Ompawil ed Dabok—Panon?
“LAPUD sika et dabok ka dia ed dabok ompawil ka.” Sanen nadngel na inmunan too, si Adan, iratan a salita, amta to la no anto so pansumpalan. Sikato so agawa manlapud dabok na dalin tan anggapo lay pawilan noagta say dabok. Sikatoy talagan ompatey lapud sikatoy tinmunganga ed Manamalsa to, si Jehova a Dios.—Genesis 2:7, 15-17; 3:17-19.
Ipapanengneng na Biblia a saray totoo so agawa ed dabok. Ibabaga to met: “Say kamarerwa a mankasalanan—ompatey naani.” (Ezequiel 18:4; Salmo 103:14) Say patey so angitarok na ermen ed minilyon tan naulit-ulit ya amalesa na saray tepet no antoy nepeg a gawaen ed saray bangkay na too.
Apalabas tan Kaplesan Iran Agamil
Anto so ginawa ed saray bangkay na totoo na Dios ed kadaanan a panaon? Diad saray unonan pahina to, sasaglawien na Biblia so nanduruman paraan ed pidedeneng ed inaatey, kalaktip lay kiponpon ed dalin. (Genesis 35:8) Si patriarkan Abraham tan say asawa to, si Sara, ontan met ed ilalak dan Isaac tan apon Jacob so niponpon ed ungib na Macpela. (Genesis 23:2, 19; 25:9; 49:30, 31; 50:13) Saray Israelitan Ukom a Gideon tan Samson so niponpon ‘diad saray ponponan a pasen na kaamaan da.’ (Uko-ukom 8:32; 16:31) Isusuheri na saya a mas labayen na kadaanan a totoo na Dios so pakawalaan na saray panagponponan na pamilya. Sanen inatey si Jesu-Kristo ed inmunan siglo K.P., say bangkay to so nipasen ed kapanubol a baton pantyon. (Mateo 27:57-60) Nen saman et inkalapagan a saray bangkay so nikokotkot ed dalin odino nipantyon. Onia nin siansia so nagagawa ed dakel a pasen ed interon dalin.
Balet, diad arum a parti na dalin natan, ondaraiset a tuloy so espasyo tan ombibili so dalin a sengegay iyiirap na pakalmoy panagponponan. Kanian, arum a totoo so mannononot ed arum a paraan na pangitabonan ed bangkay na totoo.
Nagmaliw lan kaslakan so panagsibuag ed dapol kayarin pinoolan so bangkay na too. Diad Inglatera et onia so gagawaen a paraan natan ed ngalngali 40 porsiento na inaatey. Diad Sweden, a ditan et masulok ya 80 porsiento na inaatey ed saray syudad so pinoolan, arum a katakelan so nidesigna parad pangisibuagan na dapol. Tan diad Shanghai tan ed pigaran asingger ed dayat iran syudad ed Tsina, iyaabuloy na gobierno so malaknab a panagsibuag ed dayat a maminpigan danay ed sakey taon.
Iner so napangisibuagan na dapol? Aliwan basta inerman a pasen. Tatakotan na arum a say panagsibuag na dapol so maneral ed kaliberliber. Balet, diad tua, antokaman a nayarin kapeligroan na epidemya et napaandi diad panamegley na panamool. Arum a sementeryo diad Inglatera tan saray memorial park diad Estados Unidos so angigana na karikaan odino marosas iran harden bilang panagsibuagan. Siempre, nagkalalo lan mapaga iray Kristiano nipaakar ed Makasulatan a panmoria nipaakar ed panamool na bangkay tan say panagsibuag na dapol.
Anto ta so Makasulatan a Panmoria?
Diad sakey a panangibalikas sumpad “ari na Babilonia,” inkuan nen propeta Isaias: “Nibantak ka a manlapu ed lubok mo a singa kadimla so sanga.” (Isaias 14:4, 19) Talaga tan say panagsibuag na dapol so naikompara ed ontan a makapabaing a kipapasen? Andi, ta anggapo so impanukoy ed panamool tan say kipreserba odino say panagsibuag na dapol.
Sinalita nen Jesu-Kristo so mangaraldalin a kioli na inaatey a nagawa legan na Milenyon Uley to sanen inkuanto: “Amin so saray wala ed saray lubok narengel da so boses [ko] et ompaway ira.” (Juan 5:28, 29) Anggaman ontan, satan ya espisipikon lubok so agla nakaukolan pian paolien so too a pekderan toy sananey a mapropetikon deskripsyon na kioli. Oniay salaysay na Apocalipsis 20:13: “Say dayat initer to so inaatey a wala ed sikato, tan say patey tan say Hades initer da so inaatey a wala ed sikara.” Kanian, say importantin konsideraen et aliwan say no iner odino no panon a say too so ‘ompapawil ed dabok.’ Imbes, no kasin satan so balanglan nanonotan na Dios tan paolien to. (Job 14:13-15; ikompara so Lucas 23:42, 43.) Maseguron agkaukolan nen Jehova iray mararakep a pantyon pian ontulong ed sikaton nanonotay totoo. Agmakaamper so panamool ed kioli na sakey a too. Tan no gawaen tekep na manepeg a motibo tan andian na palso iran relihyoson seremonya so panagsibuag na dapol, satan so agmagmaliw a sumlang ed Kasulatan.
Saramay deneside ran mangisibuag na dapol so kaukolan a mangimano ed ley na nasyon da. Matukoy met parad sikara so pangikonsidera ed saray liknaan na inateyan tan ed arum. Maalwar a maong iray ariripen nen Jehova diad pideneng ed Makasulatan a kawayangan da nipaakar ed sayan pamaakaran pian agmakapangitarok pakabalawan ed maong a ngaran ya aakbibiten na saray Kristiano. Saya so nagkalalo lan importanti diad daldalin a ditan say panamool tan panagsibuag so legal a naabobonan balet agsigpot ya aawaten ed komunidad. Siempre, say sakey a Kristiano so ompaliis ed antokaman iran ritual tan kostumbre a nibase ed sisiaen ed immortalidad na kamarerwa na too.
Sigpot a Kawayangan Manlapud Lubok!
Ibabaga na arum a manusuporta ed panagsibuag na dapol a saya so mankabaliksan na kawayangan manlapud inkiponpon ed saray lubok. Balet, say mangitarok na sankabalgan a pakainawaan et say kasumpalan na sipan na Biblia a “say kaunoran a kabusol a naekal naani say patey.”—1 Corinto 15:24-28.
Kabaliksan na saya a saray lubok, pantyon, anggan say panamool tan say panagsibuag na dapol, so magmaliw laran bengatla ed apalabas. On, say patey so naandi la. Diad silong na impangipuyan na Dios, insulat nen apostol Juan: “Nadngel ko so sakey a baleg a boses ed tawen, a kuanto: ‘Nia! so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da. Tan punasen to so amin a lua ed kamataan da, tan andi gapo la naani ipatey, tan anggapo la naani onnangis o dageyem, o ot-ot, ta saray una a bengatla sikara so linmabas la.’”—Apocalipsis 21:3, 4.
Amin na saya so nagawa sano say ipapatey na too a resultay impankasalanan nen Adan so kompleto lan nabalang ed silong na Panarian na Dios. Diad satan a panaon et agla nidunget so matulok a katooan ed posibilidad a kipawil ed dabok.
[Saray litrato ed pahina 29]
Kaslakan iran metodo ed panangibantak na saray bangkay na totoo
[Litrato ed pahina 31]
Panagsibuag na dapol diad Sagami Bay, Hapon
[Credit Line]
Kortesiya na Koueisha, Tokyo