Baleg so Kakanaan na Pangdem na Katawan ed Sika

KASIN walay importansia tan magnayon a kana na Pangdem na Katawan ed sika? Pian naamtaan, kabaten tayo nin unona no panoy impangipasen nen Jesu-Kristo a mismo ed sayan espisyal ya ebento.

Diad labi na Nisan 14, 33 K.P., nandaragup si Jesus tan saray 12 apostol to diad tagey a silir ed Jerusalem pian selebraan so tinaon a Paskua. Kayari na impanpangdem da ed Paskua, tinaynan na traidor a si Judas so silir pian itapat si Jesus. (Juan 13:21, 26-30) Diad saray nakekeraan a 11 ya apostol et inletneg nen Jesus so ‘pangdem na Katawan.’ (1 Corinto 11:20) Satan met so tinutukoy a Memoryal odino pakanodnonotan, lapud ingganggan nen Jesus ed saray patumbok to: “Gawa yo so saya a pannodnonotan yo ed siak.” Saya lambengat so ebento ya ingganggan ed saray Kristiano a nodnonoten.​—1 Corinto 11:24.

Unong ed diksionaryo a Webster’s, say memoryal et bengatla ya ontulong pian “nipreserba so pakanodnonotan” odino “napansiansia a mabilay so pakanodnonotan.” Diad dakel a pasen, saray totoo so mangipapaalagey na monumento odino mamipili na espisyal ya agew pian nodnonoten so sakey a too odino bengatla ya importante. Diad sayan kaso et si Jesus so angiletneg na pakanodnonotan a pangdem​—pangdem ya onkanan tulong pian nanonotan tan nipreserba na saray babangatan to so pakanodnonotan ed importantin tuloy iran ebento ed satan a makatantandan agew. Parad saray onsublay a kailalakan, sayan memoryal a pangdem so mangipanonot ed saray manselebra ed sigpot a kakanaan na ginawa nen Jesus diad saman a labi, nagkalautla ed saray simbolo ya inusar to. Antoran simbolo, odino emblema, so inusar nen Jesus, tan anto so kabaliksan na saratan? Usisaen tayo pa so salaysay na Biblia ed no anto so agawa ed labi na 33 K.P.

Saray Sagradon Simbolo

“Angala na tinapay, et sanen akapisalamat, pinisag to, et inter to ed sikara, a kuan to, Saya sikatoy [“kabaliksan to so,” NW] laman ko a niiter nisengeg ed sikayo; gawa yo’ya a pakanodnonotan ed siak.”​—Lucas 22:19.

Sanen inala nen Jesus so tinapay insan to inkuan, ‘saya kabaliksan to so laman ko,’ ipapabitar to a say anggapoy lebadura a tinapay so mangirerepresenta, odino mangisisimbolo, ed andiay kasalanan a dilin laman to, ya inter to “nipaakar ed bilay na mundo.” (Juan 6:51) Anggaman inkuan na arum a patalos na Biblia a “saya so [Griego, es·tinʹ] laman ko,” inkuan na Thayer’s Greek-English Lexicon of the New Testament a sayan verb so kaslakan lan mankabaliksan na “ipaamta, ipatnag, ipakabaliksan.” Ipapasabi na satan so ideya a mangirepresenta, odino mangisimbolo.​—Mateo 26:26.

Ontan met ed kopa na alak. Inkuan nen Jesus: “Saya a kopa sikato [“kabaliksan to,” NW] so balon sipan dia ed dalak, a naibung nisengeg ed sikayo.”​—Lucas 22:20.

Diad salaysay nen Mateo, oniay inkuan nen Jesus nipaakar ed kopa: “Sikato yay [“kabaliksan na,” NW] dalak ed sipan a sikatoy naibung nipaakar ed amayamay a pangekal ed saray kasalanan.” (Mateo 26:28) Inusar nen Jesus so alak ed kopa bilang representasyon, odino simbolo na dili ton dala. Say nipaagus a dala to so basiyan na “balon sipan” parad saray nilanaan na espiritu a babangatan, a manuley bilang arari tan saserdote a kaiba to diad tawen.​—Jeremias 31:31-33; Juan 14:2, 3; 2 Corinto 5:5; Apocalipsis 1:5, 6; 5:9, 10; 20:4, 6.

Say alak ed kopa so onkana met a panonot a say nipaagus a dala nen Jesus so basiyan ed pangitarya na “pangekal ed saray kasalanan,” a mangilukas ed dalan parad saray mibibiang pian natawag ed mangatatawen a bilay bilang kaiban tomatawir nen Kristo. Natalosan sirin a saraman lambengat so walaan na mangatatawen a tawag​—a limitado so bilang da​—so mibiang ed pangan na tinapay tan iyinum na alak diad Memoryal.​—Lucas 12:32; Efeso 1:13, 14; Hebreos 9:22; 1 Pedro 1:3, 4.

Balet, komusta iramay patumbok nen Jesus ya agkabiangan ed balon sipanan? Saraya so ‘arum a karnero’ na Katawan, ya agmaniilalon magmaliw a manuley a kaiba nen Kristo diad tawen, noagta pian magnayon a manbilay diad paraison dalin. (Juan 10:16; Lucas 23:43; Apocalipsis 21:3, 4) Bilang “baleg ya ulop” na matoor a Kristianos a ‘manlilingkor ed Dios agew tan labi,’ maliket tan maapresya iran magmaliw a manag-imaton ed Pangdem na Katawan. Saray salita tan kiwas da et singa mangiyaabawag: “Say kililiktar so otang tayo ed Dios tayo, ya akayurong ed trono, tan ed Kordero.”​—Apocalipsis 7:9, 10, 14, 15, NW.

Panon Kabetbet?

“Gawa yo’ya a pakanodnonotan ed siak.”​—Lucas 22:19.

Panon kabetbet so nepeg a panselebra ed Memoryal pian napansiansia so pakanodnonotan ed impatey nen Kristo? Satan so ag-indalatdat nen Jesus. Balet, lapud inletneg to so Pangdem na Katawan diad Nisan 14, say labi na Paskua, a tinaon a senelebraan na saray Israelita, mapatnag a ginetma nen Jesus a say Memoryal so selebraan ed ontan met a paraan. Bangta saray Israelita so tinaon a nanselebra ed inkibulos da manlapud inkaaripen ed Ehipto, saray Kristiano so tinaon a manseselebra ed inkibulos da manlapud inkaaripen ed kasalanan tan patey.​—Exodo 12:11, 17; Roma 5:20, 21.

Peteg ya aliwa lan balon ideya so panselebra a tinaon ed importantin ebento. Alimbawa, imanoen pa sano selebraan na sanasawa so anibersaryo na kasal da odino sano selebraan na nasyon so sakey ya importantin ebento ed awaran to. Kaslakan a seselebraan itan a maminsan ed sakey taon diad anibersaryo na satan ya ebento. Makapainteres ta diad loob na pigaran siglo kayari na impanbilay nen Kristo bilang too, dakel ed saray mankuan a Kristiano so tinawag a Quartodecimans, a kabaliksan toy “Saray koma Labin-apat,” lapud senelebraan da so impatey nen Jesus a maminsan ed sakey taon, kada Nisan 14.

Simpli Ingen ta Importantin Tuloy

Impaliwawa nen apostol Pablo a say panselebra ed Pangdem na Katawan so ontulong ed saray babangatan nen Jesus a ‘mangipakabat ed impatey na Katawan.’ (1 Corinto 11:26) Kanian, sayan selebrasyon so akasentro ed makanan betang nen Jesus, panamegley na impatey to, diad pakasumpal na gagala na Dios.

Lapud katooran to anggad patey, inyalangon nen Jesu-Kristo si Jehova a Dios bilang makabat tan maaron Manamalsa tan matunong a Soberano. Misunian ed saray ibabaga nen Satanas, tan aliwan singa si Adan, pinaneknekan nen Jesus a posiblin makapansiansia a matoor ed Dios so too, anggan desdesen a pirmi.​—Job 2:4, 5.

Impansiansia met na Pangdem na Katawan so maapresyan pakanodnonotan ed dilin-panagsakripisyon aro nen Jesus. Anggaman pirmin sinubok, si Jesus so nansiansian sigpot a matulok ed Ama to. Ayarian to sirin ya imbagat so ayadyarin bilay to bilang too pian bayaran so agaylay bili ya impankasalanan nen Adan. Unong ya impaliwawa nen Jesus a mismo, sikatoy linma pian “iter toy bilay to a panondon ed amayamay.” (Mateo 20:28) Bilang resulta, amin a manmatalek ed si Jesus so naperdona ed saray kasalanan da tan mangawat na andi-anggaan a bilay a mitunosan ed orihinal a gagala nen Jehova parad katooan.​—Roma 5:6, 8, 12, 18, 19; 6:23; 1 Timoteo 2:5, 6.a

Amin na saya so mangipapabitar met ed daakan a kamaongan tan agkanepegan a kaabigan nen Jehova diad impangitarya to na kililiktar parad katooan. Oniay inkuan na Biblia: “Dia ed saya nipatnag so aro na Dios ed sikatayo, a say Dios imbaki to ed mundo so Anak ton bogbogtong, pian manbilay itayo ed panamegley to. Onia so panangaro: aliwa a lapu ed sikatayo so angaro ed Dios, noag ingen sikato so angaro ed sikatayo, tan imbaki to so Anak to a makapamaandi kasalanan tayo.”​—1 Juan 4:9, 10.

On, agaylan abig a selebrasyon so Memoryal! Simpli tan praktikal a maong a selebraan ed sankamundoan anggaman nanduruma iray kipapasen, ingen ta simbolikon tuloy a mansiasiansian makanakanan panonot diad loob la na andukey a panaon.

Say Kakanaan na Satan ed Sika

Say masakripisyon impatey na Katawan tayon Jesu-Kristo so agawa diad alay bilin impansakripisyo to tan nen Ama to, si Jehova. Bilang ayadyarin too, ag-atawir nen Jesus so ipapatey, ya aliwan singa sikatayo. (Roma 5:12; Hebreos 7:26) Nayarian to komon so manbilay ed ando lan ando. Sikatoy agnapaskar a mangisuko ed bilay to no agto iyabuloy. Oniay inkuan to: “Anggapo so mangekal ed siak na bilay ko, ingen sikato so iter ko manlapu ed inkasiak.”​—Juan 10:18.

Balet ta mabulos si Jesus ya angibagat ed ayadyarin bilay to pian “lapud ipapatey bagbagen to so kawalaan na pakayari na ipapatey, salanti, say diablo; tan ilaban to ra ed amin lapu ed takot da ed ipapatey wala ran amin ed legan na bilay da ya impauleyan ed inkaaripen.” (Hebreos 2:14, 15) Nagkalalon mapatnag so dilin-panagsakripisyon aro nen Kristo diad paraan na ipapatey ya inabuloyan to. Kabkabat ton maong so paraan na panirap tan ipatey to.​—Mateo 17:22; 20:17-19.

Ipapanonot met ed sikatayo na Memoryal so sankatalonggaringan a panangipatnag na aro ed kapiganman na mangatatawen ya Ama tayo, si Jehova. Agaylan makapagonigon parad sikato, a “maabagey a tuloy, tan mapangasi,” a narengel tan naimatonan so “mabiskeg a tagleey tan saray lua” nen Jesus diad hardin na Getsemani, say sadistan panaglewet, say maruksan impangipasak, tan say kalkalna, tan mapalaloy ot-ot ya ipapatey. (Santiago 5:11; Hebreos 5:7; Juan 3:16; 1 Juan 4:7, 8) Anggan say panisip lambengat ed satan anggad natan, ya apalabas lay pigaran siglo et ansakit nin siansia parad karaklan.

Agaylan mabmabli so imbayar nen Jehova a Dios tan si Jesu-Kristo parad sikatayon makasalanan! (Roma 3:23) Inagew-agew et naiimatonan tayo so makapasinagem a katuaan na inkamakasalanan tan saray agtayo inkayadyari. Balet, diad pananisia tayo ed dondon bagat nen Jesus, nayarian tayoy onkerew na panamerdona ed Dios. (1 Juan 2:1, 2) Lapud satan et posibli lan napanggayagaan tayo so kawayangan a pakapitongtong ed Dios tan nawalaan na malinis a konsiensia. (Hebreos 4:14-16; 9:13, 14) Likud ed satan, nawalaan itayoy ilalon manbilay a magnayon ed paraison dalin. (Juan 17:3; Apocalipsis 21:3, 4) Saraya tan saray arum nin bendisyon so resultan amin na sankatalonggaringan a kiwas na dilin-panagsakripisyo nen Jesus.

Pangipatnag na Apresasyon ed Pangdem na Katawan

Andi-duaruwa a say Pangdem na Katawan so makapakelaw a pakapatnagan na “alablabas ya agkanepegan a kaabigan na Dios.” Tan say uksoyan nen Jehova a Dios a dondon bagat​—a nagmaliw a posibli panamegley na dilin-panagsakripisyon aro nen Jesus​—so peteg ya “agnadeskribin langkap [to] ya anggapoy bayar.” (2 Corinto 9:14, 15, NW) Agta sarayan balikas na kamaongan na Dios panamegley nen Jesu-Kristo so managyat ed sika a nawalaan na aralem tan manbayag a pisasalamat tan apresasyon?

Matalek kami ya ontan. Kanian, kaliktan mi kan imbitaan a midagup ed saray Tasi nen Jehova diad panselebra ed Memoryal na impatey nen Jesus. Diad sayan taon et nagawa so Memoryal diad Mierkoles, Abril 16, kaselek na agew. Maliket iray Tasi nen Jehova ed lugar yo a mangipaamta ed eksakton oras tan pasen na sayan sankaimportantian ya ebento.

[Paimano ed Leksab]

[Kahon/Saray litrato ed pahina 6]

“SAYA SO LAMAN KO” ODINO “KABALIKSAN NA SAYA SO LAMAN KO” DINAN?

Sanen inkuan nen Jesus a “siak so pinto” tan, “siak so tua a sengeg na ubas,” anggapoy nanisip a sikato so literal a pinto odino literal a sengeg na ubas. (Juan 10:7; 15:1) Ontan met, sanen inaon na The New Jerusalem Bible si Jesus ya angikuan: “Saya a kopa so balon sipanan,” agtayo ipasen a say kopa so literal a balon sipanan. Kanian ontan met, sanen inkuan to a say tinapay “sikatoy” laman to, mabitar a say tinapay et mankabaliksan, odino angisimbolo ed laman to. Kanian, oniay inkuan na patalos a Charles B. Williams: “Irerepresenta na saya so laman ko.”​—Lucas 22:19, 20.

[Litrato ed pahina 5]

Say anggapoy lebadura a tinapay tan say alak so matukoy a simbolo na andiay kasalanan a laman tan nipaagus a dala nen Jesus

[Litrato ed pahina 7]

Say Memoryal et panonot ed pirmin panangaron impatnag nen Jehova a Dios tan si Jesu-Kristo