Sakey a Mundon Andiay Bakal​—Kapigan?

SAY Konstitusyon na Nasyones Unidas so inmepekto nen Oktubre 24, 1945. Satan so sankakompletoan ya estratihiya parad sankamundoan a kareenan ya adesinyo ed kapiganman na totoo. Tekep na orihinal a 51 membron Estados to, say Nasyones Unidas so nagmaliw a sankabalgan ya internasyonal ya organisasyon ed awaran na mundo. Ontan met, diad sankaunaan a pankanawnawa, sakey ya internasyonal ya organisasyon so walaan na kontrol ed sakey ya armada pian iyimpuersa so kareenan tan kaligenan tan mangipawala na sakey a mundon andiay bakal.

Natan, lapud walaan na 185 a membron Estados, say Nasyones Unidas so mas mabiskeg nen say kapiganman. No ontan, akin a say makapanyarin tuloy ya internasyonal ya organisasyon ed awaran so agsigpot ya akasumpal ed mapagalang iran gagala to?

Relihyon​—Sakey a Baleg a Makasbel

Sakey a baleg a problema et say betang a kakanaan na relihyon ed saray kurang na mundo. Tua, nanlapulad inggapo na Nasyones Unidas, saray manunan relihyon na mundo so angisipan ed suporta ra ed satan ya organisasyon. Diad panutukoy ed koma-50 anibersaryo to, sinaglawi nen Pope John Paul II so Nasyones Unidas bilang “say sankaabigan ya instrumento parad panangiyalibansa tan panalimbeng ed kareenan.” Mipara met so liknaan na sankagloboan a komunidad na relihyoso iran lider ed say sikato. Balet sayan mataktikan siglaotan ed baetan na relihyon tan gobierno so agmakapangiyamot ed katuaan a say relihyon so nagmaliw a makasbel tan sakey a problema ed Nasyones Unidas.

Diad loob na saray siglo et walaan na manunan betang so relihyon ed panangiyalibansa odino pananuporta ed saray nasyonalistikon gulaan, bakabakal, tan palaspas a panagpatey. Diad agano niran taon, diad silong na pankuankuanan na relihyoson inkasimoon, pinatey na totoo so kapara ran too. Say terminon “panamagit na poli” so malaknab ya inusar nipaakar ed bakal ed Balkan. Anggaman ontan, say marawal a gulaan a walad dakel diman parad sakey tan sakey so base ed relihyoson pisisiglaot imbes a diad rasa, lapud maslak ed sikara so walaan na parehon etnikon lapuan. On, nepeg ya aksobien na relihyon so baleg a responsabilidad parad panag-ames na dala ed datin Yugoslavia, tan ag-ayarian a patundaen itan na Nasyones Unidas.

Matukotukoy, agano nin inkuan na sakey a propesor na relihyon ed kolehyo a “diad sakey a mundo kayari cold-war a walay ompapalalon relihyoson inkaagresibo, say panangusisa ed relihyon tan palaspas a panagpatey so nayarin sakey ed saray kaukolan ya usisaen tayo, anggaman walay irap-irap na satan.” Sakey a balon inkaliing ed no panon a sesebelan na relihyon iray sagpot parad sankamundoan a kareenan so mapatnag natan.

Sakey a resolusyon na NU ed 1981 so angikuan: “Mapaga ed saray panangipatnag na agpanangiyabuloy tan ed say kiwawala na panangidumaduma diad pamaakaran na relihyon odino sisiaen a siansia nin mapatnag ed pigaran paspasen na mundo, Determinadon mangiyadapta ed amin a nakakaukolan a kundang parad maples a panangekal na ontan ya agpanangiyabuloy ed amin a porma tan panangipatnag to tan pian amperen tan labanay panangidumaduma diad basiyan na relihyon odino sisiaen.”

Mitunosan ed resolusyon da, indeklara na Nasyones Unidas so 1995 bilang Taon Parad Panangiyabuloy. Balet, no magmaliw itayon matua, kasin posibli ni pakagamor na kareenan tan kaligenan ed sakey a mundon naapag lapud relihyon?

Say Arapen na Relihyon

Sakey a propesiya ed libroy Biblia ya Apocalipsis so mangitatarok na ebat. Sasaglawien to so sakey a simbolikon “baleg a balangkantis” a manyudyurong bilang “sakey a reyna” tan walaan na “sakey a panarian ed arari na dalin.” Sayan balangkantis so manbibilay “ed andiay baing a likeliket” tan walaan na pirerelasyonan ed saray gobiernoy mundo. Sarayan gobierno so ililitrato bilang “sakey ya iskarlatan-kolor ya atap ya ayep,” a luluganan na say balangkantis a main-inawa. (Apocalipsis 17:1-5, 18; 18:7) Kabkabat bilang “Babilonia a Baleg,” sayan makapanyari tan imoral a bii so ningaran ed kadaanan a Babilonia, say lapuan na managtalintaon relihyon. Matukotukoy, ta say balangkantis so mangirerepresenta natan ed amin a relihyon na mundo, ya akibabali ed saray kurang na saray gobierno.

Itutuloy ya ibabaga na salaysay a, diad kaunoran, ipasen na Dios ed kapusoan na saray militaristikon kabiangan na atap ya ayep a nepeg lan onkiwas. Saraya “so mamusol ed balangkantis tan gawaen dan deral tan labos, tan upoten so malaman iran kabiangan to tan sigpot a poolen ed apuy.” (Apocalipsis 17:16)a Diad ontan et si Jehova a Dios mismo so onkiwas diad pangimaneobra ed makapanyari iran nasyon ed kampanyan panangekal ed palson relihyon. Say sankamundoan a relihyoson sistema, pati saray magastos a templo tan altar to, so sigpot a deralen. Diad ontan et naandi la ed dala da so relihyoson pakasbelan ed panangiletneg na kareenan tan kaligenan. Balet anggaman ed satan, kasin niwalay peteg a kareenan tan kaligenan ed dalin?

Ag-ayadyarin Inkasipor na Too

Kasin wala so antokaman a garantiya a say pamagit ed relihyon so peteg a mangitonton ed sakey a mundon andiay bakal? Andi. Say Nasyones Unidas so mantultuloy ya onarap ed sakey a mabanbanday a situasyon. Diad biek a dapag, kaliktan na totoo so kareenan tan kaligenan. Ingen, diad biek a dapag et say totoo so mangipaparap na sankabalgan a panameligro ed kareenan tan kaligenan. Say gulaan, kinon, egotismo, inkasiblet, tan inka-ignorante so walna na too a pansesengegan na amin a panlalaban tan bakal.​—Santiago 4:1-4.

Impasakbay na Biblia a diad agew tayo et saray totoo so magmaliw “iran maaro ed inkasikaran dili, maaro ra na kuarta, mapasirayew ed inkasikara, atagey a linawa, maayew, matunganga ed kaatengan, anggapoy otang a linawa, agmatoor, anggapoy nisipor ya aro, aglukas ed antokaman a panpapakna, managpauges, andian na dilin-dangka, maruksa, andiay panangaro ed kamaongan, managliput, anawet-ulo, mapaatagey ed pandinayew.”​—2 Timoteo 3:1-4.

Binidbir nen Sekretaryo-Heneral Boutros Boutros-Ghali a “say mundo so maniirap lapud sosyal tan moral a krisis a, diad dakel a sosyedad et walad mapalalon sukat.” Agnayarian na antokaman a diplomatikon panangimaneobra ya amperen so makapasakit iran walna na ag-ayadyarin inkasipor na too.​—Ipareng so Genesis 8:21; Jeremias 17:9.

Si Jesu-Kristo​—Say Prinsipe na Kareenan

Malinlinew, say Nasyones Unidas so andian na abilidad a mangitarok na sankamundoan a kareenan. Anggaman ed atagey iran kalat da, amin a membro tan sumusuporta to so ag-ayadyarin totoo. Ibabaga na Biblia ya “agnipasen ed mangaraldalin a too so basbas to. Agkien na toon manaakar so anggan say pangiwanwan ed kundang to.” (Jeremias 10:23) Niarum ni, ipapasakbay na Dios: “Agmo ipasen so talek mo ed saray dederlengen, nisay ed anak na mangaraldalin a too, a diad sikato et anggapoy kilalaban.”​—Salmo 146:3.

Ipapasakbay na Biblia no anto so sumpalen nen Jehova diad panamegley na Anak to, say “Prinsipe na Kareenan.” Ibabaga na Isaias 9:6, 7: “Wala so sakey ya ugaw ya inyanak ed sikatayo, wala so sakey ya anak ya initer ed sikatayo; tan say uley to bilang prinsipe so nipasen ed takeb to. Tan say ngaran to so tawagen a Makapakelkelaw a Managkonseho, Makapanyarin Dios, Maandon Ama, Prinsipe na Kareenan. Diad inkadaakan na pananguley to bilang prinsipe tan diad kareenan et anggapoy anggaan.”

Saray nasyon na mundo so nakekesawan la ed 50 taon na sinmaew iran sagpot. Maganggano ra lan deralen so singa balangkantis a relihyoso iran organisasyon. Insan si Jesu-Kristo, say “Ari na arari tan Katawan na kakatawan,” tan say armada na mangatatawen iran mibabakal to so maneral ed amin a gobiernoy too tan mamatey ed amin a mangipupulisay ed inkasoberano na Dios. (Apocalipsis 19:11-21; ipareng so Daniel 2:44.) Diad panamegley na saya et itarok nen Jehova a Dios so sakey a mundon andiay bakal.

[Paimano ed leksab]

[Kahon ed pahina 7]

SAY KRISTIANON PANMORIA ED NASYONES UNIDAS

Diad propesiya na Biblia, saray gobiernoy too so mabetbet ya isisimbolo na atap ya ayayep. (Daniel 7:6, 12, 23; 8:20-22) Kanian, diad loob na dakel a dekada et say magasin a Panag-Bantayan so angipabidbir ed atap ya ayayep na Apocalipsis kapitulo 13 tan 17 bilang minumundo iran gobierno natan. Ilalaktip na saya so Nasyones Unidas, ya ililitrato diad Apocalipsis kapitulo 17 bilang sakey ya iskarlatan-kolor ya ayep a walaan na pitoran ulo tan samploran saklor.

Anggaman ontan, sayan Makasulatan a talindeg so agmangiyabuloy na antokaman a porma na agpanagrespeto ed saray gobierno odino ed opisyales da. Malinlinew ya ibabaga na Biblia: “Manpasakop so balang kamarerwa ed atagtagey iran autoridad, ta anggapoy autoridad nilikud ed panamegley na Dios; say walaran autoridad so impasen na Dios ed relatibo iran posisyon da. Kanian saman so onsusumpa ed autoridad so ontatalindeg a sumpad uksoyan na Dios; saramay ontatalindeg sumpad saya so mangawat na panangukom ed inkasikaran dili.”​—Roma 13:1, 2.

Kanian, saray Tastasi nen Jehova, a mapeget a mamapasiansia ed neutralidad da ed politika, so agmibabali ed saray gobiernoy too. Ag-iran balot mangiyaalibansay rebolusyon odino mibibiang ed isusunggay ed gobierno. Imbes, bibidbiren da a say sakey a porma na gobierno so kaukolan pian pansiansiaen so ganggan tan uksoy ed sosyedad na too.​—Roma 13:1-7; Tito 3:1.

Momoriaen na Tastasi nen Jehova so organisasyon a Nasyones Unidas a singa panmomoria ra ed arum niran ulop na gobierno na mundo. Bibidbiren da a say Nasyones Unidas so mantultuloy ed kiwawala diad panangiyabuloy na Dios. Mitunosan ed Biblia, mangiiter iray Tastasi nen Jehova na makanepegan a respeto ed amin a gobierno tan ontutulok ed sikara dapot no satan a katutulok et agto ra kaukolanen a mankasalanan sumpad Dios.​—Gawa 5:29.