Report na Saray Manangiyabawag na Panarian

Atumangan so Impangalay Mapekder a Talindeg ed Eskuelaan

IPAPASAKBAY na Biblia: “Amin iray anak mo nibangat ira ed Jehova, et baleg naani deen na saray anak mo.” (Isaias 54:13) Diad ninatnat a paraan, niyaplika so “amin iray anak mo” ed entiron ulop na ariripen na Dios diad dalin, pati saray ugugaw ni. Natan, seseguroen na Kristianon atateng a saray anak da so ‘nibabangat ed Jehova’ diad ayaman tan diad Kristiano iran miting.

Balet, sano maneeskuela, nidudunget iray kalangweran a Kristianos ed mairap iran angat. Mabetbet et naroromogan dan kapilitan so pangala na mabiskeg a talindeg base ed naaaralan da manlapud Biblia. Sano ontan so gawaen da, saray resulta so magmaliw a makagungguna ed namparan estudyante tan saray managbangat, a singa ipapanengneng na onggendan ya eksperiensia manlapud Micronesia.

Diad melag a mamasagur ya isla na Pasipiko a Tol diad Chuuk Islands, binagaan na saray managbangat ed eskuelaan diman so amin ya ugugaw a manparaan tan mibiang ed panagselebra na Halloween ed eskuelaan. Amta na saray maneeskuelan Tasi a lanoren na selebrasyon iray dekorasyon tan kawe-kawes a singara no anyani, lampong, tan manananem​—ya amin et nisisiglaot ed espiritistiko iran tradisyon. Agnakonsiensia na sarayan ugugaw so mibiang ed saratan.a

Manlapud nibase’d-Biblian kipapasalan da ed ayaman tan diad Kristianon kongregasyon, amta ra a say ontan iran agamil so agmakapaliket ed Dios, anggamano gagawaen labat itan parad panliliket. Ta pian natulongan ira a mas malinew a nipaliwawa so talindeg da, inimbitaan na ugugaw si Barak, sakey ed saray misioneron Tasi ed isla, a mitongtong ed saray managbangat da.

Kayari impakadngel ed panangipaliwawa, inyuksoy na saray managbangat so sakey nin panmiting, a ditan et makapitongtong si Barak ed entiron faculty na eskuelaan. Diad sayan miting, inyarap nen Barak iray katuaan pian ipanengneng so tuan nanlapuan na Halloween. Inaon toy impormasyon to manlapud pigaran publikasyon na Watch Tower ontan met ed arum niran palapagan. Saray managbangat tan administrador so nikelawan ed naaralan da nipaakar ed gapoan, awaran, tan relihyoson nengneng na selebrasyon. Apankakasakeyan dan manggaway staff meeting pian desidien no panon a resolbien so situasyon.

Pigaran agew ed saginonor, sakey ya ag-iilaloan a desisyon so inyanunsio. Amin a panagparaan parad Halloween so patundaen. Talagan agselebraan na eskuelaan so Halloween ed saman a taon. Agaylan maapabor a nansumpalan na saman a resulta na determinasyon na sarayan kalangweran a Tastasi a gawaey susto ed eskuelaan! Agnakaukolan ya ontakot odino ombaing iray kalangweran diad pangala na mapekder a talindeg parad katuaan na Biblia.

Diad entiron mundo, babangatan na Tastasi nen Jehova iray ananak da a panseetay pan-eskuela. Nipapasal met iray kalangweran a Tastasi a manbilay unong ed prinsipyos na Biblia tan ipanabang so ilalo tan saray sisiaen da ed arum niran estudyante bektaman a walaan ira na pankanawnawa. Anggaman saray resulta so ag-ontan kaapabor odino tamtampol a singa ed sayan kaso, nawalaan na talek tan kapenek iray tobonbalo lapud susto so gagawaen da. Tan mas importanti, makaseguro ira a say mangatatawen ya Ama ra so naliliketan tan mamendisyon ed sikara lapud matoor a katutulok da.

[Paimano ed leksab]