Felipe—Maseseg ya Ebanghelisador
LUGAN na Kasulatan so dakel a salaysay nipaakar ed lalaki tan bibii a say pananisia ra so manepeg ya aligen. Konsideraen pay Felipe, sakey a Kristianon misionaryo nen inmunan-siglo. Sikatoy aliwan apostol, ingen mausa-usar a maong ed panangikayat na mensahe na Panarian. Diad tua, akabatan si Felipe bilang “say ebanghelisador.” (Gawa 21:8, NW) Akin a walaan si Felipe na ontan ya inkaturo? Tan antoy naaralan tayo manlapud sikato?
Pinmatnag si Felipe ed rekord na Biblia kayarin tuloy na Pentecostes 33 K.P. Diad saman saray mansasalitay-Griego a Judio so ginmapon nannguronguro sumpad mansasalitay-Hebreo iran Judio, a mankuan a saray balo ra so nibabaliwala ed inagew-agew a kibubunog na tagano. Pian naasikaso so problema, amili iray apostol na “pitoran lalaki a maong so dengel da.” Si Felipe so sakey ed saraman ya apili.—Gawa 6:1-6.
Sarayan pitoran lalaki et “maong so dengel” da. Inkuan na patalos nen James Moffatt a “maong so reputasyon da.” On, diad panaon na inkaturo ra, sikara lay kabat a maespiritual a lalaki a walaan na praktikal ya abilidad ed panagnonot. Mipadpara itan ed saramay manlilingkor bilang Kristianon manangasikaso natan. Saratan a lalaki so agbengat-bengat a tinuro. (1 Timoteo 5:22) Nepeg a walaan ira na ‘maabig a balita ed saray taga-paway,’ tan nepeg a kabat na saray kaparan Kristiano a sikaray makatunongan tan limpio ed kanonotan.—1 Timoteo 3:2, 3, 7; Filipos 4:5.
Mapatnag, inasikason maong nen Felipe so asaimin to ed Jerusalem. Balet, ag-abayag et sakey a baleg a daluyon na panamasegsegang so linmesa tan angitaytayak ed saray patumbok nen Kristo. Singa saray arum, tinmaynan si Felipe ed syudad, balet agni asumpal so ministeryo to. Agni binmayag et sikatoy okupado ed panagpulong ed balon teritorya—say Samaria.—Gawa 8:1-5.
Alukasan so Balo Iran Teritorya
Impasakbay nen Jesus a saray babangatan to so manpulong ed “Jerusalem tan ed amin a Judea tan Samaria, tan angga ed kasampotan na dalin.” (Gawa 1:8) Diad impanpulong ed Samaria, akapibiang si Felipe ed kasumpalan na saratan a salita. Inkalapagan a memelmelagen na saray Judio iray Samaritano. Balet aghinusgaan nen Felipe irayan totoo, tan abendisionan so agto panangidumaduma. On, dakel a Samaritano so abautismoan, pati say datin managsalamangka a manggaran na Simon.—Gawa 8:6-13.
Sinmabi panaon, say anghel nen Jehova so angiwanwan ed si Felipe a mamaarap ed disierton dalan a manlapud Jerusalem a paarap ed Gaza. Diman et apasikmatan nen Felipe so sakey a karwahe a lugan toy sakey ya Etiopen opisyal a manbabasan maksil ed propesiya nen Isaias. Inabot nen Felipe so karwahe tan inggapo toy mitongtong. Anggaman say Etiope et sakey a proselita a walaan na pikakabat ed Dios tan ed Kasulatan, sikatoy sipapaabeban amidbir a nakaukolan toy tulong pian natalosan toy babasaen to. Kanian, pinalugan toy Felipe ed karwahe tan pinayurong to’d abay to. Kayarin apulongan, akasabi ra ed danum. “Anto so makasbel a nabinyagan ak?” so intepet na Etiope. Sikatoy tampol a binautismoan nen Felipe, tan tinmuloy lay Etiope a magaygayaga. Maseguro, sayan balon babangatan so angikayat ed maong a balita diad lugar da.—Gawa 8:26-39.
Antoy naaralan tayo manlapud ministeryo nen Felipe nipaakar ed saray Samaritano tan say Etiopen opisyal? Agtayon balot ipapasen a saray indibidual a kabiangan na sakey a nasyon, rasa, odino miduma so kipapasen to ed panagbilay et ag-interesado ed maong a balita. Imbes, nepeg tayon iyabawag so mensahe na Panarian ed “amin day totoo.” (1 Corinto 9:19-23) No sipaparaan itayo diad panpulong ed amin, usaren itayo nen Jehova ed kimey a ‘panaggaway babangatan ed totoo ed amin a nasyon’ sakbay a mangangga iyan marelmeng a sistema.—Mateo 28:19, 20.
Kaaruman Iran Pribilihyo nen Felipe
Kayarin nampulong ed Etiopen opisyal, nampulong met si Felipe ed Azote, tan “impakabat to so ebanghelyo ed ganagana a baley, angga ed insabi to ed Cesarea.” (Gawa 8:40) Nen inmunan siglo, sarayan duaran syudad et dakel so populasyon a Gentil. Diad pamapaarap to ed amianen a paonla ed Cesarea, maseguron nampulong si Felipe ed balitado iran sentro na Judio, a singa ed Lidda tan Joppe. Nayarin satan so rason kanian nalmoan ed saginonor iray babangatan ed sarayan lugar.—Gawa 9:32-43.
Say unor ya inkasalambit nen Felipe et agawa kayari manga 20 taon. Diad sampot na komatlon misionaryon panagbaroy to, sinmakda si Pablo diad Tolemaida. “Dia ed kaimbuasan,” inkuan nen Lucas a kaiba nen Pablo a managbaroy, ‘linma kami ed Cesarea: et linmoob kami ed abung nen Felipe ya ebanghelisador.’ Diad sayan bekta, si Felipe et “wala so apatira ya anak ton mamarikit a nanpropeta ra.”—Gawa 21:8, 9.
Mapatnag, nampirmi lay Felipe ed Cesarea. Balet ta agnaandi ed sikato so espiritu na panagmisionaryo, ta sikatoy tinawag nen Lucas a “say ebanghelisador.” Sayan balikas et mabetbet a pakapatnagan ed sakey ya anaynan ed abung to pian ipulong so maong a balita ed agnakikimeyan iran rehyon. Say bengatlan impanpropesiya na apatiran mamarikit nen Felipe so pakapatnagan a tinumbok daray alimbawa na maseseg ya ama ra.
Nepeg a tandaan na Kristianon atateng natan a saray ananak da so sankaimportantian a babangatan da. Anggano saratan ya atateng et kaukolan dan ikbanan so pigaran teokratikon pribilihyo lapud saray responsabilidad ed pamilya, singa si Felipe et sikaray makapansiansian intiron puson lingkor na Dios tan napan-uliranan ya atateng.—Efeso 6:4.
Say imbisita nen Pablo tan saray kakaiba to so angiter ed pamilya nen Felipe na maabig a pankanawnawa pian ipanengneng so inkamaparawes. Nonoten pay panpapasesegan! Anganko et diad sayan okasyon ya atugyop nen Lucas iray detalye nipaakar ed saray aktibidad nen Felipe, ya inlaktip to ed saginonor ed Gawa kapitulo 6 tan 8.
Inusar a maong nen Jehova a Dios si Felipe pian ilaknab so intereses na Panarian. Say seseg nen Felipe so tinmulong ed sikaton mangikayat ed maong a balita ed balo iran teritorya tan pian iyalibansa so mabunigas ya espiritual ya atmospera ed abung to. Kasin labay mo met a panggayagaan so mipadpara iran pribilihyo tan bendision? Diad ontan et maong no aligen moray kualidad ya impanengneng nen Felipe ya ebanghelisador.