Bidbiren Komon nen Jehova a Maong so Kuentam
“Nonoten moak, O Dios ko . . . Nonoten moak, O Dios ko nipaakar ed maong.”—NEHEMIAS 13:22, 31.
1. Anto so ontutulong ed saramay dedikado ed Dios pian mangisaklang na maabig a kuenta ed si Jehova?
WALAAN iray ariripen nen Jehova na amin a nakakaukolan a tulong pian makapangisaklang na maabig a kuenta ed sikato. Akin? Lapud walaan ira na maapit a relasyon ed Dios bilang kabiangan na mangaraldalin ya organisasyon to. Niparungtal to la ed sikara iray gagala to, tan naiikdan tora na tulong tan aralem a pakatalos ed espiritual diad panamegley na masanton espiritu to. (Salmo 51:11; 119:105; 1 Corinto 2:10-13) Nisesengeg ed sarayan nikaduman sirkumstansya, simamaaron kinaukolan nen Jehova iray mangaraldalin ya ariripen to pian mangiter ed sikato na maong a kuenta na inkasikaran dili namparan diad no anto ira tan anto so nagagawaan da diad tulong na masanton espiritu to.
2. (a) Diad antoran paraan ya angiter si Nehemias na maong a kuenta ed sarili to ed Dios? (b) Diad panamegley na anton kerew a sinumpal nen Nehemias so libro ed Biblian mangaakbibit ed ngaran to?
2 Say sakey a toon akapanggawa na maong a kuenta ed Dios et si Nehemias, say manag-awit na kopa ed Persiano a si Arin Artajerjes (Longimanus). (Nehemias 2:1) Nagmaliw a gobernador na saray Judio si Nehemias tan angipaalagey-lamet ed bakor na Jerusalem diad arap na saray kabusol tan kapeligroan. Tekep na seseg parad tuan panagdayew, inyimpuersa to so Ganggan na Dios tan angipanengneng na kapagaan ed saray napapairap. (Nehemias 5:14-19) Pinaseseg nen Nehemias iray Levita a naynay a dalisayen day inkasikara, bantayay wangalan, tan pasantosen so agew na Sabbath. Kanian naipikasi ton: “Nonoten moak, O Dios, saya met, tan sibegan moak unong ed kinabalgan na maong a linawam.” Matukotukoy met, sinampotan nen Nehemias so madibinon nipuyan a libro to tekep na kerew: “Nonoten moak, O Dios ko nipaakar ed maong.”—Nehemias 13:22, 31.
3. (a) Panon yon ideskribe so sakey a toon manggagawa na maong? (b) Say pangonsidera ed kurang nen Nehemias so managdag ed sikatayon tepetan na anto so inkasikatayo?
3 Say sakey a toon manggagawa na maong so maabig tan maptek iray gawa to a mangungguna ed arum. Ontan a klase na too si Nehemias. Sikatoy walaan na marespeton takot ed Dios tan baleg a seseg parad tuan panagdayew. Niarum ni, pisasalamatan toray pribilihyo to ed serbisyo ed Dios tan maabig so impikuentaan to ed si Jehova. Say panumameng ed kurso to so managdag ed sikatayon tepetan tayoy inkasikatayo, ‘Panon kon momoriaen iray inter-Dios a pribilihyo tan responsabilidad? Anton nengneng na kuenta ed inkasiak so nisasaklang ko ed si Jehova a Dios tan ed si Jesu-Kristo?’
Mikuentaan Tayo Lapud Pikakabat Tayo
4. Anto so inganggan nen Jesus ed papatumbok to, tan anto so ginawa na saramay “tinandaan ed bilay ya andi-anggaan”?
4 Onia so inganggan nen Jesus ed papatumbok to: “Onla kayo . . . tan manggawa kayo na saray babangatan ed amin a nasyones, binyagan yo ra . . . , ibangat yo ra’n mangunor na amin a bengabengatla ya inganggan ko ed sikayo.” (Mateo 28:19, 20) Manggawa na saray babangatan diad panbangat ed sikara. Sirin saramay imbangat tan “tinandaan ed bilay ya andi-anggaan” so manpabautismo, a singa ed ginawa nen Jesus. (Gawa 13:48; Marcos 1:9-11) Manlalapud puso so pilalek dan gawaen so amin a bengatlan inganggan to. Onsabi ira’d punto na dedikasyon diad pangala tan pangiyaplika ed suston pikakabat ed Salita na Dios.—Juan 17:3.
5, 6. Panon tayon talosan so Santiago 4:17? Iyilustra so pangiyaplika ed satan.
5 No mas aralem so Makasulatan a pikakabat tayo, mas maong so pundasyon na pananisia tayo. Kabansag na saya et mas babaleg so pikuenta tayo ed Dios. Oniay kuan na Santiago 4:17: “Kanian dia ed satan a too ya amta ton gawaen so maong et agto gawaen dia ed sikato so kawalaan na kasalanan.” Mapatnag a saya so konklusyon ed kapkapangibaga nen Santiago nipaakar ed panagtangsit imbes ed kompleton isasaral ed Dios. No amta na sakey a too ya anggapoy nagawaan to no anggapoy tulong nen Jehova balet ta ag-onkiwas a mitunosan ed satan, saya so kasalanan. Balet saray salita nen Santiago so onaaplika met ed saray kasalanan ya impakasaew. Singa bilang, diad parabolo nen Jesus na saray karnero tan saray kanding, akondena iray kanding, aliwan lapud mauges a kiwas da, noagta lapud agda tinulongan iray agagi nen Kristo.—Mateo 25:41-46.
6 Sakey a lakin iyaaralan na Biblia na Tastasi nen Jehova so agtanton inmaligwas ed espiritual, malinew lapud agto itunday pansisigarilyo to, anggaman amta ton onman so nepeg ton gawaen. Kinerew na sakey a matatken ed sikato a basaen so Santiago 4:17. Kayari impankomento ed kaimportantian na sayan kasulatan, inkuan na matatken: “Anggaman agkani bautismado, walaan ka lay pikuekuentaan tan nepeg a walaan ka na sigpot ya eebatan ed antokaman a desisyon mo.” Makapaliket, kinmiwas so laki, tinmundan mansigarilyo, tan ag-abayag et kinmualipika parad bautismo bilang simbolo na dedikasyon to ed si Jehova a Dios.
Mikuentaan Lapud Ministeryo Tayo
7. Anto so sakey a paraan pian nipanengneng tayo so otang a linawa ed ‘mismon pikakabat na Dios’?
7 Say impapuson pilalek tayo et say pamaliket ed Manamalsa tayo. Sakey a paraan a nipanengneng so otang a linawa tayo lapud ‘[mismon] pikakabat na Dios’ et say panumpal ed komisyon tayon manggawa na saray babangatan na Anak to, si Jesu-Kristo. Saya met so dalan a nipanengneng tayo so aro tayo ed Dios tan ed kaabay tayo. (Uliran 2:1-5; Mateo 22:35-40) On, lapud pikakabat tayo ed Dios et mikuentaan tayo ed sikato, tan kaukolan tayon moriaen iray kapara tayon totoo bilang potensyal a babangatan.
8. Akin a naibaga tayo ya alikna nen Pablo a sikatoy mikuentaan ed Dios lapud ministeryo to?
8 Amta nen apostol Pablo a say sigpot-puson panangawat tan katutulok ed maong a balita so manresulta ed kilalaban, bangbalet say panangipulisay ed saya so ompugta’d kadederal. (2 Tesalonica 1:6-8) Kanian liknaen ton sikatoy mikuentaan ed si Jehova nisesengeg ed ministeryo to. Diad tua et inapresyan tuloy nen Pablo tan saray kaulop to so ministeryo ra, a siaalwar dan pinaliisan so anggan pakapangipatnag ed totoon sikaray nagugunggunaan ed pinansyal. Niarum ni, say puso nen Pablo so anagdag ed sikaton mangiganggan: “Ta no ipulong ko so evangelio, anggapo so pangloriaan ko, ta say kapilitan sikato so amasoot ed siak. Et abagey ak la no agko ipulong so evangelio!”—1 Corinto 9:11-16.
9. Anton importantin otang so nepeg a bayaran na amin a Kristiano?
9 Lapud dedikadon ariripen itayo nen Jehova, ‘say kapilitan so mamasoot ed sikatayo pian ipulong so evangelio.’ Komisyon tayon ipulong so mensahe na Panarian. Inawat tayo itan a responsabilidad sanen indedika tayoy inkasikatayo ed Dios. (Ikompara so Lucas 9:23, 24.) Niarum ni, walaan tayo na otang a kaukolan a bayaran. Oniay kuan nen Pablo: “Maotangak ed saray Griegos tan Barbaros, makabat tan agmakabat. Kanian, unong na wala ed siak, atadia ak a mangipakabat na evangelio met ed sikayo a wala ed Roma.” (Roma 1:14, 15) Si Pablo so akaotang lapud amta ton obligadon manpulong pian naamtaan na totoo so maong a balita diad ontan et nilaban ira. (1 Timoteo 1:12-16; 2:3, 4) Nansagpotan to sirin a sumpalen so komisyon to tan binayaran so otang to ed kapara ton totoo. Bilang Kristianos, sikatayo met so walaan na ontan ya otang a kaukolan a bayaran. Say panangipulong na Panarian so manunan dalan met a nidemostra so aro ed Dios, ed Anak to, tan ed kakaabay tayo.—Lucas 10:25-28.
10. Diad panggawa na anto a napalaknab na arum so ministeryo ra?
10 Say sakey a paraan a makapangisaklang na naabobonan a pikuentaan ed Dios et say pangusar ed saray abilidad tayo diad kilaknab na ministeryo tayo. Diad pangiyilustra: Dakel a totoon manlalapud arum a daldalin so ondadagsa ed Britanya ed agano niran taon. Pian nasabi na maong a balita iratan a totoo, masulok a 800 payunir (sigpot-panaon a managpulong na Panarian) tan nilasus niran Tastasi so manaaral na nanduruman lenguahe. Saya so nanresulta ed maabig a sagyat ed ministeryo. Oniay kuan na sakey ya agin biin manbabangat na Chinese: “Agkon balot inisip a nibangat koy lenguahek ed arum a Tastasi, pian naipanabang da ed arum so katuaan ed onian dalan. Talagan makapnek!” Napalaknab yo kasi ministeryo yo ed mipadparan dalan?
11. Anto so resulta na impormal ya impanpulong na sakey a Kristiano?
11 Anganko, gawaen na balang sakey ed sikatayo so anggaay nayarian to a mangisalba ed nalelener a too. Mipadparan magunaet iray ariripen nen Jehova ya usaren daray abilidad da a mantasi ed amin a pankanawnawa. Agni abayag et sakey a Tasin akayurongan toy sakey a bii ed bus so kinatongtong to nipaakar ed Kasulatan. Lapud aliketan ed nadngel to, dakel so intepet na bii. Sanen onepas lay Tasi, akikasi so bii ya onla ed ayaman to, ta dakel ni labay ton itepet. Inmabuloy so Tasi. Say resulta? Nigapo so panangiyaral na Biblia, tan anemiran bulan ed saginonor et say bii so nagmaliw ya agbautismadon manangipalapag na Panarian. Ag-abayag et sikato so mangikokondukta la na anemiran panangiyaral na Biblia. Agaylan makapaliket a tumang so pangusar na saray abilidad na sakey ed serbisyo na Panarian!
12. Panon tayon epektibon nausar ed lawak a serbisyo iray abilidad tayo bilang ministros?
12 Saray abilidad tayo bilang ministros so epektibon nausar ed lawak diad pangusar tayo na saray palapagan a singa say 192-pahinan libron Pikakabat a Mangitonton ed Andi-Anggaan a Bilay. Nen Abril na 1996, say Writing Committee na Mananguley ya Ulop na Tastasi nen Jehova so angaproba ed kipalapag na libron Pikakabat ed masulok a 140 a lenguahe, tan diad saman la et 30,500,000 a kopya so niimprinta la ed 111 a lenguahe. Sayan libro so nisulat tekep na gagalan tulongan iray iyaaralan na Biblia a magenap so naaral da ed Salita na Dios tan saray gagala pian makapandedika ed si Jehova tan nabautismoan. Lapud saray manangipalapag na Panarian so agmangikondukta ed parehon estudyante ed loob na dakel a taon, makapangiyaral ira ed dakel nin totoo odino napadaak da so pibibiang da ed panagkabkaabungan a kimey tan arum niran porma na ministeryo. (Gawa 5:42; 20:20, 21) Lapud amtan sikaray walaan met na pikuekuentaan ed Dios, ipapaimano daray madibinon pasakbay. (Ezequiel 33:7-9) Balet say manunan gagala ra et say pamagalang ed si Jehova tan tulongan so dakel ni no posibli pian naamtaan da so maong a balita ed antikey a natitilak nin panaon na sayan marelmeng a sistema na bengabengatla.
Mangisasaklang na Maabig a Kuenta Bilang Pamilya
13. Akin a nepeg a nawalaan na regular a panpamilyan panagaral na Biblia iray maridios a pamilya?
13 Balang sakey tan pamilya a manasayakop na tuan Inkakristiano so mikuentaan ed Dios tan kaukolan sirin ya “ontuloy tayo ed inkayadyari” tan magmaliw a ‘mabiskeg so pananisia tayo.’ (Hebreos 6:1-3; 1 Pedro 5:8, 9) Alimbawa, saramay akapanaral la na libron Pikakabat tan nampabautismo la so kaukolan a kompletoen day Makasulatan a pikakabat da diad regular ya iyaatendi ed saray miting ontan met ed panbasa na Biblia tan arum niran Kristianon palapagan. Saray maridios a pamilya so kaukolan met a nawalaan na regular a panagaral na pamilya, ta importanti itan a dalan pian ‘manpuyat itayo, mansiansia itayo ed pananisia, manugali itayo na singa ugali laki, tan onbiskeg tayo.’ (1 Corinto 16:13) No sika so ulo na sakey a sankaabungan, nagkalalo lan responsabli ka ed Dios a seguradoen a say pamilyam so napapakan a maong ed espiritual a paraan. No panon a say masustansyan literal a tagano so mamabunigas ed sakey, ontan met ed daakan tan regular ya espiritual a katatagano so nakakaukolan no sika tan say pamilyam et mansiansian “onkasil [mabunigas, NW] ira ed pananisia.”—Tito 1:13.
14. Anto so resulta na impantasi na sakey ya ugaw ya Israelita a nibangat a maong?
14 No walaray anak ed sankaabungan mo, bidbiren nen Jehova a maong so kuentam lapud pangiiter mo ed sikara na epektibon espiritual a panagbangat. Say ontan a panagbangat so mangungguna ed sikara, no panon ya agawa itan ed ugaw ya Israelitan biin akautibo na saray taga-Siria ed saray agew na propeta na Dios a si Elias. Sikatoy nagmaliw a katulong na asawa na akating a Sirianon hepe na armada, si Naaman. Anggaman ugaw ni, imbaga to ed amo ton bii: “No komon ta say katawan ko a laki onarap ed propeta a wala ed Samaria! Sirin onabig ed kating to.” Lapud impantasi to, si Naaman so linma ed Israel, diad kaunoran et nampasakop ed direhe nen Elias a manames a pitoran danay ed Ilog Jordan, tan alinisay kating to. Sakey ni, si Naaman so nagmaliw a managdayew nen Jehova. Talagan agaylan nanliketan itan na sayan ugaw a bii!—2 Arari 5:1-3, 13-19.
15. Akin ya importanti parad atateng ya ipasal a maong iray anak da? Iyilustra.
15 Aliwan mainomay so pamabaleg na ananak ed matakot-Dios a paraan ed sayan mundon kulang a tuloy na kalinisan ed moralidad a walad silong na pakayari nen Satanas. (1 Juan 5:19) Anggaman ontan, manlapud inkaugaw nen Timoteo, say bai ton Loida tan ina to, si Eunice, so sitatalonan angibangat ed sikato ed Kasulatan. (2 Timoteo 1:5; 3:14, 15) Say panangiyaral na Biblia ed ananak mo, pangitagar a regular ed sikara ed saray Kristianon miting, tan diad kaunoran et ulopen ira ed ministeryo et amin so kabiangan na padron na panangipasal a nepeg mon pikuentaan ed Dios. Sakey a Kristiano diad Wales, a natan et wala la’d kapegleyan na 80, natandaan toy impangitagar ed sikato na ama to ed kasakbayan na dekada 1920, sanen manakar na samploran kilometro ed palandey (pawil-patubo na 20 kilometro) pian ibunog iray tract na Biblia ed saray taga-purok ed onsublay a lawak. “Diad saraman a panaon na impanakar, impasepsep na amak so katuaan ed pusok,” kuanto tekep na otang a linawa.
Mikuentaan Iray Mamatatken—Panon?
16, 17. (a) Antoran pribilihyo so nanggayagaan na matatken ed espiritual a mamasiken ed kadaanan ya Israel? (b) No ikompara ed kipapasen na kadaanan ya Israel, akin a mas ni so kakaukolanen ed Kristianon mamatatken natan?
16 “Say ubanan ya ulo sikato so balanget na gayaga [sano] naromog ed dalan na inkatunong,” so inkuan nen makabat a too a si Solomon. (Uliran 16:31) Balet aliwan say inkatatken labat ed edad so manginlong ed laki pian nawalaay responsabilidad ed kongregasyon na totoo na Dios. Saray matatken ed espiritual a mamasiken ed kadaanan ya Israel so nanlingkor bilang ukom tan opisyal ed panangipakurang na inkahustisya tan ed panmantini na deen, maong ya uksoy, tan bunigas ed espiritual. (Deuteronomio 16:18-20) Anggaman mipadpara met itan ed Kristianon kongregasyon, mas ni nakakaukolan ed mamatatken legan a manasingger so anggaan na sayan marelmeng a sistema na bengabengatla. Akin?
17 Saray Israelita so ‘pinilin totoo’ ya inliktar na Dios manlapud kadaanan ya Ehipto. Lapud inawat da so Ganggan diad panamegley na manamegley da, si Moises, saray kapolian da so nianak ed sakey a nitalagan nasyon tan mikabisado ed saray pananontonan nen Jehova. (Deuteronomio 7:6, 11) Anggaman ontan, anggapo so automatikon nianak ed nitalagan nasyon natan, tan dagdaiset so binmaleg ed maridios a pamilyan mikabisadon maong ed Makasulatan a katuaan. Nagkalalo la ed saramay agano nin ginmapon ‘manaakar ed katuaan’ so mankaukolan na panamilin ed no panon so panbilay unong ed Makasulatan iran prinsipyo. (3 Juan 4) Agaylan responsabilidad sirin so nipapasakbat ed matoor a mamatatken legan a bebenbenan da so ‘uliran na saray maabig a salita’ tan mangaasisti ed totoo nen Jehova!—2 Timoteo 1:13, 14.
18. Anton nengneng na tulong so nepeg ya akaparaan ya iter na mamatatken ed kongregasyon, tan akin?
18 Say sakey ya ugaw a manaaral a manakar so nayarin natiror tan natumba. Natatakot ni tan mankakaukolan na tulong tan panamaseguro manlapud ateng to. Say indibidual a dedikado ed si Jehova so nayari met a natiror odino natumba ed espiritual a paraan. Anggan si apostol Pablo et aromog ton kapilitan so pipuligesgesan a gawaen no antoy maptek odino maong ed imaton na Dios. (Roma 7:21-25) Saray pastol ed pulok na Dios so kaukolan a maaron mangasisti ed saray Kristiano a nankasalanan balet ta talagan magbabawi. Sanen binisita na mamatatken so sakey a dedikadon biin seryoson nankasalanan, inkuanto diad arap na dedikadon masiken to: “Amtak a dispelosipen yoak!” Balet sikato so nanakis sanen nibaga ed sikato na mamatatken a labay dan amtaen no antoy nakakaukolan pian nipawil so espiritualidad na pamilya. Lapud amta na mamatatken a sikaray mikuentaan, maliket iray mamatatken a mangasisti ed magbabawin kapananisiaan.—Hebreos 13:17.
Mantultuloy a Mangisaklang na Maong a Kuenta
19. Panon tayon makapantultuloy a makapangisaklang na maong a kuenta ed inkasikatayo ed Dios?
19 Saray mamatatken ed kongregasyon tan arum niran ariripen na Dios so mankaukolan a mantultuloy a mangisaklang na maong a kuenta ed inkasikara ed si Jehova. Posibli iya no tumboken tayoy Salita na Dios tan gawaen so linawa to. (Uliran 3:5, 6; Roma 12:1, 2, 9) Nagkalalo lan labay tayo so manggawa na maong ed saramay kapananisiaan tayo. (Galacia 6:10) Balet, say panag-ani so dakel ni, tan dagdaiset so natitilak a komikimey. (Mateo 9:37, 38) Kanian gawaen tayo so maong ed arum diad sigugunaet a pangiproklama ed mensahe na Panarian. Si Jehova so mangisaklang na maong a pikuentaan ed sikatayo no sumpalen tayoy dedikasyon tayo, gawaen so linawa to, tan sitotoor ya iproklama so maong a balita.
20. Anto so naaralan tayo ed pangonsidera ed kurang nen Nehemias?
20 Mantultuloy tayo sirin a nawalaan na dakel a nagawaan ed kimey na Katawan. (1 Corinto 15:58) Tan marakep no ikonsidera tayo si Nehemias, ya amaalagey-lamet ed bakor na Jerusalem, angimpuersa ed Ganggan na Dios, tan siseseseg ya angiyalibansa na tuan panagdayew. Impikasi to a si Jehova so makanonot ed sikato lapud maong ya agawaan to. Komon ta napaneknekan yon onman met so debosyon yo ed si Jehova, tan bidbiren to komon a maong so kuenta yo.
Anto so Ebat Yo?
◻ Anton alimbawa so impanengneng nen Nehemias?
◻ Akin a mikuentaan tayo ed Dios lapud pikakabat tayo?
◻ Panon itayon makapangisaklang na naabobonan a kuenta ed si Jehova ed ministeryo tayo?
◻ Anto so nagawaan na saray pamilya pian makapangisaklang na maong a kuenta ed Dios?
◻ Panon so pikuekuentaan na Kristianon mamatatken?
[Saray litrato ed pahina 18]
Singa si Pablo, makapangisaklang itayo na maabig a kuenta ed Dios bilang manangiproklama na Panarian
[Saray litrato ed pahina 18]
Kasin saray anak yo so walaan na mabiskeg a pananisia a singa samay melag ya ugaw a biin Israelita ed ayaman nen Naaman?