Igamor na Pikakabat ed Dios—Panon?

Nayarin panduaruwaan na arum no kasin talagan interesado so dios a mangiparungtal ed inkasikato ed totoo. No sikatoy interesado, panon ton ipaparungtal so inkasikato?

SAY koma-16 a siglo a Protestantin Managreporma a si John Calvin so suston angikuan ya agnakabat na totoo so Dios diad dilin paraan da nilikud no iparungtal toy inkasikato ed sikara. Balet, nayarin panuumamengan na arum no kasin talagan interesado so Dios a mangiparungtal ed inkasikato ed totoo. Tan no sikatoy interesado, panon ton ipaparungtal so inkasikato?

Si Jehova, say “[Baleg a] Manamalsa,” so walaan na rason ed amin a gagawaen to. Tan bilang “Makapanyarin-amin a Dios,” sikato met so sigpot a makayarin manumpal ed saray gagala to. (Eclesiastes 12:1; Exodo 6:3) Makaseguro itayo a mabulbulos ton iparungtal ed totoo iray gagala to, lapud oniay impuyan to ya isulat na propeta ton si Amos: “Petepeteg anggapo naani gawaen nen Katawan a Jehova, ya agnaani nipuyan so inamot to ed saray aripen to a propeta.” Balet, imanoen pa a nikuan a say Dios so mangipaparungtal ed saray gagala to diad saray lingkor to labat, diad saramay masimoon a mangaaro ed sikato. Agta makatunongan itan? Siopa so labay mon pangipaamtaan na kompidensyal iran pamaakaran? Kasin diad anggan siopa odino diad sankaapitan a kaarom?—Amos 3:7; Isaias 40:13, 25, 26.

Saray mapaabeban totoo so walaan na marespeton takot lapud kakabatan tan pikakabat ed Dios, tan matukoy labat itan. Ingen, aliwan magenap so itakot labat no labay tayon nagunggonaan a mismo ed kakabatan tan pikakabat na Dios. Idadanet na Biblia a nakaukolan so mapaabeban puso ta pian naamtaan tayo iray kanonotan na Dios: ‘Iyatol mo so saray ganggan ko ed sika. Ikiling mo so layag mo ed kakabatan. Ipeket mo so pusom ed pakatalos. Kelyawan mo so kaisipan tan itagey mo so boses mo nipaakar ed pakatalos. Anapen mo itan a singa pilak.’—Uliran 2:1-4.

Say toon mapaabeba a mansasagpot pian gawaen iratan et talagan nakabatan to so Dios. Oniay intuloy ni na satan a bersikulo ed libro na Uliran: “Si Jehova mangiter na kakabatan; ompaway ed sangi to so pikakabat tan pakatalos.” On, saray masimoon a manaanap na katuaan so ‘makatalos naani ed inkaptek tan inkatunong, tan katukoyan, on, balang sakey a maong a basbas.’—Uliran 2:6-9.

Say Panaanap ed Katuaan

Oniay inkuan na The Encyclopedia of Religion: “Kabiangan ed bilay na too so pankaukolan a mangibiig ed no anto so peteg tan aliwan peteg, makapanyari tan andiay pakayari, masimoon tan makapalikdo, malinis tan marutak, malinew tan makapawetwet, ontan met ed say relatibon kalaknab na inkaalablabas na sakey odino say kasunian.” Pian napenek iyan pankaukolan, abayag lan aanapen na totoo so katuaan. No say nan-anapan da et dia ed si Jehova, a tinukoy na salmista bilang say “Dios na katuaan,” naroromog da la komon itan.—Salmo 31:5.

Say ngaran a Jehova et literal a mankabaliksan na “Pagmaliwen To so Inkasikato.” (Genesis 2:4, paimano’d-leksab ed NW) Kanian, ipapaimano na mismon kabaliksan na ngaran na Dios so inkasikato bilang Manamalsa tan say gagala to. Diad tua, say pakaamta tan pangusar ed ngaran a Jehova et sakey a pakabidbiran na tuan relihyon. Sayan katuaan so malinew a binidbir nen Jesus. Oniay impikasi to ed Dios, a tutukoyen to iray papatumbok to: “Impakabat ko ed sikara so ngaran mo, tan ipakabat kon siansia pian say aro ya impangarom ed siak wala ed sikara tan siak ed sikara.”—Juan 17:26.

Lapud nanmatalek so sakey a Hebreo nensaman a manngaran na Jose diad pikakaaro to ed Dios, oniay inkuan to tekep na kompiyansa sanen impatawag a mangiparungtal ed kabaliksan na saray kugip: “Aliwa ta a nabebetangan na Dios so panangipatalos?”—Genesis 40:8; 41:15, 16.

Pigaran siglo ed saginonor, si Arin Nabucodonosor na Babilonia so awalaan na sakey a kugip ya agnayarian ya ipatalos na saray makabat ya ariripen to. Oniay inkuan nen propeta Daniel ed ari: “Wala so sakey a Dios ed tawen a mangipatnag ed saray maamot, et impakabat to ed ari Nabucodonosor so nagawa naani ed saray kaunoran ya agew.”—Daniel 2:28.

Ipapatnag na saray alimbawa di Jose tan Daniel a say kakabatan tan pikakabat na Dios so niwala labat ed saramay manlilingkor ed si Jehova a Dios. Siempre, say pakagamor ed pabor na Dios et mankaukolan na pangitalirak ed dati iran sisiaen. Ontan so kinaukolan a gawaen na saray Judio nen inmunan siglo a nagmaliw a Kristiano. Lapud nipabangon ed sikara so panrespeto tan pangunor ed saray ganggan a nidatak ed silong na Judion sistema na bengabengatla, kinaukolan da so panaon pian awaten si Jesus bilang Mesias. Sikatoy sinmabi pian sumpalen so Mosaikon Ganggan, a kinmana a “sakey ya anino na saray penel na bengatla ya onsabi.” (Hebreos 10:1; Mateo 5:17; Lucas 24:44, 45) Sinalatan itan na say “ganggan nen Kristo,” ya atagtagey a tuloy nen say Mosaikon Ganggan.—Galacia 6:2; Roma 13:10; Santiago 2:8.

Amin tayo so nianak ed sakey a mundon niyarawi ed Dios. Lapud kasalanan ya atawir tayo ed inmunan sanasawa, nianak itayo a migugulaan ed Dios, ya andian na suston pikakabat ed saray gagala to. Nipatawir met ed sikatayo so sakey a mapalikdon puso. (Jeremias 17:9; Efeso 2:12; 4:18; Colosas 1:21) Pian sikatayo so makapikaaro ed Dios, nepeg tayon aralen ya itunos so paraan na panagnonot tayo ed saray paraan na Dios. Aliwan mainomay so panggawa ed satan.

Nayarin mairap so pangiwaklit ed saray relihyoson ideya odino ag-agamil, nagkalautla no nipurek la iratan ed sikatayo manlapud inkaugaw. Balet kasin makabat so pantultuloy a mankurang diad lingon dalan? Andin balot! Peteg a mas makabat so sakey no umanen to so paraan na panagnonot to pian diad ontan et nagamoran to so panangabobon na Dios.

Pamidbir ed Pangipaparalanan na Dios ed Bangat To

Siopara so makatulong ed sikatayo pian natalosan tayo so Salita na katuaan tan pian makapambilay itayo unong ed satan? Diad Israel nensaman, saray napanmatalkan tan matoor ya indibidual so pinabtangan na Dios na responsabilidad a mangidaulo ed nasyon. Say Ulo na Kristianon kongregasyon natan et si Kristo, tan sikato met so mangigigiya ed saramay masimoon a manaanap na katuaan. Gagawaen to itan diad panamegley na saray napanmatalkan tan matoor a papatumbok to, a manugyop ed saray paralanan a responsablin mangiwawanwan tan manasalimbeng ed saray masimoon a manaanap na katuaan. (Mateo 24:45-47; Colosas 1:18) Balet panon a nabidbiran na sakey iramay pangipaparalanan na Dios ed bangat to?

Saray tuan patumbok nen Jesu-Kristo so manggugunaet a mangipatnag ed saramay miparan kalidad ya impatnag nen Jesus bilang too. Diad sayan mundo ya ompapalalo so karelmengan, sarayan papatumbok so mainomay a nabibidbiran lapud nikadkaduman pangipapatnag da na espiritual iran kalidad. (Nengnengen so kahon diad pahina 6.) Kasin napapatnagan irayan kalidad diad relihyon ya akimembroan mo odino diad saray relihyon na kakaabay yo? Nagunggonaan ka no usisaen mo iyan pamaakaran diad tulong na Biblia.

Bilang manbabasa na palapagan mi, iimbitaan mi ka a manggawa ed satan diad panamegley na kurson panagaral ed Biblia. Katantaon, wala so promedyo a masulok ya 6,000,000 ya indibidual odino pamilya diad 235 a daldalin ya anganamot ed sayan uksoyan pian paiyaralan na Biblia ed saray Tasi nen Jehova. Say igamor na kakabatan tan pikakabat na Dios et tuloytuloy, makapenek, tan makapatumang a kimey. Akin ta no gapoan mo la natan so onggamor na kakabatan tan pikakabat na Dios? Sano agapoan mo itan, agmon balot pagbabawian. On, talagan nayarian tayon nakabat so Dios!

[Kahon ed pahina 6]

SARAMAY MANKIKIMEY A MITUNOSAN ED DIOS SO . . .

mansiasiansian neutral ed saray pankokolkol ed politika.—Isaias 2:4.

mamapawala na maabig a bunga diad panggagawa ra ed linaway Dios.—Mateo 7:13-23.

mangipapatnag na tuan panaaroan.—Juan 13:35; 1 Juan 4:20.

nankakasakey ed panagsalita diad inerman a pasen.—Miqueas 2:12.

agmangaalig ed saray makapuy ya awawey tan kondukta na mundo a walad kaliberliber da.—Juan 17:16.

mantatasi ed katuaan tan manggagawa na saray babangatan.—Mateo 24:14; 28:19, 20.

manggagayaga ed regular a pantitipon pian makapanpapasesegan ira.—Hebreos 10:25.

mangidadayew ed Dios bilang sakey ya internasyonal a grupo.—Apocalipsis 7:9, 10.

[Saray litrato ed pahina 7]

Nagamoran so pikakabat nipaakar ed Dios bilang indibidual, bilang pamilya, tan bilang kongregasyon