Say Mainget a Dalan ya Ompugta’d Kawayangan

DAISET ya intelihentin totoo so manuppiat a say talba so uuleyan na natural iran ganggan. Sarayan ganggan so mangukontrol ed amin a bengatlan manlapud melanting iran atomo ya anggad abalbaleg iran galaksi a walaan na binilyon a bibitewen. No anggapo iratan, agniwala so panagplano tan anggapo so pakatalos; say bilay a mismo so agniwala. Diad pantalos ed natural iran ganggan tan pikoopera ed saratan, agawaan na too so makapakelaw iran gawa, a singa say panakar ed bulan tan pangipanengneng na makolor iran litrato manlapud inerman a pasen ed dalin odino manlapu ni ingen ed labas na atmospera na dalin a mamaarap ed saray iskrin na telebisyon diad saray ayaman tayo.

Komusta so nipaakar ed moral iran ganggan? Kasin say pansiansia’d saratan so ontanlan makagungguna tan makatumang? Liknaen na dakel ya anggapo so moral iran ganggan tan pilien day maabuloy a pilosopiya odino relihyon ya ontukoy ed saray pilalek da.

Anggaman ontan, walaray pigaran mamili ed sananey a dalan, say ‘makisir a dalan a mamaarap ed bilay’ unong a nidatak ed Biblia. Agtayo nepeg a nasurpresa a saya so pipilien na daiset lambengat a totoo, ta inkuan nen Jesus nipaakar ed mainget a dalan: “Daiset so saray makaromog ed sikato.” (Mateo 7:14) Akin a daiset lambengat?

Lapud say mainget a basbas so pepegetan na saray ganggan tan prinsipyos na Dios. Makapaayat lambengat itan ed masimoon a manpipilalek a mangitukoy na kabibilay to ed saray estandarte na Dios. Midumaan a tuloy ed malapar a dalan, a mangiiter na ilusyon na kawayangan balet ta diad kapetegan et mangaaripen, say mainget a dalan, ya ompapatnag a mapeget, so mangibubulos ed sakey ed kada importantin pamaakaran. Saray ketegan to so gegetaran na “say ayadyarin ganggan a kien na kawayangan.”​—Santiago 1:25, NW.

No Panon a Mangibubulos so Mainget a Dalan

Tua, aliwan naynay a mainomay so pansiansia ed mainget a dalan. Amin a mabilay a too so ag-ayadyari tan walaan na atawir a tendensya ed gawan-mauges. Kanian nayarin onkiling so sakey ya onsuawi na daiset. Anggaman kuan, saray gungguna na pansiansia ed ‘makisir a dalan’ so makagungguna ed antokaman a nakakaukolan a dilin-disiplina odino saray pananguman, ta ‘ibabangat itayo [na Dios] nipaakar ed nabang tayo.’​—Isaias 48:17; Roma 3:23.

Diad pangiyilustra: Iplaplano na makabat ya atateng so ‘walaay panameget a panagdieta’ parad ananak da. Saya so no maminsan et mankabaliksan na pagmaliw a mapeget diad panangan. Balet sano ontatken iray anak, apresyaen da so maaron panagdisiplina na atateng da. Bilang susto-la’d-edad, nawalaan laray panggusto parad makapabunigas a tagano. Tan lapud walan malaknab a pandurumaay masustansyan tagano, agda liknaen a sikaray napepegetan.

Diad espiritual a paraan, pareho so gagawaen na Dios ed saramay walad mainget a dalan ya ompugta’d bilay. Sikatoy mamabayubo ed saray mauyamon sinansakey na mabunigas iran pilalek a mangitonton ed liket tan tuan kawayangan. Saya so gagawaen to diad pangitatarok na Salita to, say Biblia. Niarum ni, iimbitaan to itayo a manpikasi parad espiritu ton ontulong ed sikatayo, tan igaganggan to itayon milimog ed saray kaparan Kristiano, a makapanpaseseg ed sikatayo a mansiansia ed mainget a basbas. (Hebreos 10:24, 25) On, say Dios so aro, tan sayan supremon kualidad so pinagkabasiyan na saray gagala tan amin iran metodo to.​—1 Juan 4:8.

Sano ontalona so aro, kareenan, kaabigan, dangka, tan arum niran bunga na espiritu na Dios, say mainget a dalan so ag-ompatnag a mapeget. A singa ibabaga na kasulatan, “angapo so gangan ya onsumpa ed sarayan nengneng.” (Galacia 5:22, 23) “No iner so kawalaan na [espiritu nen Jehovah, NW], diman so kawalaan na kawayangan.” (2 Corinto 3:17) Anggan natan la, naeeksperiensia na saray tuan Kristiano iyan kawayangan. Bulos ira manlapud dakel a katatakotan a mamapairap ed totoo natan, a singa say takot ed arapen tan maaniton takot ed ipapatey. Agaylan makapaligsa so panumameng ed arapen sano “say dalin napano naani ed pikakabat ed Jehova, singa saray danum sakbongan da so dayat”! (Isaias 11:9) Insan, anggan say takot ed krimen so naandi la. Saray kandado tan barandilyas so naandi la ed ando lan ando. Nalikna na amin a sikaray bulos tan maligen​—agew tan labi, diad loob na ayaman tan diad paway. Satan so peteg a kawayangan!

Nipapaseguro ed Sikatayo so Tulong na Dios

Tua, say panbilay unong ed saray estandarte na Dios so mankakaukolan na sagpot, ingen “saray gangan to aliwa ran ambelat,” anggan parad ag-ayadyarin totoo. (1 Juan 5:3) Legan ya iyaadapta tayoy inkasikatayo ed mainget a dalan tan makakalikna’d saray gungguna na pankurang ditan, nababayuboan tayoy ombubulaslas ya agpanlabay ed dala-dalan tan panag-isip ya ipapatnag na saramay walad maawang a dalan. (Salmo 97:10) Say katutulok ed ganggan na Dios so makapasagyat ed inter-Dios a konsiensia tayo. Imbes ed “ermen na puso” tan “irap na espiritu” a walna na karaklan, isisipan na Dios: “Nia, saray aripen ko mankanta ra naani a nisengeg ed liket na puso.” On, say sakey a puson sinanay nen Jehova so magayaga tan bulos.​—Isaias 65:14.

Si Jesus so inatey pian manggawa’d peteg a kawayangan a posibli parad sikatayo. Ibabaga na Biblia: “Ontan la’y inpangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, no ag ingen wala so bilay to’n andi angaan.” (Juan 3:16) Natan, bilang Ari ed mangatatawen a Panariay Dios, ipapakurang nen Jesus iray gungguna na satan a bagat. Agmanbayag, kayari na “baleg ya irap,” sano say maawang a dalan tan saramay walad satan so onsabi’d kasampotan da, siaanos ton gapoan ya iwanwan so matulok a katooan ed nakekeraan ed mainget a dalan anggad sampot to, say atooan ya inkayadyari. (Apocalipsis 7:14-17; Mateo 24:21, 29-31) Naeksperiensia tayon siansia so kasumpalan na engranden sipan: “Say pinalsa a dili niliktar ed inkaaripen na kabolokan ya onloob ed kawayangan na gloria na saray anak na Dios.” Sayan inter-Dios a kawayangan so agnapalampasan. Anggan say ipapatey so naandi la.​—Roma 8:21; Apocalipsis 21:3, 4.

Diad malinew ya inengneng tan pantalos ed no iner so pugtaan na mainget a dalan, say sakey so magmaong a makapanpili ed sayan basbas tan mantultuloy a mankurang ed satan. Nagkalautlan natutulongan iray kalangweran ya agmagmaliw a burarog ed pakanengneng tan agnaingongotan ed ipapasen dan pananebel ya ipapakseb na saray estandarte na Dios. Naaralan dan nengnengen iraya bilang prueba na aroy Dios tan bilang salimbeng sumpad saray kaugsan ed maawang a dalan. (Hebreos 12:5, 6) Siempre, kaukolan na sakey a mananos, a nononoten a mankaukolan na panaon so pamayubo ed maridios iran kualidad tan pilpilalek, no panon a say sakey a kiew et mankaukolan na panaon pian makapawalay maabig a bunga. Balet makapanbunga so kiew no satan so nababayuboan tan nasasalog.

Kanian aralen so Salitay Dios, milimog a kaibay arum a Kristianos, tan ‘manpikasi ya andi tunda’ parad masanton espiritu. (1 Tesalonica 5:17) Manmatalek ed Dios ya ontulong ed sika a ‘mangitonton ed saray basbas mo.’ (Uliran 3:5, 6) Balet kasin amin na saya so praktikal? Kasin peteg ya epektibo itan? On, epektibo itan parad si Tom ontan met ed si Mary, ya asalambit ed akaunan artikulo.

Sikaray Tinmundan Mankurang ed Maawang a Dalan

Insulat nen Tom: “Diad kapegleyan na saray 1970, sikami so akapiabet ed Tastasi nen Jehova sanen sakey ed sikara so dinmalaw ed ayaman mi. Say tongtongan so nansumpal ed panagaral na Biblia. Kalkalnan pinasimbalok so bilay ko. Siak so abautismoan nen 1982 tan siak natan so manlilingkor ed lokal a kongregasyon. Say anak min laki met so bautismado la natan. Pisalamatan ko so asawak ed impananos to’d siak ed amin iraman a taon sakbay a naaralan ko so katuaan. Tan manuna’d amin a pisalamatan ko si Jehova tan say Anak to, si Kristo Jesus, parad amin ya inter da ed sikami tan say walan ilalo mi natan parad arapen.”

Tan komusta si Mary? Bueno, alikna to a sikatoy agbalot perdonaen na Dios, balet kinaliktan ton makaaral nipaakar ed Dios nisesengeg ed ananak to. Sanen nadngelan ton ibabangat na Tastasi nen Jehova so kaabay to na Biblia, sikato met so kinmerew na tulong. Anggaman ontan, saray nigalet a mauges a bisyo to so amairap ed iyaaligwas to. Say panagaral so dinmalan ed iyaabante tan ikakapoy. Anggaman ontan, say melag a pitoy taon ya anak ton bii so nantultuloy ya amaseseg ed sikato. “Itultuloy yo, Mommy. Sarag yo ’tan!” ikuanto. Diad ontan et lalon manggunaet si Mary.

Sanen say lakin kaamong to lan abayag, a sakey met a manangabuso na druga, so sinmempet, sikato met so akibiang ed panagaral. Diad kaunoran et atalonaan dan dua so mauges iran bisyo ra. Insan, kayari impangi-legal day panamaley da tan impanpasakup ed bautismo, naeksperiensia ra so baleg a liket tan akaliknan singa sakey a peteg a pamilya ed ununan pankanawnawa. Makapaermen, kaunoran et say AIDS so angetel ed bilay nen Mary, balet sikatoy inatey a say puso to so akaapasakey ed sipan na Biblia a kioli tan bilay ed paraison dalin, ya alinisan ed amin a pakasuysoyan na makapatey a maawang a dalan.

On, posibli so iyekal ed maawang tan malapar a dalan a mamaarap ed kadederal. Inkuan nen Kristo Jesus: “Saya sikato so andiangaan a bilay, ya naantaan da ka a saksakey a tua’n Dios, tan saman so inbakim, salanti Jesu-Cristo.” (Juan 17:3) Akin, sirin, ya agdeterminadon ipasen iray salim ed mainget a basbas a mamaarap ed bilay? Diad pangipapuso tan pangiyaplika ed nanaaralan mo manlapud Salitay Dios, personal mon naeksperiensia so makapaligsan sipan na Biblia: “Nakabatan yo so katuaan, et say katuaan sikayo so gawaen to a bolos.”​—Juan 8:32.