No Panon so Pakaromog na Gayaga ed Panaggaway Babangatan
SAKEY ed aralem a gayagan naeksperiensia na sakey a too et say pagmaliw a kaiban komikimey na Dios. Natan, lalaktipen na kimey na Dios so panagdagup ed situtunong ya onkikiling a totoo a mamaarap ed Kristianon kongregasyon tan pangipasal ed sikara parad bilay bilang Kristianos natan tan ontan met ed kililiktar a mamaarap ed balon mundo.—Miqueas 4:1-4; Mateo 28:19, 20; 2 Pedro 3:13.
Panlalapuan itan na baleg a gayaga parad Tastasi nen Jehova diad Latin Amerika so pakanengneng a minilyon a totooy magmamaliw a babangatan nen Jesu-Kristo nanlapulad 1980. Diad sayan mabungan lawak, no iner et dakel so manrerespeto tan manisia ed Biblia, atulongan la na arum a sigpot-panaon a ministro so dinosenan totoo pian idedika so bilay da ed si Jehova. Lapud kinarakel ya eksperiensia, anganko ta nisalaysay da ed sikatayo so nipaakar ed gayaga ed panaggaway babangatan. Nayarin ontulong so arum ed saray suhestion da pian naromog mo so gayaga diad panggaway babangatan ed lugar a panaayaman mo.
Panamidbir ed Potensyal a “Karnero”
“Diad antokaman a syudad odino purok a looban yo, anapen yo diman no siopay makana,” inkuan nen Jesus sanen imbaki toray apostol to pian manpulong. (Mateo 10:11) Sano dadalawen moray totoo, panon mon naamtaan iraman so nayarin natulongan ed espiritual a paraan? Oniay kuan nen Edward, sakey a sigpot-panaon a ministro ed masulok lan 50 taon: “Ipapatnag da itan diad magunaet a pantepet da tan diad inkapnek da sano niiter iray ebat manlapud Kasulatan.” Inyarum ni nen Carol: “No ipatua na sakey ed siak so personal a problema odino pakaaburidoan, satan so peteg ya ikekerew na tulong. Panggunaetan ko so pakaromog na makatulong ya impormasyon ed saray palapagan na Watch Tower Society. Say ontan a personal ya interes so mabetbet a mangitotonton ed panangiyaral na Biblia.” Ingen, aliwan naynay a mainomay so pakabidbir ed totoon masimoon. Oniay insalaysay nen Luis: “Arum a singano ra interesadon tuloy so ompapaway ya andi met manaya, ingen say arum a singano ra sumpa ed unona so manguman sano narengelan no anton talaga so ibabaga na Biblia.” Lapud dakel a taga Latin Amerika so manrerespeto ed Biblia, inyarum to, “Nabibidbiran ko iraman so natulongan ed espiritual sano awaten dan tampol so ibabangat na Biblia kayari pangipanengneng ko ed satan ed sikara.” Say pananulong ed saratan a “makana” a mamaarap ed iyaligwas ed espiritual so mangitatarok na tuan gayaga tan pakapnek. Panon yon nagawaan iya?
Panangigapo na Panangiyaral ed Biblia
Say panguusar na saray katulongan ed panangiyaral na Biblia a pinawala na “matoor tan makabat ya aripen” so mabetbet a sankaabigan a dalan pian natulongan so totoon talosay katuaan na Biblia. (Mateo 24:45) Panon mon napaaligwas so apresasyon parad saratan a katulongan ed panangiyaral na Biblia? Oniay inkuan nen Edward: “Lapud saray sirkumstansya na totoo, personalidad, tan punto de bista so nanduruman tuloy, sasalien kon itukoy so panangigapoy panangiyaral.” Agmo nausar so parehon metodo ed amin.
Diad arum, nayarin kaukolan so dakel ya impormal a diskusyon ed Kasulatan sakbay ya iyarap so libron-panaralan ed panagaral na Biblia. Anggaman kuan, inreport na sakey a sanasawan misionero: “Kasalakan min niyoopresi so panagaral ed unonan dalaw.” Ontan met, sakey a Tasin akatulong na 55 totoo anggad punto na dedikasyon so angikuan na onia: “Say manunan metodon uusaren ko diad panangigapo na saray panangiyaral na Biblia et say direktan pangonsidera ed libron Makapambilay Kayo na Ando lan Ando ed Paraiso diad Dalin.” Anggaman aglabay na arum so ideya na panaral na antokaman, labalabay met a panaralan na arum so antokaman a sisiaen dan makatulong ed bilay da. Mabetbet a makapaayat ed saraya so opresin libre iran klase na Biblia ed ayaman. Isasalaysay na arum a misionero iyan opresi, insan ikuan: “Labay kon ipanengneng ed sika no panon min gagawaen iya. No labay mo, nayarin ituloy mo iya. No andi, walad sika itan.” Sano iyoopresi ed ontan a paraan, agtalawan so totoon awaten itan.
Sananey nin Tasi, ya akatulong ed dakel a mairap tan abebay edukasyon, so angikuan: “Naimanok a saray tract so nagkalalo lan mausar diad panangigapo na saray panangiyaral na Biblia.” Dinanman a publikasyon ya usaren da, say Biblia so manunan idadanet na saray sigpot-panaon a managbanat. Oniay inkuan nen Carola: “Diad unonan panagaral, saray litrato labat so uusaren ko tan nayarin limaran kasulatan, ta pian ombitar iray manunan punto tan say Biblia so ag-ompatnag a mairap ya aralen.”
Pansiasiansiaen a Mabilay so Interes
Say liknaan na iyaaligwas so panggagayagaan na totoo, kanian irerekomenda nen Jennifer: “Gawaen a mabilabilay so panagaral. Pansiansiaen a maaligwas so panagaral.” Say regular a panangikonduktay panagaral ya anggapoy sasaewen iran simba so ontutulong met ed sikaran nalikna ran sikaray onaaligwas. Isasalaysay na sakey a special pioneer a binmaleg ed baryo so kaimportantian na pinasimplin panangipaliwawa tan iyapasakey ed saray manunan punto, pian saraman met so abebay aral da et makaaligwas. Kuanto: “Diad purok mi, kaukolan min baldian so dalin kayari pangisibwag na saray bukel. No asobraan mi na danum, say tapew na dalin so onawet ya agmakamotmot iray binmasik a bukel, tan nabulok iraya. Ontan met, sano sobra iray punton ipapaarap yo ed balo nin interesado, ompatnag a maidirap parad sikara tan onsuko lara laingen.” Anggan saray totoon matepet so nepeg ya aralen dan iyapasakey so imano ed sakey labat a tema ed sakey a pankanawnawa no labay dan onaligwas ed pakatalos. Inkuan nen Jesus ed saray apostol to: “Dakel niray bengatlan salitaen ko ed sikayo, balet agyo ni nayarin sakbaten natan.”—Juan 16:12.
Sananey nin paraan pian napansiansian mabilay so interes et pasesegen iramay bibisitaen mo a mantultuloy a nonoten so Salitay Dios kayari intaynan mo. Oniay irerekomenda nen Yolanda: “Mangitilak na sakey a tepet. Ikdan ira na aralen-ed-ayaman, singa say panbasa na sakey a kabiangan na Biblia odino panangusisa ed sakey a teman paninteresan to.”
Pamaaligwas na Aro ed si Jehova
Ondaak so gayagam sano tutulongan moy estudyantem a magmaliw a “mananumpal na salita, tan aliwan dumerengal lambengat.” (Santiago 1:22) Panon mon nagawaan itan? Saray tuan Kristiano so papakiwasen na aro ed si Jehova. Oniay salaysay nen Pedro, a taga Mexico: “Agnaaro na too so totoon agda kabat, kanian diad kagapon mismo na panagaral, ibabangat ko la’d sikara so ngaran na Dios manlapud Biblia, tan aanapen koray pankanawnawa pian idanet iray kualidad nen Jehova.” Diad pitotongtong, napabaleg mo so apresasyon ed si Jehova diad pangisalaysay ed liknaan mo ed sikato. Inkuan nen Elizabeth: “Lawas kon sasalien a salambiten so kamaongan nen Jehova. Legan na pangiyaaral ko, no makanengneng ak na marakep a rosas, balibalin manok, odino sakey a magalagalaw a kuting, lawas kon sasalambiten a satan so kimey nen Jehova.” “Ibitla so nipaakar ed nisipan a balon mundo na Dios bilang kapetegan a singa antam la nipaakar ed satan,” so isusuheri nen Jennifer. “Itepet no anto so labay dan gawaen ed balon mundo.”
Sano siaapresyan dadalepdepen na sakey a too so naaaralan to nipaakar ed si Jehova, ontatanek itan ed puso to tan mamakiwas itan ed sikato. Balet agto itan nadalepdep no agto natatandaan. Say antikey a panrepaso ed talora odino apatiran manunan punto kayari kada panaral et sakey a katulongan ed memorya. Ipapaisulat na dakel a managbangat na Biblia ed saray interesado iray manunan kasulatan tekep na sakey a nota diad Biblia ra. Ipapaliwawa na sakey a misionero ed Inglatera so kaaruman a gungguna ed panagrepaso: “Itetepet ko no panon ya akagungguna so impormasyon ed sikara. Saya so mamapadalepdep ed sikaran siaapresya ed saray dalan tan ganggan nen Jehova.”
Onia met so inkuan na sakey a matoor a Tasi a nangraduar ed komatlon klase na Gilead School: “Nepeg itayon magmaliw ya entusiastiko. Nepeg a namoria na saray estudyante tayo a panisiaan tayoy ibabangat tayo.” Makaalis so pananisian amakiwas ed sika bilang sakey a maliket a “mananumpal na gawa” no ibabalikas mo itan.—Santiago 1:25.
“Naroromogan kon mas napapaapit so totoo ed Dios no tutulongan ko’ran natebek iray ebat na pikakasi ra,” so inkuan na Tasin akatulong ed dakel a mandayew ed si Jehova. “Iikdan koray alimbawa manlapud dilin eksperiensiak, singa saya: Sanen say kaparehak tan siak so sinmabi ed balon asainmin mi bilang payunir, walaan kami labat na daiset a pising, sakey a pakete na margarin, tan anggapoy kuarta mi. Naupot mi lay tagano mi ed pangdem tan inkuan min, ‘Anggapo lay para nabuas.’ Nampikasi kami nipaakar ed saya, tan insan naugip la. Asaksakbay ed kaimbuasan, sakey ya agin taga diman so dinmalaw tan inkabat toy inkasikato, a kuanto, ‘Impikasik a si Jehova so mangibaki komon na saray payunir. Natan nakaiba ta kayo a sanagew, balet lapud ta manaayam ak ed baryo, kaukolan a mangugto ak a kaiba yo, kanian walay awit kon tagano parad sikatayon amin.’ Saman so amayamay a karne baka tan pisipising. Lawas kon ibabaga ed saray estudyantek ya agbalot mamaulyan si Jehova no unaen tayo so Panarian to.”—Mateo 6:33.
Iyopresi so Praktikal a Tulong
Mas ni so nasasaglawi diad panggawa na babangatan nen Kristo nen say pangikondukta na panagaral ed Biblia. Inkuan na sakey a misionero a nanlingkor la ed dakel a taon bilang managbiahen manangasikaso: “Ikdan mo ra na panaon. Agmanapuran onalis kasumpal na panagaral. No matukoy, mansiansia nin magano tan mitongtong.” Oniay inkuan nen Elizabeth: “Ipapanengneng koy interes ed sikara ta bilay so nalalanor. Dakel a pankanawnawan nanonotan ko ra a singara no ana’ko.” Onia met so suhestion na arum a Tastasi: “Bisitaen ira no sikaray mansasakit.” “Sano asingger ka ed ayaman da, alimbawa diad lawak a ministeryo, bisitaen iran magano pian ikabat so arum a Tastasi ed sikara.” Inkuan nen Eva: “Ontalineng a maong pian natalosan so abenegan tan kipapasen ed bilay na sakey a too. Saraya so mangaapekta ed paraan ya ikiwas na totoo ed katuaan tan nayarin mangamper na iyaaligwas da. Kaaroen ira, ta pian nawalaan ira na kompiyansa ya ibagay problema ra.” Inkuan ni nen Carol: “Say puron interes ed too so importanti ta saray pananguman ya itatarok na katuaan ed bilay to so no maminsan et mankabaliksay kabalang na pamilya tan kakaaro to. Diad inkalapagan et marakep no amta na estudyante no iner so panaayaman mo tan walaan na kompiyansan onasingger ed sika antokaman ya oras.” Tulongan a moriaen toy kongregasyon bilang balon pamilya to.—Mateo 10:35; Marcos 10:29, 30.
“Alerton mangiyopresi na praktikal a tulong. Miabay ed sikara ed saray miting, tan tulongan ira ed saray anak da,” kuan nen Yolanda. Say pangipanengneng ed sikara no panon so pangipasal ed ananak da, paaligwasen iray estandarte na kalinisan, mangiparaan na saray komento parad saray miting, tan mangiter na saray paliwawa ed Teokratikon Eskuelaan ed Panagministro et kabiangan itan ya amin na panaggaway-babangatan. Inyarum ni na sakey ya agin bii: “Importanti so pangipasal ed saray balobalo parad say ministeryo. Sano nibaliwala iyan aspeto na panangipasal, say arum so mansiansian talawan ed panagpulong a kimey, nabalang da so gayagan manlingkor ed si Jehova, tan ontundan mansungdo.” Kanian iter so maalwar a panangipasal diad say panag-kabkaabungan, diad panggaway panagpawil, tan diad panangigapo na saray panangiyaral na Biblia. Baleg so gayagam sano nanengneng moy estudyantem ya onaligwas tekep na tulong tan panangigiyam.
Pabiskegen Iran Mansungdo
“Wala so tendensyan paulyanan so pangiyaaral sano abautismoan lay estudyante,” so pasakbay na eksperiensiadon managgaway babangatan. Nepeg a tandaan na namparan managbangat tan estudyante a say balo nin bautismadon Kristiano so arawi ni ed espiritual ya inkatatken. Dakel ni so gawaen to pian ombulaslas ed pananisia to, diad apresasyon to ed ganggan na Dios, tan diad aro to ed si Jehova. Makanan ipaseseg ed sikato so pamayubo ed maabig a niyugalin personal a panagaral ta pian sikatoy mantultuloy ya onaligwas.—1 Timoteo 4:15.
Ompan mankaukolan so balo na tulong pian onaligwas tan magmaliw a maparawes a membro na asosasyon na agagi. Nayarin kaukolan toy panangigiya diad pidedeneng ed saray ag-inkayadyari na agagi legan a sikatoy onaapit ed sikara. (Mateo 18:15-18) Ompan kaukolan toy tulong pian magmaliw ya onsianon managbangat, a sarag toy man-research a bukor. Oniay imbaga na sakey a misionero: “Sakey ya estudyante so mankaliktan a napaaligwas toy abilidad to bilang sakey a managbangat kayari na bautismo to, kanian inkuan to’d siak, ‘Mangikondukta ak na balon panangiyaral no ontumbok a simba, balet nepeg kon represkoen so memoryak ed saray akadkaunan kapitulon naaralan ko la. Nayari tan aralen tayo lamet irayan kapitulo, a maalalutor, ta pian sarag kon inota iray paliwawa na kasulatan tan saray ilustrasyon, tan insan nausar ko iratan sano mangikondukta ak na panangiyaral?’ Sikatoy nagmaliw ya ekselentin managbangat, ya apatira ed saray estudyante to so abautismoan ed sakey ya asamblea.”
No Akin a Mablin Sagpot so Panaggaway Babangatan
“Say panaggaway babangatan so mankabaliksan na dakel nin manangidayew ed si Jehova. Mankabaliksan na bilay parad saraman so mangaawat na katuaan,” so inkuan nen Pamela. “Labalabay kon ibangat so katuaan ed arum—alay abig itan! Nanenengneng na sakey iray estudyanten kalkalnan onaaligwas, manguuman ed bilay da tan tatalonaan iray babeng a singano agnatalonaan no aliwan lapud espiritu nen Jehova. Dakel ed saramay mangaaro ed si Jehova so nagmaliw a maap-apit a kakaarok.”
“Sano namolimolik iraman so atulongan kon magmaliw a babangatan,” so insalaysay na sakey a misioneron nanlapud Alemanya, “nanenengneng ko so pigaran mabaing a tuloy a totoo ya ontanlay inyaligwas da bilang ministros na Dios a satan so mairap kon napanisiaan. Nanenengneng koray totoon akatalona ed abalbaleg iran babeng, mapatpatnag lapud tulong nen Jehova. Nanenengneng koray pamilyan datin abuyak balet natan et nankakasakey—maliket ya ananak a kaibay responsabli iran ateng. Nanenengneng kon panggagayagaan day makabaliksan a bilay, ya idadayew day Jehova. Satan so gayaga na panaggaway babangatan.”
On, say pagmamaliw a kaiban komikimey nen Jehova a Dios ed say panaggaway babangatan et sakey a lapuan na agnaparaan a gayaga. Pinaneknekan itan na saray eksperiensia na misionero tan saray payunir. Naromogan mo so parehon gayaga tan kapenek no iyaplikam iray suhestion tan gawaen itan tekep na interon kamarerwa. Tekep na panamendisyon nen Jehova, nakompleto so gayagam.—Uliran 10:22; 1 Corinto 15:58.