Saray Bendisyon Odino Ayew—Alimbawa Parad Sikatayo Natan
“Sarayan bengatla so dinmapo ed sikara bilang alimbawa, tan nisulat iratan parad sakey a pasakbay ed sikatayo a nasabian na panganggaan na sistema na bengabengatla.”—1 CORINTO 10:11.
1. No panon a say sakey et inspeksionen to so sakey a kagawaan, anton panag-inspeksion so kaukolan tayon gawaen?
AGNANENGNENG so walad silong na latop na pintora, say lati so onggapon maneral ed sakey a kagawaan a gawa’d balatyang. Nayarin onlabas ni pigaran panaon sakbay ya ompatnag so lati. Mipadpara, saray awawey tan pilalek na puso na sakey so onggapon onaliwa sakbay a satan so manresulta ed graben pansumpalan odino naimano ni ingen na arum. No panon a sikakabat tayon inspeksionen so sakey a kagawaan pian nengnengen no kasin onlalati la, ontan met a say panginspeksion ed kapusoan tayo tan nipanpanaon a pangasikaso ed satan so mamasiansia ed Kristianon integridad tayo. Diad arum a salita, naawat tayoray bendisyon na Dios tan napaliisan iray madibinon ayew. Nayarin isipen na arum a say niproklaman bendisyon tan ayew ed kadaanan ya Israel so walaay samet a kabaliksan ed saramay nidudunget ed konklusyon na sayan sistema na bengabengatla. (Josue 8:34, 35; Mateo 13:49, 50; 24:3) Balet, aliwan ontan. Nagunggunaan itayon tuloy manlapud manamasakbay iran alimbawan manasaglawi ed Israel, a singa nibalikas ed 1 Corinto kapitulo 10.
2. Anto so ibabaga na 1 Corinto 10:5, 6 nipaakar ed saray eksperiensia na Israel ed kalawakan?
2 Inkompara nen apostol Pablo iray Israelita ed silong nen Moises ed saray Kristiano ed silong nen Kristo. (1 Corinto 10:1-4) Anggaman, diad biang na saray Israelita et no tinmulok ira akaloob ira komon ed Insipan a Dalin, “ag-imbalikas na Dios so abobon to ed maslak ed sikara, ta sikaray nimedmer ed kalawakan.” Kanian imbaga nen Pablo ed kapara ton Kristianos: “Natan sarayan bengatla so nagmaliw ya alimbawa tayo, ta pian agtayo magmaliw a totoon manpilalek na makapasakit iran bengatla, a singa impanpilalek da ed saratan.” (1 Corinto 10:5, 6) Saray pilalek so nababayuboan ed puso, kanian kaukolan tayon tumboken iray manamasakbay ya alimbawan sinalambit nen Pablo.
Pasakbay Sumpad Idolatriya
3. Panon a nankasalanan iray Israelita no nipaakar ed binmalitok a kilaw?
3 Say inmunan pasakbay nen Pablo so: “Anggan say pagmaliw a managtalintao, a singa ginawa na pigara ed sikara; a walan nisulat: ‘Saray totoo so nanyurong pian mangan tan oninum, et inmalagey ira tan nanliliket.’” (1 Corinto 10:7) Sayan manamasakbay ya alimbawa so nipaakar ed impawil na Israelitas ed saray dalan na Ehipto tan impanggawa na idolatroson binmalitok a kilaw. (Exodo, kapitulo 32) Impanengneng nen babangatan ya Esteban so basiyan na problema: “Diad [si Moises, a representanti na Dios] saray atateng tayo so angipulisay ya ontulok, balet inwagsil da tan diad kapusoan da pinmawil ira ed Ehipto, a kuanda ed si Aaron, ‘Manggawa ka na dirios a parad sikami a mangiuna ed sikami. Ta sayan Moises ya angipaway ed sikami ed dalin na Ehipto, agmi la amta no anto so agawa ed sikato.’ Kanian nanggawa ira na sakey a kilaw a baka ed saraman ya agew et angiyakar ira na bagat ed diosdiosan et ginapoan da so nanggayaga ed inkasikara diad saray gawa na lima ra.” (Gawa 7:39-41) Imanoen a “diad kapusoan da” saray bangar ya Israelita so walaan na mauges a pilalek ya angitonton ed idolatriya: “Nanggawa ira na kilaw a baka . . . et angawit na sakey a bagat ed diosdiosan.” Niarum ni, “ginapoan day nanggayaga ed inkasikara diad gawa na saray lima ra.” Wala so musika, panagkanta, panagsayaw, panangan, tan panag-inum. Mapatpatnag, say idolatriya so makapaayat tan makaligliwa.
4, 5. Antoran idolatroson agagamil so kaukolan tayon paliisan?
4 Say antitipikon Ehipto—mundo nen Satanas—diad ontan et mandadayew ed panliliket. (1 Juan 5:19; Apocalipsis 11:8) Iidoloen toray artista, kumakanta, tan saray sikat ed esport, ontan met ed panagsayaw da, musika ra, saray ideya ra ed marakep tan makapaliket a panaon. Dakel so natutukson nigalet ed panliliket bangta ibabaga ran dadayewen da si Jehova. Sano say sakey a Kristiano so nepeg a nabaat ed gawan-mauges, say apakapuy a kipapasen to ed espiritual so mabetbet a nasuysuy ed panag-inum na de-alkohol, panagsayaw, tan pakawalaan na makapaliket a panaon diad sakey a paraan a satan so dawdawit lan idolatriya. (Exodo 32:5, 6, 17, 18) Arum a panliliket so maabig tan napanggayagaan. Balet, natan et maslak ed minumundon musika, panagsayaw, sine, tan videos so mangisusuplay na makaderal tan silalaman a pilpilalek.
5 Ag-onsusuko iray tuan Kristiano ed panagdayew na saray idolo. (2 Corinto 6:16; 1 Juan 5:21) Komon ta kada sakey ed sikatayo so manalwar ta pian agnaadik ed idolatroson panliliket tan nirisgay panirap ed makapakapuy ya epekto na kigalet ed pakawalaan na makapaliket a panaon diad minumundon dalan. No pauleyan tayoy inkasikatayo ed minumundon impluensya, say makapasakit a pilpilalek tan awawey so agnaliklikas a manayam ed kanonotan tan puso. Sano agnakorihe, diad kaunoran et saraya so manresulta ed ‘kimedmer ed kalawakan’ na sistema nen Satanas.
6. Anton positibon kiwas so kaukolan tayon alaen no nipaakar ed panliliket?
6 Singa si Moises ed panaon na binmalitok-kilaw ya insidenti, diad nansumpalan et inkuan na “matoor tan makabat ya aripen”: “Siopa so wala ed dapag nen Jehova? Onla ed siak!” Say pangala na positibon kiwas ya ipanengneng a sikatayoy malet ya akatalindeg parad tuan panagdayew so makasalbay bilay. Say tribu nen Moises a Levi so kinmiwas a tampol pian ekalen so makaderal iran impluensya. (Mateo 24:45-47: Exodo 32:26-28) Kanian, sirin, siaalwar ya usisaen so pili yon panliliket, musika, videos, tan mipadpara ni. No satan so makaderal diad pigaran paraan, ondapag parad si Jehova. Tekep na sipipikasin panmatalek ed Dios, salatan moy pilim ed panliliket tan musika, tan deralen so makaderal ed espiritual a materyal, no panon a dineral nen Moises so kilaw a balitok.—Exodo 32:20; Deuteronomio 9:21.
7. Panon tayon naprotektaan so piguratibon puso?
7 Panon tayon nasumbraan so pakalati na say puso? Diad siseseet a panaral na Salitay Dios, diad pangisepsep ed saray katuaan to ed kanonotan tan kapusoan tayo. (Roma 12:1, 2) Siempre, kaukolan tayon atendian a regular iray Kristianon miting. (Hebreos 10:24, 25) Say agsiaaktibon pibiang ed iyaatendi ed saray miting so niyaliling ed pintura ed tapew na lati. Nayarin saya so mamaligsa ed sikatayo ed magano, balet agton talaga resolbien so sengegan na problema. Imbes, diad akauna lan preparasyon, panagdalepdep, tan aktibon pibiang ed saray miting, sigugunaet tayon ekalen iray makalatin elementon nayarin wadtan ni a kiamotamot ed piguratibon puso tayo. Ontulong iya ed sikatayon tumboken so Salitay Dios tan mamabiskeg ed sikatayon natepelan iray subok na pananisia tan magmaliw a “maptek ed amin a pamaakaran.”—Santiago 1:3, 4; Uliran 15:28.
Pasakbay Sumpad Pilalawanan
8-10. (a) Anton manamasakbay ya alimbawa so atukoy ed 1 Corinto 10:8? (b) Panon a saray salita nen Jesus a naromog ed Mateo 5:27, 28 et niyaplika ed kagunggunaan?
8 Diad ontumbok ya alimbawa nen Pablo, nasisimbawa itayon: “Agtayo met ugalien so pilalawanan, a singa pigara ed sikara so akagawa na pilalawanan, ta pian nabaktar, duamplo tan talo ed sikara ed sakey agew.”a (1 Corinto 10:8) Tinukoy na apostol so panaon sanen nandakmomo iray Israelita ed palson dirios tan awalaan na “imoral a relasyon ed saray anak a bibii nen Moab.” (Numeros 25:1-9) Say seksual ya imoralidad so dudusaey ipapatey! Say pamaulyan ed imoral iran kanonotan tan pilalek a mantultuloy ya agpupugeran so singa pangiyaabuloy ed “ilalati” na puso. Oniay imbalikas nen Jesus: “Nadngel yo a nikuan, ‘Agka mikakalugoran.’ Balet ikuan ko ed sikayo a siopaman ya itultuloy toy onnengneng ed sakey a bii ta pian nawalaan na pankaliktan ed sikato so akapikalugoran la ed sikato diad puso to.”—Mateo 5:27, 28.
9 Diad panestigo ed saray pansumpalan na ‘inengneng pian nawalaan na pankaliktan ed sakey a bii’ so resulta na nipaabeban panag-isip na matungangan angheles sakbay na Delap ed agew nen Noe. (Genesis 6:1, 2) Tandaan met, a sakey ed sankaermenan ya insidenti ed bilay nen Arin David so aselselan diad panamegley na tuloytuloy a sebel ya inenengneng ed sakey a bii. (2 Samuel 11:1-4) Diad pidumaan, say matunong a walaay asawan Job so ‘akisipanan ed mata to ya agto ipanengneng so inkasikato ya atentibo ed sakey a birhen,’ diad ontan et aarawian so imoralidad tan papaneknekan a manamemben integridad. (Job 31:1-3, 6-11) Niyaliling so mata ed saray bintana na puso. Tan nipaway so dakel a marelmeng a bengatla manlapud abulok a puso.—Marcos 7:20-23.
10 No iyaplika tayoray salita nen Jesus, agtayo abuloyan ya agnapokpokan so kawayangan ed panganamot na mauges a kanonotan diad inengneng ed pornograpikon materyal odino pangipaslep ed nonot na imoral a kanonotan nipaakar ed kaparan Kristiano, katrabahoan, odino siopaman ni. Agnaekal so lati manlapud metal diad pankarkar labat na lati. Kanian, agbasta labat ekalen iramay imoral ya ideya tan tendensya a singano samet labat so epekto ra. Kaukolan so mabiskeg ya ikiwas pian ekalen moray imoral a pakasagyatan mo. (Ikompara so Mateo 5:29, 30.) Sinimbawa nen Pablo iray kapananisiaan: “Pateyen . . . iray kabiangan na laman yo a wala ed dalin no nipaakar ed pilalawanan, karutakan, panpirawat ed sekso, makapasakit a pilalek, tan inkaagum, a satan so panagtalintao. Unong ed saratan a bengatla onsabi so pasnok na Dios.” On, nisesengeg ed saratan a bengatla a singa say seksual ya imoralidad, “onsabi so pasnok na Dios” bilang balikas na ayew to. Kanian kaukolan tayon “pateyen” iray membro na laman tayo no nipaakar ed sarayan bengatla.—Colosas 3:5, 6.
Pasakbay Sumpad Rebelyoson Panagreklamo
11, 12. (a) Anton pasakbay so iiter na 1 Corinto 10:9, tan anton insidenti so tinukoy? (b) Panon a say pasakbay nen Pablo so mangaapekta ed sikatayo?
11 Tinmumbok et nanpasakbay si Pablo: “Agtayo met iyan ed pakasubokan si Jehova, singa pigara ed sikara inyan da ed pakasubokan, ta pian ompatey labat ed panamegley na saray serpienti.” (1 Corinto 10:9) Legan a manbabaroy diad kalawakan ed asingger na ketegan na Edom, saray Israelita so “nantultuloy a nansalita sumpad Dios tan si Moises: ‘Akin ya inawit mo kamin ompaway ed Ehipto pian ompatey diad kalawakan? Ta anggapo so tinapay tan anggapo so danum, tan binusol na kamarerwa mi so makapadimla a tinapay,’” say mamilagron nitarya a mana. (Numeros 21:4, 5) Isipen pa! Saraman ya Israelita so “nantultuloy a nansalita sumpad Dios,” a tinawag iray probisyon to a makapadimla!
12 Diad impanreklamo ra, susuboken na Israelitas so anos nen Jehova. Ag-insener so dusa, ta imbaki nen Jehova iray maditan serpiente ed pegley da, tan dakel so inatey lapud ketket na serpiente. Kayari impanbabawi na totoo tan insalet nen Moises ed biang da, say bakbak so anampot. (Numeros 21:6-9) Maseguron sayan insidenti so onkana bilang pasakbay ed sikatayo natan ya agmangipanengneng na rebelyoso, mareklamon awawey, nagkalalo la sumpad Dios tan ed teokratikon areglos to.
Pasakbay Sumpad Panagmeremere
13. Sumpad anto a mamapasakbay so 1 Corinto 10:10, tan anton rebelyon so walad kanonotan nen Pablo?
13 Diad impanalambit ed kaunoran ya alimbawa ton manasaglawi ed Israelitas diad kalawakan, insulat nen Pablo: “Agtayo magmaliw a managmeremere, a singa pigara ed sikara so nanmeremere, ta pian natawtaw labat ed panamegley na managderal.” (1 Corinto 10:10) Tinmerak so rebelyon sanen si Kore, Datan, Abiram, tan saray kakaiba ra so kinmiwas ed agteokratikon paraan tan inangat da so autoridad nen Moises tan Aaron. (Numeros 16:1-3) Kayari inkaderal na saray rebelde, ginmapon nanmeremere iray Israelita. Saya so lapud ginapoan dan ikatunongan a say impaneral ed saray rebelde so agmakatunongan. Oniay kuan na Numeros 16:41: “Tampol diad tinmumbok ya agew say interon doypo na saray ilalak na Israel so ginmapon mantalabutob sumpad si Moises tan Aaron, a kuanda: ‘Sikayon lalaki, inyan yo ed ipapatey iray totoo nen Jehova.’” Bilang resulta na impamalaw da ed paraan na inkahustisya ed saman ya inkagawa, 14,700 ya Israelitas so atawtaw lapud madibinon nipasabin inkakastigo.—Numeros 16:49.
14, 15. (a) Anto so sakey ed saray kasalanan na “agmaridios a totoo” a linmoob ed kongregasyon? (b) Anto so naaralan tayo manlapud insidentin manasaglawi ed si Kore?
14 Diad inmunan siglo K.P., say “agmaridios a totoo” a sisisilib a linmoob ed Kristianon kongregasyon so apaneknekan a palson managbangat ontan met a managmeremere. “Ibabaliwala [na sarayan lalaki] so inkakatawan tan mansasalita a siaabuso ed saray magloria,” ya alanaan a lalaki a nimatalekan a mangasikaso ed espiritualidad na kongregasyon. Nipaakar ed agmaridios iran apostata, inkuan met nen babangatan a Judas: “Sarayan totoo so managmeremere, managreklamo nipaakar ed kipapasen na bilay da, ya onggapo unong ed dili ran pilpilalek.” (Judas 3, 4, 8, 16) Natan, arum ya indibidual so nagmaliw a managmeremere met lapud aabuloyan day alatian ed espiritual ya awawey a nabayuboan ed puso ra. Mabetbet ya isesentro ra ed saray ag-inkayadyari na saramay manangasikaso ed kongregasyon tan gapoan day manmeremere sumpad sikara. Say panagmeremere ra tan panagreklamo ra so onlaknab ni ingen ed pamalaw ed saray palapagan na ‘matoor ya aripen.’
15 Manepeg labat so panepet na masimoon a tepetepet nipaakar ed Makasulatan a tema. Balet panon to no nabayuboan tayo so negatibon awawey a nipatnag a mismo ed kritikon pantotongtongan ed limog na maapit a sirkulo na kakaaro? Marakep no tepetan tayoy inkasikatayo, ‘Anto so pansumpalan na saya? Agta magmaong a tuloy no intunday panmeremere tan sipapaabeban ipikasi kakabatan?’ (Santiago 1:5-8; Judas 17-21) Si Kore tan saray managsuporta to, a nanrebelde sumpad autoridad nen Moises tan Aaron, so nayarin kombensidon tuloy a say panmoria ra so susto ya agda la inusisa iray motibo ra. Ontan met so agawa’d nanmeremeren Israelitas nipaakar ed impaneral ed si Kore tan arum niran rebelde. Agaylan makabat so pangiyabuloy ed saratan ya alimbawa a mamakiwas ed sikatayon usisaen so motibo tayo, pagiten so panagmeremere odino panagreklamo, tan abuloyan si Jehova a pinoen to itayo!—Salmo 17:1-3.
Manaral, tan Panggayagaay Bendisyones
16. Anto so segek na pananimbawa ed 1 Corinto 10:11, 12?
16 Diad silong na madibinon panangipuyan, sinampotan nen Pablo so listaan na manamasakbay a mensahe tekep na simbawan: “Natan sarayan bengatla so apaktak ed sikara bilang alalimbawa, et nisulat iratan parad sakey a pasakbay ed sikatayo a nasabian na saray sistema na bengabengatla. Dia ed satan say manisip ya akaalagey so manalwar komon a sikato so agnatumba.” (1 Corinto 10:11, 12) Agtayo komon babaliwalaen so talindeg tayo ed loob na Kristianon kongregasyon.
17. No alikas tayon walay agmanepeg a motibo ed puso tayo, anto so kaukolan tayon gawaen?
17 No panon a say balatyang et walaay tendensyan onlati, sikatayo met a kapolian nen makasalanan ya Adan so akatawir na inklinasyon ed kaugsan. (Genesis 8:21; Roma 5:12) Kanian, agtayo komon nadismaya no alikas tayon walay agmanepeg a motibo ed puso tayo. Imbes, desidido tayon onkiwas. Sano say balatyang et niparangtal ed dagem odino makalatin kaliberliber, onloor so ilati to. Kaukolan tayon paliisan so kiparangtal ed “dagem” ed mundo nen Satanas, pati ed mabanday a panliliket, kasmak ya imoralidad, tan negatibon inklinasyon na nonot.—Efeso 2:1, 2.
18. Anto so nagagawaan nen Jehova no nipaakar ed mauges iran tendensya na katooan?
18 Intarok la nen Jehova parad sankatooan so paraan pian nasumbraan iray mauges a tendensyan atawir tayo. Inter to so bogbogtong ya anak to ta pian saramay mangaagamil na pananisia ed sikato so nawalaan na andi-anggaan a bilay. (Juan 3:16) No tumboken tayon maapit iray bakat nen Jesus tan ipatnag so singa-Kriston personalidad, magmaliw itayon bendisyon parad arum. (1 Pedro 2:21) Makaawat itayo met na madibinon bendisyones, ya aliwan saray ayew.
19. Panon itayon nagunggunaan manlapud pangonsidera ed Makasulatan iran alimbawa?
19 Anggaman sikatayo natan so mainomay a nalingo a singa ed Israelitas ed inmuna, walaan tayo na kompleton nisulat a Salita na Dios a mangigiya ed sikatayo. Manlapud saray pahina to et naamtaan tayoray impideneng nen Jehova ed katooan ontan met ed kualidades ton insindag nen Jesus, ‘say aninag na gloria na Dios tan eksakton itsura na mismon inkasikato.’ (Hebreos 1:1-3; Juan 14:9, 10) Diad panamegley na pikakasi tan maseet a panaral ed Kasulatan, nawalaan itayo na “kanonotan nen Kristo.” (1 Corinto 2:16) Sano nipaarap ed tukso tan arum niran subok na pananisia tayo, nagunggunaan itayo diad pangonsidera ed kadaanan a Makasulatan iran alimbawa tan nagkalalo la ed superlatibon uliran nen Jesu-Kristo. No gawaen tayo so ontan, agtayo nasagmak so madibino iran ayew. Imbes, panggayagaan tayo natan so abobon nen Jehova tan saray bendisyon to ed maando.
[Paimano ed leksab]
a Nengnengen so The Watchtower na Hulyo 15, 1992, pahina 4.
Panon Yon Ebatan?
◻ Panon tayon niyaplika so konseho nen Pablo ya agmagmaliw a managtalintao?
◻ Anto so nagawaan tayo pian tumboken so pasakbay na apostol sumpad pilalawanan?
◻ Akin a kaukolan tayon paliisan so panagmeremere tan panagreklamo?
◻ Panon tayon naawat iray madibinon bendisyon, aliwan saray ayew?
[Litrato ed pahina 18]
No labay tayo iray madibino a bendisyon, nepeg tayon paliisan so idolatriya
[Saray litrato ed pahina 20]
No panon a say lati et nakaukolan ya ekalen, mangala tayo na positibon kiwas ed pangekal na agmanepeg iran pilalek manlapud kapusoan tayo