Pangipabidbir ed Suston Klase na Mensahero

“[Siak imay] mamaelet ed salita na aripen to, tan [samay] manumpal ed simbawa na saray igaganggan [dilin mensaheros] to.”​—ISAIAS 44:25, 26.

1. Panon nen Jehova ya ipapabidbir so suston klase na mensaheros, tan panon ton iwawalwal iray palso?

SI Jehova so Engranden Manangipabidbir ed tuan mensaheros to. Ipapabidbir tora diad pakasusumpal na saray mensahen impasabi to’d panamegley da. Si Jehova met so Baleg a Manangiwalwal ed palson mensaheros. Panon toran iwawalwal? Pasasaewen toray tanda tan panagpalbeng da. Diad onia et nipapanengneng tora bilang dilin-aturon managparles, a talagan saray mensahe ra et manlalapud palson panagkatunongan da​—on, say makulangkulang tan silalaman a panag-isip da!

2. Anton pansumlangan ed baetan na saray mensahero so agawa ed panaon na Israelitas?

² Namparan inkuan di Isaias tan Ezequiel a sikaray mensaheros nen Jehova a Dios. Tua kasi? Nengnengen tayo. Nanpropesiya si Isaias ed Jerusalem manlapud ngalngali 778 K.K.P. ya anggad kayari na 732 K.K.P. Si Ezequiel so akautibo ed Babilonia kayari 617 K.K.P. Sikatoy nanpropesiya ed saray Judion agagi to diman. Makmakpel ya inyanunsio na sarayan propeta a say Jerusalem so naderal. Inkuan na arum a propeta ya ag-iyabuloy kuno na Dios iyan nagawa. Sioparay apaneknekan a suston klase na mensaheros?

Inwalwal nen Jehova Iray Palson Propeta

3, 4. (a) Antoran mansumlangan a mensahe so impasabi ed saray Israelita diad Babilonia, tan panon ya inwalwal nen Jehova so palson mensahero? (b) Antoy imbaga nen Jehova a nagawa ed saray palson propeta?

³ Si Ezequiel, bangta walad Babilonia, so naikdan na pasingawey nipaakar ed nagagawa’d temploy Jerusalem. Diad lolooban ed mamabukig a wangalan et walay 25 a lalaki. Kabiangan ditan iray duaran prinsipi, si Jezonias tan si Pelcias. Panon iran minoria nen Jehova? Oniay ebat na Ezequiel 11:2, 3: “Anak na too, saraya sikara so totoo a mannononot na mauges, tan mangiter na mauges a simbawa ed saya a syudad; a kuanda, ‘Say panaon aliwa ya asingger a panangipaalagey na abung?’” Sarayan palpalaran a mensaheros na kareenan so mangibabagan, ‘Anggapo so onsabin kapeligroan ed Jerusalem. Siempre, ta agla mabayag et mangipaalagey itayo na dakel nin abung ed sikato!’ Kanian imbaga na Dios ed si Ezequiel a mangipropesiyay kontra ed sarayan matitilan mensahero. Diad bersikulo 13 na kapitulo 11, ibabaga ed sikatayo nen Ezequiel so agawa ed sakey ed sikara: “Et agawa, sanen nanpropeta ak, a si Pelcias ya anak a laki nen Banaias inatey.” Anganko agawa iya lapud si Pelcias so sankaprominentian tan maimpluensyan prinsipi tan manunaan a managtalintao. Pinaneknekan na biglaan ya impatey to a sikatoy palson propeta!

⁴ Say impamatey nen Jehova ed Pelcias so ag-amatunda ed arum niran palson propeta a mantila ed ngaran na Dios. Nantultuloy irayan manamalikdo ed maatiw a kurang da a mangipalbeng na bengabengatlan sumpad linawa na Dios. Kanian imbaga nen Jehova ed si Ezequiel: “Kasi la ray manpropropeta a maatiw, a tumboken da so dili ya espiritu ra, et anggapo so anengneng da.” Singa si Pelcias, sikaray “anggapo la” lapud pangilulut dan pangukugkugip parad Jerusalem na “pasingawey na deen, et anggapo so deen.”​—Ezequiel 13:3, 15, 16.

5, 6. Anggaman ed amin na saraman a palson mensahero, panon a niyalangon si Isaias bilang tuan propeta?

⁵ No nipaakar ed si Isaias, amin a madibinon mensahe to nipaakar ed Jerusalem et tinmua. Diad tiagew na 607 K.K.P., dineral na saray taga-Babilonia so syudad tan inawit iray nakdaan a Judio bilang kautibo ed Babilonia. (2 Awaran 36:15-21; Ezequiel 22:28; Daniel 9:2) Kasin sarayan kalamidad so amatunda ed palson propetas a mangataki’d totoo na Dios tekep na maapan labilabir? Andi, saraman a matitilan mensahero so nantultuloy ni!

⁶ Niarum ed saya, saray adakep ya Israelita so nipaarap met ed saray matangsit a managparles, managbuyon, tan astrologo na Babilonia. Balet, pinaneknekan nen Jehova irayan amin a palson mensahero ya atalon makulangkulang, diad impangipropesiyay kontra’d nagawa. Asabi panaon ya impanengneng ton si Ezequiel so tuan mensahero to, a singa met ed si Isaias. Sinumpal nen Jehova so amin a salita ya imbaga to ed panamegley da, unong ya insipan to: “Manerel ed saray tanda na saray matila, tan mamasanok ed saray pomaparles; tan mamalikdo ed saray makabat a totoo, tan manggawa na pikakabat da a kaatiwan; a mamaelet ed salita na aripen to, tan manumpal ed simbawa na saray igaganggan to.”​—Isaias 44:25, 26.

Makapakebbiew a Mensahe Nipaakar ed Babilonia tan Jerusalem

7, 8. Anton apuyanan a mensahe so walad si Isaias parad Babilonia, tan antoy kabaliksan na saray salita to?

⁷ Say Juda tan Jerusalem so mankibalatar, andian na manayam a too, ed loob na 70 taon. Anggaman ontan, inyabawag nen Jehova diad panamegley di Isaias tan Ezequiel a say syudad so nipaalagey lamet tan say dalin so napanayaman ed eksakton panaon unong ed impasakbay to! Saya so makapakelaw a prediksion. Akin? Lapud say Babilonia so kabkabat ya agbalot mangibubulos ed saray priso to. (Isaias 14:4, 15-17) Kanian siopa so makapangibulos ed sarayan akautibo? Siopa so makatalo ed makapanyarin Babilonia, a protektadon maong na ataragey a bakor tan depensan ilog to? Sarag na makapanyarin-amin a Jehova! Tan oniay inkuanto a gawaen to: “A mankuan ed kalinsurong [salanti, maranum a depensa na syudad], ‘Onmaga ka, tan pamagaen ko naani so saray ilog mo’; a mankuan ed Ciro, ‘Sikato so pastol ko, tan gawaen to ya amin so labay ko’; a kuanto a nipaakar ed Jerusalem lanlamang, ‘Sikato nipaalagey naani, say semento to niletneg naani.’”​—Isaias 44:25, 27, 28.

⁸ Isipen pa itan! Say Ilog Eufrates so talagan mairap na totoon looban a samben balet no parad si Jehova singa labat itan sankatedter a danum ed ngimmalab a kalan. Tampol, a naandipat so samben! Nabagbag so Babilonia! Anggaman ngalngali 150 taon ni sakbay na kianak nen Ciro a Persiano, impaipasakbay la nen Jehova ed si Isaias iyan pakakobkob na ari ed Babilonia tan say kibulos na saray akautibon Judio diad panamegley na pangautorisa to ed sikara ya ompawil pian ipaalagey lamet so Jerusalem tan say templo to.

9. Siopay sinalambit nen Jehova bilang ahinti to diad panusa ed Babilonia?

⁹ Naromog tayo iyan propesiya diad Isaias 45:1-3: “Onia so kuan nen Jehova ed nilanaan to, ed Ciro, a say lima to a kawanan binenbenan ko, a mamatulok ed saray nasyon ed arap to, . . . a mangilukas ed saray pinto ed arap to; et saray wangalan ag-ira naani nikaput: ‘Onla ak naani ed onaan mo, tan palanasen ko naani so saray lasonglasong [nipokpokdol, NW]. Buyaken ko naani so saray wangalan a gambang; puterputeren ko naani so saray balewet a balatyang. Et iter ko naani ed sika so saray kayamanan na kabilungetan, tan saray kayamanan ya inyamot ed saray maamot a pasen, pian sika naamtaan mo a siak, si Jehova, a manawag ed sika ed ngaran mo.’”

10. Diad anton dalan a si Ciro et “alanaan,” tan panon a makapitongtong si Jehova ed sikato masulok a sanlasus taon sakbay na inkiyanak to?

¹⁰ Imanoen ya akitongtong si Jehova ed si Ciro a singano sikatoy manbibilay la. Mitunosan iya ed balikas nen Pablo a si Jehova “tawagen to so saray bengatla ya anggapo ni, a singa no wala ra.” (Roma 4:17) Ontan met, impabidbir na Dios si Ciro bilang say “alanaan a sakey” to. Akin a ginawa to itan? Anta agbalot angiyibung na masanton panaglanan larak so atagey a saserdote ed ulo nen Ciro. Tua, balet saya so mapropetikon panaglana. Ipapanengneng toy impanuro ed sakey a nikaduman inkipuesto. Kanian sarag na Dios a saglawien so akauna lan impanuro to ed si Ciro bilang panaglana la.​—Ikompara so 1 Arari 19:15-17; 2 Arari 8:13.

Susumpalen na Dios Iray Salita na Mensaheros To

11. Akin a liknaen na saray manaayam ed Babilonia a maligeligen ira?

¹¹ Diad panaon na inkiwas nen Ciro sumpad Babilonia, liknaen na saray mibabaley to a maligeligen tan asalimbengan. Say syudad da so apaliberan na aralem tan maawang a manalimbeng a banaoang, a pinorma na Ilog Eufrates. Diad banda’d bukig a pangdel na ilog, ya onaagos ed syudad et walay mantultuloy ya agosan na danum. Pian nisian itan manlapud syudad, angipaalagey si Nabucodonosor na tinawag ton “sakey a baleg a bakor, a singa sakey a palandey, agbalot natenyeg . . . Saray toktok so impaalagey [ton] kaatagey na palandey.”a Sayan bakor so walaan na saray wangalan tekep na ankabaleg iran gansan kapot. Pian nalooban iratan, kaukolan a kalaben na sakey so alosarsar manlapud pangdel na ilog. Agpankelawan a saray priso na Babilonia so andian a balot na ilalo ed pakabulos da!

12, 13. Panon a saray salita nen Jehova diad panamegley na mensahero ton Isaias so tinmua sanen naplag so Babilonia ed si Ciro?

¹² Balet aliwan ontan parad saramay akautibon Judion manisia ed si Jehova! Walaan ira na masnag ya ilalo. Diad panamegley na saray propeta to, insipan na Dios ya ibulos to ra. Panon na Dios a sinumpal so sipan to? Inganggan nen Ciro iray armada to ya ipaarap so agos na Ilog Eufrates pigaran kilometro ed bandad amianen na Babilonia. Diad ontan et say manunan depensa na Babilonia so nagmaliw ya amagan ilog. Diad mapeligron labi, saray manliliket a maniinuman so palpalaran a pinaulyan dan akalukas so duaran-pohas a kapot ya akaarap ed Eufrates. Agliteral a binisangbisang nen Jehova iray gansan kapot, nisay pinekewet toray balatyang a balewet a mangikakapot ed saratan, balet ta say makapakelkelaw a panangimaneobra to pian mansiansian akalukas tan ag-atarangkaan so walaan na parihon epekto. Saray bakor na Babilonia so anggapoy kana. Agla kinmalab iray tropa nen Ciro pian makaloob. Tinulongan nen Jehova si Ciro, pinalatas so “nipokpokdol,” on, amin a makababeng. Si Isaias so apaneknekan a tuan mensahero na Dios.

¹³ Kayarin sigpot ya akontrol nen Ciro so syudad, amin a kayamanan to so naplag ed lima to, pati saramay akasinop ed ambilunget, maamot iran kuarto. Akin a ginawa nen Jehova a Dios iyan amin parad si Ciro? Ta pian nakabatan to a si Jehova, ‘samay manatawag ed sikato diad panamegley na ngaran to,’ et tuan Dios na propesiya tan Soberanon Katawan na uniberso. Pian naamtaan ton say Dios so angiyareglo’d kiiyan to’d pakayari pian ibulos so totoo To, say Israel.

14, 15. Panoy pakaamta tayo ya otang nen Ciro ed si Jehova so impanbiktorya to’d Babilonia?

¹⁴ Talinengen iray salita nen Jehova ed Ciro: “Lapu ed Jacob ya aripen ko, tan say Israel, a pinilik, tinawag ta ka ed ngaran mo, siak pangaranan ta ka, anggan agmo ak kabat nen saman. Siak si Jehova, et anggapo so arum la; anggapo so Dios noag siak lambengat. Balkesan ta ka, anggan agmo ak kabat nensaman, pian sikara nakabatan da a manlapu ed banwa, tan manlapu ed sagur, ya anggapo la so sananey noag siak lambengat. Siak si Jehova, et anggapo la so sananey. Siak pawalaen ko so liwawa, tan bilunget; gawaen ko so deen [salanti, parad adakep a totoo to] tan palsaen ko so mauges [parad Babilonia]; siak si Jehova a manggawa na saraya ya amin.”​—Isaias 45:4-7.

¹⁵ Otang nen Ciro ed si Jehova so impakaloob to’d Babilonia, ta Sikato imay amabiskeg ed sikato ed pakasumpal na panliketan To sumpad saman a marelmeng a syudad tan ibulos iray akautibon totoo To. Diad panggawa’d satan, inganggan na Dios so katawenan to pian mamauran na matunong ya impluensya odino puersa. Inganggan toy dalin ton onlukas tan mamawala na matunong iran ebento tan kilalaban parad adakep a totoo to. Tan say piguratibon katawenan tan dalin to so kinmiwas ed sayan ganggan. (Isaias 45:8) Masulok a sanlasus taon kayari impatey to, apaneknekan si Isaias bilang tuan mensahero nen Jehova!

Say Maong a Balita na Mensahero Parad Sion!

16. Anton maong a balita so niproklama diad nankibalatar a syudad a Jerusalem sanen atalo so Babilonia?

¹⁶ Balet dakel ni. Ibabaga ed sikatayo na Isaias 52:7 so maong a balita parad Jerusalem. “Agayla so kalimgasan ed tapew na saray palandey so saray sali na mangyakar na saray maong a balita, a mangiyabawag na deen, mangiyakar na saray maong a balita na kaabigan, a mangiyabawag na kilalaban, a kuanto ed Sion: ‘Say Dios mo man-ari!’” Agaylan makapaligsa so pakanengneng ed sakey a mensahero ya onaasingger ed Jerusalem manlapud kapalandeyan! Maseguron awit-awit toy balita. Anto kasi itan? Makapalikliket a balita parad Sion. Balita na kareenan, on, balita na maong-linawa na Dios. Say Jerusalem tan say templo to ipaalagey lamet! Tan say mensahero so angiproklama tekep na mananalon entusiasmo: “Say Dios mo man-ari!”

17, 18. Panon ya angapekta ed mismon ngaran nen Jehova so impakapanalo nen Ciro ed Babilonia?

¹⁷ Sanen inabuloyan nen Jehova iray Babilonia a mangigeba ed tipikon trono to a niyurongan na arari ed linya nen David, ompatnag a singa aliwa lan Sikatoy Ari. Imbes, si Marduk, say manunaan a dios na Babilonia so singano say ari. Balet, sanen tinalo na Dios na Sion so Babilonia, indemostra toy sankatalbaan ya inkasoberano to​—a sikatoy sankabalgan ya Ari. Tan pian nipabitar iyan bengatla, say Jerusalem, “syudad na baleg ya Ari,” et kaukolan a niletneg lamet, pati say templo to. (Mateo 5:35) No nipaakar ed mensaheron angitarok ed satan a maong a balita, anggaman saray sali to so marabok, marutak tan asugatan, diad pakanengneng na saray manangaro na Sion tan say Dios to, no nengnengen da, oh, agaylay kalimgasan!

¹⁸ Diad mapropetikon pantalos, say inkaplag na Babilonia et kabaliksan ton say Panarian na Dios so niletneg tan say manangakbibit na maong a balita et sakey a manangiproklama ed katuaan na satan. Niarum ni, sayan kadaanan a manangipasabi, a nipasakbay la ed panamegley nen Isaias, a mangililitrato ed sakey a mensahero na mas engranden maong a balita​—mas engrande lapud matalonggaring a lugan to tan say tema ton Panarian, tekep na makapakelkelaw ya epekto ed amin a totoon walaay pananisia.

19. Anton mensahe nipaakar ed dalin na Israel so initer nen Jehova diad panamegley nen Ezequiel?

¹⁹ Naikdan met si Ezequiel na masnag iran propesiya na panangipawil. Impropesiya to: “Onia so kuan nen Katawan a Jehova, . . . ‘Gawaen ko naani so saray syudad a napanayaman, tan nipaalagey so saray abagbag a pasen. Et ikuan da naani: “Saya a dalin a mankibalatar nensaman nagmaliw a singa say panagtanamanan na Eden.”’”​—Ezequiel 36:33, 35.

20. Anton makapasayaksak a simbawa so mapropetikon inter nen Isaias ed Jerusalem?

²⁰ Diad inkakautibo ed Babilonia, pandadageyeman na totoo na Dios so Sion. (Salmo 137:1) Balet natan et makapanggayaga la ra. Insimbawa nen Isaias: “Onarakak kayo ed liket, mankanta kayo a bansag, sikayo a kibalatar a paspasen na Jerusalem; ta si Jehova niligliwa to so baley to, dinondon to so Jerusalem. Si Jehova nilislisan to so taklay to a masanto ed saray mata na saray amin a nasyon; tan amin a sampot na dalin nanengneng da so panangilaban na Dios tayo.”​—Isaias 52:9, 10.

21. Panon ya asumpal iray salita ed Isaias 52:9, 10 kayari impakatalo na Babilonia?

²¹ On, saray pinilin totoo nen Jehova so walaan na baleg a rason pian manggayaga. Sikara la natan so mangokupa lamet ed saramay datin nankibalatar a paspasen, a pagmaliwen da iratan a singa say hardin na Eden. Si Jehova “nilislisan to so taklay to a masanto” parad sikara. Inlislis toy taklay na kawes to, diad piguratibon panagsalita, ta pian sikatoy makatrabaho diad pangipawil to’d sikara ed inad-aro ran nianakan a dalin. Saya so aliwan sakey a melag, niyamot ya inkagawa ed loob na awaran. Imbes, amin a mabilay a totoo ed saman so akanengneng ed ‘alislisan a taklay’ na Dios ya angisekar na pakayari ed saray pakurang na mundo pian itarok so makapakelaw a kilalaban na sakey a nasyon. Naikdan ira na naspot a prueba a si Isaias tan Ezequiel et tuan mensaheros nen Jehova. Anggapo so makapanduaruwa a say Dios na Sion so alenleneg a mabilay tan tuan Dios ed amin a dalin. Diad Isaias 35:2, oniay nabasa tayo: “Nanengneng da naani so gayaga nen Jehova, say kaatageyan na Dios tayo.” Saramay angawat ed sayan prueba na inka-Dios nen Jehova so binmaling a mandayew ed sikato.

22. (a) Antoy napisalamatan tayo natan? (b) Akin a nagkalalo lan misalamat tayo ta iwawalwal nen Jehova iray palson mensahero?

²² Agaylay pisalamat tayo ya ipapabidbir nen Jehova iray tuan mensahero to! Sikato imay “mamaelet ed salita na aripen to, tan manumpal ed simbawa na saray igaganggan to.” (Isaias 44:26) Saray panangipawil a propesiyan initer to ed si Isaias tan Ezequiel so mangitandoro ed baleg ya aro, agkanepegan a kaabigan, tan panangasi to ed ariripen to. On, makanepegan si Jehova ed amin a panangidayew tayo! Tan sikatayo natan so nagkalautlan misalamat ta iwawalwal toray palson mensahero. Onia lapud dakel ira natan ed eksena na mundo. Saray pinarakep a mensahe ra so mangibabaliwala ed niyabawag iran gagala nen Jehova. Say ontumbok ya artikulo so ontulong ed sikatayon mangipaamta ed saramay palson mensahero.

Paimano ed leksab]

Kasin Nisalaysay Yo?

◻ Panon ya ipapabidbir nen Jehova iray tuan mensahero to?

◻ Diad panamegley nen Isaias, siopa so inngaran nen Jehova ya ahinti to a taloen toy Babilonia?

◻ Panon ya asumpal iray propesiya nen Isaias a manidiskribi ed pakatalo na Babilonia?

◻ Antoy maong a nansumpalan ed ngaran nen Jehova ed impakataloy Babilonia?

[Litrato ed pahina 9]

Ompatnag ya agnakobkob na saray nasyon so Babilonia ed agew nen Ezequiel