Ginawa Ra so Linawa nen Jehova

Nitandoro si Jesus Bilang Mesias tan Ari!

SAY onloloob a maingal ya ulop ed Jerusalem nen Nisan 9, 33 K.P., so anurprisa ed dakel a taga-Judea. Anggaman gendat lay pakakanengneng na totoon ondudupag ed syudad sakbay na Paskua, nikaduma irayan bisita. Say manunan persona ed limog da et sakey a lakin akakabayo ed kilaw a kalakian ya asno. Say laki et si Jesu-Kristo, tan imbilkag na totoo iray kawes da tan saray sanga na palma ed arapan to legan ya iyeeyag day: “Hosanna ed anak nen David! Bendito so onla dia ed ngaran na Katawan! Hosanna ed sankatagyan!” Diad impakanengneng ed ulop, dakel a wala la’d Jerusalem so apakiwas a mibiang ed libot.​—Mateo 21:7-9; Juan 12:12, 13.

Anggaman sikatoy nitatandoro la, kabat nen Jesus a manaalagar ed sikato iray subok. Agayla, limaran agew labat, sikatoy napapatey ed satan lanlamang a syudad! On, kabat nen Jesus a say Jerusalem et agmakaaron lugar, ginawa ton sikatoy sankanengneng ed iloob to’d syudad ed ontan a kanonotan.

Asumpal so Kadaanan a Propesiya

Nen 518 K.K.P., impasakbay nen Zacarias so mananalon iloloob nen Jesus ed Jerusalem. Oniay insulat to: “Oneyag ka, O bii ya anak na Jerusalem; nia, say arim onsabi ed sika; sikato so maptek, tan walaan na panangilaban, mauyamo, tan onkabayo ed sakey ya asno a kabatyan, ed tapew na sakey lanlamang a kilaw ya anak na asno a kabatyan. . . . Et salitaen to naani pampapakna ed saray nasyon; et say panuleyan to sikato naani manlapu ed dayat angga ed dayat tan manlapu ed Ilog ya angga ed saray sampot na dalin.”​—Zacarias 9:9, 10.

Kanian say iloloob nen Jesus ed Jerusalem nen Nisan 9 so anumpal ed propesiya na Biblia. Satan so aglambengat agawan aksidinti noagta maalwar itan ya implano. Diad asasakbay, sanen wala ni’d paway na Jerusalem, binilin nen Jesus so duara ed saray babangatan to: “Onla kayo ed aldea a wala’d naparong yo, et makaromog kayo naani a tampol na sakey ya asno ya akasinger, tan sakey ya kilaw ya iba to; okbar yo ’ra tan yakar yo ra ed siak. Et no walay mangibaga na bengatla ed sikayo, ikuan yo, ‘Say Katawan kaukolan to ra.’ Et tampol a payakad to ra.” (Mateo 21:1-3) Balet akin a labay nen Jesus so onkabayon onloob ed Jerusalem ed sakey ya asno, tan anto so kabaliksan na reaksion na ulop?

Manunan Tema Nipaakar ed Inkaari

Mabetbet a mas mabiskeg so nanengneng nen say insalita. Sirin, no maminsan et ipaakto nen Jehova ed saray propeta to so mensahe ra pian napaelet so mapropetikon mensahe ra. (1 Arari 11:29-32; Jeremias 27:1-6; Ezequiel 4:1-17) Sayan pirmin nipanengneng a panangipasabi so nipaslep ed anggan say sankaawetay-puson makakaimaton. Diad mipadparan dalan, inyakto nen Jesus so sakey a mabiskeg a mensahe diad inkabayo ed sakey ya asno diad iloob ed syudad na Jerusalem. Panon?

Diad panaon na Biblia nausar so asno parad dederlengen iran gagala. Alimbawa, si Solomon so kinmabayo diad pakalanaan to bilang ari ed say “mula” nen ama to, sakey a hybrid ya anak na kalakian ya asno.a (1 Arari 1:33-40) Sirin say ikabayo nen Jesus ed asno a paloob ed Jerusalem et makabaliksan na pangiprepresenta to na inkasikato bilang sakey ya ari. Saray kiwas na ulop so amaelet ed sayan mensahe. Say grupo, anggapoy duaruwan tugyopen na saray taga-Galilea, so angibilkag ed kawes da ed arapan nen Jesus​—andawes ya angipanonot ed mapublikon panangiyabawag ed inkaari nen Jehu. (2 Arari 9:13) Say impanukoy da ed si Jesus bilang “say Anak nen David” so angidanet ed legal a kanepegan to ed panuley. (Lucas 1:31-33) Tan say impangusar day kasangaan na palma et mapatnag a panangipanengneng day panagpasakop da’d maarin autoridad to.​—Ikompara so Apocalipsis 7:9, 10.

Kanian say libot a sinmabi’d Jerusalem nen Nisan 9 so malinlinew ya angilitrato a si Jesus et tinuroy Dios a Mesias tan Ari. Siempre, aliwan amin so maliket a makanengneng ed ontan ya inkipresenta nen Jesus. Inisip nagkalautla na saray Fariseo a sigpot ya agmatukoy itan ya ikdan si Jesus na ontan a maarin galang. “Managbangat,” kinerew da, andi duaruwan makakapasnok ed saray bosis da, “banom so saray babangatan mo.” Inmebat si Jesus: “Kuan ko ed sikayo, a no saraya ag-ira komon onesel, saray bato maningal ira.” (Lucas 19:39 40) On, say Panarian na Dios so tema na ipupulong nen Jesus. Nakaukolan ton iproklaman makpel itan a mensahe balanglan awaten na totoo odino andi.

Leksion Parad Sikatayo

Parad si Jesus et kaukolan so baleg a tepel pian makaloob ed Jerusalem diad paraan ya impasakbay nen propeta Zacarias. Kabat to a say panggawa ed satan so mamasanok ed kakabusol to. Sakbay na itokotok to ed tawen, pinabtangan nen Jesus iray babangatan to a mangipulong na maong a balita na Panarian na Dios tan ‘manggawa na saray babangatan ed amin a nasyones.’ (Mateo 24:14; 28:19, 20) Pian nasumpal iyan kimey nakaukolan met so tepel. Aliwan amin et maliket ya ondengel ed mensahe. Dakel so agmanginenen ed satan, bangta sumpaen itan na arum. Pigaran gobierno so mamepeget ed panagpulong a kimey odino sigpot a sinebelan itan.

Siansia, momoriaen na Tastasi nen Jehova a say maong a balita na niletneg a Panarian na Dios so nepeg ya ipulong, balanglan talinengen odino ibaliwala itan na totoo. (Ezequiel 2:7) Legan a gagawaen da iyan manangisalbay bilay a kimey, napapaseguroan ira ed sipan nen Jesus: “Nia! Wala ak a naynay ed sikayo ya angga ed kasampotan na mundo.”​—Mateo 28:20.

[Paimano ed leksab]