Lawas Ibuntok so Awit Mo ed si Jehova

DAKEL natan so nakukusbo lapud saray awit. Say irap na panagbilay, makapadetdet iran problema ed pamilya, pansakit, ot-ot tan panirap lapud panamairap tan inkaruksa, tan mantutumbokan ya irap so singano gilingan ya akabitin ed beklew da. Nilikud ed sarayan akinpaway a desdes, say arum so nababanalan lapud pakaliknay inkaandi-kana tan inkasaew lapud dilin agda inkayadyari. Dakel so atukson onsuko la. Panon mon natalonaan sano saray awit so singano ambelat a tuloy?

Aminsan et alikna nen Arin David na Israel ya agto la nayarian so desdes. Unong ed Salmo 55, sikatoy apagaan a tuloy lapud desdes tan alabas a sanok na saray kabusol to. Talagan ansakit so linawa to tan natatakot. Mandageyem lambengat ed kaermenan to. (Salmo 55:2, 5, 17) Balet anggaman ed amin a gonigon to, akaromog na paraan pian makapan-anos. Panon? Sinmaral ed Dios to pian naantabayan. Onia so simbawa to ed arum a nayarin makalikna na singa ed alikna to: “Ibuntok mo so awit mo ed si Jehova a mismo.”​—Salmo 55:22.

Anto so labay ton ibaga ed “ibuntok mo so awit mo ed si Jehova a mismo”? Kasin saman so basta panpikasi ed si Jehova tan pangibalikas na kapagaan tayo? Odino walaay nagawaan tayo pian naresolbi so situasyon? Anto no nalikna tayon sikatayo so agmakanepegan ya onasingger ed si Jehova? Naamtaan tayo no anto so labay ya ibaga nen David diad pangusisa ed pigaran eksperiensia ya atandaan ton maong sanen insulat to irayan salita.

Gawaen Iray Bengatla Diad Biskeg nen Jehova

Natatandaan mo ta no panon a si Goliat et apagyaw to iray mibabakal a lalaki na Israel? Sayan alan, a masulok a siameran piye ed kaatagey, so kinebbiewan da. (1 Samuel 17:4-11, 24) Balet ag-antakot si David. Akin? Lapud agto sinalin arapen si Goliat diad dilin biskeg to. Nanlapulad nilanaan bilang arapen ya ari na Israel, impaiwanwan ed espiritu na Dios tan pabiskegen ed amin a gawaen to. (1 Samuel 16:13) Kanian imbaga to ed si Goliat: “Wadia ak ed sika ed ngaran nen Jehova na saray armada, say Dios na saray linya na pibabakal ed Israel, ya inangat mo. Sayan agew et isuko to ka nen Jehova ed limak.” (1 Samuel 17:45, 46) Si David so sakey ya onsianon managbansot, balet makapanseguro tayo a say masanton espiritu nen Jehova so angigiya tan nanggawan mas makapatey ed baton imbansot to ed si Goliat.​—1 Samuel 17:48-51.

Inarap tan atalonaan nen David iyan baleg ya angat ed panamegley na panagmatalek ya antabayen tan pabiskegen na Dios. Awalaan na sakey a maong tan nailaloan a siglaotan ed Dios. Anggapoy duaruwan saya so apabiskeg ed bengatlan sikatoy inliktar nen Jehova ed asasakbay. (1 Samuel 17:34-37) Singa si David, makapanmantini ka na malet a personal a siglaotan ed si Jehova tan sigpot a makapankompiyansa ed abilidad to tan inkamabulos ton mamabiskeg tan mangantabay ed sika ed amin a kipapasen.​—Salmo 34:7, 8.

Gawaen so Anggaay Nayarian Pian Resolbien so Problema

Anggaman ontan, agkabaliksan na saya ya anggapo lay panaon na pirmin irap, kapagaan, tan anggan say takot, a singa ed malinlinew ya ipapanengneng na Salmo 55. Alimbawa, pigaran taon kayari na anggapoy-takot ton panangipatnag na kompiyansa to ed si Jehova, asagmak nen David so alay takot ed arap na kakabusol to. Abalang to so panangabobon nen Arin Saul tan kaukolan ya ontakas. Isipen pa so kapagaan a nayarin pinalesa na saya ed si David, saray suppiat a nayarin pinalesa na satan ed kanonotan to nipaakar ed kasumpalan na sipan nen Jehova. Iyan la a nilanaan bilang arapen ya ari ed Israel, balet ta sikatoy wadian kaukolan a manbilay bilang sakey a puganti ed kalawakan, ya uusilan a singa sakey a maatap ya ayep. Sanen sinali ton pasalimbengan ed syudad na Gat, say baley nen Goliat, sikato so abidbir. Anto so resulta? Ibabaga na rekord a “sikatoy natatakot a tuloy.”​—1 Samuel 21:10-12.

Balet agto inabuloyan so takot to tan alabas a kapagaan a mangamper ed ikerew to na tulong ed si Jehova. Unong ed Salmo 34 (insulat lapud sayan eksperiensia), inkuan nen David: “Tinmupleg ak ed si Jehova, tan inebatan toak, tan inliktar toak manlapud amin a katatakotan ko. Tinmawag iyan naiirapan, tan dinengel a mismo nen Jehova. Tan insalba To ed amin a sesga to.”​—Salmo 34:4, 6.

Siempre, inantabay nen Jehova. Balet imanoen a si David so aliwan basta akayurong labat tan nanalagar ya iliktar nen Jehova. Binidbir to so pankaukolan a gawaen to so anggaay nayarian to ed silong na saray kipapasen pian makaimwas ed mairap a kipapasen. Papablien to so impangiliktar ed sikato nen Jehova, balet sikaton mismo so kinmiwas, a nankuankuanan a walay deral na ulo to pian sikatoy agpateyen na ari na Gat. (1 Samuel 21:14–22:1) Kaukolan a gawaen tayo met so anggaay nayarian tayo pian natalonaan iray awit, imbes a basta iyalagar tayo ed si Jehova so panangiliktar.​—Santiago 1:5, 6; 2:26.

Ag-aaruman Iray Awit Mo

Diad kaunoran a bilay to et naaralan nen David so sakey nin leksion, sakey ya ampait. Anto itan? A no maminsan et sikatayo so mangaarum na saray awit tayo. Kayari na pananalo sumpad saray Filisteo, awalaan na saray problema si David sanen deniside ton ipawil so kaban a sipan ed Jerusalem. Onia so ibabaga ed sikatayo na maawaran a rekord: “Diad saman et si David tan ed amin a totoon kaiba to so binmangon tan amaarap ed Baale-juda pian awiten diman so kaban na tuan Dios . . . Anggaman ontan, inlugan da so kaban na tuan Dios ed balon kariton, . . . tan sikara di Uzah tan Ahio, ya ananak nen Abinadab, so angitonton ed balon kariton.”​—2 Samuel 6:2, 3.

Say panangusar na kariton pian iyalis so Kaban so sumpad amin a bilin ya initer nen Jehova nipaakar ed saya. Malinew ya imbaga a saray autorisadon manag-awit labat, saray Kohatitan Levita, so nepeg a manakbat ed Kaban ed saray takeb da, a manguusar na saray sakbatan ya isusulong ed saray kondiling a nikadkaduman inkabit ed Kaban. (Exodo 25:13, 14; Numeros 4:15, 19; 7:7-9) Say pangibaliwala ed sarayan bilin so angitarok na kalamidad. Sanen saray bakan manguguyor ed kariton so ngalngali lan angibalintuag ed kariton, si Uzah, a maseguron sakey a Levita balet ta aliwan sakey a saserdote, so angiyunat na lima to pian paligenen iman tan sikato so pinatey nen Jehova lapud ag-inkamagalang to.​—2 Samuel 6:6, 7.

Bilang ari napilanor ed saya si David. Ipapanengneng na reaksion to ya anggan samay walaan na maong a siglaotan ed si Jehova so nayarin onkiwas ya agmakanepegan ed mairap iran situasyon a tunggal paminsan. Unona et sinmanok si David. Insan natatakot. (2 Samuel 6:8, 9) Say nailaloan a siglaotan to ed si Jehova so nisilong ed pirmin inkasubok. Wadia so sakey a pankanawnawan singano sinmaew ya angipasakbat na awit to ed si Jehova, sanen agto tinumbok iray ganggan to. Nayari kasin niiyan tayo ed ontan a kipapasen no maminsan? Tetetelen tayo ta si Jehova ed saray probleman resulta na agtayo itutumbok ed saray bilin to?​—Uliran 19:3.

Iyaarap ed Belat na Kasalanan

Diad saginonor, pinalesa nen David ed sarili to so ambelat a kasalanan sanen sinumlang toray estandarte nen Jehova ed moral. Diad sayan panknawnawa binenegan nen David so responsabilidad a mangidaulo ed saray totoo ed pibabakal. Nampatilak ed Jerusalem legan a sikaray linman mibakal. Saya so nansumpal ed seryoson problema.​—2 Samuel 11:1.

Anengneng nen Arin David so manaames a maganganan Bath-sheba. Awalaan na imoral a relasyon ed sikato, tan saya so nanlukon. (2 Samuel 11:2-5) Pian salien a sakbongan so lingon kondukta to, inyareglo to a say masiken nen Bath-sheba, si Urias, so ompawil ed Jerusalem manlapud bakalan. Agnilabay nen Urias so mirelasyon ed akulaw to legan a say Israel so mibabakal. (2 Samuel 11:6-11) Natan et inmarap si David ed sakey a marelmeng tan alay uges a paraan pian sakbongan so kasalanan to. Inyareglo ton paulyanan si Urias na saray kapara ton sundalo ed sakey a mainomay a pateyen a posisyon pian sikatoy napatey. Sakey ya alay uges tan baleg a kasalanan!​—2 Samuel 11:12-17.

Siempre, diad kaunoran et inebatan nen David so kasalanan to, tan sikatoy niwalwal. (2 Samuel 12:7-12) Salien mo pan isipen so belat na ermen tan impankasalanan a nayarin alikna nen David sanen amoria to so inkagrabe na ginawa to lapud petang na liknaan to. Nayarin atalonaan na liknaan na inkasaew, lalo seguro lapud sikato so sakey ya emosyonal tan sensitibon too. Nayarin alikna ton sikatoy sigpot ya anggapoy kakanaan!

Anggaman ontan, binidbir a tampol nen David so lingo to, ya inako to ed si propetan Natan: “Siak so nankasalanan sumpad si Jehova.” (2 Samuel 12:13) Ibabaga ed sikatayo na Salmo 51 so alikna to tan no panon ton akikasi ed si Jehova a Dios pian sikatoy linisan tan perdonaen to. Sikatoy nampikasi: “Sigpot moak ya orasan manlapud lingok, tan linisan moak manlapud kasalanan ko. Lapud kabat kon mismo iray impakaluksok, tan say kasalanan ko so naynay a walad arap ko.” (Salmo 51:2, 3) Lapud matuan nagbabawi, nipawil to so maligen, maapit a siglaotan to ed si Jehova. Agnilebleb ed alabas a panangimano si David ed pagbabawi na sarili to tan nanlikna na inkaandi-kakanaan. Inbuntok to so awit to ed si Jehova diad panamegley na mapaabeban impamidbir ed kasalanan to, masimoon ya impanbabawi, tan pirmin impanpikasi ed panamerdona nen Jehova. Agamoran to lamet so panangabobon nen Jehova.​—Salmo 51:7-12, 15-19.

Pananalona ed Inkitapat

Ipapaarap itayo na saya ed inkagawan anagdag ed si David a nansulat na Salmo 55. Sikatoy agaylan nagogonigon. “Say pusok so manpapaot-ot a pirmi ed loob ko,” so insulat to, “tan saray pakataktakotan na ipapatey mismo so naplag ed siak.” (Salmo 55:4) Anto so sengegan na onian ot-ot? Si Absalom, ya anak nen David, so nanggetman samsamen so inkaari manlapud si David. (2 Samuel 15:1-6) Sayan impangitapat na dilin anak to so ansakit a tuloy pian anosan, balet linmoor iya lapud bengatlan say panmamatalekan a managkonseho nen David, sakey a lakin manngaran na Ahitopel, so akinonong sumpad David. Si Ahitopel imay dineskribe nen David ed Salmo 55:12-14. Bilang resulta na impinonong tan inkitapat, si David so kaukolan ya ontaynan manlapud Jerusalem. (2 Samuel 15:13, 14) Talagan saya so angitarok ed sikato na alay ermen!

Siansian, agto inabuloyan a say pirmin emosyon tan ermen so mamakapuy ed panagmatalek tan ilalo to ed si Jehova. Nampikasi ed si Jehova a pasaewen iray plano na saray managnonong. (2 Samuel 15:30, 31) Anengneng tayo lamet a si David ya aliwan basta manalagar ya anggapoy gagawaen ya ipasakbat lan amin ed si Jehova. Diad bektan awalaan na pankanawnawa, ginawa to so anggaay nayarian to pian amperen so pannononong sumpad sikato. Imbaki to so sakey ni ed managkonseho to, si Husai, a papawil ed Jerusalem pian mankuankuanan a mibabali ed pannononong, balet, diad tua et wadman pian buyaken to iman. (2 Samuel 15:32-34) Tekep na suporta nen Jehova, tinmalona iyan plano. Apatayam nen Husai si Absalom ya akapangrupo-lamet tan naorganisa nen David so pandepensa.​—2 Samuel 17:14.

Talagan inapresya met a tuloy nen David ed legay bilay to so proteksion nen Jehova ontan met ed impagmaliw ton maanos tan mabulos a manamerdona. (Salmo 34:18, 19; 51:17) Diad panamegley na sarayan inkagawa a sitatalek itayon papasesegen nen David ya onsaral ed si Jehova parad tulong ed panaon na sesga, ya ‘ibuntok so awit tayo ed si Jehova.’​—Ikompara so 1 Pedro 5:6, 7.

Iletneg tan Pansiansiaen so Matibay, Nailaloan a Siglaotan ed si Jehova

Panon itayon nawalaan na nengneng na siglaotan a niwala ed si David no nipaakar ed si Jehova, sakey a siglaotan a manaantabay ed sikato ed panaon na baleg a subok tan kairapan? Nawalaan itayo na ontan a siglaotan diad panamegley na pagmaliw a makulin estudyante na Salita na Dios, say Biblia. Paibangat itayo ed sikato ed saray ganggan to, prinsipyo, tan personalidad to. (Salmo 19:7-11) Legan a dadalepdepen tayo so Salita na Dios, lalo tayon napapaapit ed sikato tan naaralan so manmatalek ed sikaton sigpot. (Salmo 143:1-5) Napapaaralem tan napapabiskeg tayo itan a siglaotan legan na piuulop tayo’d saray kaparan managdayew pian nabangatan ni nen Jehova. (Salmo 122:1-4) Lalon napaapit so siglaotan tayo ed si Jehova diad sigpot-puson panpikasi ed sikato.​—Salmo 55:1.

Tua, si David, so singa sikatayo ya agonigon met sanen say siglaotan to ed si Jehova so aliwan singa ed katibay na inilaloan. Say inkaruksa so manggawa ed sikatayon “onkiwas ya ambagel.” (Eclesiastes 7:7) Balet nanenengneng nen Jehova so nagagawa, tan naaamtaan no anto so walad kapusoan tayo. (Eclesiastes 4:1; 5:8) Kaukolan tayon panbanikelan a pansiansiaen a maligey siglaotan tayo ed si Jehova. Diad ontan et antokaman ya awit tayo a kaukolan tayon awiten et nailaloan tayon palemewen nen Jehova so desdes odino pabiskegen to itayo pian natalonaan so situasyon tayo. (Filipos 4:6, 7, 13) Saman so mantegteen ed pansiansia tayon maapit ed si Jehova. Sanen ginawa iya nen David, sikatoy sigpot ya apaligen.

Sirin, antokaman so kipapasen mo, inkuan nen David a lawas ibuntok ed si Jehova so awit mo. No ontan et naeksperiensia tayo so katuaan na sipan to: “Sikaton mismo so manustini ed sika. Agton balot paulyanan a nasigensigen so matunong a sakey.”​—Salmo 55:22.