Ginawa Ra so Linawa nen Jehova

Binautismoan nen Filipe so Etiopen Opisyal

LEGAN ya akalugan ed karwahe to, sikakabat ya inusar na sakey ya Etiope so oras to. Sikatoy manbabasan maksil​—kaslakan ya ugali ed limog na inmunan-siglo iran managbiahe. Sayan too so sakey ya opisyal ed “pakauley ed leksab nen Candace a reina na saray taga Etiopia.”a Sikato so “managimaton ed amin a kayarian [to]”​—diad ontan et sikato so sakey a ministro ed pinansyal. Babasaen na sayan opisyal so Salita na Dios ta pian makagamor na pikakabat.​—Gawa 8:27, 28.

Asingger ed saman so ebanghelisador a Filipe. Sikatoy inwanwan na anghel ed sayan lugar, tan nibaga ed sikaton: “Onasingger ka et miulop ka ed sayan luganan.” (Gawa 8:26, 29) Nayarin isipen tayon intepet nen Filipe ed inkasikato, ‘Siopa iyan laki? Antoy babasaen to? Akin a niwanwan ak ed sikato?’

Legan ya akapibansag la si Filipe ed karwahe, apatipatan to irayan salitan babasaen na Etiope: “Singa sakey ya oveja a niakar ed panagpateyan, tan singa kilaw na karnero a naumel ed arap na manangiskis ed sikato, ontan ya agto bisuaten so sangi to. Dia ed inpaabeba to inekal da so katunongan to. Siopa naani mangipaliwawa ed kapolian to? Ta say bilay to naekal dia ed dalin.”​—Gawa 8:32, 33.

Abidbir a tampol nen Filipe iraman ya estansa. Saman so sulat nen Isaias. (Isaias 53:7, 8) Nakekewkew so Etiope ed babasaen to. Ginapoan nen Filipe so tongtongan diad impantepet: “Natalosan mo so babasaen mo?” Inmebat so Etiope: “Panon so pakayarik, no anggapo so mangiwanwan ed siak?” Et akikasi ed si Filipe ya onsapat ed karwahe to.​—Gawa 8:30, 31.

“Anto so Makasbel a Nabautismoan Ak?”

“Kerewen ko ed sika,” inkuan na Etiope ed Filipe, “siopa so pansalitaan na propeta na onia? Sikaton dili odino wala so arum?” (Gawa 8:34) Say inkawetwet na Etiope so agmakapakelaw, ta say pakapatnagan ed “karnero,” odino “aripen,” ed propesiya nen Isaias so abayag lan sakey a misteryo. (Isaias 53:11) Agaylay alinewan iya sanen “inpulong [nen Filipe ed Etiope] si Jesus”! Kabekta inkuan na Etiope: “Nia so danum, anto so makasbel a nabinyagan [nabautismoan, NW] ak?” Kanian sikato so binautismoan ed saman a tampol nen Filipe.​—Gawa 8:35-38.

Kasin manapurasta iyan kiwas? Andin balot! Say Etiope so sakey a Judion proselita.b Kanian sikato lay sakey a managdayew nen Jehova a walaay pikakabat ed Kasulatan, a laktipen toray Mesianikon propesiya. Balet, say pikakabat to so agkompleto. Natan ta naawat to la iyan makanan impormasyon ed betang nen Jesu-Kristo, atalosan na Etiope la no antoy kakaukolanen na Dios ed sikato tan akaparaan a mangunor. Matukoy la’d satan so bautismo.​—Mateo 28:18-20; 1 Pedro 3:21.

Insan, “say espiritu na Katawan sinamsam to si Filipe.” Sikatoy linma ed sananey ya asainmin. Say Etiope “intuloy to so dalan to a malikeliket.”​—Gawa 8:39, 40.

Leksion Parad Sikatayo

Bilang ariripen natan nen Jehova, obligasyon tayon tulongan iray matuan-impanpuson indibidual ya aralen so katuaan na Salita na Dios. Dakel so tinmalona ed impangiparungtal na maong a balita ed arum legan na panbiabiahe odino ed arum niran impormal a sirkumstansya. Bilang resulta na panangipulong na Panarian, tinaon et nilasus nilibo so mangisisimbolo na dedikasyon da ed si Jehova a Dios diad impanpabautismo ra.

Siempre, agkaukolan ya apuraen iray balobalo ni a manpabautismo. Ta nepeg dan gamoran ni suston pikakabat ed si Jehova a Dios tan ed Anak to, si Jesu-Kristo. (Juan 17:3) Insan sikaray nepeg a magbabawi, ya italirak so mauges a kondukta tan benegan itan ta pian makapitunosan ed saray estandarte na Dios. (Gawa 3:19) Mankakaukolan iya na panaon, nagkalalo la no nigalet a maong so mauges a panag-isip tan kondukta. Manwarin konsideraen a maong na saray balo ni nasasaglawin sakripisyo ed pagmaliw a Kristianon babangatan, manresulta itan ed dakel a bendisyon ed pakawalaan na dedikadon relasyon ed si Jehova a Dios. (Ikompara so Lucas 9:23; 14:25-33.) Saray Tastasi nen Jehova so entusiastikon tuloy a mangiwawanwan ed saratan a balo ni ed organisasyon ya uusaren na Dios pian sumpalen so linawa to. (Mateo 24:45-47) Singa say Etiope, saraya so manggayaga ed pakaaral tan pitunosan ed kakaukolanen na Dios ed sikara.

[Saray paimano ed leksab]

[Kahon ed pahina 8]

Akin a Tinawag ya Eunoko?

Diad interon salaysay ed Gawa kapitulo 8, say Etiope so natutukoy bilang “eunoko.” Anggaman ontan, lapud ag-aawaten na Mosaikon Ganggan so akapon a laki ed loob na kongregasyon, mapatnag a sayan laki so aliwan eunoko ed literal a pantalos. (Deuteronomio 23:1) Say Griegon salita parad “eunoko” so nayarin ontukoy ed toon walaay atagey a betang. Kanian, say Etiope so sakey ya opisyal ed leksab na reyna na Etiopia.