Akin a Nepeg Tayon Amin a Dayewen so Dios?

HALLELUJAH! Bantog iyan salita ed kaslakan a mimimisa ed Kakristianoan. Arum ed sikara so mangikekelyaw ed satan diad saray panagdayew da ed Simba. Balet, pigara so makaamta ed peteg a kabaliksan na satan a salita? Diad katuaan to, Hebreon salita itan parad “Idayew si Jah!” Sakey itan a magayaga, desididon panangidayew ed Manamalsa, a say ngaran to et Jehova.a

Say salitan “Hallelujah” so mabetbet a napatnagan diad Biblia. Akin? Lapud dakerakel so rason pian dayewen so Dios. Si Jah (Jehova) so Manamalsa tan Mananustuni na maawang a talba. (Salmo 147:4, 5; 148:3-6) Pinawala toray ecosystem ya amaposibli ed bilay diad dalin. (Salmo 147:8, 9; 148:7-10) Insan sikato so walaay nikabiig ya interes ed katooan. No gawaen tayo so linawa to, bendisyonan tan suportaan to itayo ed sayan bilay tan tarokan to itayo na seguradon ilalo na sakey a magmaong nin bilay ya onsabi. (Salmo 148:11-14) Si Jah (Jehova) so angipuyan ed saray salitan: “Say matunong tawiren to so dalin tan manayam diman lawas.”​—Salmo 37:29.

Kanian, say panamaseseg so nipapaarap ed amin: “Hallelujah!” “Idayew si Jah, sikayon totoo!” (Salmo 104:35; paimano’d-leksab, NW) Balet, makapaermen, ta aliwan amin so malabay ya onkiwas. Natan, maniirap iray totoo. Dakel so naeerasan, mansasakit, odino nalalames. Dakel so manasagmak na dakel ya ermen lapud agsuston panangusar na druga odino alak odino lapud resulta na impan-imoralidad odino impanrebildi ra. Wala ta so rason no akin a saratan so nepeg a mandayew ed Dios?

‘Si Jehova Lambengat so Makapangiter ed Siak na Ilalo’

On, wala. Anggapoy panangipueran mangiimbita si Jehova ed amin a sikatoy amtaen, aralen a sumpaley linawa to, tan panggayagaan iray bendisyon a manasagyat ed totoon sikatoy dayewen da. Tan dakel so onkikiwas. Alaen pan alimbawa si Adriana a taga-Guatemala. Sanen pitoy taon nen Adriana, inatey so ina to. Ag-abayag et tinaynan na ama to. Sanen samplora to la, sikato so ginmapon mantrabaho. Lapud binilin nen ina to a manserbi ed Dios tan relihyon, akilimog si Adriana ed nanduruman grupo na Katoliko, balet sanen 12 to la, sikatoy adismaya tan akiulop ed sakey a pangkat ed lansangan. Sikato la’d satan so mansigarilyo, mandruga, tan mantakew. Akin a labay na ontan a malangwer a bii a dayewen so Dios?

Say atsi nen Adriana so iyaaralan na Biblia na Tastasi nen Jehova, balet sikatoy inelekan nen Adriana. Asabin say panginaen to so inatey. Diad ponpon na panginaen to, awetwet si Adriana ed dakel a makapagutgut a tepet. Iner so nila nen panginaen to? Wala kasi ed tawen? Linma kasi ed mangapuy-apuy ya impierno? Makawetwet itan a tuloy, tan linma si Adriana ed kapilya na sementeryo pian manpikasi parad tulong, ya inusar so ngaran na Dios a Jehova, a singa imbangat na atsi to.

Ag-abayag et sikatoy iyaaralan na Biblia na Tastasi nen Jehova tan onaatendi met la ed saray Kristianon miting da. Saya so angiter ed sikato na sigpot a balon panmoria ed bilay, tan sipapakpel ton intunda so pililimog to ed saray pangkat ed lansangan. Inkuan nen Adriana, a natan et wala la’d kapegleyan na 20: “Say aro lambengat ed si Jehova so amatalirak ed siak ed ontan a mauges a kabibilay. Si Jehova lambengat ed baleg a panangasi to so makapangiter ed siak na ilalon andi-anggaan a bilay.” Si Adriana, anggaman ed mairap a gapo na bilay to, so walaan na eksilinti iran rason a dayewen so Dios.

Sakey a lalon agnailaloan a kipapasen so inreport na Ukraine. Sakey a lakin manyudyurong ed prisoan so manatalaray ipapatey. Nakakasian to kasi so inkasikato? Nagogonigon? Andi, misuniyan a tuloy. Lapud agano nin akatongtong na Tastasi nen Jehova tan akagamor met la na pikakabat ed si Jehova, kinerew to’d sikara a laen da so ina to. Susulatan to ra natan lapud nadngelan ton tinoor da so kerew to. Inkuanto: “Salamat ed pamibisita yo ed inak. Saya so sankagayagaan a balita a naawat ko ed kaunoran a taon.”

Diad panasaglawi nipaakar ed sikato tan saray kaprisoan a nantasian to, insulat to: “Natan et wala la so pananisia mi ed Dios tan panggugunaetan min onkiwas unong ed pananisia tayo.” Sinampotan toy sulat to: “Salamat ed panutulong yo’d sikami pian naaralan no anto so aro tan pian nagamoran so pananisia. No manbilay ak ni, tulongan takayo met. Misalamat ak ed Dios ta wala kayo tan ontan met ed panutulong yo ed arum a mangaro ed Dios tan manisia ed sikato.” Inyapelo na sayan too so sintinsya ton patey. Balet balanglan sikato so napapatey odino nipriso’d dakel a taon, mabitar a sikato so walaan na rason a dayewen so Dios.

‘Anggaman Bulag Ak, Makanengneng Ak’

Konsideraen pa, natan, so sakey a maliksin tinedyer a bii a biglan agmakanengneng. Ontan so agawa ed si Gloria, a manaayam ed Argentina. Biglan abulag si Gloria sanen mantaon na 19, tan agto lan balot apapawil so pakanengneng to. Diad edad a 29, sikatoy akiamong ed sakey a laki tan agnambayag et nanlukon. Natan et alikna to a wala so kabaliksan la na bilay to. Balet sanen inatey so anak to, sikato so ginmapon nantepet. Panumamengan to, ‘Akin a nagagawa’d siak iya? Anto ta so ginawak? Peteg kasin wala so Dios?’

Diad sayan punto, sinmabi ed puerta to so duaran Tasi nen Jehova. Sikato so ginmapon manaral na Biblia tan naaralan toy isisipan a diad balon mundo et makanengneng lamet iray bulag. (Isaias 35:5) Agaylan makapakelaw ya iilaloan parad si Gloria! Malikeliket a tuloy, nagkalalo la nen inmabuloy so masiken to a pagmaliwen a legal so panasawa ra. Insan naaksidenti so masiken to tan nagmaliw ya inutil, ya aka-wheelchair. Natan et sayan bulag a bii so kaukolan a mankimey ya impasya ed pananap na panbilay. Niarum ni, gagawaen ton amin a kimey ed abung, ontan met ed personal a pangaasikaso ed masiken to. Ingen dadayewen nen Gloria si Jehova! Ta diad tulong na Kristianon agagi to, sikatoy manaaral na Braille a Biblia, tan sikatoy apaseseg a tuloy ed saray Kristianon miting diad Kingdom Hall. Inkuanto: “Mairap ya ipaliwawa, balet anggaman bulag ak, singa no makanengneng ak.”

No maminsan et napapasegsegang iray totoo sano dadayewen da so Dios. Sakey a bii ed Croatia so aliketan sanen naaralan toy nipaakar ed Dios, balet say masiken to so sumpa ed balon aromogan ton pananisia tan sikatoy pinataynan to, ya impila na masiken to so sakey taon ya anak dan bii. Diad lansangan, kinaindan na masiken tan say pamilya to, ya andiay ayaman, trabaho, anggan say anak to, diad inmuna et agaylay ermen to. Balet say aro to ed Dios so tinmulong ed sikato, anggaman matalag ton napinengnengan so anak ton bii anggad saya so binmaleg. Aromog na sayan bii so “sankaabigan a perlas” tan agto impulisay itan. (Mateo 13:45, 46) Panon ton minantini so gayaga to legan na sarayan mairap a panaon? Inkuanto: “Say gayaga so bunga na masanton espiritu. Nabayuboan itan ya agmandependi ed akinpaway iran sirkumstansya, a singa saray tanaman et ombaleg ed dalem na greenhouse antokaman so tiempo ed paway.”

Diad Finland, si Markus a mantaon na anemira so nalmoan a walaay agnatambal a sakit ed masel. Ag-abayag et sikatoy aka-wheelchair la. Pigaran taon ed saginonor, sikatoy inawit nen ina to ed sakey a Pentecostal ya ombabalitadon makapanpaabig kono ed saray mansasakit. Balet ta agmet mamilagron atambal. Kanian naandi so interes nen Markus ed Dios tan ginegemtan toray aral na siensia tan arum niran sekular a lawak. Insan ngalngalin limay taon so apalabas, sakey a biin aka-wheelchair ya inulop na sakey a malangwer a laki so linma ed abung a panaayaman nen Markus. Sikaray Tastasi nen Jehova. Diad satan et si Markus so sakey lan atiesta, balet anggapoy suppiat to ed paningbat ed relihyon et pinaloob to ra.

Saginonor, sakey a sanasawa so binmisita ed sikato, tan nigapo so sakey a panagaral ed Biblia. Diad kaunoran, say pakayari na katuaan ed Biblia so anguman ed panmoria nen Markus ed saray bengatla, tan amoria to ya anggaman ed inkainutil to, sikato so peteg a walaan na rason a dayewen so Dios. Inkuanto: “Malikeliket’ak lapud aromog ko so katuaan tan say organisasyon ya uusaren nen Jehova. Say bilay ko so walaan la natan na direksyon tan kabaliksan. Sakey nin abalang a karnero so aromog tan agla malabay ya ontaynan ed pulok nen Jehova!”​—Ikompara so Mateo 10:6.

Amin Komon et “Idayew si Jah”

Saraya so pigara lambengat ed agnabilang ya eksperiensia a nisalaysay pian mangipanengneng a saray totoo natan, antokaman so sirkumstansya ra et nawalaan na rason a dayewen so Dios. Onia so impangipaliwawa nen apostol Pablo: “Ingen say kasantosan mangiter na pinanabang ed amin a bengatla, ta wala ed sikato so sipan na sayan bilay a peles tan say onsabi.” (1 Timoteo 4:8) No gawaen tayo so linawa na Dios, sumpalen to so “sipan na sayan bilay a peles.” Siempre, aliwan diad sayan sistema na saray bengatla a payamanen to iray pobri odino pabunigasen to iray mansasakit. Balet iiter to so espiritu to ed saraman so manserbi ed sikato pian naromog da so gayaga tan inkakontento antokaman so akinpaway a kipapasen da. On, anggan ed “sayan bilay natan,” saray mansasakit, saray nalalames, tan saray pobri so nawalaay rason a dayewen so Dios.

Balet anto ed bilay ya “onsabi”? Agayla, say mismon panisip ed satan so mamakiwas ed sikatayo a mandayew ed Dios tekep na sankabalgan ya entusiasmo! Manliket itayon isipen so panaon sano say inkaduka so aglan balot kabat; sano “say manaayam agto naani ikuan: ‘Mabeblay ak’”; tan sano si Jehova a Dios so ‘mamunas ed amin a lua ed saray kamataan da, tan anggapo la naani ipatey, tan anggapo la naani so onnangis o dageyem, o ot-ot. Ta saray ona a bengatla sikara so linmabas la.’ (Isaias 33:24; Apocalipsis 21:3, 4; Salmo 72:16) Panon mon moriaen irayan sipan na Dios?

Sakey a malangwer a laki ed El Salvador so angawat na sakey a tract na Biblia ya angipaliwawa na arum ed sarayan bengatla. Inkuanto ed say Tasi ya angiter ed sikato na satan, “Atsi, kugkugip so ibabaga na sayan tract.” Dakel so mangikuan na ontan. Balet, saraya so sipan na samay Sakey ya amalsa ed talba, a mamapakiwas ed natural iran sikulo ed dalin tayo, tan ontutulong ni ingen ed pobre tan mansasakit a makaromog na gayaga. Napanisiaan tayo so ibabaga to. Say asalambit ed tagey a malangwer a laki so nanaral na Biblia a kaibay Tastasi nen Jehova tan aromog ton tua iya. No agmo ni gagawaen so ontan, pasesegen mi kan gawaen mo met so ontan. Diad ontan, wadman ka komon sano sayan peles a sistema na bengabengatla so napaso la, tan amin a pinalsa so mibiang ed pangikelyaw na: “Hallelujah!” “Dayewen si Jah, sikayo ran totoo!”​—Salmo 112:1; 135:1.

[Paimano ed leksab]

[Litrato ed pahina 5]

Wadman ka komon sano amin a pinalsa so mibiang ed pangikelyaw na: “Hallelujah!”