No Pakaliknam et Agmo La Nasarag

“Agla mangangga iyan naliliknak,” so inamin nen Adriana, ya taga Brazil. “Kanian inisip ko ya mas maong lay ompatey.”

KASIN ontan met so aliknam kanian labay mo lay ompatey? No ontan, natalosan moy alikna nen Adriana. Sikatoy naiirapan lapud graben kapagaan tan maer-ermen, tan singa anggapo lay ilalo to. Si Adriana et a-diagnose ya walay graben depresyon to.

Imanoen met si Kaoru ya taga Japan, ya angasikaso ed mansasakit tan maedad lan atateng to. “Diad saman et ngalngali ak la onsuko lapud graben pressure ed trabaho,” so imbaga to. “Walay panaon ya agak makapangan, tan agak makaugip. Naisip ko ya mas maong laingen no ompatey ak la pian makainawa ak la.”

Oniay imbaga nen Ojebode, ya taga Nigeria: “Naynay ak ya maermen ya anggad punton onakis ak la, kanian nanisip ak na paraan pian manbikkel.” Maong labat ta agnambikkel si Ojebode, Kaoru, tan Adriana. Balet kada taon, nilasus-libo so manbibikkel.

NO INER SO PAKAROMOGAN NA TULONG

Maslak ya manbibikkel et lalaki, tan dakel ed sikara et ambaing day onkerew na tulong. Imbaga nen Jesus ya kaukolan na mansasakit so doktor. (Lucas 5:31) Kanian no ontan so naliliknam, agka nababaingan ya onkerew na tulong. Dakel so ondadalan ed depresyon ya nainawaan lapud nampatambal ira kanian akapan-anos ira. Nampatambal ed doktor si Ojebode, Kaoru, tan Adriana kanian natan et mas nasasarag da itan.

Nayarin manresita na tambal iray doktor odino irekomenda da so talk therapy, odino atan ya dua pian natambal so depresyon. Saramay walaan na depresyon et kaukolan da met so maaro tan maanos ya suporta na kapamilya tan kakaaro da. Say sankaapitan ya nakaaro na sakey et si Jehova a Dios, ya mangiiter na balibalin tulong panamegley na Salita to, say Biblia.

KASIN WALAY PERMANENTIN SOLUSYON?

Mabetbet ya kaukolan na saray walaan na depresyon so mabayag ya panagtambal tan kaukolan dan umanen so paraan na kabibilay da. Balet no ondadalan kad depresyon, makapanilalo ka ed balibalin arapen, ya singa si Ojebode. Imbaga to: “Tatalaranan ko lan nagawa so ibabaga na Isaias 33:24, ya onsabi panaon et anggapo lay manaayam diad dalin ya mangibagan: ‘Mansasakit ak.’” Singa si Ojebode, naligliwa ka ed promisa na Dios ya walay “sakey a balon dalin,” ya ditan et anggapo la so “panotot.” (Apocalipsis 21:1, 4) Kaibad satan ya promisa so pakaandi na sakit ed mental tan emosyonal. Permanente lan naandi so ansakisakit ya liknaan. Saray ansakisakit ya liknaan et ‘agmo lan balot nanonotan, tan agla iratan mansiansia ed pusom.’—Isaias 65:17.

Saray Bersikulo ed Biblia ya Makatulong

Natatalosan na Dios so naliliknam.

“Siak, si Jehova a Dios mo, so mamemben ed kawanan a limam, say mangibabaga ed sika na, ‘Agka ontatakot. Tulongan ta ka.’”—Isaias 41:13.

Mas natatalosan nen Jehova so nalilikna tayo nen say arum, tan labay to itayon tulongan.

Dalepdepen so Salita na Dios.

“Kinerew [nen Elias] a sikatoy ompatey la komon. Inkuan to: ‘ . . . O Jehova, paandim lay bilay ko.’”—1 Arari 19:4.

“Akatulong ed siak so pandalepdep ed Salita na Dios,” so imbaga nen Ojebode. “Pareho kami manayay alikna nen propeta Elias.”

Makaaral kad saray alimbawa ed Biblia.

“Impikasi . . . lan masimsimoon [nen Jesus si Pedro] ta pian ag-onkapuy so [pananisia to].”—Lucas 22:32.

Nen amitlon imburi nen apostol Pedro si Jesus, grabe so ermen to tan inyaki-akis to. “Anengneng kod samay eksperiensya nen Pedro ya natatalosan nen Jehova tan Jesus so liknaan to. Apabiskeg so liknaan ko,” so kuan nen Kaoru.

Saray ansakisakit ya liknaan et ‘agmo lan balot nanonotan, tan agla iratan mansiansia ed pusom.’—Isaias 65:17