Tinaon a Miting

OKTUBRE 7, 1995

SAY TINAON A MITING na saray membro na Watch Tower Bible and Tract Society of Pennsylvania so nagawa no Oktubre 7, 1995, diad Assembly Hall na Saray Tasi nen Jehova, 2932 Kennedy Boulevard, Jersey City, New Jersey. Sakey ya ununan miting na saray membro lambengat so onggapo ed oras na 9:30 n.k., a tumbokan na inheneral a tinaon a miting diad oras na 10:00 n.k.

Saray membro na Korporasyon so mangipaamta ed Opisina na Sekretaryo natan nipaakar ed antokaman a pansalat ed direksion na panangipawitay sulat legan na apalabas a taon ta pian saray regular a sulat na notisya tan manangilaman (proxies) so makasabin tampol ed sikara legan na Hulyo.

Saray proxy, ya impawit ed saray membro pati ed say notisya na tinaon a miting, so ipawil ta pian makasabi ed Opisina na Sekretaryo na Sosyedad ya ag-onlampas ed Agosto 1. Nepeg a kumpletoen tan ipawil a tampol na kada membro so proxy to, ya ibaga no sikatoy makaatendi a personal ed miting odino andi. Say impormasyon a niiter ed kada proxy so nepeg a seguroen ed sayan punto, ta satan so pangibasian ed pangamta no siopa so personal a makaatendi.

Iilaloan a say interon sesyon, pati say pormal a business meeting tan saray report, so nasumpal ya ag-onlampas ed ala–1:00 n.n. odino onlampas na daiset. Anggapo so sesyon ed ngarem. Lapud limitado so espasyo, saray walaay tiket lambengat so naawat. Anggaporay oksuyan a nagawa ed pangikonekta na tinaon a miting ed arum ya auditorium diad panamegley na linya na telepono.