‘Panakar Diad Panamegley na Pananisia, Aliwan Diad Pakanengneng’
“Manakar itayo lapu ed pananisia, aliwan lapud pakanengneng.”—2 CORINTO 5:7.
1. Anto so labay ya ibaga na ‘manakar lapud pananisia’?
KADA manpikasi tayo a mitunosan ed saray panangidirehi a nidatak ed Salitay Dios, nipapaamta tayon anggan panon et walaan tayoy pananisia. Sano ipulong tayo la’d arum so nipaakar ed Panarian na Dios, nipapanengneng met na saya so pananisia. Tan sano idedika tayoy bilay tayo’d si Jehova, papaneknekan tayon pilalek tayoy ‘manakar lapud pananisia,’ salanti, pian gemtanen so kurang na bilay ya uuleyan na pananisia.—2 Corinto 5:7; Colosas 1:9, 10.
2. Akin a say pibibiang ed aktibidades na kongregasyon et agmamrueban satan a sakey et walaan na pananisia?
2 No talagan manbilay itayo ed ontan a paraan, kaukolan tayo so niletneg a maong a pananisia. (Hebreos 11:1, 6) Dakel a totoo so nasasagyat ed Tastasi nen Jehova lapud atagey iran estandarte ed moral tan ed aro a naiimano ra’d limog na Tastasi. Maabig itan a gapoan, balet ta agto labay ya ibagan saratan a totoo et walaan lay pananisia. Say arum so nayarin walaay asawa odino ateng a mabiskeg ed pananisia, tan nayarin pibibiangan day pigara ed espiritual ya aktibidades na aaroen da. Say pakawalaan na ontan ya impluensia ed ayaman na sakey so peteg a bendision, balet anggan saya et agkasandi na personal a panangaro ed Dios tan personal a pananisia.—Lucas 10:27, 28.
3. (a) Pian nawalaan itayo na niletneg a maong a pananisia, anton kombiksyon so nepeg a personal a niwala ed sikatayo nipaakar ed Biblia? (b) Akin mas mainomay a nakombinse so arum a totoo ed inkapuyan na Biblia nen saramay arum?
3 Saramay peteg a manaakar diad panamegley na pananisia so kombinsidon tuloy a say Biblia et Salita na Dios. Daakan so ebidensia a say Masanton Kasulatan et talagan, “impuyan na Dios.”a (2 Timoteo 3:16) Kaunongan karakel ed sayan ebidensia so nepeg a nausisa sakbay a nakombinse so sakey a too? Nayarin mandependi itan ed abenegan to. Say sigpot a mamenek ed sakey et nayarin agmanagyat ed sananey. Diad arum a kipapasen, anggaman nipanengneng ed sakey a too so daakan ya agnasuppiat ya ebidensia, nayarin agto nin siansia awaten so konklusyon ya ipapabitar na satan. Akin? Lapud nilamot a tuloy iran pilalek ed puso to. (Jeremias 17:9) Kanian, anggaman ikuan na sakey ya interesado’d gagalay Dios, nayarin panpirawatay puso to so panangabobon na mundo. Nayarin agto nikaindan so kabibilay a sumlang ed saray estandarte na Biblia. Balet, no talagan naeerasan so sakey ed katuaan, no sikatoy matua ed inkasikato, tan no sikatoy mapaabeba, nasabin namoria ton say Biblia et Salitay Dios.
4. Anto so kakaukolanen ed biang na indibidual ta pian makagamor na pananisia?
4 Mabetbet a diad loob labat na pigaran bulan et aapresiaen na saray matuan-impanpuso ya iyaaralan na Biblia a naamtaan da laray daakan a prueban satan so Salita na Dios. No saya so mamakiwas ed sikaran lukasay kapusoan da pian paibangat ed si Jehova, diad ontan et say sankaaralman a kanonotan, pilpilalek, tan motibasyon da et kalkalnan moldien na nanaaralan da. (Salmo 143:10) Kuan na Roma 10:10 a dia “ed puso” a say sakey et mangagamil na pananisia. Ibabalikas na ontan a pananisia so talagan nalilikna na indibidual, tan napatnagan itan diad kurang na bilay to.
Kinmiwas si Noe Unong ed Niletneg a Maong a Pananisia
5, 6. Antoy akabasiyan na pananisia nen Noe?
5 Si Noe so sakey ed walaan na niletneg a maong a pananisia. (Hebreos 11:7) Antoy basiyan to pian nawalaan na ontan? Walaan si Noe na salitay Dios, aliwan diad nisulat a porma, noagta unong a sinalita ed sikato. Oniay ibabaga na Genesis 6:13: “Say Dios inkuanto ed Noe: ‘Say anggaan na amin a laman sinmabi ed arapan ko; ta say dalin napno na karawalan lapu ed sikara.’” Indirehi nen Jehova si Noe a mangipaalagey na biong tan nidetalye ed sikatoy kipaalagey to. Insan, inyarum na Dios: “Siak, salanti siak, mangiyakar ak na sakey a delap na saray danudanum ed dalin, a mangaygay na amin a laman, a kawalaan na panlinlinawaan na bilay ed silong na tawen; amin a bengatla a wala ed dalin ompatey.”—Genesis 6:14-17.
6 Wala ta lay uran sakbay na saya? Anggapoy ibabaga na Biblia. Kuan na Genesis 2:5: “Si Jehova a Dios agto ni pinauran.” Balet, ontan so impangibalikas nen Moises, a nambilay pigaran siglo ed saginonor, nipaakar ed saray pamaakaran sakbay na panaon ni nen Noe. Unong a nipanengneng diad Genesis 7:4, tinukoy nen Jehova so uran sanen mitotongtong ed si Noe, tan mapatnag ya atalosan nen Noe so labay ton ibaga. Ingen, say pananisia nen Noe so agnibase’d nanengneng to labat. Insulat nen apostol Pablo a si Noe so naikdan na “panangipatnag ed saray bengatla ya agni anengneng.” Imbaga na Dios ed si Noe a Sikatoy mangitarok ed dalin na “delap na saray danudanum,” odino “say mangatatawen a dayat,” a singa pangibabalikas na paimano’d-leksab na New World Translation ed Genesis 6:17. Anggad saman a panaon, agnin balot agawa itan. Balet amin a pinalsan nanengneng nen Noe so ebidensian pakapatnagan a talagan nayarian na Dios ya itarok itan a makaderal a delubio. Apakiwas lapud pananisia, impaalagey nen Noe so biong.
7. (a) Anto so agkaukolan nen Noe ta pian gawaen toy ingganggan la na Dios ed sikato? (b) Panon itayon nagugunggunaan diad pangonsidera ed pananisia nen Noe, tan panon a say pananisia tayo et bendision ed arum?
7 Ag-imbaga na Dios ed si Noe so petsay igapoy Delubio. Balet ag-angibaraanan itan nen Noe pian agamiley ugalin makauley la (wait-and-see), a say panagpaalagey na biong tan panagpulong et onkokomadua labat ed bilay to. Diad magenap a panaon, imbagay Dios ed si Noe no kapigay iloob to’d biong. Kaleganan, “ginawa nen Noe; unong na amin ya ingganggan na Dios ed sikato. Ontan so ginawa to.” (Genesis 6:22) Nanakar si Noe diad panamegley na pananisia, aliwan diad pakanengneng. Agaylan otang a linawa tayo ta ginawa to itan! Lapud pananisia to, sikatayoy mabilay natan. Dia met ed kipapasen tayo, say pananisian ipapanengneng tayo so walaan met na baleg ya epekto’d itatarya na arapen aliwan parad sikatayo labat noagta parad ananak tayo tan parad arum nin totoon walad liber tayo.
Say Pananisia nen Abraham
8, 9. (a) Diad anto so angibasiyan nen Abraham na pananisia to? (b) Diad anton dalan a “pinmanengneng” si Jehova ed si Abraham?
8 Nonoten pa met so sakey nin alimbawa—nipaakar ed si Abraham. (Hebreos 11:8-10) Antoy angibasiyan nen Abraham na pananisia to? Say kaliber-liber a binalegan to ed Ur na saray Caldeo et managtalintao tan materyalistiko. Balet wala niray impluensian nanmoldi ed panmoria nen Abraham. Anggapoy duaruwan akapilimog ed ilalak nen Noe a Sem, a kapanaonan to ed loob na 150 a taon. Akombinse si Abraham a si Jehova so “Dios a Sankatageyan, makankien [Manamawala, NW] na tawen tan say dalin.”—Genesis 14:22.
9 Wala ni bengatlan angimpluensian tuloy ed si Abraham. Si Jehova so “pinmanengneng ed . . . si Abraham, sanen sikatoy wadman ed Mesopotamia, nen agni nanayam ed Haran, et inkuanto ed sikato: ‘Ompaway ka ed dalin mo, tan ed kanayon mo, et onla ka ed dalin ya ipanengneng ko ed sika.’” (Gawa 7:2, 3) Diad anton dalan a “pinmanengneng” si Jehova ed si Abraham? Agdirektamintin anengneng nen Abraham so Dios. (Exodo 33:20) Anggaman ontan, posibli a nampanengneng si Jehova ed si Abraham diad sakey a kugip, tekep na mamilagron panangipanengneng na gloria, odino diad panamegley na anghelikon mensahero, odino manangilaman. (Ikompara so Genesis 18:1-3; 28:10-15; Levitico 9:4, 6, 23, 24.) Antokamay paraan ya inyapireng nen Jehova ed si Abraham, sayan matoor a too so matalek a say Dios et mangileletneg na mablin pribilihyo ed arap to. Kinmiwas si Abraham diad pananisia.
10. Panon a pinabiskeg nen Jehova so pananisia nen Abraham?
10 Say pananisia nen Abraham so agnandependi ed pakawalaan na saray detalye ed kipaakaray dalin a pangiyaakaran na Dios ed sikato. Agnandependi itan ed pakaamta to no kapigan a niiter ed sikato itan a dalin. Sikatoy walaan na pananisia lapud kabat toy Jehova bilang Dios a Makapanyarin-amin. (Exodo 6:3) Imbaga nen Jehova ed si Abraham a sikatoy nawalaan na ilalak, balet no maminsan et panumamengan nen Abraham no panon itan a nagawa. Sikatoy onmamasiken la. (Genesis 15:3, 4) Pinabiskeg nen Jehova so pananisia nen Abraham diad impangibaga ed sikaton tangayen toray bitewen tan bilangen iratan no kasin nayarian to. “Ontan so ilalak mo naani,” inkuan na Dios. Apakiwas a tuloy si Abraham. Mapatnag a sarag a sumpalen na Manamalsa’d saratan a makapadinayew a pinalsan walad tawen so insipan to. Si Abraham so “anisia ed Jehova.” (Genesis 15:5, 6) Aglabat anisia si Abraham lapud labay toy arengel to; sikatoy walaan na niletneg a maong a pananisia.
11. (a) Legan a ngalngali la manedad na 100, panon so inkiwas nen Abraham ed sipan na Dios a say akulaw lan Sara et mananak? (b) Diad anton nengneng na pananisia ya inarap nen Abraham so subok a manasaglawi’d pangawit to’d anak to ed Palandey Moria pian ibagat to?
11 Sanen ngalngali la manedad na 100 si Abraham tan say asawa to, si Sara et ngalngali la manedad na 90, imbaga lamet nen Jehova so sipan ton nawalaan na ilalak si Abraham tan si Sara so magmaliw ya ina. Realistikon minolimoli nen Abraham so kipapasen da. “Anggan ontan, dia ed panaalagar to ed sipan na Dios, agto nanduaruwa ed panamegley na agpananisia, noag ingen apabiskeg ed panamegley na pananisia, tan akapangiter na gloria ed Dios, tan sinisia to a peteg a ganagana ya insipan to, makapanyari met a manumpal.” (Roma 4:19-21) Kabat nen Abraham ya ag-onsaew so sipan na Dios. Diad saginonor, lapud pananisia to, tinmulok si Abraham sanen inkuan na Dios ed sikaton awiten toy anak to ed dalin na Moria tan ibagat to. (Genesis 22:1-12) Sigpot a matalek si Abraham a say Dios a mamilagron amawala ed saman ya anak so makapamaoli met ed sikato ta pian nasumpal iray insipan To a misiglaotan ed anak.—Hebreos 11:17-19.
12. Kaunongan kabayag a nantultuloy si Abraham a nanakar diad panamegley na pananisia, tan anton tumang so manatalaran ed sikato tan ed saray kapamilyaan to ya angidemostra na mabiskeg a pananisia?
12 Impanengneng nen Abraham a sikatoy inuleyan na pananisia aliwan dia lambengat ed sagpaminsan, noagta ed intiron bilay to. Legan na impanbilay to et anggapoy atawir nen Abraham manlapud Dios na antokaman a kabiangay Insipan a Dalin. (Gawa 7:5) Ingen, si Abraham so aglinmetey tan pinmawil ed Ur na saray Caldeo. Diad loob na 100 taon, anggad impatey to, sikatoy nanayam ed saray tolda diad dalin ya angidirehian na Dios ed sikato. (Genesis 25:7) Nipaakar ed sikato tan ed asawa ton Sara, ed anak dan Isaac, tan ed apo ran Jacob, oniay ibabaga na Hebreos 11:16: “Kanian say Dios agto ra ibaing, a sikato so manngaran na Dios da; ta wala ya imparaan to ed sikara so sakey a syudad.” On, intaryaan la ra nen Jehova na lugar ed mangaraldalin a sakop na Mesianikon Panarian to.
13. Siopara ed limog na ariripen nen Jehova natan so mamapaneknek a walaan ira na pananisia a singa ed samay si Abraham?
13 Walara’d limog na ariripen nen Jehova natan so singa si Abraham. Dakel lan taon a manaakar ira diad pananisia. Diad biskeg ya iiter na Dios, natatalonaan day pinmalandey iran babeng. (Mateo 17:20) Sikaray agnipapalir-palir ed pananisia lapud ta agda labat amta no kapigay pangiter na Dios ed sikara na tawir ya insipan to. Kabat dan ag-onsaew so salita nen Jehova, tan ikuekuenta ran mablin pribilihyo so pakapibilang ed limog na Tastasi to. Ontan ta so naliliknam?
Say Pananisian Amakiwas ed si Moises
14. Panon a niletneg so pundasyon na pananisia nen Moises?
14 Say sananey nin alimbawa na pananisia et si Moises. (Hebreos 11:23-29) Anto tay pundasyon na pananisia to? Ginmapo itan ed inkaugaw. Anggaman aromog na marikit nen Faraon si Moises a walad papiron balbaloto ya akasakda ed gilig na Ilog Nilo tan inala ton pinagka-anak to, say peteg a Hebreon ina nen Moises, si Jocabed, so mismon amasoso ed ugaw a walad panangasikaso to legay asasakbay a taon to. Mapatnag a sikatoy binangatan a maong nen Jocabed, ya ipapaslep so panangaro ed si Jehova tan apresasyon ed saray sipan To ed si Abraham. Saginonor, bilang membro na sankaabungan nen Faraon, “abangatan si Moises ed amin a kakabatan na saray taga-Ehipto.” (Gawa 7:20-22; Exodo 2:1-10; 6:20; Hebreos 11:23) Ingen, anggaman ed maabig a posisyon nen Moises, walad puso toy naaripen a totoo na Dios.
15. Antoy kabaliksan na impangipakabat nen Moises a sikatoy kabiangay totoo nen Jehova?
15 Diad koma-40 taon to, pinatey nen Moises so sakey ya Ehipsio pian iyagel so Israelitan lalamesen. Impanengneng na sayan inkagawa so impanmoria nen Moises ed totoo na Dios. On, “lapu ed pananisia, si Moises, sanen nagnap la ed inkatoo to agto ginabay a nangaranan na anak na saman a marikit nen Faraon.” Imbes ya onkiling ed ‘temporaryon gayaga na kasalanan’ bilang membro na korte na Ehipto, sikatoy pinakiwas na pananisia ya ipakabat so inkasikato a kabiangay lalamesen a totoo na Dios.—Hebreos 11:24, 25, NW; Gawa 7:23-25.
16. (a) Anton kimey so inter nen Jehova ed si Moises, tan panon a tinulongan na Dios? (b) Diad panusumpal na kimey to, panon ya impanengneng nen Moises so pananisia?
16 Maganat lan onkiwas si Moises pian itarok so pakainawaan na kabaleyan to, balet ta agni asabi so panaon na Dios parad kililiktar da. Kaukolan a taynan nen Moises so Ehipto. Anggad sanen ngalngali la 40 taon ed saginonor a ginanggan nen Jehova si Moises diad panamegley na sakey ya anghel pian ompawil ed Ehipto a mangidaulo’d kipaway na Israelitas ed saman a dalin. (Exodo 3:2-10) Panoy inkiwas nen Moises? Agto nanduaruwaan so abilidad nen Jehova ya iliktar so Israel, balet ta liknaen ton ag-onnepeg ed betang ya iiter na Dios ed sikato. Simamaaron initer nen Jehova so panamaseseg a kaukolan nen Moises. (Exodo 3:11–4:17) Binmiskeg so pananisia nen Moises. Sikatoy pinmawil ed Ehipto tan paulit-ulit a pinasakbayan ya arap-arapan si Faraon ed saray salot ya ondapo ed Ehipto lapud agto pangibulos ed Israel pian mandayew ed si Jehova. Andian si Moises na personal a pakapanyari pian pawalaen iraman a salot. Sikatoy nanakar diad panamegley na pananisia, aliwan diad pakanengneng. Say pananisia to et wala ed si Jehova tan ed salita to. Pinagyaw nen Faraon si Moises. Balet nantultuloy si Moises. “Lapu ed pananisia tinaynan to so Ehipto, ya agto tinakotan so sanok na ari, ta nansiansia a singa to nengnengnengen so agnanengneng.” (Hebreos 11:27) Ag-ayadyari si Moises. Sikatoy akagawa na saray lingo. (Numeros 20:7-12) Balet kayarin ginanggan na Dios, say intiron kurang na bilay to so inuleyan la na pananisia.
17. Anto so nansumpalan na impanakar diad panamegley na pananisia parad di Noe, Abraham, tan Moises, anggaman agda anengneng ed impanbilay da so balon mundo na Dios?
17 Komon ta say pananisiam et singa ed di Noe, Abraham, tan Moises. Tua ya agda anengneng so balon mundo na Dios ed agew da. (Hebreos 11:39) Aliwa nin aturon panaon na Dios; wala niray arum ya aspekto na sipan to a siansia nin nakaukolan a nasumpal. Ingen, say pananisia ra ed salitay Dios et agnipalir, tan say kangaranan da et walad libroy bilay a kien na Dios.
18. Parad saramay atawag ed mangatatawen a bilay, akin a kapilitan so panakar diad panamegley na pananisia?
18 “Say Dios angiparaan na magmaong a bengatla nipaakar ed sikatayo,” insulat nen apostol Pablo. Salanti, akauna lan anengneng na Dios so bengatlan magmaong parad saraman so, singa si Pablo et atawag ed mangatatawen a bilay a kaibay Kristo. (Hebreos 11:40) Saraya imay nagkalautlan walad kanonotan nen Pablo sanen insulat toray salitan nirekord ed 2 Corinto 5:7: “Manakar itayo lapu ed pananisia, aliwan lapud pakanengneng.” Sanen nisulat itan, anggapo ni ed sikara so akadampot ed mangatatawen a tumang da. Agda nanengneng itan ed mismon kamataan da, balet say pananisia ra ed satan so niletneg a maong. Apaoli si Kristo manlapud inaatey, say unonan bunga na saramay nabendisionan na mangatatawen a bilay. Tan masulok a 500 a tastasi so akanengneng ed sikato sakbay na insegep to’d tawen. (1 Corinto 15:3-8) Walaan ira na magenap a rason pian pauleyan so intiron kurang na bilay da diad satan a pananisia. Walaan itayo met na maabig a rason ed panaakar diad pananisia.
19. Singa nipanengneng ed Hebreos 1:1, 2, diad panamegley na siopa so akisalitaan na Dios ed sikatayo?
19 Natan, agmisasalita si Jehova ed totoo to panamegley na anghel, a singa ginawa to ed si Moises diad mandarlang a tanaman. Say Dios so nansalita diad panamegley na Anak to. (Hebreos 1:1, 2) Say imbaga na Dios ed panamegley to, impairekord To ed Biblia, a nipatalos ed saray lenguahe na totoo ed sankamundoan.
20. Panon a say situasyon tayo et mas paborabli nen di Noe, Abraham, tan Moises?
20 Mas dakel so niwala’d sikatayo nen say niwala’d di Noe, Abraham, odino Moises. Walaan itayo na kompleton Salita na Dios—dakel ed satan so asumpal la. Nisengeg ed amin ya ibabaga na Biblia nipaakar ed lalaki tan bibii a pinaneknekan day inkasikaran matoor a tastasi nen Jehova ed arap na subsubok ed amin a nengneng, oniay ipapaseseg na Hebreos 12:1: “Ikaindan tayo so amin a pakabelatan, tan say kasalanan ya akaliktob a sankainomayan ed sikatayo, tan batiken tayo a siaanos komon so babatiken a niyan ed arap tayo.” Say pananisia tayo so bengatlan agnepeg ya ibaliwala. “Say kasalanan ya akaliktob a sankainomayan ed sikatayo” et say kakulangay pananisia. Kakaukolanen toy impasyan pibakal parad satan no mantinien tayoy ‘manakar lapud pananisia.’
[Paimano ed leksab]
a Nengnengen so The Bible—God’s Word or Man’s?, impalapag na Watchtower Bible and Tract Society of New York, Inc.
Anto so Komento Yo?
◻ Anto so sasaglawien na ‘panakar diad panamegley na pananisia’?
◻ Panon tayon nagunggunaan ed paraan na impangipanengneng nen Noe na pananisia?
◻ Panon a say paraan na impangagamil nen Abraham na pananisia et ontulong ed sikatayo?
◻ Akin a tutukoyen na Biblia si Moises bilang sakey ya alimbawa na pananisia?
[Litrato ed pahina 10]
Nanakar si Abraham diad panamegley na pananisia
[Litrato ed pahina 10]
Angipanengneng si Moises tan Aaron na pananisia sanen walad arap nen Faraon