“Dalan na Dios ed Bilay” Magano lan Nagaway 1998-1999 Kombension!
DIAD Pilipinas labat, 51 iran kombension so aka-eskedyul no Disyembre tan Enero. Nayarin sakey ed sarayan taloran-agew a panduroypo so nagawa diad sakey a syudad ya asingger ed panaayaman mo. Onggapo so programa ed 9:30 n.k. ed Biernes tan Sabado tekep na kanta. Diad Simba et onggapo ed 9:00 n.k.
Ipabitar na programa ed kabuasan na Biernes iray report ed iyaaligwas na panangipulong na Panarian ed nanduruman parti na mundo. Tan say tema na kombension so idanet na pinagka-teman paliwawa, “Dondon nen Kristo—Dalan na Dios ed Kilalaban.”
Say simposium ed ngarem ya, “Atateng—Ipurek so Dalan na Dios ed Ananak Yo,” so mangiter na saray suhestion ed no panon a pakiwasen iray kalangweran a mangaro tan manlingkor ed si Jehova. Sampotan so programa ed ngarem ed paliwawan “Wala Ta so Bilay Kayari Ipatey?”
Iparungtal na programa ed kabuasan na Sabado so panaggaway babangatan a kimey na Tastasi nen Jehova ed taloran mantutumbokan a parti, “Pananulong ed Totoon Manakar ed Dalan ya Ompugta’d Bilay,” “Say Angat ed Panabi’d Totoo,” tan “Ibangat Iray Babangatan ed Amin ya Ingganggan nen Kristo.” Diad pansampot na programa ed kabuasan, walay probisyon parad saray balon babangatan a nabautismoan.
Say manangilukas a paliwawa ed ngarem na Sabado, “Panaglingkor Tekep na Ilalon Bilay ya Andi-Anggaan,” so mamaseseg ed sikatayo a masimoon a mangikonsidera ed personal iran rason tayo ed panlingkor ed Dios. Saray paliwawan “Panangapresia ed ‘Langkap a Totoo,’ a Mangibabangat ed Dalan na Dios” tan “Personalidad—Lakseben so Daan tan Isulong so Balo” so mangiparungtal na bersikulo por bersikulon panangusisa ed kapitulo 4 na Efeso. Ontumbok, nitarya so maabig a Makasulatan a bilin ed paliwawan “Pansiansiaen Yoy Inkasikayon Agnamatikan na Mundo” tan ed taloran-parti na simposium a “Sikayoran Tobonbalo—Tumboken so Dalan na Dios.” Sampotan so programa ed ngarem ed paliwawan “Say Manamalsa—Say Personalidad tan Saray Dalan To.”
Iparungtal na programa ed kabuasan na Simba so taloran-parti na simposium a maningbat ed unor iran kapitulo na libroy Biblia ya Ezequiel ontan met ed mapropetikon aplikasyon da. Sampotan so programa ed kabuasan ed draman aka-costume a nibase ed inkamatoor na taloran Hebreon tobonbalo. Say kapantokan na kombension ed ngarem et say publikon paliwawa, “Say Mogmon Dalan a Mamaarap ed Andi-Anggaan a Bilay.”
Seguradon napayaman ka ed espiritual diad iyatendi ed intiron taloy agew. Ampetapetang kan aabrasaen ya atendian so kada sesion, ya amin na satan, siempre, so libre ed sika. Parad pakagawaan ya asingger ed panaayaman mo, mitalosan ed lokal a Kingdom Hall na Tastasi nen Jehova odino mansulat ed saray manangipalapag ed sayan magasin.