Epafras—“Matoor a Ministro nen Kristo”

SIOPAY angiletneg ed Kristiano iran kongregasyon diad Corinto, Efeso, tan Filipos? Anganko say tampol mon iyebat et: ‘Si Pablo, say “apostol na saray Hentiles.”’ (Roma 11:13) Susto ka.

Balet, siopa so angiletneg ed saray kongregasyon ed Colosas, Hierapoles, tan Laodicea? Anggaman ag-itayo segurado, nayarin say lakin manngaran na Epafras. Anggan panon, anganko labay mon nagkalalon naamtaan so nipaakar ed sayan ebanghelisador, lapud sikatoy atawag a “matoor a ministro nen Kristo.”​—Colosas 1:7.

Ebanghelisador ed Lawak na Lycus

Say ngaran ya Epafras so pinatikeyan a porma na Epafrodito. Balet duma si Epafras ed samay Epafrodito a taga-Filipos. Si Epafras so taga-Colosas, sakey ed taloran sentro na Kristiano iran kongregasyon ed lawak na Ilog Lycus, diad Asia Minor. Say Colosas so 18 kilometro manlapud Laodicea tan 19 kilometro manlapud Hierapoles, diad kadaanan a rehyon na Phyrgia.

Agdiritsaan ya ibabaga na Biblia no panoy impakasabi na maong a balita na Panarian na Dios ed Phyrgia. Balet, presenti ed Jerusalem iray taga-Phrygia ed agew na Pentecostes nen 33 K.P., anganko arum ed sikara so nanlalapud Colosas. (Gawa 2:1, 5, 10) Legan na ministeryo nen Pablo ed Efeso (ngalngali 52-55 K.P.), say impanpulong ed satan a lugar so ontanlan mabiskeg tan epektibo ya aliwa labat lan saray taga-Efeso noagta ed “amin [met] a manaayam ed Asia, saray Judios tan saray Griegos, [et] nadngel da so salita na Katawan.” (Gawa 19:10) Ompatnag ya ag-impulong nen Pablo so maong a balita ed intiron Lawak na Lycus, lapud dakel ed saramay nagmaliw a Kristianos ed satan a rehyon et agdan balot apinengnengan.​—Colosas 2:1.

Unong ed si Pablo, say nanbangat ed saray taga-Colosas nipaakar ed “grasya’y Dios ed katuaan” et si Epafras. Say bengatlan panatawag nen Pablo ed sayan kakimeyan a “matoor a ministro nen Kristo a lapud sikatayo” so mangipapanengneng a si Epafras et aktibon ebanghelisador ed satan a lugar.​—Colosas 1:6, 7.

Namparan si apostol Pablo tan say ebanghelisador ya Epafras so mapagan tuloy parad espiritual a pankaabiganan na kapananisiaan da ed Lawak na Lycus. Bilang “apostol ed saray nasyon,” nanliketan nen Pablo so pakabalita ed iyaaligwas da. Anggapo lay arum noagta si Epafras so akadngelan nen Pablo ed espiritual a kipapasen na saray taga-Colosas.​—Colosas 1:4, 8.

Report nen Epafras

Nipaarap iray taga-Colosas ed saray problema a magenap lan anagdag ed Epafras a manbiahin andukey a paarap ed Roma diad gagalan isingbat irayan pamaakaran ed si Pablo. Say detalyadon inreport nen Epafras so mapatnag ya amakiwas ed si Pablo pian mamidduan onsulat ed saramay agagin agto kabat. Say sakey et sulat parad saray taga-Colosas. Say sananey a sulat, a mapatnag ya agnipresirba et nipatulor ed saray taga-Laodicea. (Colosas 4:16) Makatunongan labat so panisip a saray lugan na saraman a sulat et ginetma a mangebat ed saray pankaukolan na saraman a Kristiano unong ed pakatebek nen Epafras. Antoray kapilitan a naimano to? Tan antoy ipaparungtal na saya nipaakar ed personalidad to?

Say sulat ed saray taga-Colosas et singa ipatnag ton naaburido si Epafras a saray Kristiano ed Colosas et niiyan ed kapeligroan lapud pagano iran pilosopia a lalanoren toy asetisismo, espiritismo, tan panagtalintaon anito. Niarum ni, say bangat na Judion panag-ayunal tan panngilin ed pigaran agew so nayarin angimpluensya ed arum a membro ed kongregasyon.​—Colosas 2:4, 8, 16, 20-23.

Say katuaan ya insulat nen Pablo so nipaakar ed sarayan tema et ipapanengneng to ed sikatayo so inkaalerto tan inkasensitibo nen Epafras ed saray pankaukolan na kaparan ton Kristianos. Impanengneng toy maaron kapagaan parad espiritual a pankaabiganan da, a sinononot ed saray kapeligroan ed kaliberliber a panaayaman da. Pinmanon si Epafras ed simbawa nen Pablo, tan ipaparungtal na saya a sikatoy mapaabeba. Nayarin alikna toy pankaukolan pian awatey simbawa manlapud sakey a mas eksperiensiado. Diad antokaman a kipapasen, kinmiwas a sikakabat si Epafras.​—Uliran 15:22.

Sakey a Lakin Amabli’d Pikakasi

Diad konklusyon na sulat ya impatulor to’d saray Kristianon taga-Colosas, oniay inkuan nen Pablo: “Si Epafras, a sikato so sakey ed sikayo, sakey ya aripen nen Kristo Jesus, lugayan to kayo, ya andi ebas so panseseet to ed kaabigan yo ed saray pikakasi to, pian magnayon kayo ya ayadyari tan napasekderan kayo ed amin a linaway Dios. Ta sikato so tasian ko, a dakel so sagpo’to nipaakar ed sikayo tan dia ed saray taga-Laodicea, tan dia ed saray taga-Hierapoles.”​—Colosas 4:12, 13

On, anggaman sikatoy ‘kaiban nipangaw’ nen Pablo ed Roma, sankanonot nen Epafras iray inadaro ton agagi diad Colosas, Laodicea, tan Hierapoles tan ipipikasi to ra. (Filemon 23) Diad literal et ‘sikatoy akipuligesgesan’ parad sikara diad pikakasi. Unong ed si iskolar D. Edmond Hiebert, say Griegon terminon nausar dia et kabaliksan toy “sakey a mairap tan ambelat a kimey,” sakey a bengatlan mipadpara ed mental a ‘panpapanabos [paniirap, NW]’ a naeksperiensia nen Jesu-Kristo legan a sikatoy manpipikasi ed hardin na Getsemani. (Lucas 22:44) Sisisimoon a pinilalek nen Epafras a nakapet na espiritual ya agagi to so malet tan sigpot a Kristianon inkatatken. Agaylan bendisyon parad saray kongregasyon ed ontan ya agin manonot ed espiritual!

Lapud atawag si Epafras ya ‘inadaron kaiban aripen,’ andi-duaruwan sikatoy apabli na kapara ton Kristianos. (Colosas 1:7) Sano iyabuloy na sirkumstansia, amin a membro ed kongregasyon so kaukolan a sibubulos ya iyopresi ray inkasikara tekep na ligsa tan panangaro. Alimbawa, nayarin niiter so imano pian tulongay iray mansasakit, maedad, odino ed arum niran nikaduman mankakaukolan. Nayarin walaray nanduruman responsabilidad ya aasikasoen ed kongregasyon, odino ompan posibli so itulong ed saray proyekton teokratikon panagpaalagey.

Say pangipikasi ed arum, a singa ginawa nen Epafras et sakey a nengneng na sagradon serbisyo a nagawaan na amin. Nayarin ilaktip ed saratan a pikakasi so balikas na kapagaan parad saray managdayew nen Jehova a kaukolan a mangarap ed nanduruman kapeligroan odino kairapan ed espiritual odino pisikal a nengneng. Diad pangisekar ed inkasikatayo ed onian paraan, magmaliw itayon singa si Epafras. Balang sakey ed sikatayo so nawalaay pribilihyo tan gayaga ed pamaneknek ed pagmaliw ya ‘inadaron kaparan aripen’ ed pamilya na matoor ya ariripen nen Jehova.