Anengneng nen Eliseo Iray Mandarlang ya Karwahe—Sika ey?

Aanapen na ari na Sirya so propeta na Dios ya si Eliseo tan naamtaan ton walad apadiran ya nipalandey a syudad na Dotan. Sikatoy angibaki ed Dotan na saray kabayo, karwahe parad guerra, tan dakdakel ya sundalo. Ombubutay ni labat so agew, asingger lad syudad iray imbaki to.—2 Ara. 6:13, 14.

Kabangon na lingkor nen Eliseo, pinmaway tan anengneng to ray mangerel ed propeta. “Abagey, katawan ko! Panon so gawaen tayo?” so inkuan to. “Agka antakot; ta saray wala ed sikatayo sikara so dakdakel nen saray wala ed sikara,” so ebat nen Eliseo. Insan oniay impikasi to: “Jehova, pikasik ed sika, lukasan mo so saray mata to, pian makanengneng.” Tan oniay agawa: “Et si Jehova nilukasan to so saray mata na tobonbalo a laki; et anengneng to: et, nia, say palandey napno ed saray kabayo tan saray luganan ya apoy ed liberliber nen Eliseo.” (2 Ara. 6:15-17) Antoy naaralan tayod saya tan ed arum ni ran agawad bilay nen Eliseo?

Anggan apaliberan la na saray Siryano, kalmado si Eliseo lapud sikatoy nanmatalek ed si Jehova tan anengneng toy pakapanyari na Dios ya manalimbeng. Agtayo la makakanengneng na milagro natan, balet amta tayon proprotektaan nen Jehova iray lingkor to bilang grupo. Singa itayo met apaliberan na saray mandarlang ya kabayo tan karwahe. No ‘nengnengen’ tayo iratan panamegley na pananisia tan naynay tayon manmatalek ed Dios, ‘manayam itayod andi kaatapan’ tan bendisyonan itayo nen Jehova. (Sal. 4:8) Amtaen tayo no antoy naaralan tayod arum ni ran agawad bilay nen Eliseo.

NANLINGKOR SI ELISEO ED SI ELIAS

Aminsan, sanen manbabaka si Eliseo, sikatoy inasinggeran nen propeta Elias tan imbuntok tod sikatoy kawes ton parad propeta. Amta nen Eliseo no antoy labay ya ibaga na satan. Kanian sikatoy angiparaan na ponsia, nampatanir ed atateng to, insan tinmaynan pian manlingkor ed si Elias. (1 Ara. 19:16, 19-21) Lapud akaparaan si Eliseo ya manlingkor ed Dios diad anggaay nayarian to, sikatoy inusar nen Jehova tan ag-abayag et sinmalat ed si Elias bilang propeta.

Manga anem taon ya nanlingkor si Eliseo ed si Elias. Legan na satan a panaon, si Eliseo so ‘mangiyiibung na danum ed saray lima nen Elias.’ (2 Ara. 3:11) No mamangan iray totoo nensaman, mantutumpok ira, anggapoy kutsara, tinidor, odino arum ni. Kayari panangan, mangikalbo na danum so aripen ed lima na katawan to pian naurasan iratan. Kanian say arum ed saray kimey nen Eliseo et talagan abebbeba. Anggaman ontan, impasen ton pribilehyo so pagmaliw a lingkor nen Elias.

Diad panaon tayo, dakel a Kristiano so linmoob ed nanduruman klase na sigpot panaon a panaglingkor. Ginawa da itan lapud pananisia, tan labay dan usarey biskeg da pian lingkoray Jehova. Wala ray tinaynan day ayaman da pian manlingkor ed Bethel, diad saray proyekto na panagpaalagey, tan arum ni ra—saray kimey a nayarin ipapasen na arum ya abebbeba. Agnepeg ya ipasen na saray Kristiano ya ag-importante o makapabaing iratan ya panaglingkor lapud papablien a maong nen Jehova iratan.—Heb. 6:10.

NANMATOOR SI ELISEO ED ASAINMIN TO

Antis ya inala na Dios si propetan Elias ed tawen panamegley na alimbusabos, imbaki to ya manbiahe manlapud Gilgal paonlad Bethel. Imbaga nen Elias ya natilak lay Eliseo, balet oniay ebat nen Eliseo: “Agta ka paulyan.” Legan iran manbiabiahe, amiduan imbaga nen Elias ya manalagar lay Eliseo diman balet akilan siansia. (2 Ara. 2:1-6) Singa si Rut ya akilad si Noemi, agsinmian si Eliseo ed si Elias. (Rut 1:8, 16, 17) Akin? Lapud pinabli nen Eliseo so nanlapud Dios ya pribilehyo ton lingkoray Elias.

Balibalin alimbawa si Eliseo ed sikatayo. No walay naawat tayon pribilehyo ed organisasyon na Dios, pablien tayo tan isipen tayon say panlilingkoran tayo et si Jehova. Baleg ya kagalangan itan.—Sal. 65:4; 84:10.

“KEREWEN MO NO ANTO SO GAWAEN KO A NIPAAKAR ED SIKA”

Legan iran manbiabiahe, oniay imbaga nen Elias ed si Eliseo: “Kerewen mo no anto so gawaen ko a nipaakar ed sika, [ed] arapen na kaekal ko a manlapu ed sika.” Singa samay kerew nen Solomon, say kerew nen Eliseo et nipaakar ed espiritual. Kinerew to ya onlad sikatoy ‘mamiduan kabiangan na espiritu nen Elias.’ (1 Ara. 3:5, 9; 2 Ara. 2:9) Diad Israel, say panguloan ya anak a laki et doble so apag ton tawir. (Deu. 21:15-17) Kanian say kekerewen nen Eliseo et say pagmaliw ton mananawir nen Elias ed espiritual. Sakey ni, mapatnag ya labay nen Eliseo so nawalaan na pakpel a singa si Elias, ya ‘nanimon a tuloy nipaakar ed si Jehova.’—1 Ara. 19:13, 14.

Antoy reaksion nen Elias ed kerew nen Eliseo? Inkuan to: “Kinerew mo so mairap a bengatla: anggaman ontan, no nanengneng mo ak sano naekal ak a manlapu ed sika, sikato naani so ontan ed sika; balet no andi, sikato naani so aliwa ya ontan.” (2 Ara. 2:10) Duaray labay ya ibaga na satan. Unona, say Dios so mandesisyon no kasin niiter ed sikatoy kerew to. Komadua, pian niiter itan ed sikato, nepeg a sikatoy mansiansiad si Elias anggan antoy nagawa.

SAY ANENGNENG NEN ELISEO

Antoy panmoria na Dios ed kekerewen nen Eliseo ya mamiduan kabiangan na espiritu nen Elias? Oniay ibabaga na Biblia: “Et agawa, leleg a manaakar ira, tan mansasalita ra, ya nia, pinmayawar so luganan ya apoy, tan saray kabayo ya apoy, ya amasian ed sikara a nampadpara; et si Elias sinmegep ed panamegley na alimbusabos ed tawen. Et sikato so anengneng nen Eliseo.”a Atan so ebat nen Jehova ed kerew nen Eliseo. Anengneng to ya nakal o sinmian ed sikatoy Elias, niiter ed sikatoy mamiduan kabiangan na espiritu nen Elias, tan nagmaliw ya mananawir na propeta ed espiritual.—2 Ara. 2:11-14.

Dinokdok nen Eliseo so kawes ya nanlapud si Elias tan insulong to. Satan ya kawes so pakapatnagan ya si Eliseo et sakey lan propeta na Dios. Apaneknekan met itan nen nanggaway milagro diad impamelsay tod Ilog Jordan.

Seguradon baleg so epekto na impakanengneng nen Eliseo ed insegep nen Elias ed tawen panamegley na alimbusabos. Ta singa imposible makanengneng na mandarlang iran karwahen parad guerra tan mandarlang iran kabayo! Paneknek iratan ya inebatan nen Jehova so kerew nen Eliseo. Ag-itayo makakanengneng na mandarlang iran karwahe tan kabayo no eebatan na Dios iray pikakasi tayo. Balet, natebek tayo ya uusaren toy agnaparaan ya pakapanyari to pian seguradon nagaway linawa to. Tan no nanenengneng tayon bebendisyonan nen Jehova so organisasyon to diad dalin, singa tayo ‘nanenengneng’ so ikikiwas na karwahe tod tawen.—Eze. 10:9-13.

Dakel so naeksperiensya nen Eliseo a mamapaneknek ed agnaparaan a pakapanyari nen Jehova. Diad tua, lapud masanton espiritu na Dios et sikatoy akapanggawa na 16 ya milagro—mas dakel ya mamidua nen si Elias.b Say mikaduan impakanengneng nen Eliseo na mandarlang iran kabayo tan karwahe et sanen wala rad Dotan, samay eksenan abitla ed gapo na sayan artikulo.

NANMATALEK SI ELISEO ED SI JEHOVA

Anggano apaliberan na kalaban, nansiansian kalmado si Eliseo. Akin? Lapud mabiskeg so pananisia tod si Jehova. Kaukolan tayo met so ontan ya pananisia. Kanian, ipikasi tayoy tulong na masanton espiritu na Dios pian naynay tayon nipanengneng so pananisia tan arum nin aspekto na bungay espiritu.—Luc. 11:13; Gal. 5:22, 23.

Samay agawad Dotan et akatulong met ed si Eliseo ya manmatalek ed si Jehova tan ed agnanengneng ya armada to. Atebek na propeta ya angibaki so Dios na saray anghel pian paliberay syudad tan saray mangerel ed sikato. Binulag na Dios iray kalaban kanian akaliktar si Eliseo tan say aripen to. (2 Ara. 6:17-23) Diad saman ya mapeligron situasyon tan arum ni, impanengneng nen Eliseo so pananisia tan panagmatalek tod si Jehova.

Singa si Eliseo, manmatalek itayod si Jehova a Dios. (Uli. 3:5, 6) No gawaen tayo itan, “say Dios kasian . . . tan bendisyonan to itayo.” (Sal. 67:1) Tua, anggapo ray akapaliber ed sikatayon literal ya mandarlang a karwahe tan kabayo. Balet diad “baleg ya kairapan,” protektaan itayo nen Jehova bilang sanaagi ed interon mundo. (Mat. 24:21; Apo. 7:9, 14) Antis ya onsabi itan, agtayon balot lilingwanan ya say Dios so ‘manasalimbeng ed sikatayo.’—Sal. 62:8.