Kasin Nanonotan Yo?

Naapresya yo ta’n binasa so agano niran paway na Say Panag-Bantyan? Sirin, imanoen no naebatan yo so onggendan a tepetepet:

◻ Kasin saray salita nen Jesus a, “no perdonaen yoray kasalanan na siopaman a totoo, naperdona la ira ed kasalanan,” et kabaliksan to a saray Kristiano so makaperdona na saray kasalanan? (Juan 20:23, NW)

Anggapo so Makasulatan a basiyan ed pangibaga a saray Kristiano ed inkapalagan, odino anggan saray aturon mamatatken ed saray kongregasyon, so walaan na autoridad pian mamerdona sa saray kasalanan. Ompatnag a say konteksto na saray salita nen Jesus a saray apostol so pinagamoran ira diad panamegley na kiwas na espiritu na sakey a nikaduman autoridad pian mamerdona odino agmamerdona na saray kasalanan. (Nengnengen so Gawa 5:1-11; 2 Corinto 12:12.)​—4/15, pahina 28.

◻ Anto so matalonggaring nipaakar ed patalos nen J. J. Stewart Perowne ed libro na Salmos, ya inmunan nipalapag nen 1864?

Nanggunaetan nen Perowne ed patalos to pian tumboken a “maapit ed say porma na Hebrew, namparan diad say idiom tan diad say inkasangal na saray clause.” Diad satan pinaboran to so kipawil na madibinon ngaran diad porma a “Jehova.”​—w 4/15, pahina 31.

◻ Anton panangigiya so inter nen Jesus ed saray babangatan to no panon so pidedeneng da ed saray gobierno ed mundo?

Inkuan nen Jesus: “Ibayar yo, sirin, ed si Cesar iray bengatla nen Cesar, balet ed Dios iray bengatla na Dios.” (Mateo 22:21, NW) Inkuan to lamet: “No siopaman so nisilong ed autoridad a mamipilit ed sikan manlingkor ed sakey a milya, mila ka ed sikato na duaran milya.” (Mateo 5:41, NW) Iyiilustra dia nen Jesus so prinsipyo na mabulos a panagpasakop ed lehitimo iran kakaukolanen, balanglan diad siglaotan na totoo odino ed saray kakaukolanen na gobiernon mitunosan ed ganggan na Dios. (Lucas 6:27-31; Juan 17:14, 15)​—5/1, pahina 12.

◻ Anto so kabaliksan na ‘panakar ed katuaan’? (Salmo 86:11, NW)

Lalaktipen na saya so itulok ed saray kakaukolanen na Dios tan panaglinkor ed sikato diad katooran tan inkasimoon. (Salmo 25:4, 5; Juan 4:23, 24)​—5/15, pahina 18.

◻ Anto so nansumpalan ed impangibaki nen Jehova ed si Jonas ed Nineve?

Bilang nansumpalan, impanengneng na say impanpulong nen Jonas so pandumaan ed baetan na magbabawi iran taga Nineve tan saray anawet-impantenger ya Israelita, a pirmin kinmulang na pananisia tan panagpaabeba. (Ikompara so Deuteronomio 9:6, 13; Jonas 3:4-10.)​—5/15, pahina 28.

◻ Siopa so Serpiente tan siopa so “say bii” ya atukoy ed Genesis 3:15, NW?

Say Serpiente so aliwan abeban uleg noagta saman so angusar ed satan, si Satanas a Diablo. (Apocalipsis 12:9) “Say bii” et aliwan si Eva noagta say mangatatawen ya organisasyon nen Jehova, say ina na alanaay-espiritu ton ariripen ed dalin. (Galacia 4:26)​—6/1, pahina 9.

◻ Panon a makataynan so sakey a too ed Babilonia a Baleg tan makaromog na kaligenan? (Apocalipsis 18:4)

Nepeg a kompleton ibiig toy inkasikato manlapud saray palson relihyoson organisasyon tan ontan met manlapud saray kustombre tan awawey ya ipapatnag da, tan makaromog na kaligenan ed loob na teokratikon organisasyon nen Jehova. (Efeso 5:7-11)​—6/1, pahina 18.

◻ Akin a mabetbet ya abitla so agila ed Kasulatan?

Agdirektan tinukoy na saray managsulat na Biblia iray kalareker na agila a mangisisimbolo na saray bengatla a singa say kakabatan, madibinon proteksyon, tan inkapeles.​—6/15, pahina 8.

◻ Kasin saray ariripen na Dios natan a walaan na mangaraldalin ya ilalo so walaan na parehon sukat na espiritu na Dios a singa ed alanaay-espiritun Kristianos?

Manuna, say ebat et on. Say espiritu na Dios so naala ed parehon sukat ed namparan klase, tan say pikakabat tan pakatalos so namparan nagamoran na nantupag, a tekep na pareho iran pankanawnawa parad pangawat ed satan.​—6/15, pahina 31.

◻ Akin a makagungguna parad sikatayo natan so pangusisa ed sagradon serbisyo a ginawa na saray saserdote ed Israel diad templo ed Jerusalem?

Diad panggawa ed satan lalon sigpot tayon natalosan so mapangasin areglo a ditan et saray makasalanan a totoo natan so makapipawilan ed Dios. (Hebreos 10:1-7)​—7/1, pahina 8.

◻ Panon a say komaduan templo a nipaalagey ed Jerusalem so akagamor na babaleg a gloria nen samay impaalagey nen Solomon?

Say komaduan templo so nambayag na 164 a taon nen say templo nen Solomon. Dakel niran managdayew a nanlalapud amayamay nin daldalin so dinmagsa ed saray saban to. Lalo nin importanti, nanggayagaan na sayay komaduan templo so baleg a pidumaan lapud inkiwala na Anak na Dios, si Jesu-Kristo, a nambangat ed saray saban to.​—7/1, pahina 12, 13.

◻ Kapigan so impangitarok na Dios na espiritual a templo to?

Saya so nitarok nen 29 K.P. sanen impanengneng na Dios so panangabobon to ed pikakasi nen Jesus ed bautismo. (Mateo 3:16, 17) Say impangabobon na Dios ed inkipresenta na laman nen Jesus et kabaliksan ton diad espiritual a pantalos, inmapireng so altar a babaleg nen say samay walad templo ed Jerusalem.​—7/1, pahina 14, 15.

◻ Akin a kaukolan itayon manamerdona?

Say panamerdona ed akaopendi ya akipulangan so importanti no kaukolan tayon mantinien so Kristianon pankakasakey. Say pamusol tan panimbel na linawa so mamawas na deen na nonot tayo. No sikatayo so agmamerdona, wala so kapeligroan ya onsabi agew ya agla perdonaen nen Jehova iray kasalanan tayo. (Mateo 6:14, 15)​—7/15, pahina 18.

◻ Panon a magmaliw a masanto iray Israelita?

Posibli labat so inkasanto diad pakawalaan da na maapit a relasyon ed si Jehova, say masanton Dios, tan panamegley na puron panagdayew da ed sikato. Nakaukolan day suston pikakabat ed “say Sankasantosan a Sakey” diad ontan sikatoy nadayew da ed inkasanto, diad pisikal tan espiritual a kalinisan. (Uliran 2:1-6; 9:10)​—8/1, pahina 11.