Ginawa Ra so Linawa nen Jehova
Itatalineng ed Patanir Iran Salita nen Jesus
DIAD labi na Nisan 14, 33 K.P., si Jesu-Kristo tan saray 11 a matoor ya apostoles to so akatameg ed dulang diad sakey a kuarto ed tagey diad Jerusalem. Diad pakaamtan asingger lay ipapatey to, imbaga to ed sikara: “Siak so kaiba yo a maganggano labat la.” (Juan 13:33) Diad tua, si Judas Iscariote so paonla lan minonong ed marelmeng a lalaki a malabay a napapatey si Jesus.
Anggapo so anggan sakey ed loob na saman a kuarto ed tagey so akalikas ed inkaganatan na situasyon nilikud ed si Jesus. Kabat ton tuloy a paganigani lay panirap to. Kabat met nen Jesus a sikatoy taynan na saray apostol to ed saman lanlamang a labi. (Mateo 26:31; Zacarias 13:7) Lapud saya so kaunoran a pankanawnawa nen Jesus a mansalita ed apostoles to sakbay na ipapatey to, maseguro itayon sarayan panamatanir a salita to so mangiyapasakey na imano ed saray pamaakaran ya importantin tuloy.
“Itultuloy Yon Gawaen Iya diad Pakanodnonotan ed Siak”
Kaibay matoor ya apostoles to, inletneg nen Jesus so sakey a balon panggilin a manalat ed Judion Paskua. Tinawag nen apostol Pablo itan a “say pangdem na Katawan.” (1 Corinto 11:20) Kayari impangala to na andi-lebaduran tinapay, si Jesus so nampikasi. Insan to pinisag tan inter so tinapay ed apostoles to. “Ala kayo, kanen yo. Saya so mankabaliksan na laman ko,” inkuanto. Insan angala na sakey a kopa na alak, nampikasi na pisalamat tan inter to itan ed apostoles, kuanto: “Uninom kayo manlapud saya, amin yo; ta saya so mankabaliksan na ‘dala na sipanan’ ko, a satan so nikalbo nisesengeg ed dakel parad pakaperdona na saray kasalanan.”—Mateo 26:26-28.
Anto so kabaliksan na sayan ebento? Singa impanengneng nen Jesus, say tinapay so angirepresenta ed anggapoy kasalanan a laman to. (Hebreos 7:26; 1 Pedro 2:22, 24) Isisimbolo na alak so nipaagos a dala nen Jesus, a manggawan posibli kaperdona na kasalanan. Say masakripisyon dala to so mamekder met ed balon sipanan ed baetan nen Jehova a Dios tan say 144,000 a totoo, a diad kaunoran et miuley ed si Jesus diad tawen. (Hebreos 9:14; 12:22-24; Apocalipsis 14:1) Diad pangimbita ed saray apostol a mibiang ed sayan pangdem, impanengneng nen Jesus a miulop ira ed sikato diad mangatatawen a Panarian.
Nipaakar ed sayan makatantandan pangdem, inganggan nen Jesus: “Itultuloy yon gawaen iya diad pakanodnonotan ed siak.” (Lucas 22:19) On, say Pangdem na Katawan so magmaliw a tinaon ya ebento, a singa say Paskua. Bangta ipapanonot na Paskua so inkiliktar na saray Israelita manlapud inkaaripen diad Ehipto, say Pangdem na Katawan so mangiyaapasakey na imano ed lalon babaleg a kililiktar—salanti say karondon na katooan manlapud inkaaripen ed kasalanan tan ipapatey. (1 Corinto 5:7; Efeso 1:7) Niarum ni, saramay mibibiang ed embleman tinapay tan alak so napanonotan ed arapen a pribilihyo ra bilang arari tan saserdote diad mangatatawen a Panarian na Dios.—Apocalipsis 20:6.
Say impatey nen Jesu-Kristo so talagan sankaimportantian ya ebento diad awaran na too. Saramay mangaapresya ed ginawa nen Jesus so ontutulok ed ganggan to nipaakar ed Pangdem na Katawan: “Itultuloy yon gawaen iya diad pakanodnonotan ed siak.” Ngingilinan na Tastasi nen Jehova so impatey nen Jesus ed kada taon ed petsan misimbangan ed Nisan 14. Diad 1996 sayan petsa so ompetek ed Abril 2, kaselek na agew. Sikayo so ampetapetang ya iimbitaan ya onatendi ed Kingdom Hall ed lugar yo.
‘Ikdan ta Kayo na Balon Ganggan’
Nilikud ed impangiletneg na Pangdem na Katawan, angiter si Jesus na panamatanir a konseho parad apostoles to. Anggaman ed maabig a panangipasal, dakel so kaukolan ya aralen ni na sarayan lalaki. Agda sigpot ya atebek so gagala na Dios parad si Jesus, parad sikara, odino parad arapen. Balet agnanggunaetan nen Jesus ya ipalinew irayan amin a pamaakaran ed satan a panaon. (Juan 14:26; 16:12, 13) Imbes, sinalita to so nipaakar ed bengatlan walaan na baleg a kaimportantian. “Ikdan ta kayo na sakey a balon ganggan,” inkuanto, “sikayo so manaaroan ed sinansakey; a singa pangaarok ed sikayo, sikayo met komon so manaaroan ed sinansakey.” Insan inyarum nen Jesus: “Lapud saya amin nakabatan da a sikayo so babangatan ko, no wala so aro ed limog yo.”—Juan 13:34, 35.
Diad anton dalan a saya et “sakey a balon ganggan”? Bueno, inganggan na Mosaikon Ganggan: “Nepeg mon aroen so kaparam a too a singa sikan dili.” (Levitico 19:18) Balet, kinerew nen Jesus ed papatumbok to a mangipanengneng na dilin-panagsakripisyon aro ya onabot ed punton bulos ya iter na sakey so bilay to nisesengeg ed kaparan Kristianos. Siempre, say ‘ganggan na aro’ so onaaplika met diad agtanton kritikal iran sirkumstansya. Diad amin a situasyon et mabulos so sakey a patumbok nen Jesu-Kristo a mangipanengneng na aro diad panulong ed arum diad espiritual tan ed arum nin paraan.—Galacia 6:10.
Diad sayan kaunoran a labi na mangaraldalin a bilay nen Jesus, say aro so anagdag ed si Jesus pian manpikasi ed si Jehova a Dios diad biang na babangatan to. Kabiangan na saya, impikasi to: “Sikara so wadia ed mundo tan siak so onla ed sika. Masanton Ama, bantayan mo ira nisesengeg ed dilin ngaran mo ya inter mo ed siak, pian sikara so magmaliw a sakey a singa sikata.” (Juan 17:11) Makatantanda a diad sayan kerew ed Ama to, nampikasi si Jesus parad maaron pankakasakey na saray patumbok to. (Juan 17:20-23) Kaukolan a ‘manaaroan ed sinansakey a singa impangaro nen Jesus ed sikara.’—Juan 15:12.
Saray matoor ya apostol so tinmalineng ed patanir iran salita nen Jesus. Sikatayo so kaukolan met ya ontulok ed saray ganggan to. Diad sayan “kaunoran iran agew,” say aro tan pankakasakey ed limog na saray tuan managdayew so lalon importanti nen say kapiganman. (2 Timoteo 3:1) On, ontutulok iray Kristiano ed ganggan nen Jesus tan mangipapanengneng na inaagin aro. Lalaktipen na saya so itulok ed ganggan to a ngilinan so Pangdem na Katawan.