Tuan Kaligenan Natan tan ed Maando
ANGGAPO so panduaruwa a si Jehova a Dios so makapangitarya na kaligenan parad totoo to. Sikato so “say Makapanyarin-amin a Sakey.” (Salmo 68:14) Say nikadkaduman ngaran to so mankabaliksan na “Pagmaliwen To.” Saya so mangipapakabat ed sikato bilang say alenleneg a Sakey ed talba a makatalona ed antokaman a babeng ta pian nasumpal iray sipan to tan nagawa so linawa to. Inkuan na Dios a mismo: “Napaneknekan ya ontan so salitak ya ompaway ed sangik. Ag-itan ompawil ed siak ya anggapoy resulta, noagta petepeteg a gawaen to so panliketan ko, tan peteg ya ontalona itan ed angibakian ko.”—Isaias 55:11.
Itatarok na Dios so kaligenan parad saraman so manmamatalek ed sikato. Gagarantiyaan iya na Salita to. “Say ngaran nen Jehova so sakey a mabiskeg a tori,” ontan so inkuan nen makabat ya Arin Solomon ed silong na panangipuyan na Dios. “Ditan so babatikaan na matunong tan naiikdan na proteksion.” Intuloy to nin inkuan: “Siopaman a manmamatalek ed si Jehova so naprotektaan.”—Uliran 18:10; 29:25.
Kaligenan Parad Ariripen na Dios
Lawas itatarya nen Jehova so kaligenan ed saramay onsasaral ed sikato. Alimbawa, nanggayagaan nen propetan Jeremias so proteksion na Dios. Sanen kinubkob na saray armada na Babilonia so apostatan Jerusalem, saray totoo so apilitan a “mangan na tinapay unong ed simbang tan tekep na paga.” (Ezequiel 4:16) Ontanlay inkaatap na situasyon ya inlambong tan kinan na pigaran bibii so dilin ananak da. (Saray Tagleey 2:20; 4:10) Anggaman si Jeremias so inkulong ed saman lapud andi-takot a panagpulong to, sinegurado nen Jehova a “naiikdan na malimpek a tinapay ya inagew-agew manlapud kalsada na saray panidero, anggad kaupot na amin a tinapay ed syudad.”—Jeremias 37:21.
Sanen naplag so Jerusalem ed saray taga Babilonia, si Jeremias so ag-pinatey nisay ginayugor bilang priso a paarap ed Babilonia. Imbes, “say [taga Babilonian] hepe na guardia . . . so angiter ed sikato na sustenton tagano tan sakey a regalo tan binulosan.”—Jeremias 40:5.
Pigaran siglo ed saginonor, pinaseguroan nen Jesu-Kristo so ariripen na Dios: “Agkayo mapaga tan ikuan, ‘Anto so kanen mi?’ odino, ‘Anto so inumen mi?’ odino, ‘Anto so isulong mi?’ Ta amin na sarayan bengatla so sigugunaet a gegegemtanen na nasyones. Ta kabat na mangatatawen ya Ama yo a kaukolan yo irayan amin a bengatla. Mantultuloy, sirin, ya anapen ya unona so panarian tan say inkatunong to, tan amin na sarayan arum nin bengabengatla so niarum ed sikayo.”—Mateo 6:31-33.
Kabaliksan ta na saya a panggayagaan na ariripen nen Jehova so madibinon proteksion manlapud amin a kalamidad natan? Andi, aliwan ontan. Agbulos iray matoor manlapud pakasakitan. Saray tuan Kristiano so mansakit, makasagmak na panamasegsegang, magmaliw a biktima na krimen, ompatey ed saray aksidente, tan manirap ed arum a paraan.
Anggaman agni iiter nen Jehova so sigpot a kaligenan manlapud kasakitan, ipapanengneng na saray report ya uusaren to so pakapanyari to pian taryaan so ariripen to tan protektaan ira. Saray Kristiano so nasasalimbengan met manlapud saray problema lapud iyaaplika ra iray prinsipyo na Biblia ed kabibilay da. (Uliran 22:3) Niarum ni, panggagayagaan da so kaligenan na sankamundoan a panlilimog na maaron agagi ed espiritual, a mantutulongan ed panaon na pankaukolan. (Juan 13:34, 35; Roma 8:28) Alimbawa, bilang ebat ed mairap a kipapasen na agagi ra ed natatabek na bakal a Rwanda, saray Tastasi nen Jehova ed Europa so tampol ya angidonasyon tan angipawit na 65 a toneladan kawes tan $1,600,000 a kantidad na medisina, tagano, tan arum niran suplay.—Ikompara so Gawa 11:28, 29.
Anggaman aabuloyan nen Jehova iray subok ya ondapo ed tuan Kristianos, sikaray napapaseguroan a sikatoy mangiter ed sikara na biskeg, tulong, tan kakabatan pian makapansungdo. Diad impansulat ed saray kapananisiaan, inkuan nen apostol Pablo: “Anggapoy tukson [subok a] sinmabi ed sikayo nilikud ed no anto so kaslakan ed totoo. Balet say Dios so matoor, tan agto paulyanan a tuksoen [suboken] kayo na labas nen naanosan yo, noagta kaiba na say tukso [subok] sikato so manggawa met na dalan a nalabasan ta pian nasungdoan yo itan.”—1 Corinto 10:13; The Emphatic Diaglott.
No Anto so Gagawaen na Dios Parad Totoo To
Natan, minilyon a totoo so naliliketan a manggawa ed linawa na Dios. Ag-ira napipilitan a manlingkor ed Dios; gagawaen da itan lapud sikatoy kabat tan inaro ra. Lapud inaro met nen Jehova so matoor ya ariripen to, gagala ton pasimbaloen so dalin a pagmaliwen a sakey a paraiso a ditan et say matulok a katooan so manggayaga ed kareenan, kabunigasan, tan kaligenan ed maando.—Lucas 23:43.
Gawaen iya na Dios diad panamegley na mangatatawen a gobierno, a say Manuley na satan et say tinuro ton Ari, si Jesu-Kristo. (Daniel 7:13, 14) Tutukoyen na Biblia iyan gobierno bilang “panarian na Dios” tan bilang “say panarian na katawenan.” (1 Corinto 15:50; Mateo 13:44) Say Panarian na Dios so manalat ed amin ya atooan a gobierno. Imbes ed pakawalaan na dakel a gobierno ed dalin, wala lambengat so saksakey a gobierno. Satan so manguley diad inkatunong ed interon dalin.—Salmo 72:7, 8; Daniel 2:44.
Inanatnat nen Jehova ed amin so imbitasyon a manayam ed silong na Panarian. Say sakey a paraan a gagawaen to et diad panamegley na malaknab a panangibunog ed Biblia, say libron mangipapaliwawa ed gawaen na Panarian parad sankatooan. Say Biblia so sankalaknaban a libron nisisirkula, tan satan so naala la, ed intero odino ed kabiangan, diad masulok a 2,000 a lenguahe.
Simamaaron tutulongan nen Jehova so totoo a talosan so ibabangat na Biblia nipaakar ed Panarian. Gagawaen to itan diad panbabangat tan pangibabaki ed totoo pian mangipaliwawa ed Kasulatan ed arum. Masulok a limaran milyon a Tastasi nen Jehova so mangiyaabawag natan ed maong a balita na Panarian na Dios ed masulok a 230 a daldalin.
Tuan Kaligenan Parad Amin?
Awaten ta na balang sakey so imbitasyon a magmaliw ya uuleyan na Panarian na Dios diad panumbok ed matunong iran estandarte to? Andi, lapud dakel a totoo so andian na interes ed panggawa na linaway Dios. Ipupulisay daray sagpot a mamaaligwas ed bilay da. On, ipapanengneng day inkasikara a mipara ed saraman so natutukoy ya angibagaan nen Jesus: “Say puso na sayan totoo so nagmaliw ya agmaawat, tan diad kalayagan da sikara so akadngel ya anggapoy kiwas, tan impikit daray kamataan da; pian agdan balot nanengneng ed kamataan da tan narengel ed kalayagan da tan naala so talos na satan ed kapusoan da tan ompawil, tan napaabig ira [na Dios].”—Mateo 13:15.
Panon a niwala ed ando la ando so tuan kaligenan ed dalin ed utel na saraman so mangipupulisay a manbilay a mitunosan ed matunong iran dalan na Dios? Agnayari. Sisigensigenen na saray andiay-Dios a totoo so kaligenan na saramay malabay a manlingkor ed si Jehova.
Agpapaskaren na Dios so totoo a manguman, balet agto met abuloyan a mansiansia so karelmengan. Anggaman siaanos si Jehova a mantultuloy a mangibabaki ed Tastasi to pian bangatan so totoo nipaakar ed saray dalan tan gagala to, agto itultuloy a gawaen itan a manbayag ni. Impasakbay nen Jesu-Kristo: “Sayan maong a balita na panarian so nipulong ed amin a panaayaman a dalin bilang pantasi ed amin a nasyones; tan insan onsabi so say anggaan.”—Mateo 24:14.
Anto so kabaliksan na “say anggaan” parad saraman so mangipulisay ed saray estandarte na Dios? Kabaliksan toy pirmin kaukom tan kaderal da. Say Biblia so manasalita nipaakar ed “pamales ed saramay agmakaamta ed Dios tan ed saramay ag-ontulok ed maong a balita nipaakar ed Katawan tayon Jesus. Sarayan mismo so managmak na hudisyal a dusa na andi-anggaan a kadederal.”—2 Tesalonica 1:6-9.
Siansia—Tuan Kaligenan ed Maando!
Kayari kadederal na saraman so mangipulisay ed saray dalan nen Jehova ed kareenan, say Panarian na Dios so onsandi ed maglorian panaon na kaligenan parad kagunggunaan na saray matunong ed dalin. (Salmo 37:10, 11) Agaylan pidumaan na satan a balon mundo ed panbibilayan tayo natan!—2 Pedro 3:13.
Say ukol tan eras so anggapo la. Balang sakey so nawalaan na daakan a naakan. Ibabaga na Biblia ya ‘amin a baley so manggayaga ed bangkete na alarakan-a-maong iran tagano.’ (Isaias 25:6) Anggapo lay kakisiran na tagano, lapud “niwala so daakan ya ilik ed dalin; diad tapew na kapalandeyan et onlippua la naani.”—Salmo 72:16.
Agla manayam so totoo ed saray alolong tan kobongkobong. Diad silong na Panarian na Dios, amin so nawalaan na maabig iran ayaman, tan sikaray mangan na tagano a pinawala na dilin dalin da. Isisipan na Biblia: “Sikaray petepeteg a mamaalagey na saray abung tan panayaman da; tan sikaray petepeteg a mantanem na saray ubasan tan kanen day bunga to.”—Isaias 65:21.
Imbes a kasmak so anggapoy trabaho, niwala so mabungan kimey, tan saray totoo so makanengneng ed maong iran resulta manlapud satan. Ibabaga na Salita na Dios: “Say kimey na dilin kalimaan na saray pinilik so mangusar a sigpot. Agda usaren ed andi kana.”—Isaias 65:22, 23.
Diad silong na uley na Panarian, agla manirap so totoo tan ompatey lapud sakit. Ipapaseguro na Salita na Dios ed sikatayo: “Anggapoy manaayam a mangikuan: ‘Mansasakit ak.’”—Isaias 33:24.
Diad mangaraldalin a Paraiso ya asingger lan nagawa, say irirap tan ut-ot, kaermenan tan ipapatey, so naandipat la. On, anggan say ipapatey! Saray totoo so manbilay ya ando lan ando ed Paraiso! Ibabaga na Biblia ed sikatayo a say Dios “so mamunas ed kada lua manlapud kamataan da, tan say ipapatey so anggapo la, nisay say pandageyem nisay say panakis nisay say ut-ot so anggapo la. Say dati iran bengatla so linmabas la.”—Apocalipsis 21:4.
Diad silong na pananguley nen Jesu-Kristo, say “Prinsipi na Kareenan,” say bilay ed dalin so magmaliw a maligen a siansia. On, sankamundoan a kaligenan so niwala ed silong na matunong, maaron uley na sakey a gobierno—say Panarian na Dios.—Isaias 9:6, 7; Apocalipsis 7:9, 17.
[Blurb ed pahina 4]
“Say kaligenan na too so mangipapatnag na pananisia ed arapen, . . . [pananisia ed] inkaligen na mapulitika tan ekonomikon situasyon.”—Sakey a biin manaayam ed Asia
[Blurb ed pahina 5]
“Say agmamaligen ed sika a nagkalalo ed amin et say karawalan tan inkadelingkuenti.”—Sakey a laki a manaayam ed Abalaten America
[Blurb ed pahina 6]
“Agko akalikna na kaligenan legan na . . . ilulusob. No say sakey a bansa so walad bakal, panon so pakaliknay totoo na kaligenan?”—Sakey ya eskuela’d elementarya ed Pegley Bukig
[Blurb ed pahina 7]
“Naliknak so kaligenan sano kabat kon makapanakar ak ed saray kalsada diad labi ya agnapasoot.”—Sakey a biin maneeskuela ed Afrika