Saray Tumang na Inkamapilit

SIKATOY Griegon biin manaayam ed Phoenicia diad taon 32 K.P. Mansasakit a maong so anak ton bii, tan desperadon patambal toy anak to. Diad impakadngel a walay ombisita’d lugar to​—sakey a sankailin kabkabat a walaay pakayarin manambal ed saray mansasakit—​sikatoy determinadon minengnengan ed sikato tan mikasin patulongan.

Diad impakaabet ed sikato, sikatoy tinmalimukor, a mikakasin: “Kasian mo ak komon, O Katawan, sika Anak nen David; say ana’ko a bii papairapen a toloy na sakey a demonio.” Diad ontan, say Griegon bii so akikasi ed si Jesus pian paabigey anak to.

Kasin naisip yo so pakpel tan inkamapaabeban kakaukolanen na satan ed biang to pian nagawaan iya? Si Jesus so sakey a walaay autoridad a pigura tekep na pigaran pakayari tan reputasyon, tan impaamta to ed asasakbay ya agto labay a nakabatan na arum no iner so kawalaan to. Intagar toray apostol to ed Phoenicia pian makapanpainawan maong, ya agmankimey ed limog na saray agmananisian Hentil. Niarum ni, si Jesus so sakey a Judio tan say bii et sakey a Hentil, tan agpanduaruwaan ya amta to so nipaakar ed agpanlabay na saray Judio a milimog ed babandayen a totooy nasyones. Anggaman kuan, sikato so mapekder ed desisyon ton napatambal so anak to.

Sinali nen Jesus tan saray apostol to a dismayaen so bii ed ikekerew toy tulong ed saman a bekta. Diad inmuna, ag-akitongtong si Jesus ed sikato. Insan, lapud paulit-ulit, mapilit iran ey-ey, diad syodot na apostoles, imbaga ra’d si Jesus: “Sikato komon so patainanen mo; ta manakis ya manomtombok ed sikatayo.”

Balet ta sikatoy mapekder tan dinmakmomo laingen ed salian nen Jesus, a kuanto: “Katawan, tulongan mo ak.”

Diad pangidadanet ed manunan responsabilidad to ed ananak na Israel tan panubok met ed pananisia tan determinasyon to ed parehon bekta, siaabagey ya insalaysay nen Jesus ed sikato: “Ag manepeg ya alaen so tinapay na saray ugugaw [na Israel] tan sikato so ibontok ed saray [ankelag ya] aso [Hentiles].”

Imbes a naopendi ed negatibon ipapasagilig nipaakar ed rasa to, sipapaabeban inpilit toy labay to diad impangebat: “On, Katawan; ta angan saray [ankelag ya] aso mangan ira’d saray mekmek ya napelag a manlapu’d pananganan na katawan da.”

Tinumangan nen Jesus so inkamapilit na Griegon bii diad impangomenda ed pananisia to tan kinmiwas a paborabli ed saray kerew to. Isipen pay gayaga to sanen diad insempet to et aromog toy anak ton sigpot lan inmabig!​—Mateo 15:21-28; Marcos 7:24-30.

Singa saman a bii ed inmunan siglo, nakaukolan tayoy magmaliw a mapilit ed saray sagpot tayon pamaliket ed si Jehova tan pangamor na pabor to. Singa ed kaso na Griegon bii, ipapaseguro na Biblia ed sikatayo a say inkamapilit tayo a “mangawa na maabig” so natumangan a maong.​—Galacia 6:9.

Anto so inkamapilit? Akin a nakakaukolan itan? Antoray nayarin pansengegan na pakabalang tayo ed sayan kualidad, pian ontunda odino onsuko? Antoray tumang a nailaloan tayon naawat no natan et aagamilen tayo lay inkamapilit ed panaglingkor ed Manamalsa tan Ama tayo, si Jehova?

Uukeran na sakey a diksyunaryo so verbon “pilit” a bilang “mapekder a pamenben tan pantultuloy ed pigaran gagala, kipapasen, odino gawa, anggaman ed saray babeng, pasakbay, odino insaew. . . . pian mantultuloy ed kiwawala; magnayon.”

Paulit-ulit a manisimbaway Biblia ed ariripen nen Jehova a mantultuloy ed panggaway linawa to. Alimbawa, nibaga ed sikatayo ya “anapen yo ni’n onona so panarian,” pian “mansiansia kayo ed maong,” pian “mansiansia a malet ed pikakasi,” tan ag ‘onkesaw’ ed panggaway maabig.​—Mateo 6:33; 1 Tesalonica 5:21; Roma 12:12; Galacia 6:9.

Diad inagew-agew a kabibilay, say inkamapilit so sakey a kualidad a nepeg a niwalad amin tan nabayuboan ta pian makapantultuloy. No anggapo itan et agtayo nadampot so antokaman a peteg, magnayon ed kablian. Konsideraey alimbawa na sakey ya ugaw a sasalien toy onalagey tan ununan mantogingging iran kundang. Imposibli pakaaral na kapangiyanak a makaalagey tan makaakar ed loob lambengat na sakey ya agew. Bilang ugugaw, anganko et amin tayo so anali tan sinmaew ya aminpiga-piga sakbay ya adampot tayo so sukat na itatalona’d pakaakar. Anto so agawa komon no diad impakatumba tayo ed inmuna et deniside tayo lay ontunda la’d panasali? Seguro et mankukurongkurong tayo ni diad panamegley na saray lima tan pueg tayo! Say inkamapilit so makana ed pakasabi ed makana iran kalat tan pakagamor na misimbangan ya idaraak ed abilidad tan dilin-respeto. Unong a singa kuan na bantog a diparan, “Saray mananalo so agbalot ontunda, tan saray tinmunda so agbalot manalo.”

Momoriaen na saray abayag lan pioneer a say itatalona et aggagarantiyaan na espisyal iran abilidad odino dunong. Kakaukolanen to so inkakpel, determinasyon ed sigpot a panggawa’d linawa nen Jehova, tan pakpel diad arap na temporaryo iran insaew, anggan say depresyon ni ingen. Say kalat a pinabang ed maando iran bendisyon na Dios so nepeg a pansiansiaen a malinew ed kanonotan tayo.

On, amin tayo a manaanap na pakagamor ed pabor nen Jehova tan manaanap na itatalona ed babatiken parad bilay so mankaukolay inkamapilit, pantultuloy, tan sungdo. No anggapo irayan kualidad, posibli pakabalang tayoy pabor nen Jehova tan say tumang a peteg a bilay.​—Salmo 18:20; Mateo 24:13; 1 Timoteo 6:18, 19.

Lalon mabetbet a mairap parad sakey a Kristiano so pagmaliw a mapilit diad espiritual ya aktibidades nen say diad arum niran obligasyon to. Say sakey a laki so nayarin mankimey ya impasya ed sekular a trabaho to pian naasikasoy pisikal iran pankaukolay pamilya to, balet sikatoy ‘naksawan a tuloy’ a mangikondukta na regular a panagaral na Biblia ed asawa tan ilalak to. Antoray sengegan a manggawa’d inkamapilit diad Kristianon kimkimey ya ontanlan mairap parad dakel?

Sakey a sengegan et say inkadismaya, a manlalapud dilin indibidual iran kaleteyan tan kakapuyan tayo. No lawas nonoten iray impakalukso tayo, nayarin sikatayoy nagonigon tan ontunda, a liknaen ya agtayon balot naperdona nen Jehova ed amin a kasalanan tayo.

Sananey nin sengegan et say minumundon atmospera na imoralidad, inkabulok, tan busol. (1 Juan 2:15, 16) Sakey ed “saray maong ya ugugali” a nayarin deralen na minumundon impluensya, et say Kristianon inkamapilit.​—1 Corinto 15:33.

Say inkamapilit tayo diad panagpulong so napakapuy na isusumpa tan agpananginunang na publiko ed sagradon serbisyo tayo. Lapud inkasaew, nayarin ikuan tayon saray totoo ed teritorya tayo et agdan talaga labay so katuaan. Saya so pansengegan na pangitepet, ‘Antoy kana to?’ tan pian itunda so espisyal a pribilihyo tayo ed ministeryal a serbisyo.

Nayarin naimpluensyaan tayo met ed espirituy pilpilalek na mundo. Akin a kaukolan tayoy mipuligesgesan tan mansakripisyon maong bangta say arum so ompatnag a manliliket odino agda panggugunaetan itan?​—Ipareng so Mateo 16:23, 24.

Pian makapantultuloy ed panggaway linawa nen Jehova, nakaukolan tayon isulong so Kristianon personalidad tan manbilay unong ed espiritu, aliwan diad laman. (Roma 8:4-8; Colosas 3:10, 12, 14) Say pakawalaay panmoria nen Jehova ed satan a pamaakaran so mamakayari ed sikatayon manumpal ed makana iran espiritual ya aktibidad tayo.​—1 Corinto 16:13.

Saray Alimbawa na Inkamapilit

Nitatarok la nen Jehova ed sikatayo so dakel a makapasagyat ya ehemploy ariripen a nansiansian matoor ed sikato diad panamegley na dakel a mairap a subok. Diad pangonsidera ed saratan, nanengneng tayo no panon a nabayuboan tan naagamil tayo so Kristianon inkamapilit tan akin ya ontanlan makana itan.

Say sankabalgan ya ehemplo et si Jesus, ya ontanlan nanirap parad kigloriaan na ngaran nen Jehova. Ipapaseseg na Biblia ed sikatayo ya atentibon aralen iray gawa ton mantultuloy a debosyon: “Kanian sikatayo met, bangta wala ed liberliber tayo so sakey a sankabalgan a lurem na saray tasi, ikaindan tayo so amin a pakabelatan, tan say kasalanan ya akaliktob a sankainomayan ed sikatayo, tan batiken tayo a siaanos komon so babatiken a niyan ed arap tayo, a nengnengnengen tayo si Jesus a nangawa tan manamayadyari na pananisia tayo. A sikato lapud gayaga a niyan ed arap to sinongdoan to so [panamairapan a palitek, NW], ya inbantak to so baing, et imyorong ed kawanan na trono na Dios. Motektek yo sirin so nansongdo ed ontan la ya insumlang na saray managkasalanan ed sikaton dili, pian ag kayo komon nakesawan, ya onkapuy kayo ed saray kamarerwa yo.”​—Hebreos 12:1-3.

Say babatiken parad bilay so sakey ya andukey a babatiken, aliwan antikey a batik. Satan so rason no akin a nakaukolan tayo so singa-Kriston inkamapilit. Say kalat, say sampot, so nayarin agnanengneng ed babaleg a kabiangay babatiken. Say kalat so nepeg a magmaliw a malinew ed mata na sakey ta pian sinononot tayon nadampot itan ed intero, mankakaukolan a kurang. Awalaan na ontan a mental a litrato si Jesus, salanti, “lapud gayaga a niyan ed arap to.”

Anto so lalaktipen na sayan gayaga parad Kristianos natan? Parad sakey a bengatla, tumang itan ya imortal a bilay diad tawen parad daiset, tan andi-anggaan a bilay ed dalin parad dakel. Ontan met, satan so liknaay inkapnek a manlalapud pakaamta a say sakey et mangitatarok na gayaga’d puso nen Jehova tan walaay betang ed panamasantos na ngaray Dios.​—Uliran 27:11; Juan 17:4.

Nilaktip ed sayan gayaga et sakey a maapit, makapalikliket a siglaotan ed si Jehova. (Salmo 40:8; Juan 4:34) Say ontan a siglaotan so makapabiskeg tan makapadukey na bilay, a mamapabiskeg ed sakey ya ombatik ed babatiken tekep na sungdo tan ag-ontunda. Niarum ni, bebendisyonan nen Jehova itan a siglaotan diad pangikakalbo na masanton espiritu to ed ariripen to, a mansusumpal ed sakey ya apadaak a gayaga tan magayagan kimey.​—Roma 12:11; Galacia 5:22.

Say pangonsidera’d alimbawa nen Job ya inkamapilit ed pananisia so makagungguna. Sikato so ag-ayadyari tan awalaay limitadon pikakabat ed situasyon to. Kanian no maminsan, sikato so temporaryon manisip ed dilin-panangikatunongan tan inkagonigon. Anggaman ontan, lawas ton impanengneng so mapekder a determinasyon a pansiansiaey integridad to ed si Jehova tan Sikatoy agbalot ikaindan. (Job 1:20-22; 2:9, 10; 27:2-6) Tinumangan nen Jehova si Job lapud mantultuloy a debosyon to, a sikatoy inikdan na saray espiritual tan materyal a bendisyon tan say ilalon andi-anggaan a bilay. (Job 42:10-17; Santiago 5:10, 11) Singa si Job, nayarin naeksperiensia tayo so agaylan kairapan tan impakaandi legay panbibilay tayo natan, balet ta napapaseguroan tayo met ed bendisyon nen Jehova ed matoor a panagsungdo tayo.​—Hebreos 6:10-12.

Diad modernon panaon, Saray Tasi nen Jehova bilang interamenti so mangipapanengneng na Kristianon inkamapilit diad panggaway linawa nen Jehova. Alimbawa, say pantultuloy da ed panagkabkaabungan tan arum niran mapublikon panagpulong so mangipapaimano ed sikara tan ed mensahe ra ed sankamundoan a panangimano. Say media so akapanggawa na dakel ya impanukoy ed seseg tan determinasyon da a mangipulong ed maong a balita anggaman ed isusumpa tan subsubok. Sakey ed saray karton so angiparungtal ni ingen ed punch line ya “Anggapoy makatakas ed Tastasi nen Jehova!”​—Mateo 5:16.

Bebendisyonan nen Jehova so mantultuloy iran sagpot na Tastasi to tekep na apadaak a bunga ed ministeryo. Imanoey eksperiensia na pigaran magunaet a Tastasi diad Italya ed apalabas iran taon na 1960 sanen ngalngali 10,000 so Tastasin manpupulong ed nasyon a walaay 53,000,000 a totoo. Diad sakey a baley a 6,000 so manaayam et anggapoy Tastasi. Saray ombibisitan agagi so akaawat na maruksan reaksion ed ministeryo ra.

Bektaman a manpulong diman so agagi, dakel a bibii, tan anggan lalaki ni ingen ed saman a lugar so mandagup ed ugugaw a lalaki, a pasesegen iran ontumbo-tumbok ed Tastasi tan mansumpit ed sikara tan maningal. Kayari pigaran minuto na sayan kondukta, napilitan iray agagin ontaynan tan onla’d sananey a baley. Diad gunaet a salien ya anggan panon et naikdan na kumpleton panagtasi so amin a manaayam ed sayan baley, deniside na agagin pulongan itan lambengat ed panaoy mamauran, diad ilalon ag-ira isturboen na ugugaw. Naimano ran saray totoo ed satan a baley so agmabulos a manpabasa pian isturboen lambengat iray manangipalapag. Diad onian dalan et niiter so maabig a pantasi. Aromog iray interesado. Bilang resulta, aglambengat niletneg so mabulaslas a kongregasyon ed melag a baley noagta nigapo so panagpulong anggan diad panaoy tiagew. Nantultuloy a bebendisyonan nen Jehova so inkamapilit na Tastasi ed satan a lugar tan ed interon Italya. Wala natan so masulok a 200,000 a Tastasi ed satan a bansa.

Saray tumang na inkamapilit ed panggawa no antoy maptek so baleg. Diad pakayari na espirituy Dios, nayayarian na Tastasi nen Jehova a sumpaley agnaparaan ya agawaan ed awaray too, say panangipulong ed maong a balitay Panarian, diad saray puerta tan, ed minilyon a totoo. (Zacarias 4:6) Sigagayaga ran nanenengneng so kasumpalay propesiya diad makapakelaw ya ibubulaslas tan ligsa na mangaraldalin ya organisasyon nen Jehova. (Isaias 54:2; 60:22) Walaan ira na malinis a konsiensia ed Dios, tan panliliketan day ilalon andi-anggaan a bilay. Manuna ed amin, panggagayagaan day maapit a siglaotan ed Manamalsa, si Jehova a Dios.​—Salmo 11:7.

[Saray litrato ed pahina 20]

Tinumangan nen Jesus so mapaabeban inkamapilit na sayan Griegon bii

[Litrato ed pahina 21]

Say bilay diad Paraiso et lalaktipen toy gayagan niiyan ed arap na Kristianos natan