Onatendi ed “Pananisia ed Salita na Dios” a Distriton Kombension!

Minilyon so onatendi ed nilasus a pasen diad intiron mundo. Diad Pilipinas lambengat, 49 iran kombension so akaeskedyul. Say sankaunaan so nagawa no Disyembre 19-21 tan say unor et no Enero 2-4, 1998. Anganko ta sakey ed sarayan taloran-agew a pandaragup—a manlapud Biernes ya anggad Simba—so nagawa’d syudad ya asingger ed ayaman mo.

Nagunggunaan ka manlapud daakan a praktikal ya instruksion ed Biblia. Diad maslak a pasen onggapoy programa ed kada kabuasan tekep na musika diad 8:30. Iparungtal ed kabuasan na Biernes so 25 minutos iran interbio ed totoon naimpluensiaan lan tuloy so kabibilay da lapud pananisia ra ed Salitay Dios. Say unonan sesyon so mansampot ed pinagkateman paliwawan, “Panakar Diad Panamegley na Pananisia, Aliwan Diad Pakanengneng.”

Say unonan paliwawa ed ngarem na Biernes so mangonsidera ed makanan betang na saray tobonbalo ed loob na Kristianon kongregasyon. Say ontumbok a taloran-partin simposium so maningbat ed saray estandarte na Biblia a misiglaotan ed Kristianon kondukta diad panagsalita, walna, tan personal ya itsura, Onsublay iray paliwawan “Manalwar ed Inka-Andi na Pananisia” tan “Mabilay so Salita na Dios” a nisentro’d maabig a simbawa diad Hebreos kapitulo 3 tan 4. Say programa ed Biernes so manampot ed diskurson “Sakey a Libro Parad Amin a Totoo.”

Say unonan paliwawa ed kabuasan na Sabado et “Say Pananisian Andiay Gawa so Inatey.” Sananey nin importantin diskurso ed satan a kabuasan et say “Magmaliw a Nilamot tan Niletneg ed Katuaan,” a manideskribe no panon a nagawaay espiritual ya ibubulaslas. Say sesyon so mansampot tekep na regular a nipaparungtal ed kombension, “Mangitonton ed Bautismo so Pananisia ed Salita na Dios,” a kayari et nitarya so kabautismoan na saray balon nin babangatan.

Say manangilukas a paliwawa ed ngarem na Sabado et “Impasyan Mibakal Parad Pananisia,” so manisingbat ed simbawa na libroy Biblia a Judas. Konsideraen na sakey oras a simposium ya apauloan na “Onla Itayo ed Abung nen Jehova” iray gungguna ed saray Kristianon miting. Say programa ed satan ya agew so sampotan na diskurson “Say Kualidad na Pananisia Yo—Nasusubok Natan.”

Say programa ed kabuasay Simba so mangiparungtal ed taloran-partin simposium a maningbat ed libroy Biblia a Joel, pati say kiyaplikaan to ed agew tayo. Insan ontumbok so drama ed Biblia ya apauloan na “Pansiansiaen Yon Simpli so Mata Yo.” Say pabitar ed kombension et say publikon paliwawan, “Say Pananisia tan say Arapen Yo.”

Maseguron napayaman kayo ed espiritual a paraan diad kiwala yo. Sikayoy ampetapetang ya abrasaen ed kada sesyon. Manplano la natan pian makaatendi. Parad pasen a sankaasinggeran ed ayaman mo, ontupleg ed Kingdom Hall na Tastasi nen Jehova ed pasen mo odino mansulat ed saray manangipalapag na sayan magasin. Naromog mo met iray address na pasen na kombension diad Disyembre 8 a paway na Awake!