walaan ka na asawa tan walaan na responsabilidad a manlegpet ed ananak. Saray kairapan a kidudungetan mo natan so temporaryo, saraya so naandi diad balon sistema na Dios​—tan anganko natan et naekal laray pigara.​—Ipareng so Salmo 145:16.

Kasin Napalaknab Moy Ministeryom?

Anggaman aliwan amin so makapanggawa ed saya, arum so makapanlilingkor ed sigpot-panaon anggaman walaray problema ed pinansyal. Si Chuks, ya asaglawi la, so mansasaliw tan manlalako na stationery pian nasuportaay pamilya to. Ngalngali kabansag met na saya so insaew to ed planon pangasawa, sikato so akaawat na sulat a mangiimbita ed sikaton mitulongan ed temporaryon panangipaalagey ed lokal a sangan opisina na Watch Tower Society. Lapud mapagay kuya to nipaakar ed kuarta, sikatoy dinismaya ed saya. Akikatunongan met si Chuks a si Jehova so tinmulong ed sikato ed pangiletneg na negosyo, kanian nepeg ton unaey intereses na Panarian tan manmatalek ed abilidad na Dios a mangitarok. (Mateo 6:25-34) Sakey ni, naisip to, saman so diad loob na taloran bulan labat.

Inawat nen Chuks so imbitasyon tan impasa so negosyo ed kuya to. Kayari na anemiran taon, si Chuks so walad sigpot-panaon a serbisyo ni, sakey a matatken ed Kristianon kongregasyon, tan walaan lay gastosen ed pangasawa. Kasin nagbabawian toray agawa ed bilay to? Kuan nen Chuks: “Siak so adismaya sanen agak akapangasawa, balet nagmaliw a mas marakep met so pinawayan to. Naeksperiensiak so dakel a gayaga tan saray pribilihyo ed panaglingkor a nayarin agko nanggayagaan no siak so angasawa ed saman tan nanpamilya.”

Kaligenan parad Arapen

Diad saray mairap a panaon, dakel so onnenengneng ed panangasawa bilang salimbeng ed kairapan ed arapen. Arum a bansa so inlereg na otang ya anggapoy tanton nitulong ed saray maedad la. Kanian saray ateng so mabetbet a maniilalo ed kapamilya ra, tan nagkalautla ed ananak da, pian manuporta ed sikara ed panaon na inkatatken. Diad kasumpalan, saray balolaki tan mamarikit so mabetbet a dedesdesen pian mangasawa tan manpamilya, anggan anggapoy pakaseguroan ed pinansyal a posisyon da.

Balet say panangasawa tan panpamilya so aliwan garantiya na kaligenan. Walaray minumundon ananak ya agda labay so mangasikaso ed maedad laran ateng da, say arum met so anggapoy nayarian, bangta say arum so makakauna nin ompatey nen saray ateng da. Aanapen na saray Kristiano so kaligenan ed arum a lapuan, a sinononot ed sipan na Dios: “Ag taka naani tainan, tan ag taka naani ikaindan.”​—Hebreos 13:5.

Saramay agni angasawa pian makapanlingkor ed si Jehova na sigpot-panaon so agnapaulyanan. Si Christiana so marikit tan 32 años. Sikato so manlilingkor bilang regular pioneer ed Nigeria ed apalabas lan siameran taon. Kuanto: “Siak so manmamatalek ed si Jehova, a mamapaseguro ed sikatayo ya agto itayon balot paulyanan ya ariripen to. Walay talek ko ed sipan to. Siak so tatalimaen nen Jehova ed espiritual tan materyal a paraan. Papaneknekan ton sikatoy sakey ya Aman mabunlok. Alimbawa, siak so inmalis pian manpayunir ed lugar a babaleg so pankaukolan ed Tastasi. Anggaman walaray pigaran probisyon parad pakainawaan, naaralan koy itatalona. Sanen siak so naospital lapud sakit a tipus, walaray agagin datin kakongregasyon kon binmisita tan angasikaso ed siak.

“Siak so apenek a tuloy ed sigpot-panaon a serbisyo. Parad say siak sakey iyan baleg a pribilihyo a mankimey a kaibay Manamalsa ed talba tan kaibay dakel ya agagi diad interon mundo. Nanenengneng ko a dakel a kalangweran so desperado tan andiay ilalo bilang resulta na bengabengatlan nagagawa ed kaliber-liber da. No nipaakar ed siak, say bilay ko so makabaliksan; onnenengneng ak ed arapen tekep na panagmatalek. Amtak a say pagmaliw ya asingger ed si Jehova so sankaabigan a solusyon ed saray probleman kidudungetan tayo natan.”

No pirawat mo so mangasawa balet ta agka makapangasawa lapud kairapay panagbilay, manpakpel! Agmo bokbokor. Dakel so manaanos na mipadpara iran subok tekep na tulong nen Jehova. Anamoten mo so pankanawnawam ed panggawa na maong a bengabengatla parad arum tan ed iyaaligwas na espiritualidad mo. Onasingger ka ed Dios; sika so tulongan to lapud talagan manatalima ed sika.​—1 Pedro 5:7.