Pobri Balet Mayaman—Panon a Posibli Itan?

Pigaran siglo lay apalabas sanen impikasi na sakey a makabat a laki ya agkomon ompobri. Akin ya ontan so kerew to? Lapud natatakot ompan say inkaduka et panlapuan na saray ugali tan kakikiwas a mameligro’d relasyon to ed Dios. Napatnagan iya ed saray salita to: “Taganoen moak ed kanen a nakaukolan ed siak . . . ompan onduka ak, tan mantakew ak, tan agamilen ko a mudmoraen so ngaran na Dios ko.”—ULIRAN 30:8, 9.

KABALIKSAN ta na saya ya imposiblin makapanlingkor a sitotoor ed Dios so pobrin too? Andin balot! Diad intiron awaran et apansiansia na dakerakel ya ariripen nen Jehova a Dios so integridad da ed sikato anggaman ed irap ya itatarok na inkaduka. Ontan met, aaroen nen Jehova iramay manmamatalek ed sikato tan tataryaan tora.

Saray Matoor Nensaman

Naeksperiensian mismo nen apostol Pablo so panaoy pankaukolan. (2 Corinto 6:3, 4) Deniskribe to met so ‘baleg a lurem’ na matoor a tastasi ed sakbay na Kristianon panaon, a pigara ed sikara so “nanakarakar ira dia tan diman a nankawes ira na katat na saray karnero tan saray kanding; makabos ira . . . Abalbalang ira ed saray lawak, dia ed saray palandey, tan saray ungib, tan ed saray abut-abut na dalin.”​—Hebreos 11:37, 38; 12:1.

Sakey ed sarayan matoor et si propeta Elias. Legan na talora-tan-kapalduan-taon a kelang, sikatoy regular a tinaryaan nen Jehova na tagano. Unona, imbaki na Dios iray wawak a mangitarok na tinapay tan karne ed propeta. (1 Arari 17:2-6) Saginonor, mamilagron pinansiansia nen Jehova so suplay na arena tan larak a panlalapuay angitaryaan na balon bii parad si Elias. (1 Arari 17:8-16) Simpli labat so tagano, balet anustini itan ed propeta, ed bii, tan ed anak ton laki pian manbilay.

Sinustini met nen Jehova so matoor a propetan si Jeremias legan na kairapan ed ekonomya. Aliktaran nen Jeremias so impangubkob na saray taga-Babilonia ed Jerusalem, sanen saray totoo et kaukolan a “mangan ira na tinapay a sinimbang, tan sitatakot.” (Ezequiel 4:16) Kabekta, say ukol ed syudad et linmoor a kinan na pigaran bibii so laman na dilin ananak da. (Tagleey 2:20) Anggaman nipisok si Jeremias lapud andi-takot a panagpulong to, sineguro nen Jehova a sikatoy naikdan na “sankabukel a tinapay” ed inagew-agew “angga ed say amin a tinapay ed syudad naupot.”​—Jeremias 37:21.

Kanian si Jeremias, a singa si Elias, et walaan na daiset a naakan. Ag-ibabaga ed sikatayo na Kasulatan no antoy kinan odino panon kabetbet so impangan nen Jeremias kayarin naupotay tinapay so Jerusalem. Ingen, amta tayon sikatoy sinustini nen Jehova tan sikatoy akaliktar ed saman a pirmin panaoy ukol.

Natan, kasmak met so inkaduka ed amin a parti na mundo. Unong ed Nasyones Unidas, say sankagrabeay inkaduka et diad Aprika. Onia so imbalita na NU nen 1996: “Ag-onkulang a kapaldua na amin a taga-Aprika et maniirap.” Anggaman ed ipapalalo na kipapasen ed ekonomya, ondarakel iray Aprikano a mangiyaaplika’d prinsipyos na Biblia ed bilay da tan sitotoor a manlilingkor ed Dios, matalek a sikaray sustinien to. Konsideraen pay pigaran alimbawa manlapud sakey a kabiangan na magulon mundo tayo.

Panamantini ed Inkamatua

Si Michael,a a manaayam ed Nigeria et sakey a dumaralos a walaan na anemiran ilalak a lelegpeten. “Magmairap so pagmaliw a matua no andian ka na kuarta a panlegpet ed pamilyam,” so inkuanto. “Balet, sano natutukso ak a mansaol, ipapanonot ko ed inkasiak so Efeso 4:28, a kuanto: ‘Saman so nantatakew nensaman agkomon la mantakew, noag mansagpot, a gawaen na saray limalima to so bengatla a makapaabig.’ Kanian no natutukso ak, tetepetan koy inkasiak, ‘Kasin nansagpotan ko iyan kuarta?’”

“Alimbawa,” inyarum ni nen Michael, “legan a manaakar ak ed aminsan ya agew, anengneng koy bag a naplag ed beneg na sakey a motorsiklo. Agko la apara so manmomotor, kanian dinokdok koy bag tan nalmoan kon napno na kuarta! Diad impangusar ed pakabidbiran ed loob na bag, aromog koy makankien tan impawil ko’d sikatoy bag.”

Labanay Depresyon

Onia so inkuan na sakey a laki ed Amianen ya Aprika: “Say inkaduka et [singa] inkasukop na sakey a too ed aralem ya abot, sankanengneng toy liwawa tan totoon bulos ya ondadalan, balet agmakaeyag pian patulongan odino onkerew na takayan pian makaagwat.” Agpankelawan a say inkaduka et mabetbet a mangipapalikna na depresyon tan inkasaew! Anggan saray ariripen na Dios so makakanengneng ed kayamanan na arum tan onggapon manisip ya anggapoy gunggunay manbilay a walaay integridad. (Ikompara so Salmo 73:2-13.) Panon a natalonaan iratan a liknaan?

Si Peter, sakey a taga-Sagur ya Aprika, so nanretiro la kayari 19 taon a serbisyo ed gobierno. Pambibilayan to natan so melag a pension to. “No walaray panaon a nadidismaya ak,” so kuan nen Peter, “ipapanonot ko ed inkasiak so abasak ed Biblia tan ed saray palapagan na Watch Tower Society. Sayan daan a sistema et pagani-gani lan napaso, tan aalagaren tayo so magmaong a sistema.

“Ontan met, iisipen koy ibabaga na 1 Pedro 5:9 a kuanto: ‘Sumpaen yo [si Satanas] na mabiskeg a pananisia yo, amta yo a peteg ta saratan a kairapan nagawa met ira ed utel na agagi yo a wala ed mundo.’ Kanian agko bokbokor so maniirap. Sarayan panonot so ontutulong ed siak a mangiwaklit ed makadismaya tan makapagonigon iran kanonotan.”

“Nilikud ni,” inyarum ni nen Peter, “nanggawa si Jesus na dakel a milagro sanen wadiad dalin, balet agto pinayaman ed materyal so anggan siopa. Akin ya ilaloan kon payamanen toak?”

Say Pakayari na Pikakasi

Say iyaasingger ed si Jehova a Dios ed pikakasi so sananey a dalan pian nalabanay negatibon kaisipan. Sanen nagmaliw a sakey ed Tastasi nen Jehova si Mary nen 1960, sikatoy inkaindan na pamilya to. Ag-akiasawa tan natan et masulok lan 50 to, sikatoy makapuy la tan dagdaiset lay materyal a kayaryan to. Anggaman kuan, sikatoy maseseg ed Kristianon ministeryo.

Oniay inkuan nen Mary: “Sano nadidismaya ak, siak so manpikasi ed si Jehova. Amtak ya anggapoy makatulong ed siak a nagkalalo nen say sikato. Amoriak a sano manmatalek ka ed si Jehova et tulongan toka. Lawas kon nononoten iray salita nen Arin David, a naromog diad Salmo 37:25: ‘Tobonbalo ak nensaman, et natan masiken ak la; agko nin balot anengneng a say matunong et apaulyan, nisay saray bini to mipabpayabol na nakan.’

“Napapaseseg ak met ed saray eksperiensia na mas matatken ed espiritual ya agagi a nisalaysay ed Say Panag-Bantayan. Sikaray tinulongan nen Jehova a Dios, kanian amtak a mantultuloy toak met a tulongan. Bebendisionan toy melag a trabahok a panaglakoy fufu [taganon gawa ed kahoy], tan nasasapotan koy inagew-agew a pankaukolan ko. No maminsan sano anggapo lay kuartak tan agko amtay gawaen ko, mangibabaki si Jehova na toon mangiregalo ed siak tan ikuanton, ‘Sister, ipangasim ya awaten iya.’ Agak balot sinaew nen Jehova.”

Say Kablian na Panagaral na Biblia

Papablien na Tastasi nen Jehova so panagaral ed Salitay Dios, say Biblia, tan ag-ipuepuera iray pobri ed limog da. Say manedad na anemaplo a si John so manlilingkor bilang payunir (sigpot-panaon a managpulong na Panarian) tan sakey a ministeryal ya aripen ed kongregasyon. Sikatoy manaayam ed nagagaygay lan duaran-gradon bilding a panaayaman met na 13 pamilya. Say kuarto to et sakey a kabiangan na pasilyo ed unonan-grado, ya adibisyonan na plywood. Ditan et walay duaran daan a yurongan tan sakey a lamisaan a napnoy katulongan ed panagaral na Biblia. Sikatoy ondudukol ed silag ya ikamen.

Datin makakalmoy John na sakey dolyar ed sanagew diad panlalakoy tinapay, balet sanen insebel so importasyon na trigo, naandi so anapan to. Inkuanto: “Alay irap na panagbilay ko no maminsan, balet ta itutultuloy koy panpapayunir ko. Si Jehova so manusustini ed siak. Agak mapili na trabaho tan agak ompapapeg ed siopaman a too a manuporta odino mamakan ed siak, anggaman matulong a maong iray agagi ed kongregasyon. Tutulongan da ak a makaromog na trabaho tan no maminsan et iikdan daak na kuarta.

“Ipapanaon koy panbasay Biblia tan ed saray palapagan na Watch Tower Society. Manaaral ak diad palbangon sano marendeen ni abung tan manbabasa ak met ed labi sano walay koryenti mi. Amtak a kaukolan kon pansiansiaen so personal a panagaral ko.”

Panangipasal ed Ananak Parad Bilay

Si Daniel et abalo la a walaan na anemiran ilalak. Nen 1985 et naandi so trabaho to ed loob la na 25 taon, balet ta sikatoy akaromog na trabaho bilang bodegero. “Alay irap na bilay parad pamilya,” so inkuanto. “Natan et maminsan kami labat a mangan ed sanagew. Aminsan, et agkami angan ed loob na taloy agew. Inmiinum kami labat na danum pian nabilay ni.”

Manlilingkor si Daniel bilang sakey a matatken ed kongregasyon. “Agkon balot asaew iray Kristianon miting, tan nansiansia ak ya okupado ed saray teokratikon asainmin,” so inkuanto. “Kapiganman a walay trabahoen ed Kingdom Hall, seseguroen kon wadtan ak. Tan sano oniirap so kipapasen, papanonotan koy inkasiak ed saray salita nen Pedro ed si Jesus, a nirekord diad Juan 6:68: ‘Katawan, siopa so laen mi?’ No ontunda ak a manlingkor ed si Jehova, iner ni laen ko? Saray salita nen Pablo a naromog tayo diad Roma 8:35-39 so mangiiter met ed siak na determinasyon lapud ipapanengneng na saratan ya anggapoy makapangisian ed sikatayo manlapud aro na Dios tan Kristo. Saya so awawey ya ipupurek ko’d saray ilalak ko. Lawas kon ibabaga ed sikara ya agmin balot nepeg ya ikaindan si Jehova.” Say seseg nen Daniel, ya atekepay maparanay a pampamilyan panagaral na Biblia, so walaan na positibon epekto ed ilalak to.

Espiritu na Panangiter

Ompan isipen na sakey a saramay manbibilay ed pirmin inkaduka so nairapan a mandonasyon ed kiyalibansa na intereses na Panarian. Balet ta aliwan ontan so nagagawa. (Ikompara so Lucas 21:1-4.) Arum a Tastasi ed Ghana a say manunan anapan da et panagdalos so mangigagana ed kabiangan na dalin da pian usaren ed kiyalibansa na intereses na Panariay Dios. Sano nilako so produkto na saman a kabiangan a dalin, say kuarta so uusaren labat ed intereses na Panarian, pati met lay pandonasyon ed lokal a Kingdom Hall na Tastasi nen Jehova.

Si Joan, a manaayam ed Central Africa et sakey a payunir. Pian naasikaso so paralitikon masiken to tan apatira nin lelegpeten to, sikatoy manlalakoy tinapay. Sanen mankakaukolan na saray yurongan so aatendian ton Kingdom Hall, deniside na pamilya nen Joan ya idonasyon so amin a kuarta ra. Kanian nakatan ira. Balet, diad tinmumbok ya agew, ag-iilaloan a walay nambayar na abaybayag lan otang to, a niiter ed sikara so kuartan agda la iilaloan a naawat ni!

Masayaksak si Joan tan agtanton manaaburido nipaakar ed kuarta. “Ipapaliwawak so situasyon ko ed si Jehova diad pikakasi, tan insan ompaway ak ed lawak a ministeryo. Amta mi a melmelag so ilalo parad magmaong nin panaon ed sayan sistema na bengabengatla. Ingen, namomoria min mangitarya si Jehova na nakakaukolan mi.”

Panangipanengneng na Inkakuli

Nabibidbiran iray Tastasi nen Jehova diad panaaroan da. (Juan 13:35) Ontutulong iramay walaan na kuarta ed kapara ran Kristianos a mankakaukolan. Mabetbet a saya so onsabi bilang regalo tan no maminsan bilang tulong ed trabaho.

Si Mark, a manaayam ed Congo, so akating. Nakakaweng iray gamet na sali tan lima to. Pian makaakar, sikatoy mansasaklay. Sanen deniside nen Mark so manlingkor ed si Jehova, ginapoan toy baleg a pananguman ed bilay to. Imbes a mipayabol na tagano a singa datin gagawaen to, ginapoan toy mantanem na nakan to. Sikatoy nanggawa met na adobe iran laryo tan inlako to.

Anggaman ed pisikal a beblay to, sikukulin nantultuloy a nantrabaho si Mark. Diad kaunoran et sikatoy akasaliw na melag a sular tan angipaalageyan toy melag ya abung. Natan, manlilingkor si Mark bilang sakey a matatken ed kongregasyon tan sikatoy rerespitoen a maong ed baley da. Natan et sikatoy ontutulong ed arum nin mankakaukolan.

Siempre, diad dakel a paspasen et ngalngalin imposibli pakaromog na trabaho. Onia so insulat na Kristianon matatken a manlilingkor ed sangan opisina na Watch Tower Society ed Central Africa: “Dakel ya agagi dia so andian na trabaho. Arum so manggugunaet a mamawalay dili ran trabaho, balet ta mairap iya. Dakel so angikatunongan ya anggan antoy gawaen da et siansian manirap ira, sikaray mangisakripisyo ed materyal da bilang payunir iran ministro. Diad panggawa ed satan, dakel so makakaimanon sikaray nabebendisionan na mas daakan nen say no sikaray walaan na trabaho a melag odino anggapoy sueldo.”

Susustinien nen Jehova Iray Totoo To

Inkuan nen Jesu-Kristo ed inkasikato: “Saray kuyangen walay ungib da, tan saray manok ed tawen walaan iran na ubong, balet say Anak na too andian na napangisaralan to ed ulo to.” (Lucas 9:58) Mipadpara, onia so insulat nen apostol Pablo: “Angga ed saya ya oras natan narasan kami, tan napgaan kami met, tan lakseb kami, tan atamtampal kami, tan anggapo so tinandaan a panayaman mi.”​—1 Corinto 4:11.

Pinili di Jesus tan si Pablo so manbilay a simpli ta pian nagkalalon nagegemtan dan sigpot so ministeryo ra. Dakel a Kristianos ed kaplesan et pobri lapud anggapo lay napanpilian da. Anggaman kuan, iyaaplika ra’d bilay da iray prinsipyo na Biblia tan siseseseg a manggugunaet a manlingkor ed Dios. Amta ran sikaray papablien nen Jehova legan dan naeekperiensia so katuaan na panamaseguro nen Jesus: “Ingen anapen yo nin unona so panarian, tan say inkatunong to; et amin iraya [a materyal] a bengatla niarum ira ed sikayo.” (Mateo 6:25-33) Nagkalalo ni, sarayan pobrin ariripen na Dios so walaan na paneknek a “say bendision nen Jehova makapayaman.”​—Uliran 10:22.

[Paimano ed leksab]

[Kahon ed pahina 6]

Sioparay ‘Mananumpal na Salita’?

UNONG ed 1994 a Gallup poll, 96 porsiento na saray Amerikano so “manisia ed Dios odino sakey a sankatalbaan ya espiritu.” Walara met so “dakel a relihyon parad kada too ed Estados Unidos nen say dinanman a nasyon ed Dalin,” so inkuan na U.S.News & World Report. Anggaman ed ontan a relihyoson nengneng, onia so inkuan na beteranon pollster a si George Gallup, Jr.: “Say sigpot a katuaan et, ag-amta na maslak ya Amerikano no antoy sisiaen da odino no akin.”

Ipapanengneng met na estadistika a walay maawang a panbaetan na dakel a relihyoson kombiksion na totoo tan saray kiwas da. Singa bilang, “inkuan na saray sosiologo a pigara ed sankatageyay krimen iran lugar ed bansa so nibanbanan paspasen met a sankabiskegan iray relihyoson sisiaen tan agamil,” so inkuan nen managsulat a si Jeffery Sheler.

Ag-iya manurprisa ed sikatayo. Akin? Lapud singa nen inmunan siglo, pinasakbayan nen apostol Pablo iray kaparan Kristiano a manalwar ed saramay “ipaliwawa ra ya amta ra so Dios, balet dia ed saray gawa sikato so benegan da.” (Tito 1:16) Niarum ni, imbaga nen Pablo ed kalangweran a Timoteo a “saray kaunoran ya agew” et napatnagan so totoon “wala so nengneng da ya inkasanto, et ingen itapat da so pakayari na sayan inkasanto.”​—2 Timoteo 3:1, 5.

Balet, gagawaen na tuan Kristianos so anggaay nayarian da pian tumboken so ganggan nen Jesu-Kristo ya ‘onla . . . tan manggawa na babangatan ed amin a nasyon.’ (Mateo 28:19) Diad onian dalan et sikaray ‘mananumpal na salita ya aliwan dumerengel labat.’​—Santiago 1:22.

[Litrato ed pahina 7]

Papablien na totoo ed sankamundoan so panagaral na Biblia