Ontalindeg a Nagnap tan Tekep na Mapekder a Kombiksion
Panulong ed Saray Kalangweran Tekep na Nipanpanaon ya Instruksion
SI Epafras so sakey ya inmunan-siglon Kristiano a linma’d Roma. Anggaman ontan, makatunongan a sankanonot to ni so Colosas, sakey a syudad ed Asia Minor. Sikato so angipulong na maong a balita diman tan andi-duaruwan atulongan to iray pigaran taga-Colosas a magmaliw a babangatan nen Jesu-Kristo. (Colosas 1:7) Nampagaan a tuloy nen Epafras iray kapananisiaan to diad Colosas, ta manlapud Roma et nansulat si apostol Pablo ed sikara: “Si Epafras . . . lugayan to kayo, lawas ton isesekar so inkasikato nisesengeg ed sikayo diad saray pikakasi to, ta pian diad kaunoran et sikayoy ontalindeg a nagnap tan tekep na mapekder a kombiksion ed amin a linawa na Dios.”—Colosas 4:12, NW.
Mipadpara, saray Kristianon kaamaan tan kainaan natan so masimoon a mangipipikasi ed espiritual a pankaabigan na ananak da. Seseetan na sarayan atateng ya itanem ed kapusoan na ananak da so panangaro ed Dios ta pian magmaliw iran mapekder ed pananisia.
Dakel a Kristianon kalangweran so onkekerew na tulong diad pangarap ed saray angat a kidudungetan da diad eskuelaan tan arum nin pasen. Onia so inkuan na sakey a 15-años a bii: “Onloloor iray problema mi. Say bilay so makapakebbiew a tuloy. Kaukolan mi tulong!” Kasin naebatan iray kerew na saratan a kalangweran tan saray pikakasi na maridios ya atateng? On! Say nibase’d Biblian instruksion so nitatarya panamegley na “matoor tan makabat ya aripen.” (Mateo 24:45) Sasalambiten na sayan artikulo iray pigaran literatura ya akatulong la ed nilasus nilibon kalangweran “ontalindeg a nagnap tan tekep na mapekder a kombiksion.”Konsideraen tayo so pigara ed sarayan publikasyon.
“Nia . . . 15,000 a Balon Tastasi!”
Nen Agosto 1941, nandaragup so 115,000 a dumerengel diad St. Louis, Missouri, E.U.A., parad sankabalgan a kombension na saray Tastasi nen Jehova ya agawa anggad saman a panaon. Diad unor ya agew na satan—“Agew na Ananak”—wala so 15,000 ananak ya akayurong ed asingger ed plataporma a mapetepet ya onderengel legan ya ipapaliwawa nen Joseph F. Rutherford so teman “Ananak na say Ari.” Sanen mansamposampot la so paliwawa to, onia so inkuan na 71-años a Rutherford diad singa ama a tono na boses to:
“Sikayon amin . . . ya ananak ya inmabobon . . . a tuloken so Dios tan say Ari to, ipangasi yo pan onalagey kayo.” Saray ananak so inmalagey a nankakasakey. Et inkelyaw nen Brother Rutherford: “Nia, masulok a 15,000 a balon tastasi diad Panarian!” Walay maksil a tipak. Inyarum ni na espiker: “Amin yo a manggawa na anggaay nayarian yo pian ipakabat ed arum so nipaakar ed Panarian na Dios . . . , et ipangasi yo pan ibagay On.” Inmebat so ananak ed maksil ya “On!” Insan to imparungtal so balon libron Children, ya inawat itan tekep na abaybayag a tipak.
Kayari na sayan makatenyeg a paliwawa, amaarap so andukey a linya na kalangweran diad plataporma pian iyawat ed sikara nen Brother Rutherford so libren kopya na balon libro. Akalua iray dumerengel lapud eksena. Onia so inkuan na sakey ya akaimaton ed ebento: “Say toon andiay pililikna tan simpatya labat so agnatenyeg diad pakanengneng ed saray kalangweran [a mangipapatnag] na nagnap a panagmatalek tan pananisia ed Dios da, a si Jehova.”
Diad satan a makatantandan asamblea, walay 1,300 a kalangweran ya abautismoan bilang simbolo na dedikasyon da ed si Jehova. Dakel ed sikara so siansia nin mapekder ed pananisia anggad natan. Ontutulong ira ed saray lokal a kongregasyon, manboboluntaryo ed Bethel, odino manlilingkor ira bilang misionaryo ed sananey iran bansa. Peteg ya amawala na magnayon ya impresyon so “Agew na Ananak” tan say libron Children ed kapusoan na dakel a kalangweran!
“Nipanpanaon so Insabi na Saratan”
Legan na dekaday 1970, angipalapag so Tastasi nen Jehova na taloran nin libro ya anabi ed kapusoan na nilasus nilibon kalangweran. Saraya et say Listening to the Great Teacher, Your Youth—Getting the Best out of It, tan My Book of Bible Stories. Nen 1982 et ginmapon nipaway iray serye na “Young People Ask . . . diad Awake! a magasin. Sarayan artikulo so mamapakiwas ed kapusoan na ugugaw tan matakken la tekep na ligsa. Onia so inkuan na sakey a 14-años: “Nilabilabi a misasalamat ak ed Dios lapud inkipalapag na saratan.” “Labalabay ko iray artikulo,” so imbalikas na sakey a 13-años a bii, a “nipanpanaon so insabi na saratan.” Onaabobon iray atateng tan saray aturo a Kristianon mamatatken a sarayan artikulo so talagan nipanpanaon tan makagunggona.
Nanlapu la’d 1989 et manga 200 lan artikulo na “Young People Ask . . .” so nipaway ed Awake! Diad “Maridios a Debosyon” a Distriton Kombension ed satan a taon, nipaway so libron Questions Young People Ask—Answers That Work. Kasin akatulong itan ed saray kalangweran a makapansiansian malet ed pananisia? Oniay insulat na taloran kalangweran a lalaki: “Sayan libro so alay abig ya uusaren mi ed panebek na saray problema mi tan ed pangamta no panon ya arapen iratan a problema. Salamat ed say panangiyansakit yo parad pankaabigan mi.” Onaabobon so dakerakel a manbabasan kalangweran ed interon mundo.
“Napepenek Kami”
Nen 1999, saray Tastasi nen Jehova so amawala na sananey nin nipanpanaon a nengneng na instruksion parad saray kalangweran—say video a Young People Ask—How Can I Make Real Friends? Satan so amakiwas tekep na inkaligsa. Onia so inkuan na sakey a 14-años a bii: “Sayan video so anenyeg ed pusok.” “Magmaliw iyan regular a kabiangan na espiritual a panangan mi,” so insalaysay na sakey a mansusulon-ina. Onia met so inkuan na sakey nin kalangweran a bii: “Makapaliket a naamtaan a say sankaapitan a Kaaro tayo, si Jehova, so peteg a mangaaro tan mangaasikaso ed saray kalangweran diad sankamundoan ya organisasyon to.”
Anto so agawaan na video? Nia so inkuan na saray kalangweran: “Akatulong itan ed siak ya alwaran so pililimog ko, pian kabaten so amin a wala’d loob na kongregasyon, tan pian makapikaaro ak ed si Jehova.” “Akatulong itan ed siak pian makpel ya onarap ed saray kalimog ko.” “Satan so amabiskeg ed say determinasyon ko a lingkoran si Jehova ed anggaan na nayarian ko.” Onia met so insulat na sakey a sanasawa: “Impapuson pisasalamatan mi so impangitarya yo ed sikami na sayan ‘tagano.’ Napepenek kami.”
Lapud panotoor ed inter-Dios a kimey, say alanaan a “matoor tan makabat ya aripen” so mangitatarya na nipanpanaon ya espiritual a tagano parad amin a mangawat ed satan. Tan agaylan makapaliket so pakaimano ed panutulong na satan a Makasulatan ya instruksion ed saray kalangweran natan pian sikaray ‘makatalindeg a nagnap tan tekep na mapekder a kombiksion ed amin a linawa na Dios’!