Ipatnag so Espiritu na Panagpayunir
1. Panon yon deskribien so espiritu na panagpayunir?
1 Balanglan makapanpayunir natan odino andi, amin a manangipalapag na Panarian so makapangipatnag na espiritu na panagpayunir. Magunaet dan tutuloken so ganggan a manpulong tan manggawa na saray babangatan. (Mat. 28:19, 20; Gawa 18:5) Iyaansakit da so totoo tan mansasakripisyo ira pian nasumpal so ministeryo ra. (Mat. 9:36; Gawa 20:24) Mabulos iray lingkor nen Jehova a manggawa na antokaman a nakaukolan pian tulongan so arum a makaamta ed katuaan. (1 Cor. 9:19-23) Imanoen tayo pa so ehemplo na sakey ya angipatnag na ontan ya espiritu, si Felipe ya ebanghelisador.
2. Panon a naalig na saray mamatatken tan ministeryal a lingkor so seseg nen Felipe ed ministeryo?
2 Diad Panagpulong tan Panagbangat: Ambelat iray responsabilidad nen Felipe diad inmunan-siglon kongregasyon. (Gawa 6:1-6) Balet, manuna ed amin et sikatoy maseseg a manangipulong na maong a balita. (Gawa 8:40) Kanian natan, legan ya aasikasoen na saray mamatatken tan ministeryal a lingkor so nipabtang iran kimey da, nayarian dan ipatnag so espiritu na panagpayunir diad maseseg a panangidaulo ra ed ministeryo. Peteg a saya so mamabiskeg ed espiritu na kongregasyon!—Roma 12:11.
3. Panon tayon nipatnag so espiritu na panagpayunir sano nasusubok itayo?
3 Kayari impatey nen Esteban, pirmin agulo so bilay na saray babangatan lapud bigla tan pirmin panamasegsegang. Balet, nantultuloy si Felipe a nampulong, tan baleg so agawaan to pian nigapo so kimey diad limog na saray Samaritano. (Gawa 8:1, 4-6, 12, 14-17) Sarag tayon aligen so ehemplo to diad pantultuloy tayon pangipakabat ed maong a balita sano manasagmak itayo na saray subok tan diad agmanangidumaduma a pampulong ed amin a naabet tayo.—Juan 4:9.
4. Anton ehemplo so impanengneng nen Felipe bilang managbangat?
4 Naimano so inkadunong nen Felipe bilang managbangat na Salita na Dios diad salaysay nipaakar ed impitongtong to ed Etiopen eunoko. (Gawa 8:26-38) Say pamaaligwas ed abilidad a pangusar na Biblia tan ‘miebatan [odino mankatunongan] ed saray sulat’ so sananey nin paraan a nipapatnag tayo so espiritu na panagpayunir. (Gawa 17:2, 3) Singa si Felipe, panggugunaetan tayon ipulong so maong a balita inerman so pakaromogan ed totoo tan diad kada matukoy a pankanawnawa.
5. Antoy makatulong ed Kristianon atateng a nipaseseg ed anak da so espiritu na panagpayunir?
5 Diad Pamilya tan Kongregasyon: Seguradon maabig so epekto na ugali tan ehemplo nen Felipe ed saray mamarikit to. (Gawa 21:9) Mipadpara met, saray Kristianon atateng ya akasentroy bilay da ed intereses na Panarian so pakapasesegan na anak a mangalig ed satan. Anggaman naksawan ed loob na sakey simba, say magunaet a pampupulong na ateng so agbalot nalingwanan na anak da.—Uli. 22:6.
6. Panon tayon nipatnag so pisasalamat ed saray payunir diad kongregasyon tayo?
6 Si Felipe so amarawes ed si Pablo tan Lucas, a maseseg a Kristianos a mansasagpot a manlingkor ed si Jehova. (Gawa 21:8, 10) Panon tayon nipatnag so pisasalamat tan suporta ed saray maseseg ya agagi natan? Nayarin iyopresi tayoy pikimey ed saray payunir diad sakey a kabuasan odino ngarem a daiset so mibibiang ed ministeryo. (Fil. 2:4) Nayari tayo met iran imbitaan ed kaabungan tayo parad makapabiskeg a panlilimog. Antokaman so kipapasen tayo, komon ta panggunaetan tayon amin ya ipatnag so espiritu na panagpayunir.