Kasin Nanonotan Yo?

Kasin maalwar mon kinonsidera iray agano nin paway na Say Panag-Bantayan? No ontan, naromog mon makapainteres so pannonot ed onggendan:

◻ Panon a saray sanasawa natan so makatumbok ed eksilintin alimbawan intilak nen Aquila tan Prisca?

Nanlingkor si Aquila tan Prisca ed pigaran nanduruman kongregasyon. Singa sikara, dakel a maseseg a Kristianos natan so mabulos ya inmalis ed lugar a babaleg so pankaukolan. Naeeksperiensia ra met so gayaga tan inkapnek ed pakakanengneng ed ibubulaslas na intereses na Panarian tan diad pakababayubo na maligsa tan mablin Kristianon pankakaaro.​—12/15, pahina 24.

◻ Anto so panmoria na Biblia ed de-alkohol ya iinumen?

Balansi so panmoria na Biblia ed de-alkohol ya iinumen. Diad sakey a dapag, ibabaga na Biblia a say alak so langkap manlapud Dios. (Salmo 104:1, 15) Diad biek a dapag, kokondenaen to so inkaalablabas. (Lucas 21:34; 1 Timoteo 3:8; Tito 2:3; 1 Pedro 4:3)​—12/15, pahina 27.

◻ Anto so makatantandan nengneng ed libro na Biblia ya Aggeo?

Anggaman say libro na Aggeo so tugyopen labat na 38 bersikulo, nausar so ngaran na Dios a 35 danay. Singa ompasen ya andi bilay itan a propesiya sanen say ngaran a Jehova so sinalatan na titulon “Katawan.”​—1/1, pahina 6. 

◻ Anton leksion so naaralan tayo manlapud saray kasalanan nen David tan Manases?

Anggaman ed panamerdona nen Jehova ed si David tan Manases, sarayan lalaki​—tan kaiba so Israel​—so kaukolan a manbilay tekep na saray pansumpalan na makasalanan a gawa ra. (2 Samuel 12:11, 12; Jeremias 15:3-5) Diad mipadparan dalan, anggaman perdonaen nen Jehova iray managbabawin managkasalanan, nayarin walaray pansumpalan na saray kiwas da ya agnaarawian.​—1/1, pahina 27.

◻ Diad anton dalan a ‘saray sali na saray mangitarok na saray magayaga a balita’ na Panarian na Dios et “alay karakpan”? (Isaias 52:7)

Satan et saray sali so kaslakan a mamapakiwas ed sakey ya onlan manpulong ed arum. Saratan a sali so peteg a mangirerepresinta ed sakey a too. Kanian parad dakel ya akarengel tan kinmiwas a paborabli ed maong a balita na Panarian, saratan a sali na mensahero so tuan masanting a nengnengen.​—1/15, pahina 13.

◻ Anton nankaduan kimey so nasasaglawi ed ‘panangideklara ed maong a balita’? (1 Corinto 9:16)

Unona, nepeg tayon iproklama so maong a balita na Panarian na Dios. Say komaduan aspeto ed sayan kimey et sasaglawien toy panbangat ed saraman so onkiwas a paborabli ed panangiproklama na Panarian.​—1/15, pahina 23.

◻ Antoray personal a gungguna a resulta manlapud panagkanta na saray kanta ed Panarian diad saray miting ed kongregasyon?

Say panagkanta so mangiiter ed sikatayo na pankanawnawa pian nibalikas tayoray liknaan tayo ed Manamalsa. (Salmo 149:1, 3) Sano ipapuso tayo so panagkanta ed kongregasyon, mangiyan itan ed sikatayo ed dugan kipapasey nonot tan puso parad ontumbok a programa. Satan so mamakiwas ed sikatayo diad babaleg a pibiang ed panagdayew ed si Jehova.​—2/1, pahina 28.

◻ Panon a nibaga a say agew na ipapatey so magmaong nen say agew na kianak? (Eclesiastes 7:1)

Say agew na ipapatey so magmaong nen say agew na kianak na sakey, no say sakey so akapangiletneg na maong a ngaran ed si Jehova a makapamaoli ed saray matoor ya ompapatey. (Juan 11:25)​—2/15, pahina 12.

◻ Akin a personal a makatulong ed sikatayo so libro na Eclesiastes?

Makatulong itan ed sikatayo a mangipetek ed saray panmoria tayo ed bilay tan no anto so pangiyaapasakeyan tayo. (Eclesiastes 7:2; 2 Timoteo 3:16, 17)​—2/15, pahina 16.

◻ Kasin pundamentalista iray Tastasi nen Jehova?

Andi. Anggaman walaan ira na mabiskeg a relihyoson kombiksyon, aliwa iran pundamentalista diad pantalos a pakauusaran a termino. Ag-ira ombabaling ed demostrasyon tan karawalan a sumpad saramay agda piabobonan. Aaligen da so Pangulo ra, si Jesu-Kristo.​—3/1, pahina 6.

◻ Say agpakaamta na eksakton panaon na isasabi nen Jesus pian gawaen so panangibales na Dios so walaan na anton epekto’d saray Kristiano?

Saya so manggawa ed saray Kristianon mansiansian akabantay tan mangiter ed sikara na inagew-agew a pankanawnawa pian paneknekan a sikaray manlilingkor ed si Jehova tekep na andi-siblet a motibo.​—3/1, pahina 13.

◻ Anto so kaukolan tayon ikonsidera sakbay na pangidemanda sumpad agi tayo a nayarin anaol ed sikatayo?

Kaukolan tayon ikonsidera so posiblin epekto to ed sikatayon mismo, ed arum a nalalanor, diad kongregasyon, tan ed saray taga-paway. (1 Corinto 6:7)​—3/15, pahina 20.

◻ Panon a nagamoran so tuan liket?

Say tuan liket so sakey a kondisyon ed puso, a nibasi ed puron pananisia tan sakey a maong a siglaotan ed si Jehova. (Mateo 5:3)​—3/15, pahina 23.

◻ Anto so nepeg a gawaen na Kristiano sano natawag a manhurado?

Balang sakey a Kristiano a nipaarap a manhurado so nepeg a manetermina no anton kurso so tumboken to, a nibasi ed say pakatalos to ed Biblia tan say dilin konsiensia to. (Galacia 6:5)​—4/1, pahina 29.