Report na Saray Manangiyabawag na Panarian
Makapaliket Iran Resulta na Inkaanos tan Inkaseet
IMPASAKBAY nen Jesu-Kristo a diad kaunoran iran agew ‘say aro na amayamay [et] ombetel.’ Bilang resulta, kaslakan ed saray totoo natan diad dakel iran pasen na mundo so andiay interes ed maong a balita na Panarian. Mumudmoraen ni ingen na arum so relihyon.—Mateo 24:12, 14.
Anggaman ontan, lapud pananisia tan anos et natatalonaan na saray manangipalapag na Panarian iyan angat, a singa ipanengneng na onggendan ya eksperiensya ed Czech Republic.
Akitongtongan na duaran tasi so sakey a bii a walad benegay akakapot a puerta. Agnambayag, nilukasay daiset na bii so puerta, insan inderew toy lima to pian alaen so magasin a Watchtower tan Awake! ya inyopresi na saray Tasi. Nadngel da so boses na bii ya angibaga na “salamat,” insan to la inkapot so puerta. “Pawilen ta ni kasi?” so nanumamengan na saray Tasi. Nandesidi ya ompawil so sakey ed sikara, samay payunir, odino sigpot panaon a ministro, balet onman lamet so agawa, tan nantultuloy itan diad loob na sakey taon.
Sanen denesidi na payunir a kaukolan ton salatan so paraan na ipawil to, sikato so nampikasi’d si Jehova parad tulong. Nen ontumbok a sikatoy angiyopresi na saray magasin, oniay makaaron intepet to ed samay bii: “Komusta ka la? Komustay impamasam ed saramay magasin?” Diad gapo et anggapo so reaksion na samay bii, balet sikatoy nagmaliw a makaaro kayari na aminpiga nin impamawil ed sikato. Aminsan et nilukasan to la so puerta, balet antikey labat so impitongtong to.
Lapud masuyat a mitongtong imay bii dia ed puerta, nandesidi so payunir a sikatoy sulatan to la pian ipaliwawa so gagala na ipapawil to, tan pian iyopresi so panagaral na Biblia. Diad saginonor, kayari na sakey tan kapalduan taon na maanos ya impansagpot, say payunir so matalonan akapangigapo na panagaral na Biblia ed samay onabung. Sikato so asurprisa balet apabiskeg sanen imbaga’d sikato na bii diad saginonor: “Anisia ak ed Dios manlapu la’d inyawitan yo ak na saramay magasin.”
On, say inkaanos tan inkaseet so mamawalay makapaliket iran resulta dia ed panangipulong ed Panarian tan panaggaway-babangatan a kimey.—Mateo 28:19, 20.