Amin so Nepeg a Mikuentaan ed Dios

“Sakey tan sakey ed sikatayo mangi-usausa [mikuentaan, NW] naani nipaakar ed inkasikaton dili ed arap na Dios.”​—ROMA 14:12.

1. Antoray ketegan na kawayangan nen Adan tan Eva?

PINALSA nen Jehova a Dios so inmunan atateng tayo, si Adan tan Eva, bilang totoon walaan na bulos a linawa. Anggaman sikaray abebbeba nen say saray angheles, sikaray intelihentin pinalsa a makayarin manggaway matudion desisyon. (Salmo 8:4, 5) Ingen, satan ya inter-Dios a kawayangan so aliwan lisensya pian determinaen na too no anto so susto tan aliwa. Sikaray walaan na pikuekuentaan ed Manamalsa ra, tan sayan pikuekuentaan so ninatnat ed amin a kapolian da.

2. Agmanbayag et manggawa si Jehova na anton pikuekuentaan, tan akin?

² Natan ta manasingger tayo la ed kapantokan na sayan marelmeng a sistema na bengabengatla, si Jehova so manggawa na pikuentaan ed dalin. (Ikompara so Roma 9:28.) Agla mabayag et mikuentaan iray agmaridios ed Jehova a Dios lapud impantakew ed kayamanan na dalin, diad impaneral ed bilay na too, tan nagkalalo la ed impamasegsegang ed ariripen to.​—Apocalipsis 6:10; 11:18.

3. Antoran tepet so konsideraen tayo?

³ Nipaarap ed sayan seryoson pansumpalan, makagungguna parad sikatayo ya isipen iray matunong ya impideneng nen Jehova ed saray pinalsa to ed apalabas a panaon. Panon itayon personal a natulongan na Kasulatan pian makapanggawa na paborablin kuenta ed Manamalsa tayo? Antoran napanuliranan so makatulong, tan dinan iray kaukolan tayon paliisan ya aligen?

Mikuentaan Iray Angheles

4. Panon tayon amta a kaukolanen na Dios a mikuentaan iray anghel ed gagawaen da?

⁴ Saray anghelikon pinalsa nen Jehova so mipadparan mikuentaan ed sikato a singa met ed sikatayo. Sakbay na Delap ed agew nen Noe, arum ya angheles so situtungangan nankinon too ta pian seksual a mirelasyonan ed bibii. Bilang walaan na kawayangan, sarayan espiritun pinalsa so makapandesisyon na onia, balet ta akikuentaan so Dios ed sikara. Sanen pinmawil iray matungangan anghel ed pasen na saray espiritu, aglara inabuloyan nen Jehova a makapawil ed orihinal a kipapasen da. Ibabaga ed sikatayo nen babangatan a Judas a sikaray “inggana to ed silong na kabilungetan ed andi-anggaan a panamangawan, angga ed panangukoman na sankabalgan ya agew.”​—Judas 6.

5. Anton inkaplag so asagmak nen Satanas tan saray demonyo to, tan panon a naresolbi so pikuentaan a resulta na impanrebelde ra?

⁵ Sarayan matungangan anghel, odino dedemonyo, so walaan na manuley, salanti, si Satanas a Diablo. (Mateo 12:24-26) Sayan marelmeng ya anghel so nanrebelde ed Manamalsa to tan inangat to so inkakanepegan na inkasoberano nen Jehova. Impaarap nen Satanas so inmunan atateng tayo ed kasalanan, tan diad kaunoran et saya so nansumpal ed impatey da. (Genesis 3:1-7, 17-19) Anggaman inabuloyan nen Jehova si Satanas a makaloob ed mangatatawen iran lolooban ed loob na sakey a peryodo kayari na satan, impasakbay na libro na Biblia ya Apocalipsis a diad nigeter a panaon na Dios et sayan marelmeng a sakey so ibasileng ed kaliber-liber na dalin. Ipapanengneng na ebidensya ya agawa iya ag-abayag kayari impangawat nen Jesu-Kristo na pakayari to ed Panarian nen 1914. Diad kaunoran et say Diablo tan saray demonyo to so nipaarap ed andi-anggaan a kadederal. Lapud sigpot lan naebatan so isyu nipaakar ed inkasoberano, say pikuentaan parad rebelyon so naresolbi la ed makatunongan a paraan.​—Job 1:6-12; 2:1-7; Apocalipsis 12:7-9; 20:10.

Mikuentaan So Anak na Dios

6. Panon a momoriaen nen Jesus so bengatla a sikatoy walaay eebatan ed Ama to?

⁶ Agaylan maabig ya uliran so impanengneng na Anak na Dios, si Jesu-Kristo! Bilang ayadyarin too a kasimbangan nen Adan, si Jesus so maliket a manggawa na madibinon linawa. Maliket met a mikuentaan ed pananumbok ed ganggan nen Jehova. Nipaakar ed sikato et matukotukoy so impropesiya na salmista: “Makaliket ak a mangunor na linawam, O Dios ko, on, say ganggan mo wala ed dalem na pusok.”​—Salmo 40:8; Hebreos 10:6-9.

7. Legan a manpipikasi ed labi na ipatey to, akin a nibaga nen Jesus iray salitan nirekord ed Juan 17:4, 5?

⁷ Anggaman ed makapagulan isusumpan asagmak nen Jesus, sinumpal to so linawa na Dios tan pinansiansia to so integridad ya anggad ipapatey ed panamairapan a kiew. Diad ontan et abayaran to so bili na dondon pian narondon so katooan manlapud makapatey a resulta na impankasalanan nen Adan. (Mateo 20:28) Kanian, diad labi na ipatey to, sitatalek a makapanpikasi si Jesus: “Inggloria ta ka ed dalin, bangta asumpal ko so kimey ya inter mo ed siak a gawaen ko. Et natan, O Ama, igloria mo ak laktip ed inkasika ed samay gloria a wala’d sikata nen andi ni mundo.” (Juan 17:4, 5) Naibaga nen Jesus iratan a salita ed mangatatawen ya Ama to lapud sitatalona ton inarap so pikuekuentaan tan nagmaliw a makapaliket ed Dios.

8. (a) Panon ya impanengneng nen Pablo a nepeg tayon mikuentaan ed si Jehova a Dios? (b) Anto so ontulong ed sikatayo pian abobonan na Dios?

⁸ Aliwan singa say ayadyarin toon Jesu-Kristo, sikatayo so ag-ayadyari. Ingen, sikatayo met so mikuentaan ed Dios. Oniay inkuan nen apostol Pablo: “Bangbalet sika, akin ya ukomen mo so agim? O sika met, akin et pabpabandayen mo so agim? Ta amin tayo onpatnag itayo ed arap na panangukom na Dios; ta walan nisulat: ‘“Unong a mabilay ak,” kuan na Katawan, balang pueg ontalimukor ed siak, tan balang dila mankompisal ed Dios.”’ Dia ed ontan, sakey tan sakey ed sikatayo mangi-usausa [mikuentaan, NW] naani nipaakar ed inkasikaton dili ed arap na Dios.” (Roma 14:10-12) Ta pian nagawaan tayo itan tan abobonan nen Jehova, simamaaron pinagamoran to itayo na say konsiensia tan say apuyanan a Salita to, say Biblia, pian mangigiya ed sikatayo ed ibaga tan gawaen tayo. (Roma 2:14, 15; 2 Timoteo 3:16, 17) Say sigpot a panganamot ed saray espiritual a probisyon nen Jehova tan panumbok ed nipasal-ed-Biblia a konsiensia tayo so ontulong ed sikatayon nadampot so panangabobon na Dios. (Mateo 24:45-47) Say masanton espiritu nen Jehova, odino aktibon puersa, so kaaruman a lapuan na biskeg tan panangigiya. No onkiwas tayon mitunosan ed panangiwanwan na espiritu tan panangigiya na nipasal-ed-Biblian konsiensia tayo, nipapanengneng tayon agtayo ‘ipupulisay so Dios,’ a nepeg a pikuentaan tayon amin ed ikikiwas tayo.​—1 Tesalonica 4:3-8; 1 Pedro 3:16, 21.

Mikuentaan Bilang Nasyones

9. Sioparay Edomita, tan anto so agawa ed sikara lapud impantrato ra ed Israel?

⁹ Kakaukolanen nen Jehova a mikuentaan iray nasyon. (Jeremias 25:12-14; Sofonias 3:6, 7) Konsideraen pay kadaanan a panarian na Edom, a walad bandad abalaten na Inatey a Dayat tan amianen na Gulpo na Aqaba. Saray Edomita so totoon Semita, a maap-apit a kanayon na Israelitas. Anggaman say inmunan-ateng na saray Edomita et say apo nen Abraham a si Esau, ag-inabuloyan iray Israelita ya ondalan ed Edom ed “mapalaway a dalan na ari” diad pamapaarap da ed Insipan a Dalin. (Numeros 20:14-21) Diad inlabas na saray siglo, say panggula na Edom so inmarap ed andi-panangasin busol ed Israel. Diad kaunoran, akikuentaan iray Edomita lapud impanugsog da ed saray taga-Babilonia a deralen so Jerusalem nen 607 K.K.P. (Salmo 137:7) Diad komanem a siglo K.K.P., saray trupa na Babilonia ed silong nen Ari Nabonido so anakup ed Edom, tan nankibalatar itan, singa ed inganggan nen Jehova.​—Jeremias 49:20; Obadias 9-11.

10. Panon so impideneng na saray Moabita ed Israelitas, tan panon ya impikuentaan na Dios so Moab?

¹⁰ Ontan met so pinawayan na Moab. Say panarian na Moabita so walad bandad amianen na Edom tan bukig na Inatey a Dayat. Sakbay na inloob na saray Israelita ed Insipan a Dalin, agsipaparawes iray Moabita ed sikara, a mapatnag a sinusuplayan dara na tinapay tan danum lapu labat ed pinansyal a gungguna. (Deuteronomio 23:3, 4) Inopaan nen Arin Balak na Moab si propetan Balaam pian ayewen so Israel, tan inusar iray bibiin Moabita pian ingganyoey lalakin Israelitas ed imoralidad tan idolatriya. (Numeros 22:2-8; 25:1-9) Balet, agpinalampas nen Jehova so panggula na Moab ed Israel. Singa nipropesiya la, say Moab so nankibalatar ed saray lima na taga-Babilonia. (Jeremias 9:25, 26; Sofonias 2:8-11) On, kinaukolan na Dios so Moab a mikuentaan.

11. Say Moab tan Ammon so nagmaliw a singa antoran syudad, tan anto so ipapanengneng na saray propesiya nipaakar ed kaplesan a marelmeng a sistema na bengabengatla?

¹¹ Aliwa lambengat a say Moab noagta ontan met ed say Ammon so kinaukolan a mikuentaan ed Dios. Impasakbay nen Jehova: “Petepeteg say Moab singa naani Sodoma, et saray anak nen Ammon singa ra naani Gomorra, sakey a kayarian na saray sabitan tan kaskasan na asin, tan sakey a mankibalatar lawas.” (Sofonias 2:9) Nagba iray dalin na Moab tan Ammon, no panon a dineral na Dios so Sodoma tan Gomorra. Unong ed Geological Society of London, ibabaga na saray researcher a nalmo ra lay kawalaan na aderal a Sodoma tan Gomorra ed mamabukig a baybay na Inatey a Dayat. Antokaman nin mabiskeg ya ebidensyan nadiskobre ed sayan pamaakaran so manuporta labat ed saray propesiya na Biblia a mangipapatnag a mikuentaan met ed Jehova a Dios so kaplesan a marelmeng a sistema na bengabengatla.​—2 Pedro 3:6-12.

12. Anggaman say Israel so kaukolan a mikuentaan ed Dios lapud saray kasalanan to, anto so nipropesiya nipaakar ed nakdaan a Judio?

¹² Anggaman pinaboran a tuloy nen Jehova so Israel, kaukolan iya a mikuentaan ed Dios lapud saray kasalanan to. Sanen sinmabi si Jesu-Kristo ed nasyon na Israel, sikatoy impulisay na karaklan. Saray nakdaan labat so angagamil na pananisia ed sikato tan nagmaliw a papatumbok to. Inyaplika nen Pablo so pigaran propesiya ed sayan Judion nakdaan sanen insulat to: “Tan si Isaias met mantawag a nipaakar ed Israel: ‘No komon ta say bilang na saray anak na Israel et singa buer ed dayat, saray sulok lambengat so nilaban ira. Ta say Katawan ipaakseb to so salita to ed tapew na dalin, sumpalen to tan patikeyen to.’ Tan unong na kuan nen Isaias nensaman: ‘No say Katawan na saray ejercitos agto itayo komon intilakan na bini, nagmaliw itayo komon a singa Sodoma, tan agawa itayo a singa komon Gomorra.’” (Roma 9:27-29; Isaias 1:9; 10:22, 23) Tinukoy nen apostol Pablo so alimbawa na 7,000 ed panaon nen Elias ya agdinmakmomo ed Baal, tan intuloy ton inkuan: “Ontan met sirin anggan dia ed sayan panaon wala so kera unong ed panamili na grasya.” (Roma 11:5) Saman a nakdaan so tinibukel na totoon personal a mikuentaan ed Dios.

Saray Alimbawa na Personal ya Akikuentaan

13. Anto so agawa ed si Cain sanen kinaukolan a mikuentaan ed Dios lapud impamatey to ed agi ton Abel?

¹³ Sasaglawien na Biblia so dakel ya alimbawa na personal ya akikuentaan ed si Jehova a Dios. Konsideraen pan alimbawa so panguloan ya anak nen Adan, si Cain. Sikato tan si agi ton Abel so angiyapay na bagat ed si Jehova. Say bagat nen Abel so inabobonan na Dios, balet agnaabobonan so bagat nen Cain. Sanen kinaukolan a mikuentaan ta siruruksan amatey ed agi to, si Cain so andiay-liknaan ya angibaga ed Dios: “Siak ta so managkomis ed kinen agik?” Nisesengeg ed kasalanan to, pinatakyas si Cain “ed dalin na Nod ed bukig na Eden.” Agto angipanengneng na masimoon a pagbabawi ed ginawa ton krimen, a say nanermenan to labat et say makatunongan a dusa to.​—Genesis 4:3-16.

14. Panon ya inyilustra so personal a pikuekuentaan ed Dios diad kaso na atagey a saserdoten Eli tan saray ilalak to?

¹⁴ Say personal a pikuekuentaan ed Dios so niyilustra met ed kaso na atagey a saserdote na Israel a si Eli. Nanserbi bilang manangimaton a saserdote iray ilalak ton Hophni tan Phinehas, balet “nankasalanan na ag-inkahustisya ed totoo, tan agpangingalngalep ed Dios, tan ag-inmarawi ed antokaman a nengneng na karelmengan,” kuan na manag-awaran a si Josephus. Agbinidbir na sarayan “mabanday a lalaki” si Jehova, nanggagaway mauges, tan nankasalanan na graben imoralidad. (1 Samuel 1:3; 2:12-17, 22-25) Bilang ama ra tan atagey a saserdote na Israel, obligasyon nen Eli a disiplinaen ira, balet ta agtora binaat a maong. Si Eli so ‘angigalang ed ananak to a labas nen si Jehova.’ (1 Samuel 2:29) Dinusa so sankaabungan nen Eli. Say duaran ilalak so inatey ed parehon agew ya impatey na ama ra, tan diad kaunoran et kompleton apultot so makasaserdoten linya ra. Ontan so impakasumpal na pikuekuentaan.​—1 Samuel 3:13, 14; 4:11, 17, 18.

15. Akin ya atumangan si Jonatan ya ilalak nen Arin Saul?

¹⁵ Midumaan a tuloy so alimbawan impanengneng na ilalak nen Arin Saul a si Jonatan. Kayarin tuloy na impamatey nen David ed si Goliat, “say kamarerwa nen Jonatan nisiglaot ed kamarerwa nen David,” tan nansipanan ira na pankaaro. (1 Samuel 18:1, 3) Anganko, ta atebek nen Jonatan a say espiritu na Dios so tinmaynan la ed si Saul, balet ta ag-abawasan so dilin seseg to parad tuan panagdayew. (1 Samuel 16:14) Say apresasyon nen Jonatan ed inter-Dios ya autoridad ed si David so agbalot kinmapuy. Amoria nen Jonatan a sikatoy mikuentaan ed Dios, tan tinumangan nen Jehova lapud mapagalang a kurang to diad impanegurado ton makapantultuloy so kapolian to ed loob na saray kailalakan.​—1 Awaran 8:33-40.

Mikuentaan so Kristianon Kongregasyon

16. Siopa si Tito, tan akin a naibaga ya akapanggawa na maong a kuenta ed Dios?

¹⁶ Maapabor so impanaglawi na Kristianon Griegon Kasulatan ed dakel a lalaki tan bibii ya angisaklang na maong a kuenta ed inkasikara. Singa bilang, wadtan so Kristianon Griegon manngaran na Tito. Nibagan sikato so nagmaliw a Kristiano legan na inmunan panmisioneron impanbaroy nen Pablo ed Chipre. Lapud walaray Judios tan proselitas a nanlapud Chipre ed Jerusalem nen Pentecostes na 33 K.P., nayarin linmaknab so Inkakristiano ed isla agnambayag kayari na satan. (Gawa 11:19) Anggaman kuan, apaneknekan a si Tito so sakey ed matoor iran kakimeyan nen Pablo. Inulop to ira di Pablo tan Bernabe ed impanbaroy ya amaarap ed Jerusalem nen ngalngali 49 K.P., sanen adesisyonan so importantin isyu nipaakar ed panaggalsim. Say bengatlan ag-agalsiman si Tito so amabelat ed argumento nen Pablo a saray akomberti ed Inkakristiano so agnakaukolan a nisilong ed Mosaikon Ganggan. (Galacia 2:1-3) Pepekderan ed Kasulatan so maabig a ministeryo nen Tito, tan pinawitan ni ingen nen Pablo na sakey a madibinon apuyanan a sulat. (2 Corinto 7:6; Tito 1:1-4) Mapatnag a tuloy ya anggad anggaan na mangaraldalin a bilay to et si Tito so nantultuloy ya angisaklang na maabig a kuenta ed Dios.

17. Anton kuenta so nisaklang nen Timoteo, tan panon a makakaapekta ed sikatayo iyan alimbawa?

¹⁷ Si Timoteo so sananey nin maseseg ya indibidual ya angisaklang na maabobon a kuenta ed si Jehova a Dios. Anggaman si Timoteo so walaan na pigaran problema ed bunigas, impatnag to so “pananisia a matua” tan ‘akiulop ed si Pablo ed kikayat na evangelio.’ Kanian nibaga na apostol ed saray kaparan Kristiano ed Filipos: “Ta anggapo so took a kapara’y [Timoteo] kalakal ko a mangisakit a peteg ed kipapasen yo.” (2 Timoteo 1:5; Filipos 2:20, 22; 1 Timoteo 5:23) Diad arap na atooan a kaleteyan tan arum niran subok, sikatayo met so nawalaan na agmansimpisimpitan a pananisia tan makapangisaklang na naabobonan a kuenta na inkasikatayo ed Dios.

18. Siopa si Lydia, tan anton awawey so impatnag to?

¹⁸ Si Lydia so sakey a maridios a bii a maseguron angisaklang na maabig a kuenta ed Dios. Sikato tan say sankaabungan to so kabiangan na saray inmunan indibidual ed Europa ya anayakop na Inkakristiano lapud kimey nen Pablo ed Filipos ed ngalngali 50 K.P. Sakey a tubo ed Tiatira, anganko ta si Lydia et sakey a Judion proselita, balet nayarin dagdaiset iray Judio tan anggapo so sinagoga ed Filipos. Sikato tan arum niran debosyonadon bibii so nantitipon ed gilig na sakey ya ilog sanen akitongtongan ira nen Pablo. Bilang resulta, si Lydia so nagmaliw a Kristiano tan akikasi ed si Pablo tan saray kaiba to a manayam ed sikara. (Gawa 16:12-15) Say inkamaparawes nen Lydia so pakabidbiran a tanda na tuan Kristianos.

19. Lapud antoran maong a gawa a si Dorcas so akapangiter na maong a kuenta ed Dios?

¹⁹ Sakey nin biin angisaklang na maabig a kuenta ed si Jehova a Dios et si Dorcas. Sanen inatey, linma si Pedro ed Joppe bilang ebat ed kerew na saray babangatan a manaayam diman. Si Pedro so “inakar [na duaran lalakin nansamar ed sikato] ed atagtagey a silir; et sikato so niliktob na amin a bibii a babalo a mannangis, et inpapanengneng da ed sikato so saray aysing tan saray kawes a ginawa nen Dorcas nen walani ed sikara.” Pinaoli ed bilay si Dorcas. Balet kasin sikato so natandaan labat lapud maaron inkamabunlok to? Andi. Sikato so sakey a “babangatan” tan maseguron akibiang ed panaggaway-babangatan a kimey. Mipadpara saray Kristianon bibii natan so ‘napno na saray maong a gawa tan payabol a gawa.’ Panliketan da met so aktibon pibiang ed panangiproklama na maong a balita na Panarian tan panaggawa na saray babangatan.​—Gawa 9:36-42; Mateo 24:14; 28:19, 20.

20. Antoray nayarin itepet tayo ed inkasikatayo?

²⁰ Malinlinew ya ipapanengneng na Biblia a saray nasyon tan indibidual so nepeg a mikuentaan ed Soberanon Katawan a Jehova. (Sofonias 1:7) No sikatayo so dedikado ed Dios, nayarian tayon tepetan so inkasikatayo, ‘Panon kon momoriaen iray inter-Dios a pribilihyo tan responsabilidad ed siak? Anton nengneng na kuenta so isasaklang ko ed si Jehova a Dios tan ed si Jesu-Kristo?’

Antoray Ebat Yo?

◻ Panon mon napaneknekan a saray angheles tan say Anak na Dios so akikuentaan ed si Jehova?

◻ Antoran alimbawa ed Biblia so angipanengneng na impikuentaan na Dios ed saray nasyon?

◻ Anto so ibabaga na Biblia nipaakar ed personal a pikuentaan ed Dios?

◻ Sioparay pigaran totoo ed rekord na Biblia ya akapangisaklang na maabig a kuenta ed si Jehova a Dios?

[Litrato ed pahina 10]

Akapangisaklang si Jesus na maabig a kuenta na inkasikaton dili ed mangatatawen ya Ama to

[Litrato ed pahina 15]

Singa si Dorcas, saray Kristianon bibii natan so manggagawa na maong a kuenta ed inkasikara ed si Jehova a Dios

[Picture Credit Line ed pahina 13]

Say Impatey nen Abel/The Doré Bible illustrations/Dover Publications, Inc.