Anapen so Tuan Kareenan tan Gegemtanen Itan!
“Say maliket a mangaro na bilay tan onnengneng na maong ira ya agew, . . . arawian to so mauges tan gawaen to so kaabigan; anapen to so kareenan tan tumboken to.”—1 PEDRO 3:10, 11.
1. Antoran bantog a salita nen Isaias so seguradon ontalona?
“PITPITEN da naani so saray kampilan da a pagmaliwen da a dingding na lukoy tan saray gayang da a komkompay. Say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.” (Isaias 2:4) Anggaman sayan bantog a teksto et niparayag diad asingger ed hedkuarter na Nasyones Unidas ed New York City, satan ya organisasyon ed mundo so imposiblin nibagan makakasumpal ed satan a balikas. Balet, bilang kabiangan na ag-onsaew a salita nen Jehova a Dios, satan a deklarasyon so seguradon walaay resulta.—Isaias 55:10, 11.
2. Anto so talagan “nagawa dia ed saray kaunoran ya agew,” unong ed Isaias 2:2, 3?
2 Saray salitan naromog ed Isaias 2:4 so diad tua et kabiangan na makapakelkelaw a propesiya, propesiyan nipaakar ed kareenan—tan satan so nasusumpal ed mismon panaon tayo. Sakbay ya iproklama iray makapaliket ya iilaloan ya anggapo lay bakal tan ayura ed bakal, oniay kuan na propesiya: “Nagawa dia ed saray kaunoran ya agew a say palandey na abung nen Jehova niletneg ed toktok na saray palandey, tan nipatagey ed labas na saray pukdol; et saray amin a nasyon onagos ira ya angga ed sikato. Et dakerakel a baley so onla tan kuanda: ‘Dago kayo, tan ontatdang itayo ed palandey nen Jehova, ed abung na Dios nen Jacob; ta ibangat to itayo ed saray dalan to, tan manakar itayo diad saray basbas to.’ Ta manlapu ed Sion ompaway so tunong, tan say salita nen Jehova manlapu ed Jerusalem.”—Isaias 2:2, 3.
Magmaliw a Mareen Iray Totoo
3. Panon a makapanguman so sakey a too a malangas ed pagmaliw a mareen?
3 Imanoen a sakbay a makapangegemtan so totoo na sakey a mareen a kurso, nepeg iran nabangatan ed saray dalan nen Jehova. Say matulok a kiwas ed panagbangat nen Jehova so mamasimbalo ed dalan na panag-isip tan kakikiwas na sakey, pian samay datin malangas et magmaliw a mareen. Panon a nagagawa iyan panamasimbalo? Oniay kuan na Roma 12:2: “Tan agkayo miaabobon unong ed sayan mundo, noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.” Napasimbalo tayo so kanonotan tayo, odino nipaarap ed sananey a diriksion, diad pamano ed satan na saray prinsipyo tan ganggan manlapud Salita na Dios. Say regular a panagaral na Biblia so ontutulong ed sikatayo pian nagawa iyan pananguman tan mamasarag ed sikatayon paneknekan tayo’d inkasikatayon dili no antoy linawa nen Jehova parad sikatayo, ta pian malinlinew tayon nanengneng so dalan a nepeg tayon laen.—Salmo 119:105.
4. Panon a nisulong na sakey so mareen a balon personalidad?
4 Aglambengat pasisimbaloen na katuaan ed Biblia so padron na panag-isip noagta pati ed kakikiwas tan personalidad tayo. Tutulongan to itayon gawaen so indagdag nen apostol Pablo: “Ipulisay yo komon so nipaakar ed abangonan a panagbilay yo, say toon daan, a sikato so manderal unong ed saray panamalingo na kagletan na laman; tan napasimbalo kayo komon ed espiritu na kalakal yo, tan ikawes yo so too a balo, a sikato so pinalsay Dios ed loob na kaptekan tan matuan kasantosan.” (Efeso 4:22-24) Wala ed akindalem so puersa a mamapakiwas ed kanonotan tayo. Napapasimbalo tan ombibiskeg itan legan ya ombubulaslas so panangaro tayo ed si Jehova tan ed saray ganggan to, tan pagmaliwen to itayon espiritual tan mareen a totoo.
5. Panon a say “balon ganggan” ya inter nen Jesus ed saray babangatan to so angitarok na deen ed limog da?
5 Say pankaukolan ed sayan panamasimbalo so naimano manlapud instruksion nen Jesus ed saray babangatan to legan na kaunoran iran oras a kaiba tora: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabirbiran da’ya sikayoray babangatan ko, no wala so aro yo ed sakey tan sakey.” (Juan 13:34, 35) Sayan singa-Kristo, agsinisiblet a panangaro so mamebedber ed saray babangatan diad naspot a pankakasakey. (Colosas 3:14) Saraman labat so mabulos a mangaksobi tan manbilay unong ed sayan “balon ganggan” so makapanggayaga ed kareenan ya isisipan na Dios. Wala ta iray totoon manggagawa ed saya natan?
6. Akin a panggagayagaan na Tastasi nen Jehova so kareenan, no ipareng ed totoo na say mundo?
6 Panbabanikelan na Tastasi nen Jehova ya ipanengneng so aro ed sankamundoan ya impanaagi ra. Anggaman sikaray nanlalapud amin a nasyon ed mundo, ag-ira mibabali ed saray agpantatalosan ed mundo, anggaman sikaray nidurunget ed pirmin pananesdes na politika tan relihyon. Bilang nankakasakey a totoo, sikaray ibabangat nen Jehova, tan panggagayagaan day kareenan. (Isaias 54:13) Mansiasiansia iran neutral ed saray politikal a gutgutan, tan ag-ira mibibiang ed bakabakal. Arum a datin marawal so tinmunda la ed ontan ya estiloy kabibilay. Sikara lay nagmaliw a maaro’d-kareenan a Kristianos, ya aaligen so uliran nen Kristo Jesus. Tan intiron puso ran tutumboken so simbawa nen Pedro: “Say maliket a mangaro na bilay tan onnengneng na maong ira ya agew, nepeg to ya amperen so dila to ed mauges tan aleg a saray bibil to mangibalikas ira na kapaklapan, arawian to so mauges tan gawaen to so kaabigan; anapen to so kareenan tan tumboken to.”—1 Pedro 3:10, 11; Efeso 4:3.
Saramay Mangegemtan na Kareenan
7, 8. Mangiter na saray alimbawa na totoon tinmunda ed pibabakal tan nananap na tuan kareenan. (Isalaysay so arum ni a kabisadom.)
7 Alimbawa, wadtan si Rami Oved, datin opisyal ed sakey ya specialized antiterrorist squad. Sikatoy impasal a mamatey ed saray kalaban to. Sisiaen ton pirmi nasyonalismo na Israel anggad asabi agew a naamtaan ton aglabay na saray rabbi ya ikasal toy inad-aro ton bii, lapu labat ta sikatoy taga-Asia, sakey a Hentil. Ginapoan ton inanap so katuaan ed Biblia. Ag-abayag et akabat toray Tastasi nen Jehova. Say impiaral to na Biblia ed Tastasi so angombinsi ed sikaton agla nayarin magmaliw a sakey a panatikon nasyonalista. Say Kristianon aro et kabaliksan toy panangipulisay ed bakal tan saray ayura tan panaral ya aroen so totoo ed amin a rasa. Agaylay impakasurprisa to sanen akaawat na sakey a sulat a kuanto ed oniaran manangilukas a salita, “Agik a Rami!” Anto ta so makapakelaw ed satan? Sakey a Tasin taga-Palestina so nansulat. “Mairap a panisiaan,” kuan nen Rami, “ta kakabusol koray taga-Palestina, tan nia so sakey ed sikaran manatawag ed siak na ‘Agik.’” Si Rami tan say akulaw to so mangegegemtan la natan na tuan kareenan diad dalan na Dios.
8 Sakey nin alimbawa et si Georg Reuter, a nanserbi ed armada na Alemanya a linmusob ed Russia legan na Guerra Mundial II. Ag-abayag et sikatoy dismayado la ed matangsit a pakana nen Hitler a kontrolen so mundo. Sanen sinmempet kayari na bakal, impaiyaralan na Biblia ed Tastasi nen Jehova. Insulat to: “Diad kaunoran, onlilinew la ed siak iray bengabengatla. Amoriak ya aliwan say Dios so natetel ed amin a panagpaagos na dala . . . Naamtaan koy gagala to a mangiletneg na sankadalinan a paraiso tekep na andi-anggaan iran bendisyon parad matulok a katooan. . . . Intangsit nen Hitler so ‘Sanlibon-Taon ya Uley’ to balet ta nanuley ed loob labat na 12 [taon]—tan tekep na makapakigtot a pinawayan to! Si Kristo, aliwan si Hitler . . . so makayari tan mangiletneg na sanlibon-taon ya uley ed dalin.” Diad loob la na 50 taon natan, si Georg so manseserbi la bilang sakey ya manangilaman parad tuan kareenan diad sigpot-panaon a panagministro.
9. Panon a say eksperiensia na Tastasi nen Jehova ed Nazi Alemanya so mamaneknek a sikaray makpel ingen mareen?
9 Say integridad tan neutralidad na Tastasi nen Jehova ed Alemanya legan na uley na Nazi so mantutultuloy a testimonya ed panangaro ra ed Dios tan ed kareenan anggad natan, diad masulok lan 50 taotaon. Onia so inkuan na sakey a bokleta ya agano nin nipalapag na Holocaust Museum diman ed Washington, D.C.: “Sinungdoan na Tastasi nen Jehova so pirmin panamasegsegang lapud uley na Nazi. . . . Sikaray pandinayewan na dakel a kapanaonan da lapud inkakpel ya impanengneng da ed agda [panangipulisay ed relihyon da], diad arap na panamairap, panagmaltrato ed saray panangipangawan a kampo, tan no maminsan et ipapatey ni ingen.” Intuloy na bokleta: “Nen nibulos ira ed saray kampo, nantultuloy iray Tastasi nen Jehova ed kimey da, akilimog ed saray akaliktar, a kinombirti ira.”
Babaleg a Tuloy a Pananguman
10. (a) Anton baleg a pananguman so nakakaukolan pian onsabi so tuan kareenan? (b) Panon iyan nilitrato ed libro na Daniel?
10 Labay kasin ibaga na saya a panisiaan na Tastasi nen Jehova a makapangitarok ira na kareenan ed mundo lapud malaknab a panangombirti diad panisia ed Kristianon neutralidad? Andi! Pian nipawil so kareenan ed dalin, balbaleg a tuloy a pananguman so nakakaukolan. Anto kasi itan? Nepeg a pasalatan so uley na too a madibisyon, malames, tan marawal ed uley na Panarian na Dios, ya imbangat nen Jesus ed saray babangatan ton ipikasi. (Mateo 6:9, 10) Balet, panon itan a nagawa? Diad madibinon nipuyan a kugip, naamtaan nen propeta Daniel a diad kaunoran iran agew, say Panarian na Dios, singa balbaleg a bato ya ‘agnanlapud lima [na too]’ so manmisimisi ed balbaleg a talintaon mangirerepresinta na mapolitikan pananguley na too dia ed dalin. Insan to improklama: “Dia ed saray agew naani na saratan ya ar-ari, say Dios na tawen mamaalagey naani na sakey a panarian ya anggan kapigan agnaani naderal. Tan say panaguley to agnaani niiter ed sananey a baley. Balet buybuyaken to naani tan upoten to naani so saraya ya amin a panarian, et sikato so mansiansia lawas.”—Daniel 2:31-44.
11. Diad anton paraan ya itarok nen Jehova so nakakaukolan a pananguman parad kareenan?
11 Akin a nagawa iyan baleg a pananguman ed nagagawan kipapasen na mundo? Lapud insipan la nen Jehova ya ekalen to dia ed dalin iray amin a manudutak tan manederal ed satan. (Apocalipsis 11:18) Nagawa iyan panamasimbalo diad matunong a bakal nen Jehova sumpad si Satanas tan ed marelmeng a mundo to. Nabasa tayo ed Apocalipsis 16:14, 16: “Ta sikara [salanti, agmalinis a nipuyan a balbalikas] so espiritu na saray dimonyo, a manggagawa na tanda, pian onla ra ed saray arari [politikal iran manuley] na amin a mundo, pian tiponen da ra ya iparaan ed bakal na baleg ya agew na Dios, a Makapanyarin amin. Tan tiponen to ran pankakasakeyen ed pasen a dia ed Hebreo manngaran na Armagedon.”
12. Anto so nagawa diad Armagedon?
12 Anto so nagawa ed Armagedon? Aliwa itan a singa say nuklear ya apocalipsis odino antokaman ya arum nin desyang lapud sugsug na totoo. Andi, saya et bakal na Dios a mangangga ed amin a bakal tan manigway ed amin na saramay mangiyaalibansa ed ontan a bakal. Satan so bakal na Dios ed kitarok na tuan kareenan ed saramay mangaaro ed kareenan. On, onsabi Armagedon a singa ed ginagala nen Jehova. Ag-itan naabala. Apuyanan so propeta ton si Habacuc a mangisulat: “Say pasingawey sikato ni nipaakar ed nigeter a panaon, tan mansiglat ya onarap ed anggaan, et agnaani mantila. Anggan manabala, sikato so alagden mo; ta petepeteg ya onsabi, ya agmanbayag.” (Habacuc 2:3) Lapud atooan a liknaan tayo a gawaen to itayon agmakaalagar a singano mabayag ni, balet sumpalen nen Jehova so inyeskedyul to. Ombetag so Armagedon ed oras ya inggeter nen Jehova.
13. Panon a pidenengan na Dios so peteg ya akankasalanan, si Satanas a Diablo?
13 Sayan desididon kiwas so mangilukas ed dalan parad tuan kareenan! Balet pian say tuan kareenan so malet a niletneg, walay bengatlan nepeg a nagawa—say kaekal na samay pansesengegan na dibisyon, panamusol, tan kolkol. Tan satan so eksakton ipropropesiya na Biblian ontumbok a nagawa—say kikalinsurong nen Satanas, say manangisagyat na bakal tan ama na katilaan. Anengneng nen apostol Juan iyan inkagawa diad sakey a mapropetikon pasingawey, a singa nirekord ed Apocalipsis 20:1-3: “Akanengneng ak na sakey ya anghil ya inmepas a nanlapu ed tawen a wala ed sikato so tombok na kaaralman tan sakey a golonggolong dia ed lima to. Tan inerel to so dragon, saman so uleg a daan, a sikato so Diablo tan Satanas, tan sikato so binalor to ed sanlibon taon. Tan sikato so imbantak to ed kaaralman tan sikato so impokok to tan tinatakan to ed tapew to, pian agto la tilaan so saray nasyones angga ed kasumpal na sanlibon taon.”
14. Panon a nadiskribi so mananalon kiwas nen Jehova sumpad si Satanas?
14 Aliwa iyan kugkugip; sipan iya na Dios—tan ibabaga na Biblia: “Sikara so agnayarin pantilaan na Dios.” (Hebreos 6:18) Kanian nibaga nen Jehova diad panamegley na propeta ton Jeremias: “‘Siak si Jehova a manggawa a managamil na maaro ya abig na linawa, inkatunong, tan kaptekan dia ed dalin; ta dia ed saraya a bengatla manliket ak,’ kuan nen Jehova.” (Jeremias 9:24) Onkikiwas si Jehova tekep na inkahustisya tan inkatunong, tan panliketan to so kareenan ya itarok to naani ed dalin.
Uley na Prinsipi na Kareenan
15, 16. (a) Siopa so pinili nen Jehova a manguley bilang Ari? (b) Panon so inkidiskribi na satan a pananguley, tan siopa so minabang ed satan?
15 Pian naseguron onsabi itan a tuan kareenan ed amin na saramay manbibilay ed silong na uksoyay Panarian to, initer nen Jehova so pananguley ed tuan Prinsipi na Kareenan, si Jesu-Kristo a singa nipasakbay ed Isaias 9:6, 7: “Dia ed sikatayo nianak so sakey ya ugaw, dia ed sikatayo sakey ya ugaw a laki so niiter; et say uley wala naani ed tapew na abala to. Et say ngaran to natawag naani a Makapakelaw, Mananimbawa, Makapanyari a Dios, Andi-anggaan ya Ama, Prinsipi na Kareenan. Ed ibaleg na pananguley to tan kareenan anggapo naani anggaan . . . Say paga nen Jehova na saray ehersito so manumpal ed saya.” Mapropetikon insulat met na salmista so mareen ya uley na Mesias: “Dia ed saray agew to say matunong manaligwas, tan say inkadaakan na kareenan, angga ed kaandi na bulan.”—Salmo 72:7.
16 Niarum ni, miuley naani ed sikato diman ed tawen so 144,000 ya alanaay-espiritun agagi nen Kristo. Saraya so kaiban minanawir nen Kristo, a nipaakar ed sikara et inkuan nen Pablo: “Tan say Dios na kareenan magano imedmer to si Satanas ed lepsag na saray sali yo. Say grasya na Katawan tayo a Jesu-Kristo so manayam komon ed sikayo.” (Roma 16:20) On, manlapud katawenan a saraya so minabang ed impanbiktorya nen Kristo sumpad mahilig ed bakal, si Satanas a Diablo!
17. Anto so nepeg tayon gawaen pian natawir so tuan kareenan?
17 Kanian, say tepet natan et, Anto so nepeg mon gawaen pian tawiren so tuan kareenan? Onsabi labat so tuan kareenan diad paraan na Dios, tan pian nagamoran itan et nepeg moy mangala na positibon kundang. Nepeg mon awaten so Prinsipi na Kareenan tan onsaral ed sikato. Kabaliksan na saya a nepeg mon awaten si Kristo unong ed betang to bilang Managbawi tan Mananondon ed makasalanan a sankatooan. Imbagan mismo nen Jesus so bantog iran salita: “Tan ontan la’y impangaro na Dios ed mundo ya inter to so bogbogtong ya Anak to, pian siopaman a manisia ed sikato agnatawtaw noag ingen wala so bilay to’n andi-anggaan.” (Juan 3:16) Mabulos ka ta a mangagamil na pananisia ed Kristo Jesus bilang Ahente na Dios ed pangitarok na tuan kareenan tan kilalaban? Anggapo la so arum a ngaran ed silong na tawen a makapangiletneg na kareenan tan mangarantiya ed satan. (Filipos 2:8-11) Akin? Lapud si Jesus so Pinilin Sakey na Dios. Sikatoy sankabalgan a mensahero na kareenan a nambilay ed dalin. Kasin talinengen mo si Jesus tan tumboken mo so uliran to?
18. Anto so kaukolan tayon gawaen bilang kiwas ed saray salita nen Jesus a nirekord ed Juan 17:3?
18 “Saya sikato so andi-anggaan a bilay,” inkuan nen Jesus, “ya naamtaan da ka a saksakey a tuan Dios, tan saman so inbakim, salanti Jesu-Kristo.” (Juan 17:3) Natan la so panaon ed pangala na suston pikakabat diad regular ya iyaatindi ed saray miting na Tastasi nen Jehova diad Kingdom Hall. Sarayan edukasyonal a miting so mamakiwas ed sikan ipanabang moy pikakabat tan ilalom ed arum. Sika met so magmaliw a manangilaman parad kareenan na Dios. Napanggayagaan mo natan so kareenan diad panmatalek ed Jehova a Dios, a singa asaglawi ed Isaias 26:3, unong ed New International Version: “Nasnaspot a mikareenan ed sikato a say kanonotan to et maligen, lapud manmamatalek ed sika.” Diad siopa so pakapanmatalkan mo? “Manmatalek ed si Jehova, sikayon totoo, ed amin a panaon, ta si Jah Jehova so Dampay ed andi-geter a panaon.”—Isaias 26:4, NW.
19, 20. Anto so manatalaran ed saramay manaanap tan mangegemtan natan na kareenan?
19 Ontalindeg natan parad andi-anggaan a bilay diad mareen a balon mundo na Dios. Papaseguroan itayo na Salitay Dios ed Apocalipsis 21:3, 4: “Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da. Tan punasen to so amin a lua ed kamataan da; tan andi gapo la naani ipatey, tan anggapo la naani onnangis o dageyem, o ot-ot. Ta saray ona a bengatla sikara so linmabas la.” Agta satan imay mareen ya arapen a panpipirawatan mo?
20 Insan tandaan so isisipan na Dios. “Ingen ta saray mauyamo tawiren da naani dalin, tan manliket ira a dili ed inka-daakan na kareenan. Tandaan mo so nagnap a too, tan nengneng mo so maptek, ta wala so maligan kasumpalan ed too na kareenan.” (Salmo 37:11, 37) Sano onsabi itan a maliket ya agew, nibaga tayo komon tekep na otang a linawa, “Tuan kareenan a siansia! Salamat ed si Jehova a Dios, say lapuan na tuan kareenan!”
Kasin Nisalaysay Yo?
◻ Anto so makatulong ed sakey pian manguman ed panag-isip tan kakikiwas to?
◻ Panon so pangidedemostray Tastasi nen Jehova, bilang indibidual tan inggrupo, so aro ra parad tuan kareenan?
◻ Panon so pideneng nen Jehova ed amin a mangiyaalibansa na panbubusol tan bakal?
◻ Anto so gawaen na uley na Prinsipi na Kareenan parad katooan?
[Saray litrato ed pahina 14]
Nasusumpal iray salita nen Isaias, aliwan say NU, noagta na saramay onkikiwas unong ed bangat nen Jehova
[Saray litrato ed pahina 15]
Sarayan duaran lalaki so anguman pian gegemtaney kareenan
Rami Oved
Georg Reuter
[Litrato ed pahina 16]
Ontalona so tuan kareenan ed silong na uley na Prinsipi na Kareenan