Pankakasal a Mamagalang ed si Jehova

Say onggendan ya artikulo ed Kristianon Pankakasal et inmunan niparaan diad Ethiopia ed Amharikon lenguahi pian makatulong a giya parad dakel ya agano nin nagmaliw a Tastasi nen Jehova ed satan a bansa. Tutukoyen to so pigaran lokal a kustombri tan agagamil a nayarin midumaan ed kawalaan mo. Maseguron naromog moy pandumaan a makapainteres. Ontan met, iprepresenta na artikulo so balansin konseho na Biblia a nanengneng mon onaplika anggamano midumaay kustombri ed kasal diad lugar mo.

“KRISTIANON Pankakasal a Mangitarok na Gayaga” so titulo na maabig ya aaralen ya artikulo ed Say Panag-Bantayan na Enero 1, 1985. Say tinmumbok ya artikulo ed satan a paway so apauloan na “Anapen so Asimbang a Panliliket ed Saray Piesta na Kasal.” (Parad siopaman a manplaplanon mangasawa, wala so kaaruman a makabat a konseho ed saray libron Making Your Family Life Happy, kapitulo 2, tan Your Youth​—Getting the Best Out Of It, kapitulo 19 tan 20.)a Dakel so nagmaliw lan Tastasi nen Jehova nanlapulad inkipalapag na saratan ya artikulo, kanian labay min irepaso so pigaran punto a nagkalautlan onaplika ed lugar tayo, ontan met ed arum niran matukoy a punton makatulong ed kagawa’d saray okasyon na pankakasal a mamagalang ed si Jehova, say Manangigapo na panamaley.

Sakey a tepet a nakonsideran unona so, Kapigay kagawa na kasal? Kaukolan ta a say petsa so unong ed kaugalian a tiempoy pankakasal? Sisiaen ed lokal a dinanman a nagawan kasal ya agnipetsa’d satan a tiempo so ag-ontalona. Anito iyan andian na pundasyon, ta dakel a sanaasawan malikeliket tan sanuulop a manlilingkor ed si Jehova so nankasal ya agmitukoyan ed kaugalian a tiempo. Agtayo manisia ed suwerte odino malas. (Isaias 65:11; Colosas 2:8) Agtayo la ingen natulongan iray agmananisian kanayon tayo pian nibiig da so katuaan ed katilaan no ipetsa tayo so kasal unong ed saray anito ra. Diad tua et makapankasal iray Kristiano ed dinanman a bulan.

Sano niyuksoy so paliwawa ed kasal kayari na seremonya sibil, makabat no agla pabayagen ed pigaran agew so baetan na satan a duaran ebento. No kaliktan na mankasal so kiwalay paliwawa ed kasal diad Kingdom Hall, mabayag ni et ontupleg la ra’d mamatatken na kongregasyon ed kausar na hall. Seguroen na lokal a mamatatken a saray uksoyan parad seremonya so makapangitilak ed sikara na malinis a konsiensia. Say panaon so kaukolan a nipiho pian agnibana ed antokaman ya aktibidad na kongregasyon. Say apilin mangasal so mitongtong lan unona ed prospektibon nobyo tan nobya pian makapangiter na makatulong a simbawa tan seguroen ya anggaporay makaamper a moral odino legal ed kasal tan sikato so miabobon ed saray plano parad antokaman ya ontumbok a sosyal a pandaragup. Say paliwawa ed kasal so nepeg a manbayag na kapalduay oras tan niiter ed mapagalang a paraan, say nidanet et say espiritual ya aspeto. Pihon say paliwawa ed kasal so mas importanti nen say dinanman a ponsyan ontumbok.

Say Kristianon kasal so maong a pankanawnawan nipanengneng tayon sikatayoy ‘ag-taga mundo.’ (Juan 17:14; Santiago 1:27) Say inkauksoy tayo so kaukolan a matalonggaring. Mankabaliksan a sikatayo so masakbay imbes a panalagaren iray imbitado, ompan maneral ed saray aktibidad na kongregasyon. Saya so bengatlan nepeg a tandaan na nobya, lapud nayarin pasesegen na kakanayon ton manpaatrasado​—a singano sikatoy im-importanti. Say pansakbay na matatken [ed espiritual] a Kristianon agin bii so makapangidemostra ed satan ya espiritual iran kalidad, a singa say inkamapaabeba tan konsiderasyon, ya importanti parad sikato! Ontan met, sano naimbitaan so litratistan mangirekord ed okasyon, importanti so inkauksoy. Matukoy labat a kaukolanen tayo ed litratistan manterno, mankorbata, tan aka-disintin pantalon tan agmakasbel ed paliwawa no manlilitrato. Anggapoy panlitrato legan na pikakasi. Say inkauksoy tayo so mamagalang ed si Jehova tan mangiter na maabig a pantasi. Agla nakaukolan so pitunosan ed minumundon kustombri a mangilot ed peteg a kabaliksan na ebento.

Aliwan sakey a kakaukolanen parad maaligwas a kasal so ponsya, balet agmet sumlang ed Kasulatan so ontan a maliket ya okasyon. Anggaman ontan, say ontan a pandaragup parad tuan Kristianos so nepeg a midumaan ed minumundon ponsyan idadanet toy sobsobra, alabas a panaginum, alabas a panangan, maksil a musika, makapaingganyon sayaw, tan panlalaban ni ingen. Ikakasakey na Biblia so “maingal iran panliliket” ed saray gawa na laman. (Galacia 5:21, NW) Mas mainomay so pakakontrol ed pandaragup no aliwan abalbaleg. Agla kaukolay pangipaalagey na damara pian napenek iray popular a kustombri. No bilang ta disidien na arum so pangusar na damara lapud pankaukolan na espasyo odino panaon, saya so personal a pamaakaran.

Nipapanengneng la na eksperiensia a say epektibon paraan ed panlimitay imbitaan et say pangusar na espisipikon insulat iran imbitasyon. Mas makabat so pangimbita ed saray indibidual imbes ya intiron kongregasyon, tan bilang mauksoy a Kristianos, kaukolan tayon respetoey panaglimita na saray bisita. Ontulong met ed sikatayo so insulat iran imbitasyon pian napaliisay kababaingan lapud iparisi na adispilo ed ponsya, ta no nagawa itan, nayarin ontaynan laray agagi. (1 Corinto 5:9-11) No imbitaan na mankasal so agmananisia iran kanayon odino kabkabat, limitaan labat la so bilang, mas ikdan na importansia iraman so “kaamong na pananisia.” (Galacia 6:10) Dinisisyonan na arum ya imbitaan iray minumundon kabkabat odino agmananisian kakanayon ed paliwawa ed kasal imbes a diad ponsya. Akin? Lapud ta, walaray kason saray minumundon kanayon so amalesay makapabaing a situasyon ed ponsya a sengegay agpakapanbayag na dakel ya agagi. Arum iran mankasal so angiyuksoy na pirungo lambengat ed maapit a kapamilyaan tan Kristianon kakaaro.

Mitunosan ed Juan 2:8, 9, praktikal so pamili na sakey a “mananguksoy na bansal.” Pilien na nobyo so napanmatalkan a Kristiano a mangimano ed kamantini na inkauksoy tan atagey iran estandarte. No manregalo so kakaaro, kaukolan a gawaen iya ya andian na “maapan gloria.” (1 Juan 2:16) Makapanpaliket so musika no ag-alaokan na kuestionabli iran liriko, maksil, odino magulon tono. Aromog na dakel a mas marakep no dengelen lan unona na sakey a matatken so patogtogen a musika. Say pansasayaw so nayarin makapalikdo, ta dakel a kaugalian a sayaw so nanlapud mabunan panagsayaw tan mangipapatnag na agmatukoy ya inkaugali. No maminsan say “cake tan panagsirbi ed champagne” so sinyales na agnapokpokan ya ikiwas la na minumundon totoo. Diad tua, dinisidi na dakel a manasawan Kristiano ya agla mangiparungo na alak, diad ontan et napaliisan iray problema.

Lapud labay tayon napagalangan si Jehova, paliisan tayo so inkaparayag a managyat na alabas ya imano ed inkasikatayo. Anggan saray publikasyon ed mundo so sumpad uso a magmaliw ya alablabas. Agaylan agmakabat parad manasawa so pakaotang lapud engranden kasal tan insan panirapan ed loob na dakel a taon pian nabayaran so ginastos ed saman a sanagew! Siempre, antokaman a kawes ya isulong ed okasyon so kaukolan a masimpit tan mauksoy, matukoy ed totoon mankuan a mamapagalang ed Dios. (1 Timoteo 2:9, 10) Say artikulon “Christian Weddings Should Reflect Reasonableness” (The Watchtower na Enero 15, 1969) so makapainteres a nankomento nipaakar ed ikawes:

“Say kasal na sakey so espisyal ya okasyon, kanian gendagendat a nipapaimanoy gayaga tan makaingganyo na sakey. Balet agto kabaliksan a say sakey et nepeg a mansulong na sakey a klase na trahe odino amerikana. Duga labat so pangonsidera na sakey ed istilo’d lugar da, gastosen tan personal a pantaway to. . . . Balet, makatunongan ta so panaliw na ontanlan kabilin trahe a sengegay pakagastosan dan maong odino ed arum? . . . Nanliketan na arum a nobya so pangusar ed kawes na pinablin kaaro odino kanayon. Arum so napnek a tuloy ed impandait da’d mismon trahe ra, anganko et nausar lamet itan ed arum niran okasyon ed arapen. Tan manepenepeg labat parad saray ikasal a balibali sulong da . . . Arum a makasarag a makapankasal na engrande so nayarin kaliktan dan personal a nawalaan na ‘simplin kasal’ lapud kaatapan na panaon.”

Mipadpara, saray kabiangan na kasal (saray abay na nobyo tan nobya) so agnakaukolan ya amayamay. Agda met labay a sikaray naimanon maong lapud trahe tan kakikiwas da. Anggaman naabuloyan so dispilosip a toon onatindi ed paliwawa ed Kingdom Hall, inkuan na The Watchtower na Abril 15, 1984: “Agmanepeg so pagmaliw dan kabiangan na kasal so totoon dispilosip odino saramay mabanday so estiloy-bilay da a pirmin misumlangan ed saray prinsipyo na Biblia.”

Anggaman inmatindi si Jesus ed kasal, agtayo isipen ya abobonan to so popular a kustombrin kilibot ed saray kotsi a mainga-ingal ed intiron baley; pinanmulta ni ingen na polisya iray manmamaneho lapud panbosina diad libot na kasal. (Nengnengen so Mateo 22:21.) Diad panegek, imbes ya aligen so maparayag odino kaslakan iran kiwas na totoo ed nasyones, nepeg ya ipatnag na saray Kristiano so kakabatan a walad sakey a masimpit.​—Uliran 11:2.

Komusta met no mibansal ka’d kakaabay, minumundon katrabahoan, odino arawin kakanayon tan kabkabat? Balang sakey a Kristiano so nepeg a mandisidin bukor ed satan. Maabig a nodnonoten a mabmabli so panaon tayo, lapud kaukolan tayo so panaon parad ministeryo tayo, personal a panagaral, tan arum a gegemtan parad pamilya tan ed kongregasyon. (Efeso 5:15, 16) Diad saray sampot-simba et walaan itayo na saray miting tan lawak a serbisyo ya agtayo labay a nasaew. (Hebreos 10:24, 25) Dakel a kasal so nipepetsan mibabansag ed saray asamblea odino espisyal a lawak a serbisyon mitukoyan ed Pangdem na Katawan. Agtayo abuloyay pakasbel ed panggawa na miparan espisyal iran sagpot na agagi tayo ed sankamundoan pian makaatindi ed Pangdem na Katawan. Sakbay ya akabatan so katuaan, akapiulop-ulop itayo la ed minumundon totoo, anganko ed saray sirkumstansyan ag-amagalang ed Dios. (1 Pedro 4:3, 4) Natan et duma laray prayuridad tayo. Lawas posibli so pangipawit na card pian komustaen so minumundon sanasawa odino onsamar a magano ed arum ya agew. Inusar na arum iratan ya okasyon pian makapanpulong, pian manginabang na pigaran teksto a matukoy parad saray balon kasal.

Say kasal a mas matalonggaring iray espiritual ya aspeto nen saray minumundon dalan so tuan mamagalang ed si Jehova. Diad paneguron sikaray agkabiangan na mundo tekep na saray anito tan inkaalablabas to, diad agpangiyabuloy ya onsalet ed saray a teokratikon aktibidades, tan diad pangipatnag na kasimpitan imbes a pamaparayag, panliketan na saray Kristiano so okasyon. Niarum ni, nayarin molimolien da so ebento tekep na maong a konsiensia tan makapaliket iran nodnonoten. Tekep na panangipatnag na kakabatan tan inkamakatunongan, amin komon a Kristianon pankakasal tayo so makapantasi ed matuan-impanpuson imbitado.

[Paimano ed leksab]

[Litrato ed pahina 24, 25]

Ag-alablabas a tutumboken na saray Kristiano so kada lokal a kustombri na kasal