Kasin Sikay Kaaro na Dios?—Napatnagan ed Saray Pikakasim

WALA tay bektan nibanan apatipatan moy pantotongtong na duaran too? Anggapoy duaruwan ag-abayag et naamtaan moy klase na relasyon da​—no kasin sikaray sankaaro odino estranghero, sankabat labat odino maapit, manmamatalekan a sankaaro. Diad mipadparan dalan, naipaparungtal na saray pikakasi tayo so relasyon tayo’d Dios.

Ipapaseguro na Biblia ed sikatayo a say Dios et “ag-arawi ed sinansakey ed sikatayo.” (Gawa 17:27) On, iimbitaan to itayon sikatoy kabaten. Sarag tayo ni ingen so magmaliw a kaaro to. (Salmo 34:8; Santiago 2:23) Napanggayagaan tayo so peteg ya inkamaapit ed sikato! (Salmo 25:14) Natalosan, say relasyon tayo ed Dios so sankamablian a bengatlan posiblin nakayarian tayon ag-ayadyarin totoo. Tan papablien nen Jehova so pikakaaro tayo. Susto labat iya ta say pikakaaro tayo ed sikato so base’d pananisia tayo ed bogbogtong ya Anak to, ya angiter na bilay to ed biang tayo.​—Colosas 1:19, 20.

Kaukolan sirin a saray pikakasi tayo et mangipatnag na aralem ya aro tan apresasyon parad Jehova. Balet, aliknam ta la a saray pikakasim, anggaman magalang et singano anggapo’d puso? Kaslakan iya. Antoy tombok ed pamaaligwas ed pamaakaran? Say pamayubom ed pikakaarom ed si Jehova a Dios.

Pangipanaon na Panpikasi

Manuna ed amin et kaukolay panaon pian napaaligwas tan nabayuboay pikakaaro. Nayarin inagew-agew mon ibabano odino kakatongtongen so dakel a totoo​—kakaabay, katrabahoan, drayber na bus, tan saray manlalako. Anggaman kuan, agto labay ya ibaga a kaarom la iratan. Ombulaslas so pikakaaro legan a sigsigpot kan mitotongtong ed sakey, a pantotongtongay palaway a tema ya anggad panangibalikas na saray akindalem a liknaan tan nononoten mo.

Diad mipadparan dalan, papaapiten itayo na pikakasi ed si Jehova. Balet magenap a panaon so kaukolan a nitalaga ed satan; mas ni so nakakaukolan nen say tampolan a pisasalamat diad saray panangan. No lanang kan mitotongtong ed si Jehova, lalon nayarian mon ipasabi iray dilin liknaan, motibom, tan aksion mo. Ompatnag lan mismo ed saratan iray solusyon ed mairap iran problema legan ya ipanonot ed sika na espirituy Dios iray prinsipyon manlalapud Salita to. (Salmo 143:10; Juan 14:26) Niarum ni, sano manpikasi ka, lalon magmamaliw a peteg si Jehova ed sika, tan lalon naamtaan moy maaron interes tan panpapaga to’d sika.

Nagkalalo la iya sano akaeksperiensia kay ebat ed pikakasim. Siempre, si Jehova so nayarin “manggawa na ontan la a daakan nen saray amin a nayarian tayo a kerewen odino nonoten, unong ed pakayari ya onggawa ed sikatayo”! (Efeso 3:20) Agto labay ya ibagan say Dios et manmilagro ed biang mo. Balet, diad panamegley na nisulat a Salita to, saray publikasyon na matoor ya aripen a klase, odino diad saray sangi na maaron agagi, niiter to ed sika so nakakaukolan a simbawa odino diriksion. Odino nayarin ikdan to ka na biskeg a nakakaukolan pian nasungdoan odino naresistian moy pakatuksoan. (Mateo 24:45; 2 Timoteo 4:17) Saratan ya eksperiensia so mamaliket ed kapusoan parad mangatatawen a Kaaro tayo!

Mangipanaon sirin so sakey pian manpikasi. Tua, singano kulang so panaon legan na sarayan makapadesdes ya agew. Balet sano talagan maasikaso ka ed sakey, kaslakan a walaan kay panaon parad satan a too. Imanoen so impangibalikas na salmista ed inkasikaton dili: “Unong a paningas na ulsa a kalakian a mananap na danum na kulokulos, ontan met so paningas na kamarerwak a mananap ed sika, O Dios. Say kamarerwak napgaan na Dios, say Dios a mabilay. Kapigan kasi yakar ko ya onpatnag ed Dios?” (Salmo 42:1, 2) Walaan ka ta na parihon panpirawat a mitongtong ed Dios? Sirin saliwen mo so panaon pian gawaen itan!​—Ikompara Efeso 5:16.

Alimbawa, nayarin salien moy ombangon a masakbay diad kabuasan pian nawalaan kay panaon a manpikasin bukor. (Salmo 119:147) Nasasalim ta no maminsan so agpakaugip ed labi? Sirin, singa say salmista, moriaen mo iratan a makapagonigon a panaon bilang pankanawnawan ibalikas iray kapagaan mo ed Dios. (Salmo 63:6) Odino nayarin satan et say pigaran panpikasin antikey legan na sanagew. Inkuan na salmista ed Dios: “Onakis ak ed sika ya agew-agew.”​—Salmo 86:3.

Panamaaligwas ed Kualidad na Pikakasi Tayo

Panapanaon et naromog mo met a makatulong so pamadukey ed saray pikakasim. Diad antikey a pikakasi et onkiling kan saglawien iray ataptapew labat ya isyu. Balet sano parukeyen tan paaralemen moray pikakasim, mas mainomay mon ibalikas iray kaisipan tan liknaan mo. Anggan panon et si Jesus so aminsan a nampikasin sanlabi. (Lucas 6:12) Anggapoy duaruwan naromog mon saray dilin pikakasim et magmaliw a lalon maapit tan makabaliksan no paliisan moy panapura.

Agto labay ya ibagan dakel so kalamakamen mo sano daiset so ibagam; nisay kabaliksan ton sika so andi-kabaliksan a mangulit-ulit ed satan. Impasakbay nen Jesus: “Tan diad panagpikasi, agmo agamilen so andi kakanaan a pangolioli na salita, a singa gawa na saray Gentiles lapud isisipen dan natalineng ira nisengeg ed dakel a panagsalita ra. Ag kayo komon sirin singa sikara, ta si Ama yo amta toray antokaman a kaukolan yo ed arapen a mankerew kayo ed sikato.”​—Mateo 6:7, 8.

Mas makabaliksan so pikakasi sano nonoten mo nin unona no antoray teman labay mon singbaten. Siempre ag-agetaran iray nayarin ibaga​—saray gayaga tayo ed ministeryo, saray kakapuyan tan kakabosan tayo, saray impakadismaya tayo, saray kapagaan tayo’d panagbilay, pakakadesdesan ed trabaho odino ed eskuelaan, say pankaabigan na pamilya tayo, tan say espiritual a kipapasen na pikokongregasyonan tayo, a pigara labat iratan.

Kasin no maminsan et say kanonotan mo so manyatawyataw sano manpipikasi ka? Sirin panggunaetan mon niyapasakey so imanom. Tutal, si Jehova et mabulos a ‘man-imatlek ed akis tayo.’ (Salmo 17:1) Agta lalon mabulos tayon masimoon a panggunaetan ya asikasoen iray dilin pikakasi tayo? On, ‘anapen so agagamil a kien na espiritu,’ tan ag-itan papaulyanan a manyatawyataw.​—Roma 8:5.

Say paraan a panawag tayo ed si Jehova so importanti met. Anggaman labay ton moriaen tayo bilang kaaro, agtayon balot lilingwanan a say pitotongtongan tayo et say Soberano na uniberso. Basaen tan dalepdepen iray makapakelkelaw ya eksenan nilitrato ed Apocalipsis kapitulo 4 tan 5. Diman et anengneng nen Juan ed sakey a pasingawey so karlangan na samay Sakey ya aasinggeran tayo’d pikakasi. Agaylan apribilihyoan tayo a makaasingger tan makapitongtong ed ‘samay Sakey ya akayurong ed trono’! Agtayon balot labay ya usarey salitan masyadon pamilyar odino anggapoy dignidad. Imbes, panggunaetan tayon napantunosan ‘iray salita tayo tan say dalepdep na puso tayo a naako ra ed pakanengneng nen Jehova.’​—Salmo 19:14.

Balet, kaukolan tayon moriaen ya agtayo panpapadinayewen si Jehova diad malabor a panagsalita. Sikatoy napaliket ed saray marespeto, impapuso iran balikas tayo, anggan panon lan kasimpli pakapangibalikas ed saratan.​—Salmo 62:8.

Ligliwa tan Pakatalos ed Panaon na Pankaukolan

Sano nakaukolan tayo so tulong tan ligliwa, mabetbet ya asinggeran tayoy maapit a kaaro parad suporta tan simpatiya. Bueno, anggapo lay kaaron magmainomay ya asinggeran nilikud ed si Jehova. Sikato so “sakey a maparparaan a tulong ed gonigon.” (Salmo 46:1) Bilang “Dios na ami ligliwa,” mas natatalosan toray nadadalanan tayo nen say siopaman ni. (2 Corinto 1:3, 4; Salmo 5:1; 31:7) Tan sikatoy walaan na peteg a pililikna tan panangabagey ed saramay mankakaukolan a tuloy. (Isaias 63:9; Lucas 1:77, 78) Diad pakatebek a si Jehova et sakey a makatalos a kaaro, bulos itayon makapitongtong ed sikato diad paraan a masimoon tan tekep na ligsa. Napakiwas tayon ibalikas iray pakakatakotan tan pakapapagaan tayo. Diad ontan et aktual tayon naeksperiensia no panon a si Jehova et ‘ligliwan mamaliket ed kamarerwa tayo.’​—Salmo 94:18, 19.

No maminsan et liknaen tayon agtayo makanepegan ya onasingger ed Dios lapud lingolingo tayo. Balet anto no sakey a maapit a kaaro so nankasalanan ed sika tan akikasin perdonaen mo? Agka ta napakiwas a manambayo tan mamaseguro ed sikato? Agta lalon nailaloan mon ontan si Jehova? Sibubunlok ton peperdonaen iray kaaro ton nankasalanan lapud ag-inkayadyari. (Salmo 86:5; 103:3, 8-11) Diad pakaamta ed saya, mabulos tayon ipatua iray lingo tayo ed sikato; a makapanmatalek ed aro tan panangasi to. (Salmo 51:17) Sano sikatayo so walaay depresyon lapud kakulangan tayo, naligliwa itayo ed saray salita ed 1 Juan 3:19, 20: “Dia ed saya nabirbir tayo a kien itayo na tua, tan saray kapusoan tayo apaletan ira ed arap to, ta no say kapusoan tayo et puoten to itayo, babaleg so Dios nen say puso tayo, tan kabat to so amin a bengatla.”

Balet agtayo kaukolan ya onsabi’d punton mankakaukolan a tuloy ta pian panggayagaay maaron panangasikaso na Dios ed sikatayo. Interesado si Jehova ed antokaman a bengatlan mangapekta ed espiritual tan emosyonal a pankaabiganan tayo. On, agbalot iisipen a saray liknaan, kanonotan, tan kapagaan tayo et agmasyadon importanti ya agla kaukolan a salambiten ed pikakasi. (Filipos 4:6) Sano katongtong moy maapit a kaarom, kasin say sisingbaten mo labat iray ankabaleg a bengatla’d bilay mo? Agta inanabang mo met iray ankelag a bengatlan panpapagaan mo? Diad mipadparan dalan, bulos kan mangitongtong ed antokaman ya aspetoy bilay mo ed si Jehova, ta amtam a “sikato asikasoen to kayo.”​—1 Pedro 5:7.

Siempre, say pikakaaro et agmakapanbayag no say amin a totongtongen mo et nipaakar ed sika. Ontan met, saray pikakasi tayo so kaukolan ya agmakasarili. Kaukolan tayo met ya ibalikas so aro tan paga tayo parad Jehova tan saray interes to. (Mateo 6:9, 10) Say pikakasi so aliwa labat lan pankanawnawa pian onkerew na tulong ed Dios noagta pankanawnawa met a makapanpasalamat tan makapandayew. (Salmo 34:1; 95:2) Say ‘pangala na pikakabat’ diad panamegley na regular a personal a panagaral so ontulong ed sikatayo ed sayan pamaakaran, on ta tulongan to itayon mas nakabatan si Jehova tan saray dalan to. (Juan 17:3) Nagkalautlan naromog mon makatulong so panbasa ed saray libro na Salmos tan imanoen no panon ya imbalikas na arum a matoor ya ariripen so inkasikara ed si Jehova.

Talagan say pikakaaro ed Jehova so mablin regalo. Komon ta ipanengneng tayoy apresasyon tayo diad panggawa’d saray pikakasi tayo a lalon maapit, impapuso, tan personal. Diad ontan et napanggayagaan tayo so liket ya imbalikas na salmista, ya angiyabawag: “Mapalar so too a pilien mo tan paasinggeren mo ed sika.”​—Salmo 65:4.

[Saray litrato ed pahina 28]

Makapanpikasi tayo ed Dios a sanagew kapigan man ya onlesay pankanawnawa