Saray Bendisyon Odino Ayew​—Wala so Panpilian!

“Inyan ko so bilay tan patey ed arap mo, say bendisyon tan say ayew; et nepeg mon pilien so bilay pian diad ontan mantultuloy kan manbilay.”​—DEUTERONOMIO 30:19.

1. Pinagamoran so totoo na anton kapasidad?

DENISINYO itayo nen Jehova a Dios​—bilang intelihentin atooan iran pinalsa to​—a magmaliw a walaay bulos linawa. Ag-itayo pinalsa bilang oto-oto, odino robot, noagta sikatayoy inikdan na pribilehyo tan responsabilidad a manpili. (Salmo 100:3) Say inmunan totoo​—si Adan tan Eva​—so bulos a manpili ed kurso na kiwas da, tan sikaray walaay eebatan ed Dios lapud pili ra.

2. Antoy pinili nen Adan, tan anto so resulta?

² Daakan so nitatarok na Manamalsa parad bilay na too ed magnayon iran bendisyon ed paraison dalin. Akin a satan a gagala so agni adampot? Lapud aliwa so pinili nen Adan. Ingganggan nen Jehova so laki: “Manlapud kada kiew na tanamanan mangan ka ed kapenek. Balet no nipaakar ed kiew na pikakabat ed maong tan mauges agmo nepeg so mangan manlapud satan, ta diad agew na pangan mo ed satan petepeteg ya ompatey ka.” (Genesis 2:16, 17) No pinili komon nen Adan so ontulok, say inmunan atateng tayo komon so abendisyonan. Ipapatey so intarok na itutunganga. (Genesis 3:6, 18, 19) Kanian nipasa so kasalanan tan ipapatey ed amin ya ilalak nen Adan.​—Roma 5:12.

Agawan Posibli Iray Bendisyon

3. Panon ya intarya na Dios so panamaseguro a say gagala to parad katooan so nasumpal?

³ Angiletneg si Jehova na paraan pian diad kaunoran et nasumpal so gagala to a nabendisyonan so katooan. Sikaton mismo so angipasakbay nipaakar ed sakey a Bini, a nampropesiya diad Eden: “Mangiyan ak na gulaan ed baetan mo tan say bii tan ed baetan na binim tan bini to. Sugaten to ka ed ulo tan sugaten mo ed mukor.” (Genesis 3:15) Diad saginonor et insipan na Dios a nabendisyonan so matulok a katooan diad panamegley na sayan Bini, sakey a kapolian nen Abraham.​—Genesis 22:15-18.

4. Anton areglo so ginawa nen Jehova diad kabendisyonan na katooan?

⁴ Satan a nisipan a Bini na bendisyon so apaneknekan a si Jesu-Kristo. No nipaakar ed betang nen Jesus diad inyareglo nen Jehova a kabendisyonan na katooan, oniay insulat na Kristianon apostol Pablo: “Irerekomenda na Dios so dilin aro to ed sikatayo a, manwarin sikatayo so managkasalanan, inatey si Kristo parad sikatayo.” (Roma 5:8) Panggayagaan na saramay makasalanan a katooan a tinmulok ed Dios iray bendisyon tan makagamor ed merito na dondon bagat nen Jesu-Kristo. (Gawa 4:12) Pilien mo ta so katutulok tan bendisyones? Say itutunganga so manresulta ed bengatlan duman tuloy.

Komusta Iray Ayew?

5. Anto so kabaliksan na salitan “ayew”?

⁵ Say kasuniyan na bendisyon et ayew. Say salitan “ayew” et kabaliksan toy pansalita na makapuy ed sakey odino pangibalikas na mauges sumpad sikato. Say Hebreon salitan qela·lahʹ so nanlapud lamut a verbon qa·lal’, a say literal a kabaliksan to et “magmaliw ya anlemew.” Balet, sano usaren ed piguratibon pantalos et mankabaliksan itan na ‘pangayew’ odino ‘tratoen tekep na panmudmora.’​—Levitico 20:9; 2 Samuel 19:43.

6. Anton inkagawa a manasaglawi ed si Eliseo so agawa ed asingger na kadaanan a Bethel?

⁶ Konsideraen pay sakey a dramatikon alimbawa na apuraan a kiwas a manasaglawi’d ayew. Saya so agawa legan a say propeta na Dios a si Eliseo so manaakar manlapud Jerico a mamaarap ed Bethel. Oniay kuan na salaysay: “Legan a sikato so ontatatdang ed dalan, walaray ugugaw a lalaki a pinmaway ed syudad et sikatoy ginapoan dan lureyen tan mantultuloy dan ibabaga ed sikato: ‘Ontatdang ka, sika a yangyangan! Ontatdang ka, sika a yangyangan!’ Diad kaunoran linmingaw tan anengneng tora tan inayew tora ed ngaran nen Jehova. Insan duaran kabatyan ya uso so pinmaway ed kakiewan et biningbingkas to so bilang ya apataplo tan dua ya ugugaw.” (2 Arari 2:23, 24) Say eksakton imbaga nen Eliseo so agniparungtal sanen sinalambit to itan ya ayew ed saraman a manluludlurey ya ugugaw. Anggaman kuan, satan ya insangin panangiproklama so epektibo lapud nibalikas diad ngaran nen Jehova ed panamegley na sakey a propeta na Dios a kinmiwas a mitunosan ed madibinon linawa.

7. Anto so agawa ed ugugaw a nanludlurey ed si Eliseo, tan akin?

⁷ Ompatnag a say manunan rason ed impanludlurey et lapud say sulong nen Eliseo so kapadpara na opisyal a kawes nen Elias, tan aglabay na ugugaw a wala so siopaman ya onsublay ed saman a propeta. (2 Arari 2:13) Pian naebatan so angat ed posisyon ton onsublay ed si Elias tan pian bangatan irayan kalangweran ni tan saray atateng da na manepeg a panagrespeto ed propeta nen Jehova, inayew nen Eliseo so manludlurey ya ulop diad ngaran na Dios nen Elias. Impatnag nen Jehova so panangabobon to ed si Eliseo bilang say propeta to diad impangipaway ed duaran kabatyan ya uso ed kakiewan tan biningbingkas so 42 ed saraman a managludlurey. Diretsaan so impideneng nen Jehova ed say butarbutar ya agpanagrespeto ra ed paralanan na pitatalosan ya uusaren to ed dalin ed saman a panaon.

8. Anto so akipaknaan na Israelitas a gawaen, tan tekep na antoran iilaloan?

⁸ Diad asasakbay iran taon, impanengneng na Israelitas so mipadparan agpanagrespeto ed saray areglo na Dios. Onia so inkagawa na satan: Nen 1513 K.K.P., impatnag nen Jehova so panangabobon to ed totoo na Israel diad impangiliktar ed sikara manlapud inkaaripen ed Ehipto a singano “walad saray payak na saray agila.” Kayarin tuloy na satan, sinambaan dan tuloken so Dios. Imanoen no panon a say katutulok et nisiglaot a tuloy ed pakagamor na abobon na Dios. Oniay inkuan nen Jehova diad panamegley nen Moises: “No siaalwar yo komon a tuloken so boses ko tan peteg a tumboken so ganggan ko, diad ontan petepeteg a magmaliw kayon nikadkaduman kayarian ko ed paway na amin ya arum a totoo, lapud say interon dalin so kien ko.” Kayari et inmebat so totoo na on, diad impangibagan: “Amin ya imbalikas nen Jehova so mabulos min gawaen.” (Exodo 19:4, 5, 8; 24:3) Ibabaga na Israelitas ya inaro ra si Jehova, dedikado ed sikato, tan akipaknan tuloken so boses to. Say panggawa ed satan so manresulta ed baleg a bendisyones.

9, 10. Legan a walad Palandey Sinai si Moises, anto so ginawa na Israelitas, tan ed antoran nansumpalan?

⁹ Anggaman kuan, sakbay a saray manunan prinsipyo na satan a paknaan so inyukit ed bato diad ‘gamet na Dios,’ nagmaliw a kapilitan iray madibinon ayew. (Exodo 31:18) Akin a saratan a makapaermen a pansumpalan so makanepegan? Agta impatnag na Israelitas so pilalek dan gawaen ya amin so sinalita nen Jehova? On, diad salita et aanapen day bendisyones, balet diad saray kiwas da pinili ra so kurson makanepegan na saray ayew.

¹⁰ Legan na 40-agew a panaon sanen walad Palandey Sinai si Moises ya awaten so Samploran Ganggan, binuyak na Israelitas so asasakbay a sipan dan katooran ed si Jehova. “Kaleganan,” inkuan na salaysay, “anengneng na totoon abayag lan agni linmasor si Moises manlapud palandey. Kanian saray totoo so nantitipon ed kinen Aaron tan inkuan da ed sikato: ‘Alagey ka, igawaan mo kami na sakey a dios a mangidaulo ed sikami, lapud nipaakar ed sayan Moises, say lakin angitonton ed sikami a pinmaway ed dalin na Ehipto, maseguron agmi la amta no anto so agawa ed sikato.’” (Exodo 32:1) Saya so sananey ya alimbawa na anggapoy respeton awawey a nipatnag ed atooan ya ahensyan inusar ed saman nen Jehova a mangidaulo tan mangiwanwan ed totoo to. Asagyat iray Israelita ya aligen so idolatriya na Ehipto tan inani ra so mauges a nansumpalan sanen 3,000 so pinatey ed saman na kampilan ed sakey agew.​—Exodo 32:2-6, 25-29.

Panangiproklama na Saray Bendisyon tan Ayew

11. Antoran instruksion nipaakar ed saray bendisyon tan ayew so sinumpal nen Josue?

¹¹ Diad pansamposampot na 40-taon ya impanyatawyataw na Israel ed kalawakan, indatak nen Moises iray bendisyon ya anien diad panpili na kurson katutulok ed Dios. Sinalambit to met iray ayew a sagmaken na Israelitas no pilien day itunganga ed si Jehova. (Deuteronomio 27:11–28:10) Agnambayag kayari inloob na Israel ed Insipan a Dalin, sinumpal nen Josue iray instruksion nen Moises a manasaglawi’d sarayan bendisyon tan ayew. Anemiran tribu na Israel so akantanyareg ed salian na Palandey Ebal, tan say sananey ya anemira so akaposisyon ed arap na Palandey Gerizim. Saray Levita so akatanyareg ed baetan na lawak. Mapatnag, a saray tribun akaposisyon ed arap na Palandey Ebal so angibagan “Amen!” ed saray ayew, odino samba, a binasa ed saman a direksion. Say arum so inmebat ed bendisyones a binasa na saray Levita ed saramay walad salian na Palandey Gerizim.​—Josue 8:30-35.

12. Antoray arum ed ayew ya improklama na Levitas?

¹² Isipen pan narerengel yoray Levitas a mangibabagan: “Nisamba so too a manggawa na inukit ya imahen odino tinunaw ya estatua, bengatlan makapadimla ed si Jehova, say sinangal na saray lima na panday, tan angigaton ed satan a maamot a pasen. . . . Nisamba so sakey a mantrato a makapabaing ed ama to tan ina to. . . . Nisamba so sakey a mangisener na ketegan na kapara ton too. . . . Nisamba so sakey a sengegay kabalang na sakey a bulag ed dalan. . . . Nisamba so sakey a mamikewet na panangukom ed say sankailin manaayam, sakey ya andiay aman ugaw a laki tan sakey a balo. . . . Nisamba itan so miakdol ed asawa na ama to, lapud inekalan to so aysing nen ama to. . . . Nisamba so sakey a miakdol ed dinanman ya ayep. . . . Nisamba so sakey a miakdol ed agi ton bii, say anak nen ama to odino anak nen ina to. . . . Nisamba so sakey a miakdol ed katulangan ton bii. . . . Nisamba so sakey a mamekpek a mamatey ed kapara ton too manlapud amotan a pasen. . . . Nisamba so sakey a mangawat na pasuksuk pian mamekpek a pateyen so kamarerwa, sano satan so andi-kasalanan a dala. . . . Nisamba so sakey ya agto iyan irayan salita na sayan ganggan diad mapilit a panggawa ed saraya.” Kayari na kada ayew, saray tribun walad arap na Palandey Ebal so mangibagan, “Amen!”​—Deuteronomio 27:15-26.

13. Diad dilin salitam, panon mon ibalikas so pigaran bendisyones ya improklama na Levitas?

¹³ Natan isipen pan narerengel yora’may walad arap na Palandey Gerizim a makbaw ya inmebat ed kada bendisyon legan ya ikekelyaw na saray Levita: “Bendito ka a wala ed syudad, bendito ka a wala ed uma. Bendito so magmaliw a bunga na eges tan bunga na dalin tan bunga na maamon ayep, say kilaw na saray bakam tan anak na pulok mo. Bendito so boksot mo tan panagmasaan mo. Bendito ka sano onloob ka, tan bendito ka sano ompaway ka.”​—Deuteronomio 28:3-6.

14. Diad anton basiyan ed pakaawat na saray bendisyon na saray Israelita?

¹⁴ Anto so basiyan ed pakaawat na sarayan bendisyon? Oniay kuan na salaysay: “No agkayo onkulang ya ontalineng ed boses nen Jehova a Dios yo diad pagmaliw yon maalwar pian gawaen so amin a ganggan to ya igaganggan ko ed sikayo natan, si Jehova a Dios yo so maseguron iyan to kayo a manuna ed amin ya arum a nasyon ed dalin. Tan amin na sarayan bendisyon so nepeg ya onsabi ed sikayo tan naabot yo, lapud mantultuloy yon tatalinengen so boses nen Jehova a Dios yo.” (Deuteronomio 28:1, 2) On, say tombok ed pakapanggayaga ed madibino iran bendisyon et say katutulok ed Dios. Balet komusta ed sikatayo natan? Kasin bilang indibidual et pilien tayoy bendisyon tan bilay diad pantultuloy a “talinengen so boses nen Jehova”?​—Deuteronomio 30:19, 20.

Suston Pangimano

15. Anton importantin punto so agawa ed bendisyon a nirekord ed Deuteronomio 28:3, tan panon tayon nagunggunaan manlapud satan?

¹⁵ Isip-isipen tayo pa iray bendisyon a napanggayagaan na sakey ya Israelita lapud katutulok ed si Jehova. Alimbawa, oniay kuan na Deuteronomio 28:3: “Bendito ka a wala ed syudad, tan bendito ka a wala ed uma.” Say pamendisyon na Dios so agmandepende ed lugar odino asainmin. Liknaen na arum a sikaray asukop na saray sirkumstansya ra, anganko ta sikaray manaayam ed ageraygeray a lugar odino natatabek na bakal a bansa. Nayarin panpirawatan na arum a panlingkoran si Jehova ed duman lugar. Arum a Kristianon lalaki so nadidismaya lapud agnira aturon ministeryal ya aripen odino bilang matatken ed loob na kongregasyon. No maminsan, naandiay ilalo iray Kristianon bibii lapud anggapo ira ed kipapasen a makapansigpot-panaon ed ministeryo bilang payunir odino misionera. Ingen, amin ya ‘ontatalineng ed boses nen Jehova tan siaalwar a gawaen so amin a kakaukolanen to’ so nabendisyonan natan tan ed inkamagnayon.

16. Panon a say prinsipyo ed Deuteronomio 28:4 so naeeksperiensia na organisasyon nen Jehova natan?

¹⁶ Oniay kuan na Deuteronomio 28:4: “Bendito so magmaliw a bunga na eges mo tan bunga na dalin tan bunga na maamon ayep mo, say kilaw na saray bakam tan anak na pulok mo.” Say panangusar ed singular a Hebreon pronombren “mo” so mangipapanengneng a saya so personal a naeksperiensia na matulok ya Israelita. Komusta iray matulok ya ariripen nen Jehova natan? Say sankamundoan ya idaraak tan ilalaknab a nagagawa diad loob na organisasyon na Tastasi nen Jehova so resulta na bendisyon na Dios lapud masimoon a sagpot na masulok a 5,000,000 a manangiproklama na maong a balita na Panarian. (Marcos 13:10) Tan say potensyal parad babaleg ya idaak so napatnagan lapud masulok a 13,000,000 so inmatendi ed impanngilin ed Pangdem na Katawan. Kasin panggagayagaan mo irayan bendisyon na Panarian?

Walay Pidumaan na Pili na Israel

17. Diad ‘pakaabot’ na saray bendisyon odino na saray ayew so mandependi ed anto?

¹⁷ Ngalngali amin, saray bendisyon so mangusil ed sakey a matulok ya Israelita. Nisipan iya: “Amin na sarayan bendisyon so nepeg ya onsabi ed sika tan aaboten to ka.” (Deuteronomio 28:2) Mipadpara, nibaga nipaakar ed saray ayew: “Amin na sarayan ayew so nepeg ya onsabi ed sika tan aaboten to ka.” (Deuteronomio 28:15) No sakey kan Israelita ed saman a panaon, kasin sika so ‘naabot’ na saray bendisyon odino na saray ayew? Satan so mandependi ed no kasin tuloken mo so Dios odino ontunganga ka ed sikato.

18. Panon ya apaliisan komon na Israelitas iray ayew?

¹⁸ Diad Deuteronomio 28:15-68, say ansakit a nansumpalan na katutunganga so nipapalapag bilang ayew. Arum so eksakton kasunian na saray bendisyon lapud katutulok ya inbinsabinsa ed Deuteronomio 28:3-14. Mabetbet, inani met na Israelitas iray alablabas a resulta na ayew lapud pinili ra so mibiang ed palson panagdayew. (Esdras 9:7; Jeremias 6:6-8; 44:2-6) Agaylan makapaermen! Saratan a nansumpalan so apaliisan komon diad dugan impanpili, salanti say katutulok ed alay abig iran ganggan tan prinsipyos nen Jehova, a malinlinew a mangibibiig ed maong tan mauges. Dakel natan so manasagmak na ot-ot tan trahedya lapud pinili ra so onkiwas a sumlang ed saray prinsipyo na Biblia diad pangaagamil na palson relihyon, pibibiang ed seksual ya imoralidad, panguusar na isesebel iran druga, alabas ed de-alkohol ya iinumen, tan mipadpara nira. Singa ed kadaanan ya Israel tan Juda, say mauges a panpili ed saratan so manresulta ed madibinon agpanangabobon tan agkapilitan a sulit na puso.​—Isaias 65:12-14.

19. Deskribien iray kondisyon a nanggayagaan sanen pinili na Juda tan Israel a tuloken si Jehova?

¹⁹ Daakan so bendisyon tan niwala so inkaligen lambengat sanen tinulok na Israel si Jehova. Alimbawa, singa diad agew nen Arin Solomon, nabasa tayo: “Say Juda tan Israel so dakel, singa saray buer a wala ed dayat ed karaklan, mamangan tan maniinum tan manliliket. . . . Tan say Juda tan say Israel so nantultuloy a nanayam ed kaligenan, amin ed silong na dili ton ubas tan silong na dili ton kiew ya higos, manlapud Dan ya angga ed Beer-seba, ed amin ya agew nen Solomon.” (1 Arari 4:20-25) Anggano diad panaon nen Arin David et walay pirmin isusumpa na kakabusol na Dios, asagmak na nasyon so pananulong tan panamendisyon nen Jehova sanen pinili ra so itulok ed Dios na katuaan.​—2 Samuel 7:28, 29; 8:1-15.

20. Diad anto a matalek so Dios no nipaakar ed katooan?

²⁰ Kasin tuloken mo so Dios, odino andi? Walaan iray Israelita na panpilian. Anggaman akatawir tayon amin na makasalanan ya inklinasyon manlapud Adan, naawat tayo met so regalo na kawayangan a manpili. Anggaman wadtan si Satanas, sayan marelmeng a mundo, tan say ag-inkayadyari tayo, sikatayo so makapanggawa na suston panpili. Niarum ni, matalek so Manamalsa tayo ya anggan ed arap na amin a subok tan tukso, walara so sustoy pili ra, aliwa lambengat diad salita noagta diad kiwas met. (1 Pedro 5:8-10) Kasin sakey ka ed sikara?

21. Anto so nausisa ed ontumbok ya artikulo?

²¹ Diad ontumbok ya artikulo, nakonsidera tayon maong so awawey tan kiwas tayo diad liwawa na saray apalabas ya alimbawa. Komon ta balang sakey ed sikatayo so onkiwas tekep na otang a linawa ed saray salita na Dios diad panamegley nen Moises: “Inyan ko so bilay tan patey ed arap mo, say bendisyon tan say ayew; et nepeg mon pilien so bilay pian diad ontan mantultuloy kan manbilay.”​—Deuteronomio 30:19.

Panon Yon Ebatan?

◻ Panon a ginawan posibli nen Jehova iray bendisyon parad makasalanan a totoo?

◻ Antoray ayew?

◻ Panon a naawat komon na Israelitas iray bendisyon imbes a saray ayew?

◻ Antoran bendisyon so nanggayagaan na Israel lapud intulok ed Dios?

[Litrato ed pahina 15]

Nantitipon iray Israelita ed arap na Palandey Gerizim tan Palandey Ebal

[Credit Line]

Pictorial Archive (Near Eastern History) Est.