Kaukolan na Saray Karnero nen Jehova so Matamoy a Panagtalima

“Amtaen yo a si Jehova so Dios. . . . Sikatayo so totoo to tan saray karnero ed pastolan to.”​—SALMO 100:3.

1. Panon so panatrato nen Jehova ed ariripen to?

SI Jehova so Baleg a Pastol. No ariripen to itayo, momoriaen to itayo bilang karnero to tan matamoy a tatalimaen to itayo. Liligliwaen tan rerepreskoen itayo na mangatatawen ya Ama tayo tan itotonton to itayo “ed saray basbas na inkatunong nisesengeg ed ngaran to.” (Salmo 23:1-4) Say Maabig a Pastol, si Jesu-Kristo, so mangaaro ed sikatayon maong ya insuko to so kamarerwa to parad sikatayo.​—Juan 10:7-15.

2. Diad anton kipapasen a naromog na totoo na Dios so inkasikara?

² Bilang managresibe na matamoy a pananalima to, nibaga tayo so singa ed imbaga na salmista: “Panlingkoran si Jehova tekep na liket. Ondago ed arapan to takep na magayagan kelyaw. Amtaen yo a si Jehova so Dios. Sikato so nanggawa ed sikatayo, tan aliwan sikatayon dili. Sikatayo so totoo to tan saray karnero ed pastolan to.” (Salmo 100:2, 3) On, sikatayo so magayaga tan maligen. A singano sikatayo so liktar manlapud saray mauges a managlames diad sakey a pukokan a walaan na malet iran baton pader.​—Numeros 32:16; 1 Samuel 24:3; Sofonias 2:6.

Mabulos Iran Pastol na Pulok

3. Panon so pidedeneng na aturon Kristianon mamatatken ed kasimpukokan na Dios?

³ Agpankelawan a sikatayo so magayaga bilang karnero na Dios! Saray aturon mamatatken so mangidadaulo ed sikatayo. Ag-ira ‘onaastan singa prinsipi,’ pakatawan ed sikatayo, odino manasalin magmaliw iran katawan ed pananisia tayo. (Numeros 16:13; Mateo 20:25-28; 2 Corinto 1:24; Hebreos 13:7) Imbes, sikaray maaron pastol a mangiyaaplika ed konseho nen apostol Pedro: “Pastolan yo so kasimpukokan na Dios a walad panangasikaso yo, agnapipilitan, noagta sibubulos; nisay aliwan parad aro ed agnapanpiyaan a pinanabang, noagta sigugunaet; nisay mangakatawan ed saramay tawir na Dios, noagta magmaliw kayon alimbawa ed say kasimpukokan.” (1 Pedro 5:2, 3) Saya met so imbaga nen apostol Pedro ed kapara ton mamatatken: “Imanoen yo so inkasikayo tan say amin a kasimpukokan, a diad sikara et sikayo so tinuro na masanton espiritu a manangasikaso, pian pastolan so kongregasyon na Dios, a sinaliw to diad dala na dilin Anak to.” Tan agaylan pisalamat na saray karnero lapud “pidedenengan so kasimpukokan tekep na inkamatamoy” na sarayan lalakin tinuro na masanton espiritu.​—Gawa 20:28-30.

4. Parad anton klase na siglaotan ed say kasimpukokan a kabkabat si Charles T. Russell?

⁴ Inikdan nen Jesus so kongregasyon na “saray langkap a totoo,” say arum bilang “papastor,” odino saray pastol, a manatrato ed pulok nen Jehova diad matamoy a dalan. (Efeso 4:8, 11; King James Version) Sakey ed sarayan lalaki et si Charles T. Russell, say inmunan presidenti na Watch Tower Society. Sikatoy tinawag a Pastor Russell lapud saray maaro tan maabagey ya aktibidad ed panagpastol ed pulok diad silong na Manunan Pastol, si Jesu-Kristo. Natan, tinuro na Mananguley ya Ulop so Kristianon mamatatken na Tastasi nen Jehova, tan aalwaran ya agmangusar ed saray terminon singa say “pastor,” “matatken,” odino “managbangat” bilang titulo. (Mateo 23:8-12) Ingen, say peles a mamatatken so manusumpal ed kimey a panagpastol parad kagunggunaan na saray karnero na pastolan nen Jehova.

5. Akin a nepeg a kabaten na saray balo ni iray matatken ed kongregasyon?

⁵ Bilang pastol, walaan na importantin betang iray matatken diad espiritual ya iyaaligwas na saray balo ni. Kanian, say balon libron Pikakabat a Mangitonton ed Andi-Anggaan a Bilay so nankuan ed pahina 168: “Kabisadoen iray aturon mamatatken ed kongregasyon. Sikaray walaan na dakel ya eksperiensia ed panangiyaplika ed pikakabat na Dios, lapud akapet da iray kualipikasyon parad manangasikaso a nidatak ed Biblia. (1 Timoteo 3:1-7; Tito 1:5-9) Agmasuyat ya onasingger ed sakey ed sikara no nakaukolan yo so espiritual a tulong pian talonaan so sakey ya ugali odino sakey a walna a misumlangan ed saray kakaukolanen na Dios. Naimano yon saray mamatatken so ontutumbok ed simbawa nen Pablo: ‘Ibalap yo so apunaw ed puso, tagano yo so saray makapuy, masungdo kayo komon ed amin.’​—1 Tesalonica 2:7, 8; 5:14.”

Sano Labay La na Saray Balo ni so Manpulong

6. Anton paraan so natutumbok no say iyaaralan na Biblia so malabay a magmaliw a manangipalapag na Panarian?

⁶ Kayarin say estudyante na Biblia so akala la na pikakabat tan sikatoy makakaatendi la’d saray miting, ompan kaliktan toy magmaliw a manangipalapag na Panarian, sakey a manangipulong na maong a balita. (Marcos 13:10) No ontan, say Tasin mangikokondukta ed sikato na panag-aral na Biblia so nepeg a mitalosan ed manangasikason manangimaton, a mangiyuksoy na sakey ed saray mamatatken na Congregation Service Committee tan sakey nin matatken so mitongtong ed estudyante na Biblia tan ed mangiyaaral ed sikato. Say diskusyon so nibased libron Organized to Accomplish Our Ministry, pahina 98-9. No nanengneng na sarayan duan matatken a say balo ni so manisia ed saray manunan bangat na Biblia tan ontutumbok ed saray prinsipyo na Dios, ipakabat ed sikaton sikatoy kualipikado lan mibiang ed mapublikon ministeryo.a Sano ireport to lay impanministeryo to diad pangisumiti na field service report, satan so niposti ed Congregation’s Publisher Record card a ningaran ed sikato. Nireport la’d satan na balo ni so panagtasin kimey to a kaibay minilyon nin sigagayagan ‘mangipapalapag na salita na Dios.’ (Gawa 13:5) Iyanunsio ed kongregasyon a sikato so sakey lan agbautismadon manangipalapag.

7, 8. Diad antoran dalan a naikdan na nakakaukolan a tulong ed ministeryo so agbautismadon manangipalapag?

⁷ Nakakaukolan na agbautismadon manangipalapag so tulong na mamatatken tan arum nin matatken a Kristiano. Alimbawa, say iyaaligwas to ed espiritual so nepeg a paninteresan na konduktor ed aatendian ton Panagaral na Libro ed Kongregasyon. Nayarin say balon manangipalapag et naiirapan ed epektibon pansalita ed panagkabkaabungan. (Gawa 20:20) Kanian maseguron abrasaen to so panangasisti, nagkalalo la manlapud say mangiyaaral ed sikato na panagaral ed libron Pikakabat. Matukoy so ontan a praktikal a tulong, ta imparaan nen Jesu-Kristo iray babangatan to parad ministeryo.​—Marcos 6:7-13; Lucas 10:1-22.

⁸ Ta pian magmaliw ya epektibo ed ministeryo tayo, importanti so masakbay a panangiparaan. Kanian, nayarin manginsayo ni so duaran manangipalapag na saray presentasyon a nisuheri ed binulan a paway na Ministeryo Tayo ed Panarian. Sano onggapo la ra’d lawak a serbisyo, nayarin say mas eksperiensiado so ununan mansalita ed unaan tan komaduan puerta. Kayari na makaaron introduksion, say namparan manangipalapag so makapibiang ed panagtasi. Say pankimey a saniba diad ministeryo ed loob na pigaran simba so makapangitonton ed maabig iran panagpawil tan anggan say panangiyaral na libro ed ayaman ya uusarey libron Pikakakabat a Mangitonton ed Andi-anggaan a Bilay. Say mas eksperiensiadon manangipalapag so nayarin mangikondukta ed panagaral ed pigaran panaon tan insan iyalis itan ed balon manangiproklama na Panarian. Agaylay liket na parehon manangipalapag no say estudyante na Biblia so mangipatnag na apresasyon to ed pikakabat na Dios!

9. Antoray gawaen ya uksoyan sano say manangipalapag et pilalek toy nabautismoan?

⁹ Legan ya onaaligwas so agbautismadon manangipalapag ed espiritual, nayarin idedika toy inkasikato ed Dios diad pikakasi tan labay toy pabautismoan. (Ikompara so Marcos 1:9-11.) Kaukolan ya ipakabat to ed manangasikason manangimaton na kongregasyon so pilalek ton manpabautismo, a mangiyuksoy ya irepaso na mamatatken a kaibay manangipalapag ed saray tepet ed pahina 175 ya anggad 218 na Organized to Accomplish Our Ministry. Say apatiran parti a ditan inapag iray tepet so nayarin kobrian ed taloran sesyon na taloran nanduruman mamatatken no nayari. No onabobon ira a say agbautismadon manangipalapag so walaan na magenap a pakatalos ed saray bangat na Biblia tan sikatoy kualipikado ed arum a paraan, ibaga ra ed sikato a nayari lan manpabautismo. Bilang resulta na dedikasyon tan bautismo to, sikato so magmamaliw a ‘natandaan’ parad kilalaban.​—Ezequiel 9:4-6.

Panangapet na Nikadkaduma Iran Pankaukolan

10. Kakompleto na panagaral ed libron Pikakabat tan kabautismo, panon a napadaak so Makasulatan a pikakabat to?

¹⁰ Kakompleto la na sakey ed panagaral na Biblia ed libron Pikakabat tan abautismoan la, agla nesisitan sikato so pormal ya ikonduktaan na panagaral na sakey nin libro, a singa say Nankakasakey ed Panagdayew Diad Alenleneg a Tuan Dios.b Siempre, say kapkapanbautismo so makaaral na dakel ni legan a manpaparaan parad saray Kristianon miting tan regular ya onaatendi ed saratan. Nagamoran to met so kaaruman a pikakabat legan a say inkapgaan to parad katuaan so mamakiwas ed sikaton basaen tan aralen iray Kristianon palapagan a personal tan isingbat iray espiritual a pamaakaran ed saray kapananisian. Balet anto no onlesay nikadkaduman pankaukolan?

11. (a) Panon ya atulongan nen Priscilla tan Aquila si Apollos? (b) Anton tulong so niiter ed agano nin bautismadon malangwer ed edad a mannononot a mangasawa?

¹¹ Anggan si Apollos, a “marundunong ed Kasulatan” tan abangatan nipaakar ed si Jesus tekep na inkasusto, so agunggunaan sanen “sikatoy impila [na eksperiensiadon Priscilla tan Aquila] tan indalatdat ed sikato so dalan na Dios a lalon susto.” (Gawa 18:24-26; ikompara so Gawa 19:1-7.) Kanian, no bilang ta nononoten na kapkapanbautismon malangwer ed edad so piinaroan tan pangasawa. Say sakey a mas eksperiensiadon Kristiano so nayarin ontulong ed sikaton mananap na impormasyon ed sarayan tema diad saray palapagan na Watch Tower. Singa bilang, say makatulong a materyal nipaakar ed saraya so walad libron Questions Young People Ask​—Answers That Work, Section 7.c Say manangipalapag ya angikondukta na panagaral na Biblia so nayarin mangisingbat ed sayan materyal ed say balo ni, anggaman agla kaukolan so regular a panagaral.

12. Anton tulong so nitarok parad saray balo nin bautismadon sanasawan walaan na saray problema?

¹² Konsideraen pay sakey nin alimbawa. Anganko ta saray balo nin bautismadon sanasawa et naproproblemaan ed pangiyaplika na saray maridios a prinsipyo. Nayarin ontupleg ira ed sakey a matatken, a makapangusar na pigaran labi ya isingbat ed sikara so Kasulatan tan ipaarap so imano ra ed impormasyon a naromog ed saray palapagan na Watch Tower. Anggaman ontan, say matatken so agmangiletneg-lamet na sakey a regular a panagaral na Biblia ed sanasawa.

No Nankasalanan so Balo ni

13. Akin a nepeg ya ipanengneng na matatken ed kongregasyon so panangasi ed balo nin bautismadon nankasalanan balet ta magbabawi?

¹³ Aaligen na mamatatken so Baleg a Pastol, si Jehova, a mankuan: “Pakanen kon mismo iray karnerok, . . . bedberan ko so sakey ya apiley tan pabiskegen ko so mabeblay.” (Ezequiel 34:15, 16; Efeso 5:1) Mitunosan ed satan ya awawey, insimbawa nen babangatan a Judas a kaukolan ya ipanengneng so panangasi ed alanaan a Kristianos a walaan na saray panduaruwa odino naplag ed kasalanan. (Judas 22, 23) Lapud baleg so iilaloan tayo ed saray eksperiensiadon Kristiano, maseguron nepeg met a mangipanengneng na panangasi ed balon bautismado​—sakey lambengat a kordero​—a nankasalanan balet ta magbabawi. (Lucas 12:48; 15:1-7) Saray mamatatken, a ‘manguukom parad si Jehova,’ so mangiter sirin na ontan a matamoy a panagtalima ed saratan a karnero tan mamepetek ed sikara diad espiritu na kaumildian.​—2 Awaran 19:6; Gawa 20:28, 29; Galacia 6:1.d

14. Anto so nepeg a gawaen sano say agano nin bautismadon manangipalapag so akapanggawa na seryoson kasalanan, tan panon so pakatulong ed sikato?

¹⁴ Panon to bilang no say agano nin bautismadon manangipalapag et datin walay problema ton panag-inum tan aminsan odino amiduan danay a sikatoy alablabas ed saya. Odino ompan atalonaan to lay abayag lan bisyon panagsigarilyo ingen aminsan odino amiduan atalo na impakatukso a mansigarilyo a pribado. Anggan say balon agi tayo so manpipikasi la ed Dios parad panamerdona, nepeg ton onkerew na tulong ed sakey a matatken ta pian agniyugali so panagkasalanan. (Salmo 32:1-5; Santiago 5:14, 15) Sano sinalambit to ed sakey ed mamatatken so kasalanan, satan a matatken et panggunaetan ton petekey balo ni diad mapangasin paraan. (Salmo 130:3) Nayarin magenap lay Makasulatan a konsehon ontulong ed sikato pian napetek so basbas to kayari na satan. (Hebreos 12:12, 13) Sayan matatken so mangisingbat na saray sirkumstansya ed manangasikason manangimaton na kongregasyon pian amtaen so kaukolan a kaaruman nin tulong ya iter.

15. Diad arum a kaso, anto so kapilitan sano agano nin bautismado so nankasalanan?

¹⁵ Diad arum a kaso et ompan nagkalalo ni nakakaukolan. No dakel so makaamta la, walay kaatapan ed kasimpukokan, odino arum nin seryoson probleman nalalanor, say ulop na mamatatken so mangiasain na duaran matatken pian mangimbistiga ed pamaakaran. No naromog na sarayan matatken a say pamaakaran et talagan seryoso a mankakaukolan na hudisyal a komite, kaukolan dan ireport iya ed ulop na mamatatken. Diad ontan et mangiasain so ulop na mamatatken na sakey a hudisyal a komite pian tulongay nankasalanan. Say hudisyal a komite so nepeg a mideneng ed sikato diad matamoy a dalan. Kaukolan dan pambanikelan a sikatoy peteken da tekep na Kasulatan. No sikatoy onkiwas ed mapangasi iran sagpot na hudisyal a komite, diad ontan et nadeterminaan da no kasin walay antokaman a pakagunggunaan na agpangiter ed sikato na saray parti ed plataporma ed saray miting ed Kingdom Hall odino no sikatoy abuloyan a mankomento ed saray miting.

16. Anto so nagawaan na mamatatken pian tulongan so nankasalanan?

¹⁶ No onkiwas so nankasalanan, sakey odino duaran matatken ed hudisyal a komite so mangiyarunsa ya ondalaw bilang pastol pian paeletey pananisia tan pabiskegey apresasyon to parad saray matunong ya estandarte na Dios. Balang sakey ed sikara so nayarin mikimey ed sikato a tunggal paminsan diad lawak a ministeryo. Nayarin diad pigaran pankanawnawa et isingbat da ed sikato so Kasulatan, a posiblin uusaren iray artikulo ed Panag-Bantayan tan Awake! balet ta agmangileletneg na regular a panagaral na Biblia. Tekep na ontan a panagtalima, nayarin napabiskeg so nankasalanan a resistian iray kaleteyan na laman ed arapen nin agew.

17. Antoran kundang so gawaen no say bautismadon managgaway-mauges so agmagbabawi tan agmangikaindan ed makasalanan a kurang to?

¹⁷ Siempre, aliwan rason so pagmamaliw ton balo nin bautismado parad agmagbabawin pangagamil na kasalanan. (Hebreos 10:26, 27; Judas 4) No wala so bautismadon managgaway-mauges ya agmagbabawi tan agmangikakaindan ed makasalanan a kurang to, sikatoy dispelosipen manlapud kongregasyon. (1 Corinto 5:6, 11-13; 2 Tesalonica 2:11, 12; 2 Juan 9-11) Sano sayan kiwas et ompatnag a kapilitan, say ulop na mamatatken so mamili na hudisyal a komite. No nagawa so panangekal, nagawa so onian antikey a panangiyanunsio: “Si . . . so dinispelosip.”e

Tulongan Ira ya “Onaligwas ed Inkatatken”

18. Akin a makapanseguro tayo a saray balo nin bautismadon Kristiano tan arum ni so lawas walaan na dakel nin aralen nipaakar ed si Jehova tan say linawa to?

¹⁸ Karaklan ed ariripen na Dios so mansiansia ed kasimpukokan. Makapaliket met a balang sakey ed sikatayo so makayarin lalon makaasingger ed mangatatawen ya Ama tayo lapud lawas tayo nin nabangatan nipaakar a nagkalalo ed sikato tan say linawa to. (Eclesiastes 3:11; Santiago 4:8) Say nilibon abautismoan ed Pentecostes nen 33 K.P. so maseguron dakel ni nepeg dan aralen. (Gawa 2:5; 37-41; 4:4) Ontan met ed saray Hentil, ya anggapoy amta ed Kasulatan. Singa bilang, saya so tua ed saramay abautismoan kayari na paliwawa nen Pablo ed Areopago na Atenas. (Gawa 17:33, 34) Dakel ni nepeg ya aralen na saray balon bautisado met natan tan mankakaukolan na panaon tan tulong pian pabiskegen so determinasyon dan mantultuloy a gawaen so maptek ed imaton na Dios.​—Galacia 6:9; 2 Tesalonica 3:13.

19. Panon a saramay manpapabautismo so natulongan ya “onaligwas ed inkatatken”?

¹⁹ Kada taon nilibo so manpapabautismo tan mankakaukolan na panangasisti ta pian sikaray “onaligwas ed inkatatken.” (Hebreos 6:1-3) Diad panamegley na salita, alimbawa, tan praktikal a tulong diad ministeryo, nayarin sarag mon tulongan so arum a mangisulong na balon personalidad tan “mantultuloy a manakar ed katuaan.” (3 Juan 4; Colosas 3:9, 10) No sika so sakey ya eksperiensiadon manangipalapag, nayari kan imbitaan na matatatken a tulongan so balo nin kapananisiaan ed lawak a ministeryo odino isingbat ed sikato so pigaran Makasulatan a punto ed loob na pigaran simba ta pian pabiskegey pananisia to ed Dios, say apresasyon to parad saray Kristianon miting, tan arum nira. Say relasyon na saray pastol ed pulok so singa ed sakey ya ama a manisimbawa tan ed sakey ya ina ed inkamabanayat. (1 Tesalonica 2:7, 8, 11) Ingen, agnaasikaso na pigaran mamatatken tan ministeryal ya ariripen so amin a bengatlan nakakaukolan ed kongregasyon. Amin tayo so singa sakey a pamilya a walaan a saray membron mantutulongan ed sakey tan sakey. Walaay nagawaan na balang sakey ed sikatayo pian tulongan so kapara tayon managdayew. Sikan mismo so makapanpaseseg, makapanligliwa ed walaay depresyon, makapansuporta ed maletey.​—1 Tesalonica 5:14, 15.

20. Anto so nagawaan mo pian nipalaknab so pikakabat na Dios tan mangitarya na matamoy a panagtalima parad saray karnero ed pastolan nen Jehova?

²⁰ Kaukolan na katooan so pikakabat na Dios, tan bilang sakey a Tasi nen Jehova, nayari kan nawalaan na gayaga ed panangilaknab ed satan. Saray karnero nen Jehova so mankakaukolan na matamoy a panagtalima, tan sika so nawalaan na maaron betang ed pangitarok na saya. Komon ta bendisyonan nen Jehova so ministeryom, tan tumangan to ka komon lapud impapuso iran sagpot mo ya ontulong ed saray karnero na pastolan to.

[Saray paimano ed leksab]

Panon so Pangebat Yo?

◻ Panon so panatrato nen Jehova ed karnero to?

◻ Anto so nagawa sano saray balo ni et labay da lay manpulong?

◻ Panon a saray kapananisiaan so ontulong ed saray balo ni a nawalaan na espisyal iran pankaukolan?

◻ Anton tulong so niiter na mamatatken ed saramay mankakasalanan balet ta magbabawi?

◻ Panon mon natulongan so balo nin bautismadon “onaligwas ed inkatatken”?

[Litrato ed pahina 16]

Si Charles T. Russell so kabkabat bilang maaron pastol na say kasimpukokan

[Litrato ed pahina 18]

Tratoen na saray maabagey a pastol so kasimpukokan na Dios tekep na inkamatamoy