Jehova​—Dios a Mangipaparungtal na Saray Sekreto

“Wala so sakey a Dios ed tawen a mangipatnag ed saray maamot.”​—DANIEL 2:28.

1, 2. (a) Panon a midumaan si Jehova manlapud baleg a Kabusol to? (b) Panon a nisisindag na totoo iyan pandumaan?

SI Jehova, say supremo tan maaron Dios na uniberso, say saksakey a Manamalsa, so Dios na kakabatan tan inkahustisya. Agto kaukolan ya iyamot so pakabidbiran ed sikato, say kimkimey to, odino saray gagala to. Ipaparungtal toy inkasikato ed panaon tan paraan a labay to. Diad onia et midumaan so Kabusol to, si Satanas a Diablo, a panggugunaetan ton iyamot so tuan pakabidbiran ed sikato pati iray intinsion to.

² No panon a mandumaan si Jehova tan si Satanas, ontan met ed saray managdayew da. Saramay ontutumbok ed panangidaulo nen Satanas so doble-kara tan manamalikdo. Kuanmono sikaray makalakal, anta saray gawa ra et nipaakar ed kabilungetan. Nibaga la’d saray taga-Corinton Kristiano ya agnasusurprisa ed sayan bengatla. “Ta saratan a totoo pakalala ran . . . apostoles, matitilan komikimey, onparungtal iran singa apostoles nen Kristo. Tan aliwan makapakelaw; ta si Satanas ni magmaliw a singa anghil na liwawa.” (2 Corinto 11:13, 14) Diad biek a dapag, ombabaling iray Kristianos ed Kristo bilang Lider da. Sanen wadiad dalin nagnap ton insindag so personalidad na Ama to, si Jehova a Dios. (Hebreos 1:1-3) Kanian, diad itutumbok ed Kristo et naaalig na Kristianos si Jehova, say Dios na katuaan, inkamaparungtal, tan liwawa. Agda met kaukolan ya iyamot so pakabidbiran da, say kimkimey da, odino saray gagala ra.​—Efeso 4:17-19; 5:1, 2.

3. Panon tayon rasonan so pangaakusan saray totoon magmamaliw a Tastasi nen Jehova so pinilit a miulop ed “maamot a sekta”?

³ Diad panaon ya amta ton sankaabigan, ipaparungtal nen Jehova iray detalye na gagala to tan ed arapen ya agni amta nensaman na totoo. Diad onian pantalos et sikato so Dios a mangipaparungtal na saray sekreto. Kanian, iimbitaan iray totoon malabay a manlingkor ed sikato​—on papasesegen​—ya amtaen so niparungtal lan impormasyon. Impanengneng na impansurbi nen 1994, ed sakey a bansa ed Europa a walaay masulok a 145,000 Tastasi, a diad promedyo et balang sakey so personal ya angusisa ed saray bangat na Tastasi nen Jehova ed loob na taloy taon sakbay dan denisisyonan so pagmaliw a Tasi. Bulos linawa iran nandesisyon ya anggapoy panamilit. Tan nantultuloy iran awalaan na kawayangan a mandesisyon tan onkiwas. Alimbawa, lapud walay pigaran aglara onkompormi’d saray atagey ya estandarte na moralidad parad Kristianos, diad saginonor et saraya so nandesidin ontunda la bilang Tastasi. Balet, makapaliket ta diad apalabas a limaran taon, walay baleg a bilang na sarayan datin Tastasi ya intubat da so pilimog tan pikimey bilang Tastasi.

4. Antoy agkaukolan a manisturbo ed matoor a Kristianos, tan akin ya andi?

⁴ Siempre, aliwan amin a datin Tastasi so ompapawil, tan arum ed saratan so datin walaay responsabilidad ed loob na Kristianon kongregasyon. Ag-iya pankelawan, ta anggan sakey pa ed sankaapitan a papatumbok nen Jesus, si apostol Judas, so sinmuawi. (Mateo 26:14-16, 20-25) Balet kasin rason itan a panduaruwaan lay Inkakristiano? Ibaliwala ta la na saya so itatalona na Tastasi nen Jehova ed panagbangat a kimey da? Andin balot, no panon ya agpinatunda na impangiburi nen Judas Iscariote so gagala na Dios.

Makapanyarin-amin Balet ta Maaro

5. Panon tayon amta ya inaro nen Jehova tan Jesus so totoo, tan panon dan nidedemostra iyan aro?

⁵ Si Jehova so sakey a Dios na aro. Iyaansakit toy totoo. (1 Juan 4:7-11) Anggaman atagtagey so posisyon to, panggagayagaan toy pikakaaro ed totoo. Oniay nabasa tayo nipaakar ed sakey ya aripen to nensaman: “‘Si Abraham sinisia to so Dios, et nibilang ed sikato a katunongan,’ tan ningaran a ‘kaaro na Dios.’” (Santiago 2:23; 2 Awaran 20:7; Isaias 41:8) No panon a mannanabang iray mankakaaro ed kompidensyal iran pamaakaran, odino sekreto ra, ontan met si Jehova ed kakaaro to. Diad onian paraan ya inalig nen Jesus so Ama to, ta akikaaro ed saray babangatan to ya innabang toray sekreto to’d sikara. Imbaga to ed sikara: “Agtakayo la tawagen ya ariripen; ta say aripen agto amta so gawaen na katawan to. Balet tinawag ta kayo a kakaaro; ta amin a bengabengatla a nadngel ko ed Amak inpaamtak ed sikayo.” (Juan 15:15) Say pribadon impormasyon, odino “saray sekreto,” a pannanabangan di Jehova, say Anak to, tan kakaaro ra so mamapakasakey ed sikara diad agnapultot a bedber na aro tan katooran.​—Colosas 3:14.

6. Akin ya agkaukolan ya iyamot nen Jehova iray intinsion to?

⁶ Say kabaliksan na ngaran a Jehova, “Pagmaliwen To,” so mangipapatnag ed abilidad ton sumpalen so antokaman a kaukolan pian nasumpal so gagala to. Aliwan singa saray totoo, agkaukolan ya iyamot nen Jehova iray intinsion to lapud takot ompan sikatoy amperen na arum ed pakasumpal na saratan. Agton balot onsaew, kanian diritsaan ton ipaparungtal ed Salita to, say Biblia, so dakel ed ginagala ton gawaen. Ta isisipan to: “Ontan met naani so salitak . . . naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangyakaran ko ed sikato.”​—Isaias 55:11.

7. (a) Anto so impasakbay nen Jehova ed Eden, tan panon ya apaneknekan nen Satanas a tua si Jehova? (b) Panon a lawas a tua so prinsipyo ed 1 Corinto 13:8?

⁷ Kayarin tuloy na impanrebildi ed Eden, imparungtal nen Jehova diad segek so pinal a pawayan na gutgutan ed baetan to tan ed say Kabusol to, si Satanas. Say insipan na Dios a Bini lapud pakasugatan et sikatoy nasakitan, balet ta agto pateyan itan, bangta si Satanas so nasabin managmak na makapatey a sugat. (Genesis 3:15) Nen 33 K.P., aktual a sinugatan na Diablo so Bini, si Kristo Jesus, diad impangimaneobra ed impatey to. Diad onian dalan, asumpal nen Satanas so Kasulatan, tan apaneknekan met a si Jehova so Dios na katuaan, anggaman seguradon ag-iya getma nen Satanas. Say panamusol to ed katuaan tan inkatunong, ontan met ed matangsit tan agmagbabawin awawey to, so angitonton ed pakasumpal to’d eksakton impasakbay na Dios a gawaen to. On, diad amin na saray sumusumpa na katuaan, anggan si Satanas a mismo et tudtua so prinsipyon: “Anggapo so nagawa mi a sumpa ed katuaan, noag ingen, lapud katuaan.”​—2 Corinto 13:8.

8, 9. (a) Anto so amta nen Satanas, balet manisigensigen ta iyan pikakabat ed pakasumpal na saray gagala nen Jehova? (b) Anton malinlinew a pasakbay so ibabaliwala na saray onsusumpa ed Jehova, tan akin?

⁸ Nanlapulad agnanengneng ya inkiletneg na Panarian na Dios nen 1914, nagagawa lay walad Apocalipsis 12:12: “Kanian manliket kayo, O katawenan, tan sikayon manaayam ed sikara. Kasi lara so dalin tan dayat. Ta say diablo inmakseb ed sikayo, a wala ed baleg a sanok to, ya amta to a daiset la so panaon to.” Ingen, kasin say pikakabat nen Satanas ya antiktikey lay panaon to so manguman ed kurso to? No ontan di singa la bibidbiren nen Satanas a si Jehova so sakey a Dios na katuaan tan bilang say Supremon Manuley, sikato lambengat so makanepegan a dayewen. Balet, aglabay na Diablo ya aksobien so pakatalo, anggaman amta to irayan katuaan nipaakar ed si Jehova.

⁹ Butar-butar ya ipaparungtal nen Jehova no anto so nagawa ed isabi nen Jesus pian mangukom ed sistemay mundo nen Satanas. (Mateo 24:29-31; 25:31-46) Nipaakar ed saya, onia so iyaabawag na Salita to asunto’d saray manuley ed mundo: “Sano ibabaga ray: ‘Kareenan tan andi-paga,’ insan biglan kaderal so onsabi ed sikara, a singa pasakit na biin malukon.” (1 Tesalonica 5:3) Ibabaliwala na saramay ontutumbok ed alimbawa nen Satanas iyan malinlinew a pasakbay. Nabubulag ira lapud marelmeng a kapusoan da, tan mangaamper iya a pagbabawian day marelmeng a kurso ra tan itunda iray plano tan istratehiyan ipulisay iray gagala nen Jehova.

10. (a) Diad anton laknab ya asumpal so 1 Tesalonica 5:3, balet panon so kaukolan ya ikiwas na totoo nen Jehovah? (b) Akin a saray totoon andian na pananisia so lalon manpakpel ed arapen ed isusumpa ra’d totoo na Dios?

¹⁰ Nagkalautla nanlapulad 1986, sanen indeklara na Nasyones Unidas so sakey ya Internasyonal a Taon na Kareenan, lawas pantotongtongan ed mundo so nipaakar ed kareenan tan kaligenan. Agawa iray pihon kundang diad gunaet a nitarok so kareenan ed mundo, anggan panon et wala met so samet ya itatalona. Kasin saya imay sigpot a kasumpalan na propesiya, odino wala ni natalaranan tayon singano nengneng toy makapabiglan anunsio? Ipalinew nen Jehova itan a pamaakaran unong ed panaon to. Kaleganan to, mansiansia itayon aliing ed espiritual, “ed panalagar tan panpilalek yo ed isabi agew na Dios.” (2 Pedro 3:12) Legan ya onlalabas so panaon a tuloy ni pantotongtong nipaakar ed kareenan tan kaligenan, arum a totoon makaamta ed sayan pasakbay, balet ta mas nilabay dan ibaliwala itan, so nayarin magmaliw a lalon makpel ed palbeng dan agtooren odino agnatoor nen Jehova so salita to. (Ikompara so Eclesiastes 8:11-13; 2 Pedro 3:3, 4) Balet amta na tuan Kristianos a sumpalen nen Jehova iray gagala to!

Suston Panagrespeto ed Saray Ahensyan Uusaren nen Jehova

11. Anto so naamtaan nen Daniel tan Jose nipaakar ed si Jehova?

¹¹ Sanen si Arin Nabucodonozor, manuley na Neo-Babilonian Imperyo, so awalaan na makapagonigon a kugip ya agto nanonotan, sikatoy kinmerew na tulong. Saray papari, managsalamangka, tan managparles to so agmakapangibaga nisay makapangisalaysay ed kabaliksan na kugip to. Balet, ayarian itan na aripen na Dios, si Daniel, anggaman diritsaan ton inadmitin say impangiparungtal ed kugip tan say kabaliksan to so agnanlapud mismon kakabatan to. Oniay inkuan nen Daniel: “Wala so sakey a Dios ed tawen a mangipatnag ed saray maamot, et inpakabat to ed ari Nabucodonosor so nagawa naani ed saray kaunoran ya agew.” (Daniel 2:1-30) Pigaran siglo ed akadkauna, si Jose, sakey nin propeta na Dios, so akaeksperiensia met a si Jehova et Manangiparungtal na saray sekreto.​—Genesis 40:8-22; Amos 3:7, 8.

12, 13. (a) Siopa so sankabalgan a propeta na Dios, tan akin ya ontan so ebat mo? (b) Siopa natan so “manangasikaso ed misteryos na Dios,” tan panon so nepeg a panmoria tayo’d sikara?

¹² Say sankabalgan a propeta nen Jehova a nanlingkor ed dalin et si Jesus. (Gawa 3:19-24) Insalaysay nen Pablo: “Say Dios ya akisalita dia ed nanduruma a pamaakaran tan dia ed nagsisananey a nengneng nen inmunan panaon ed saray atateng dia ed panamegley na saray propeta. Dia ed kaunoran na sarayan agew akisalita ed sikatayo dia ed panamegley na Anak to, a sikato so tinuro ton manawir ed saray amin a bengatla, a sikato met so nan-gawaan to ed mundo.”​—Hebreos 1:1, 2.

¹³ Akisalita si Jehova ed akaunan Kristianos diad panamegley na Anak to, si Jesus, ya angipakabat ed sikaray madibino iran sekreto. Oniay imbaga nen Jesus ed sikara: “Et sikayo niiter ya amtaen yo so saray misteryos na panarian na Dios.” (Lucas 8:10) Diad saginonor et sinaglawi nen Pablo iray alanaan a Kristianos bilang “ministros nen Kristo, tan manangasikaso na misteryos na Dios.” (1 Corinto 4:1) Natan, tuloy so panlilingkor na alanaan a Kristianos bilang ontan, a tutugyopen day matoor tan makabat ya aripen a klase a diad panamegley na Mananguley ya Ulop to a nitatarya so espiritual a tagano ed dugan panaon. (Mateo 24:45-47) No panon a rerespetoen tayoray apuyanan a propetas na Dios ed inmuunan panaon, tan nagkalautla ed Anak na Dios, agta nepeg met a respetoen tayoray totoon uusaren nen Jehova natan a mangipaparungtal na impormasyon manlapud Biblia a kakkaukolan na totoo to ed sarayan maatap a panaon?​—2 Timoteo 3:1-5, 13.

Inkamatua odino Inkasekreto?

14. Kapigan a susumpalen na Kristianos so kimey diad maamot a paraan, tan sioparay alimbawa?

¹⁴ Kasin say inkamatua nen Jehova diad panangiparungtal na saray bengatla et kabaliksan ton kaukolan na saray Kristiano so lawas odino diad kada pankanawnawa et ibaga so amin a bengatlan amta ra? Bueno, tutumboken na Kristianos so simbawa nen Jesus ed apostoles to a “mankalkalakal [manlikas, NW] kayo sirin a singa saray uleg, tan mauyamo kayo a singa saray malapati.” (Mateo 10:16) No niganggan ed sikaran agnayarin mandayew ed Dios balet ta satan so idadagdag na konsiensia ra, ituloy na Kristianos ya ‘unoren so Dios,’ ta amta ran tuloy ya anggapoy atooan ya ahensyan makanepegan a mameget ed panagdayew da’d si Jehova. (Gawa 5:29) Impanengneng a mismo nen Jesus so inkamatukoy na saya. Nabasa tayo: “Kayari sarayan bengatla nanakar si Jesus ed Galilea; ta agto ginabay so manakar ed Judea, lapu ed saray Judios sikato so inanap da a pateyen. Bangsay piesta na saray Judio, say piesta na saray tabernakulo, asingger la. Kanian si Jesus kuanto ed sikara [agmananisian agagi to ed laman]: . . . ‘Tatdang kayo ed piesta. Siak agak ni ontatdang ed sayan piesta. Ta say panaon ko agni asapot.’ Et bangnen asalita to larayan bengatla ed sikara, tinmilak ni ed Galilea. Bangnen akatatdang so saray agagi to ed piesta, saman la tinmatdang met, ed agmaparungtal, noag say singa maamot.”​—Juan 7:1; 2, 6, 8-10.

Nepeg ta ya Ibaga odino Andi?

15. Panon a nipanengneng nen Jose a say pangisekreto so no maminsan et maaron bengatlan gawaen?

¹⁵ No maminsan, say pangiyamot ed sakey a pamaakaran et aliwa labat lan makabat noagta maaro met. Alimbawa, panon so inkiwas nen Jose, say anagibin ama nen Jesus, sanen akabatan ton say ikasal to, si Maria, so “malukon lapud pakayari espiritu santo”? Nabasa tayo: “Et si Jose ya asawa to, bangta sikato so sakey a toon maptek, tan agto gabay a gawaen a pangaligay lapag, ninonot ton taynan ed maamot.” (Mateo 1:18, 19) Agaylan inkaruksa itan no gawaen ton mapublikon parayag!

16. Antoy responsabilidad na mamatatken, ontan met ed amin niran membro na kongregasyon no nipaakar ed kompidensyal a pamaakaran?

¹⁶ Saray kompidensyal a pamaakaran a pansengegay kababaingan odino pakasakitay liknaan so kaukolan ya ag-ibabaga ed totoon ag-autorisado. Sinononot iray Kristianon mamatatken ed saya sano sikaray kaukolan a personal a mangonseho odino manligliwa ed kaparan Kristianos odino anggan diad panisiplina ed sikara lapud seryoson impankasalanan ed si Jehova. Say pangasikaso ed sarayan pamaakaran diad Makasulatan a paraan so kapilitan; say pangibaga ed saray kompidensyal a detalye ed saramay agnalalanor so agkapilitan tan ag-inkamaaro. Seguradon agsalien ya ukakkiten na saray membro na Kristianon kongregasyon so kompidensyal ya impormasyon manlapud mamatatken noagta respetoen day responsabilidad na mamatatken ya iyamot iray kompidensyal a bengatla. Ta ipapaimanoy Uliran 25:9: “Isangsang mo so sengegan mo ed kaabay mo lanlamang, tan agmo lukasan so yaamot na sananey.”

17. Akin a kaslakan ed saray Kristiano et isekreto daray kompidensyal a pamaakaran, balet akin ya agda lawas nagawaan itan?

¹⁷ Tua met iyan prinsipyo ed sankapamilyaan odino ed maapit a sankakaaro. Say pamapasiansian kompidensyal ed arum a pamaakaran so importanti ta pian napaliisay agpantatalosan tan pakaapektoy relasyon. “Say amianen mangipaway na uran; ontan so gawaen na malabir a dila ipatnag to so masebeg a lupa.” (Uliran 25:23) Siempre, say katooran ed si Jehova tan saray matunong a prinsipyo to, pati say aro parad saray sinansakey a nankasalanan, so sagpaminsan a mamilit ed sikatayon ipaamta’d atateng, Kristianon mamatatken, odino ed saray akankanepegan anggan saray kompidensyal a pamaakaran.a Balet kaslakan ya iyaamot na Kristianos iray sekreto na arum tekep na kompiyansa, a babantayan da iratan no panon a babantayan day sekreto ra.

18. Antoran taloran Kristianon kualidad so makatulong ed sikatayon manetermina no anto so kaukolan tayon ibaga odino andi?

¹⁸ Bilang sumaryo, naaalig na sakey a Kristiano si Jehova diad pamapasiansia ton kompidensyal ed pigaran pamaakaran no kapilitan, ya ibaga labat iratan sano matukoy. Diad pandesidi no anto so kaukolan ya ibaga to odino andi, sikatoy nigigiya na inkamapaabeba, pananisia, tan aro. Sikatoy aamperen na inkamapaabeba ed pagmaliw ton paimportanti, a sasalien ton panisiaen so arum diad pangibaga to’d amin a bengatlan amta to odino diad pabpaibegen toran walaray sekreton agto nibaga. Sikatoy papakiwasen na pananisia ed Salita nen Jehova tan say Kristianon kongregasyon ya ipulong so impormasyon ya intarya na Dios manlapud Biblia bangta aalwaran toy pakapangibaga’d bengabengatlan diad kagapo labat et makaopendi la’d arum. On, sikatoy papakiwasen na aro ed prangkaan a pangibaga’d bengabengatlan mangigloria ed Dios tan kaukolan a naamtaan na totoo pian nagamoray bilay. Diad biek a dapag, saray kompidensyal a personal a pamaakaran, agto ibaga, ya amta ton tuloy a kaslakan et say pangiwalwal ed saratan et kasimbangan toy anggapoy panangaro na sakey.

19. Anton aksion so ontutulong ed pakapangibiig ed tuan Kristianos, tan ed anton resulta?

¹⁹ Sayan balansin paraan so ontutulong ed pakapangibiig ed tuan Kristianos. Agda iyaamot so pakabidbiran ed Dios diad agpanguusar ed ngaran to odino diad pangaadapta ed misteryoso, agnaipaliwawan doktrinan Trinidad. Saray agkabkabat a dirios so tanda na palson relihyon, aliwan say tua. (Nengnengen so Gawa 17:22, 23.) Talagan aapresyaen na alanaan a Tastasi nen Jehova so pribilihyon pagmamaliw a “manangasikaso na misteryos na Dios.” Diad diritsaan a panangiparungtal ed sarayan sekreto ed arum, natutulongan daray matuan impanpuso pian kaliktaney pikakaaro ed si Jehova.​—1 Corinto 4:1; 14:22-25; Zacarias 8:23; Malaquias 3:18.

[Paimano ed leksab]

Panon Yon Ebatan?

◻ Akin ya agkaukolan ya iyamot nen Jehova iray intinsion to?

◻ Diad siopa so pangipaparungtalan nen Jehova ed saray sekreto to?

◻ Antoy responsabilidad na Kristianos nipaakar ed kompidensyal iran pamaakaran?

◻ Antoran taloran kualidad so ontulong ed Kristianos ed no antoy kaukolan dan ibaga odino andi?

[Saray litrato ed pahina 8 9]

Ipaparungtal nen Jehova iray sekreto diad panamegley na Salita to