Ginawa Ra so Linawa nen Jehova

Sakey ya Alimbawa na Dilin-Panagsakripisio tan Katooran

PARAD malangwer a dumaralos a manngaran na Eliseo, say ginmapo bilang rotinan agew na panagbaka et nagmaliw a makabaliksan a tuloy ya agew ed bilay to. Legan a mankikimey ed uma, akaawat si Eliseo na ag-iilaloan ya imbisita nen Elias, manunaan a propeta na Israel. ‘Anto kasi kaukolan to ed siak?’ Nayarin panumamengan nen Eliseo. Agto la kinaukolay panalagar a mabayag parad ebat. Imbuntok nen Elias so opisyal a kawes to ed si Eliseo, a mangipapanengneng ya onsabi agew et sikatoy kasandi nen Elias. Agnileglemew nen Eliseo iyan imbitasyon. Tampol, tinaynan toy uma pian magmaliw ya ayudante nen Elias.​—1 Arari 19:19-21.

Anem taon ed saginonor, asabi lay panaon na iyalis nen Elias. Say salaysay na impikal to so atawag a “sakey ed sankamakapadinayew a salaysay” ed Hebreon Kasulatan.

Manpaparaan si Elias ya Ompikal

Nanpilalekan nen Elias so unor ya ibisita ed Bethel, Jerico, tan ed Jordan. Kaukolanen na saya so panakar na dakel a kilometro, arum ed satan et diad nikotkotlaong a dalan ed palandey. Diad kada itunda da’d panagbiahe, pinaseseg nen Elias si Eliseo ya ontilak la. Balet ta impilit nen Eliseo so piulop ed katawan to anggad kasampotan.​—2 Arari 2:1, 2, 4, 6.

Legan a walad Bethel tan diad Jerico, “saray anak na saray propeta” so inmasingger ed si Eliseo.a “Antam a si Jehova ekalen to so katawan mo a manlapu ed ulom ed sayan agew?” intepet da ed sikato. “Sikato so amtak,” inyebat to. “Mandeen kayo.”​—2 Arari 2:3, 5.

Insan amaarap si Elias tan Eliseo ed Ilog Jordan. Sanen akasabi ra ed Jordan, nanggawa na milagro si Elias legan a banbantagen na 50 ananak na saray propeta. “Si Elias inala to so sokbong to, tan sikato so tinupi to, tan kinabil to so saray danum, et naapag ira dia tan diman, dia ed ontan a sikara a dua binmaliw ira ed amaga a dalin.”​—2 Arari 2:8.

Kabaliw da, inkuan nen Elias ed si Eliseo: “Kerewen mo no anto so gawaen ko a nipaakar ed sika, arapen na kaekal ko a manlapu ed sika.” Kinerew nen Eliseo so “mamidua a kabiangan” na espiritu nen Elias​—salanti, say doblen kabiangan a gendat a naawat na panguloan ya anak a laki. On, pinagalangan nen Eliseo si Elias unong a say panguloan ya anak a laki et pagalangan toy ama to. Sakey ni, sikatoy alanaan a katumbokan nen Elias bilang propeta nen Jehova diad Israel. Kanian agsinisiblet nisay agmatukoy so kerew to. Anggaman kuan, lapud amta ton si Jehova labat so makapangiter ed sayan kerew, sipapaabeban inkuan nen Elias: “Kinerew mo so mairap a bengatla.” Insan inkuanto ni: “No nanengneng moak sano naekal ak a manlapu ed sika, sikato naani so ontan ed sika; balet no andi, sikato naani so aliwa ya ontan.”​—2 Arari 2:9, 10; Deuteronomio 21:17.

Andi-duaruwan lalon determinado si Eliseo nen say nen kapiganman a mansiansian maapit ed katawan to. Insan, pinmatnag “so luganan ya apuy tan, saray kabayo ya apuy.” Diad imaton a mismo nen Eliseo, inyatagey na alimbusabos si Elias​—mamilagron niyalis ed sananey a pasen.b Dinokdok nen Eliseo so opisyal a kawes nen Elias tan nanakar a papawil ed gilig na Ilog Jordan. Kinabil to so saray danum, a kuanto: “Iner so kawalaan nen Jehova, a Dios nen Elias [anggan Sikato]?” Abelsay iray danum, a mamapaneknek a walaan si Eliseo na madibinon pananulong bilang katumbokan nen Elias.​—2 Arari 2:11-14.

Saray Leksion Parad Sikatayo

Sanen naimbitaan ed espisyal a serbisyo a kaibay Elias, tampol a tinaynan nen Eliseo so uma to pian manlingkor ed manunaan a propeta na Israel. Mapatnag, arum ed kimkimey to et melag labat, ta sikatoy akabatan bilang samay “angibung na danum ed saray lima nen Elias.”c (2 Arari 3:11) Anggaman kuan, minoria nen Eliseo so kimey to bilang sakey a pribilihyo, tan sikatoy sitotoor a nansiansia ed dapag nen Elias.

Dakel ed ariripen na Dios natan so mangipapatnag na parehon espiritu na dilin-panagsakripisio. Arum so anaynan ed “daldalin” da, saray anapan day panbilay, pian ipulong so maong a balita ed arawi iran teritorya odino pian manlingkor bilang membroy pamilyan Bethel. Arum so nanbiabiahe ed saray biek-taew pian mankimey ed saray proyekton konstruksion na Sosyedad. Dakel so angawat ed nayarin tatawagen dan abeba iran kimey. Ingen, makabaliksan ya amin so serbisyo na ariripen nen Jehova. Aapresiaen nen Jehova so amin a sibubulos a manlingkor ed sikato, tan bendisionan toy espiritu na dilin-panagsakripisio ra.​—Marcos 10:29, 30.

Nansiansia si Eliseo ed si Elias anggad kasampotan. Agto labay a kaindanan so masiken lan propeta anggan sanen walay pankanawnawa. Agpanduaruwaan, say maapit a siglaotan a binayuboan to ed si Elias so amaliket ed ontan a matoor ya aro. Natan, panbabanikelan na ariripen na Dios a pabiskegen so siglaotan da ed Dios tan lalon onapit ed saray kapananisiaan da. Say maapit a bedber na pankakasakey so nabendisionan, lapud ibabaga na Biblia nipaakar ed si Jehova: “Dia ed mapangasi [matoor, NW] ompatnag ka a mapangasi [matoor, NW].”​—2 Samuel 22:26.

[Saray paimano ed leksab]