Tepet
◼ No walay sannobyo a malabay a mangusar ed Kingdom Hall parad kasal da, antoray kaukolan dan itongtong ed mamatatken?
Saray kasal ya inyuksoy mitunosan ed saray prinsipyo na Biblia et mamapagalang ed si Jehova, nagkalautla no gagawaen iratan diad Kingdom Hall. Lapud diad imaton na saray taga paway, saray nagagawan programa ditan et mangipatnag ed no anton klase na organisasyon so kawalaan tayo. Ta pian ‘nagawa so amin ed kasimpitan tan uksoy,’ matukoy labat a salitaen na saray mamatatken ed sannobyo iray pamaakaran a nalalanor sano say Kingdom Hall et kinerew ya usaren a pankasalan.—1 Cor. 14:40.
Say sannobyon malabay a mangusar ed Kingdom Hall parad kasal da et nepeg a mansulat ed komite parad serbisyo na kongregasyon a manguusar ed hall. Nepeg a masakbay da lan iter itan ya insulat a kerew tan nepeg dan iyan so petsa tan oras na labay dan pangusar ed hall. Nepeg dan tandaan ya ag-umanen na saray mamatatken so eskedyul na saray aral parad kasal da. Niarum ni, say nobyo tan nobya et nepeg a walaan na maabig a reputasyon, a manbibilay unong ed saray prinsipyo na Biblia tan ed saray matunong ya estandarte nen Jehova.
Pian naseguron kigloriaan na kagalgalang a Dios tayo so kasal, nepeg ya itongtong na sannobyo ed komite parad serbisyo iray plano ra ed kasal antis iratan a napiho. Anggaman ag-ipilit na saray mamatatken ed sannobyo so opinyon da, no walay naimano ran plano a kuestionable, nepeg ya umanen iratan. Saraman labat so musikan walad Kingdom Melodies odino diad libron panagkantaan tayo so nayarin patogtogen. Nepeg met a paaprobaan ni so antokaman a dekorasyon ya iyan ed Kingdom Hall, odino say lira na saray yurongan. No walaray manlitrato odino man-video, nepeg ya ag-itan mangekal ed dignidad na okasyon. Nayarin abuloyan na saray mamatatken so pan-rehearsal ed Kingdom Hall, daput no ag-itan makaabala ed arum iran uksoyan na kongregasyon. Nepeg ya agmangipepeket na imbitasyon ed information board. Balet, sarag na saray mamatatken so mangiter na antikey ya anunsio legan na Pantitipon Parad Panagserbi pian napakabatan so kongregasyon ed arap-arapen a kasal ed Kingdom Hall.
Anggaman agmet kakaukolanen ya amin na saray walad entourage et bautismado, agmatukoy no walay kaiba ed satan a say panagbilay to et butar-butar a sumlang ed saray prinsipyo na Biblia odino say kondukta to et kuestionable ed saramay onatendi. Say nepeg a mangasal et sakey ya elder ya aturo parad satan a betang. Saray aturon mangasal et talagan kualipikadon mangipabitar ed saray Makasulatan a prinsipyo ya onaplika ed sayan importantin okasyon.—1 Tim. 3:2.
Say kasal et onreplekta met ed samay matatken a mangasal, kanian nepeg ya amtaen to met no antoray gawaen legan na seremonya. Katongtongen to so sannobyo pian amtaen so nipaakar ed moral a kondukta ra legan na paniinaroan da; tan labay met na sannobyo so magmaliw a matua ed sikato. No bilang ta walay sakey ed sikara ya akiasawa la diad apalabas, nepeg ton pruebaan a diad pikasal to lamet et anggapoy nasusumlang ton Kasulatan tan ley. (Mat. 19:9) Kalaktip ed saya so pangipanengneng ed matatken na kopya na pinal a desisyon ed diborsyo a nanlapud arum a bansa.
No say sannobyo et bulobulos a mitalosan tan sigpot a mikoopera ed saray mamatatken, say kasal da et magmaliw a sakey ya okasyon a makapaliket ed amin.—Uli. 15:22; Heb. 13:17.