No Panon Kan Lilingkoran na Saray Kristianon Pastol

DIAD DAKEL iran pasen posibli so pangobserba na panon ya aasikasoen na saray pastol so kasimpukokan. Sikaray mangitonton, manprotekta, tan mangitarya parad saray karnero. Saya so paninteresan na Kristianon mamatatken, lapud say kimey da so lalaktipen toy panagpastol ya aktibidades. On, satan so responsabilidad da “pian pastolan so kongregasyon na Dios” tan ‘imanoen so amin a kasimpukokan.’​—Gawa 20:28.

No sikay membro na Kristianon kongregasyon, panon kan napanlingkoran na saray espiritual a pastol? Tan panon so nepeg mon ikiwas ed say saray sagpot da nisesengeg ed sika? Akin a kaukolan na kongregasyon so tulong da?

Proteksion Sumpad Anto?

Diad kadaanan iran panaon, saray leon tan arum a maatap ya ayayep so mameligro tan manbiktima ed indibidual a karnero. Kaukolan a mangiter na proteksion iray pastol. (1 Samuel 17:34, 35) Bueno, si Satanas a Diablo so “manakarakar a singa onmuang a leon, a manaanap na buagen to.” (1 Pedro 5:8) Sikatoy sisasanok a mibabakal aliwa lambengat ed say mangaraldalin ya organisasyon nen Jehova bilang intero noagta ontan met ed balang indibidual ya ariripen na Dios. Anto so getma nen Satanas? Kaliktan ton dismayaen so totoo nen Jehova tan amperen to ni ingen ira manlapud ‘pangunor ed saray ganggan na Dios’ tan ed pananumpal na “say kimey na panagtasi ed si Jesus.”​—Apocalipsis 12:17.

Inakusa nen Jehova so mananguley iran pastol ed kadaanan ya Israel lapud impamaulyan ed saray karnero to a nagmaliw a “tagano parad kada masebeg ya ayep ed uma.” (Ezekiel 34:8) Anggaman ontan, saray Kristianon mamatatken so walaan na impapuson pilalek pian protektaan iramay walad kongregasyon ta pian anggapoy nabalang lapud panamaulyan odino lapud impluensya nen Satanas, say mundo, odino apostata “iran lobo.” (Gawa 20:29, 30) Panon ya ontulong iray pastol ed amin a membro na say kasimpukokan pian mantultuloy ed panlikas tan panbantay da? Sakey a paraan et say pangiter na niparaan a maong a Makasulatan iran paliwawa manlapud plataporma na Kingdom Hall. Sakey ni et say positibo, makapaseseg a pitotongtong sakbay tan kayari na saray miting. Siansian sakey nin epektibon paraan so panbisitan personal ed “karnero” ed ayaman. (Ikompara so Salmo 95:7.) Balet anto ta so panagpastol ya idadalaw? Panon so nepeg a panumpal ed ontan a panagbisita? Tan siopa so nakaukolan a nabisita?

Anto ta so Panagpastol ya Idadalaw?

Say panagpastol ya idadalaw et aliwan basta ipapasyar labat tekep na pantongtong ed saray ag-importantin bengatla. Inkuan na sakey a matatken: “Maslak a manangipalapag so pirmin manggayaga ed panbasa na kasulatan odino pantongtongan so partikular a character ed Biblia. Siempre, aliwan say matatken labat so mansalita. Say bibisitaen a manangipalapag na Panarian so gendat a panggagayagaan toy pangibalikas na saray kanonotan to ed Biblia, tan say panggawa ed saya so mamabiskeg na dilin pananisia to. Nayarin mangitarok so matatken na Panag-Bantayan odino Awake! a magasin ta pian nasingbat so makapabiskeg ya artikulo. Anganko ta sayan espiritual a diskusyon so mangibiig no anto so panagpastol ya idalaw manlapud ipapasyar.”

Inkomento na sananey nin eksperiensiadon matatken: “Sakbay na ibisita, manuusar na panaon so matatken a manisip nipaakar ed say nakaukolan na manangipalapag a dalawen to. Anto so mamabiskeg ed manangipalapag? Say masimoon a komendasyon so manunan kabiangan na panagpastol iran idalaw, ta satan et pabiskegen so too a mansungdo.” On, aliwa labat a pikakaaron ibibisita so panagpastol ya idadalaw a nayarian a gawaen na siopaman ed kongregasyon.

Akin a Bisitaen Ka na Pastol?

Sano ombisita so matatken ed ayaman mo, sikato so akaparaan pian mamaseseg ed kaparan mananisia tan tulongan ira pian napaelet ed pananisia. (Roma 1:11) Kanian sano ombisita ed sika so sakey odino duaran mamatatken, panon so ikiwas mo? Inkuan na sakey a managbiahen manangasikaso: “No nagawa lambengat so panagpastol ya idadalaw sano walay problema, say nayarin unonan reaksion so, ‘Anto so agawaan kon mauges?’” Aligen na saray maaron espiritual a pastol si Jehova, ya angasikaso ed salmista tan lawas a ‘nirepreskoan so kamarerwa to,’ nagkalalo la ed panaon na detdet tan nagkalalon pankaukolan.​—Salmo 23:1-4.

Say gagala na panagpastol ya idadalaw et ‘pian mamaalagey, aliwan mangigeba.’ (2 Corinto 13:10) Peteg a makapaseseg iray salita na apresasyon parad sungdo, seseg, tan matoor a kimey na binisita. Inkuan na sakey a matatken: “Diad panagpastol ya idadalaw, aliwan maong so pangiter na impresyon a say sakey ya onlan walaan na intensyon ed pangamta tan singbaten iray problema. Siempre, say manangipalapag a mismo so nayarin malabay a mangitongtong nipaakar ed partikular a kairapan. Tan sano say karnero so mankitley odino ibibiig toy inkasikato manlapud say arum ed kasimpukokan, nakakaukolan na matatken a manggawa na bengatlan itulong.”

Maseguron saray Kristianon pastol so nikaduman mangasikaso ed siopaman a singa ed saramay adeskribe ed sarayan salita: “Siak [Jehova] so mananap ed sakey ya abalang, tan siak so mangipawil ed sakey a nisian, tan siak so mamedber ed sakey ya apiley tan siak so mamabiskeg ed sakey a mabeblay.” (Ezequiel 34:16) On, nayarin kaukolan na karnero so anapen, ipawil, bedberan, odino pabiskegen. Pinaulyanan na saray pastol ed Israel irayan responsabilidad. Say panggawa ed satan a kimey so mankakaukolan a say sakey a pastol so onapit ed sakey a karnero tan asikasoen iray nakaukolan to. Manuna, saya so kaukolan a pangibiigan a nengneng ed balang panagpastol ya idadalaw natan.

Kaukolan na Mabunigas a Karnero so Panangasikaso

Nepeg tayon sampotan a say presentin-agew iran espiritual a pastol so agkaukolan a mangipanengneng na nagkalautlan panangimano ed mabunigas a karnero? Bueno, sano walad kapeligroan so literal a karnero, say itutulong ed satan so mas mainomay no walaan na kompiyansa ed pastol. Naimano na sakey libro a say “karnero so gendat a maatap manlapud totoo, tan say pamaamo ed sikara so aliwan naynay a mainomay.” Kalaktip ed arum niran bengatla, isusuheri na parehon libro iyan manunan pananontonan parad pakapaamo ed karnero: “Maparanay a mitotongtong ed saray ayep. Natandaan da la so boses, a mamaseguro ed sikara. Mabetbet a bisitaen so karnero ed pastolan.”​—Alles für das Schaf. Handbuch für die artgerechte Haltung (Everything for the Sheep. Handbook on How to Keep Them Properly).

Nakaukolan sirin so personal ya iyaasingger no say napanmatalkan a siglaotan so niwala ed baetan na pastol tan ed karnero. Tua met itan ed Kristianon kongregasyon. Inkuan na sakey a matatken: “Say pagmaliw a kabkabat ed kongregasyon bilang sakey a matatken a regular ya ombibisita ed saray karnero so manggawan mainomay ed idalaw sano say sakey so walaan na saray problema.” Kanian, saray espiritual a pastol so agmanalin mamakan tan mangasikaso ed saray karnero ed loob na Kingdom Hall lambengat. Anggad iyabuloy na sirkumstansya, kaukolan a kabkabaten na mamatatken iray karnero diad panggawa na panagpastol ya idadalaw ed ayaman da. Nanonotan ni na sakey a Kristiano sanen sikatoy balobalo nin aturon matatken, tinelepono na manangasikason manangimaton tan kinerew a bisitaen tan ligliwaen so sakey ya agi a naandiay anak a bii ed makapasinagem ya inkaaksidenti ed luluganan. Inaksobi na matatken: “Ontanlay ermen ko, lapud agko ni binisita itan ya agi tan agko ni anggan amta so panaayaman to! Akainawa ak sanen sakey a matatken ya elder so angitagar ed siak.” On, manaasistian so mamatatken ed panagpastol ya idadalaw.

Diad pangiparaan tan panggaway panagpastol ya idadalaw, nayarin say matatken so ibaan na ministeryal ya aripen ya ondadampot parad “maabig a kimey” na sakey a manangasikaso. (1 Timoteo 3:1, 13) Agaylay pangaapresya na ministeryal ya aripen diad pakanengneng to no panon a say matatken so manlilingkor ed karnero ed panagpastol ya idadalaw! Diad ontan et saray mamatatken tan ministeryal ya ariripen so onaapit ed amin diad kongregasyon, a pabibiskegen iray bedber na Kristianon aro tan pankakasakey.​—Colosas 3:14.

Panangiplano na Panaon parad Panagpastol ya Idadalaw

Sanen sakey ya ulop na mamatatken so angipasakbat ed responsabilidad na panagpastol ya idadalaw ed saray manangikondukta na Panagaral na Libro ed Kongregasyon, amin a manangipalapag ed arum a grupo so abisita ed loob na anem bulan, bangta anggapo so abisita ed arum a grupo. Saya so amakiwas ed sakey a matatken ya ikuan: “Ompatnag ya arum a mamatatken so mangaala na panangiyuna tan manggagawa na dakel a panagpastol a kimey, balet saray arum so nakaukolan a pasesegen na kapara ran mamatatken pian gawaen itan.” Kanian manggawa na uksoyan so arum ya ulop na mamatatken parad amin a manangipalapag a nabisita na pastol diad sakey a pihon panaon.

Siempre, sakey a matatken odino arum nin manangipalapag so nayarin ombisita ed sakey diad kongregasyon anggan agla manalagar ed nagawan nikaduma iran uksoyan. Sakbay a gawaen so panagpastol ya idalaw, mantelepono so matatken tan ikuan, “ondadalaw ak ed sakey a pamilya kada pamilya. Nayarin bisitaen ta kayo ed sakey oras odino onsulok ni no ontumbok a bulan? Kapigan so kombenienti yo?”

Saray Bendisyon ed Panagpastol ya Idadalaw

Legan a mantultuloy ya ondaraak so desdes manlapud sayan marelmeng a sistema, saray makapaseseg ya ibibisita na makatalos a pastol so lalon makagungguna. Sano amin ed saramay walad kasimpukokan so naikdan na panamaseseg tan tulong diad panamegley na panagpastol ya idadalaw, nalilikna na balang karnero so salimbeng tan kaligenan.

Saya so nireport, nipaakar ed kongregasyon a ditan amin a manangipalapag na Panarian so regular a bibisitaen na pastol: “Nagmaliw a positibon tuloy iray manangipalapag nipaakar ed panagpastol ya idadalaw. Maslak parad manangipalapag ya onasingger ed sakey ed say mamatatken ya ontepet sano kapigan lamet so idalaw, lapud say manangipalapag so nanggayaga ed makapabiskeg a diskusyon nen imbeneg a bisita. Say panagpastol ya idadalaw so sakey a sengegan ya ontutulong pian onaligwas so espiritu na kongregasyon.” Ipapanengneng na arum a report a sano simamaaron manlingkor iray mamatatken ed ontan a paraan, ombulaslas so kongregasyon ed aro, pankakasakey, tan inkaligsa. Agaylan bendisyon!

Say Kristianon pastol so ombisita pian idalangirang so espiritual a pankaabigan na saray karnero. Kaliktan na mamatatken a pasesegen tan pabiskegen iray kapananisiaan. No walay seryoson problema a mankakaukolan na konseho a niparungtal legan na bisita, mas maabig ya iyuksoy a pantongtongan itan ed arum a panaon, nagkalalo la no say matatken so inibaan na ministeryal ya aripen. Antokaman so nagawa, matukoy no sampotan na pikakasi so panagpastol ya imbisita.

Kasin kaliktan na espiritual a pastol so idalaw to ed ayaman mo ed maganon panaon? No ontan, mantalaran a maliket ed panamaseseg a manaalagar ed sika. Sikatoy onsabi pian manserbi ed sika tan pabiskegen to ka ed determinasyon mon mansiansia ed dalan ya ontonton ed andi-anggaan a bilay.”​—Mateo 7:13, 14.

[Kahon ed pahina 26]

Saray Suhestion Parad Panagpastol ya Idadalaw

◻ Misipan ya unona: Mas lawas maabig so misipanan ya unona. No plano na matatken so mamenben na seryoson problema, manepeg no nipadpauna a pakabatan so manangipalapag ed saya.

◻ Panagparaan: Konsideraen so personalidad tan situasyon na too. Mangiter na impapuson komendasyon. Gawaen itan a kalat mo pian mangipasabi na makapaseseg, makapabiskeg-pananisian “espiritual a regalo.”​—Roma 1:11, 12.

◻ No siopa so ipila: Sananey a matatken odino sakey a kualipikado a ministeryal ya aripen.

◻ Legan na bisita: Kaukolan a say matatken so relaks, maaro, positibo, tan manangitukoy. Kabaten so nipaakar ed pamilya, say kipapasen to, tan arum ni. Ontalineng a maalalwar. No nipaparungtal so seryoson problema, mas maabig so pangiuksoy parad nikaduman panagpastol ya idalaw.

◻ Kabayag na idalaw: Tumboken so nanpaknaan a panaon, tan onalis legan a siansia nin manggayaga so unabong ed imbisita.

◻ Sampotan so imbisita: Say pikakasi so matukoy tan peteg a naapresya.​—Filipos 4:6, 7.

[Litrato ed pahina 24]

Saray Kristianon pastol so mangiiter na espiritual a proteksion

[Saray litrato ed pahina 26]

Mangiiter na maabig iran pankanawnawa so panagpastol ya idadalaw parad espiritual a panamaseseg