“Pabiskegen Yoray Puspuso Yo”
“Wala so pakapankaukolan yo ed anos, pian, dia ed kayari na panggawa yo na linaway Dios, awaten yo so sipan.”—HEBREOS 10:36.
1, 2. (a) Antoy agawa ed pigaran Kristiano nen inmunan siglo? (b) Akin a mainomay ya onkapuy so pananisia?
DIAD amin a managsulat ed Biblia, anggapo lay nagkalalon anaglawi ed pananisia nen say si apostol Pablo. Insan naynay ton sinalambit iraman so say pananisia ra et kinmapuy odino inatey. Alimbawa, wadtan si Himeneo tan Alejandro a “nagba ed pananisia.” (1 Timoteo 1:19, 20) Inkaindan met nen Dimas si Pablo lapud “nilabay to so sayan mundo a peles.” (2 Timoteo 4:10) Walaray pigara a lapud agmakristiano tan iresponsabli iran kiwas da et “pinaandi [da] la so pananisia.” Arum so apalikdo na palson kakabatan kanian “abalang ira nipaakar ed pananisia.”—1 Timoteo 5:8; 6:20, 21.
2 Akin a saraman ya alanaan a Kristiano so sinmaew ed onia ran dalan? Bueno, “say pananisia sikato so agpanduaruwa ed saray bengatla ya iilaloan, say panangipatnag ed saray bengatla ya agni anengneng.” (Hebreos 11:1) Papanisiaan tayoy bengatlan agtayo nanengneng. Agtayo nakaukolan itan parad bengabengatla iran nanengneng. Mas mainomay a pankimeyay nanengneng a kayamanan nen say agnanengneng ya espiritual a kaykayamanan. (Mateo 19:21, 22) Dakel a nanengneng a bengatla—a singa say “kilalawan na laman tan kilalawan na mata”—so pirmin makasagyat ed ag-ayadyarin laman tayo tan mamakapuy met ed pananisia tayo.—1 Juan 2:16.
3. Anton nengneng na pananisia so kaukolan a bayuboan na sakey a Kristiano?
3 Balet, kuan nen Pablo, a “say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” Ontan so nengneng na pananisia nen Moises. “Inyan to so mata to ed katumangan” tan “nansiansia a singa to nengnengnengen so agnanengneng.” (Hebreos 11:6, 24, 26, 27) Kaukolan na sakey a Kristiano so onian nengneng na pananisia. Singa naimano la ed akadkaunan artikulo, si Abraham so sakey a maabig ya alimbawa ed sayan pamaakaran.
Alimbawa na Pananisia nen Abraham
4. Panon a say kurso na bilay nen Abraham et naimpluensiaay pananisia to?
4 Walad Ur si Abraham sanen naawat toy sipan na Dios a sikatoy magmaliw ya ama na sakey a bini a pakabendisionan na totoo ed amin a nasyon. (Genesis 12:1-3; Gawa 7:2, 3) Base’d satan a sipan, tinulok nen Abraham si Jehova, ya inmalis a pilimero ed Haran insan diad Canaan. Ditan insipan nen Jehova ya iter itan a dalin ed bini nen Abraham. (Genesis 12:7; Nehemias 9:7, 8) Balet, dakel ed insipan nen Jehova so nasumpal kayari ipatey nen Abraham. Singa bilang, anggapon balot so akayarian nen Abraham ed Canaan—nilikud labat ed ungib na Macpela a sinaliw to bilang ponponan. (Genesis 23:1-20) Siansia, panisiaan toy salita nen Jehova. Manuna’d amin, panisiaan to so sakey ya arapen a “baley a wala so semento to, a say manamaalagey tan managgawa say Dios.” (Hebreos 11:10) Ontan a pananisia so anustuni ed sikato legay impanbilay to.
5, 6. Diad anton dalan ya asubok so pananisia nen Abraham no nipaakar ed sipan nen Jehova?
5 Naimano iyan nagkalalo la no nipaakar ed sipan a say bini nen Abraham so magmaliw a baleg a nasyon. Ta pian nagawa iya, kaukolan a walay ilalak nen Abraham, tan abayag ton tinalaranay pakabendisionan na ontan. Agtayo amta no kaunongay edad to sanen inmunan nadngel toy sipan na Dios, balet sanen nambaroy na andukey a mamaarap ed Haran, sikatoy agni inikdan nen Jehova na ilalak. (Genesis 11:30) Sikatoy binmayag la ed Haran ya ‘akatipon na kaykayarian tan kakamarerwan nalnala to,’ tan diad intaynan to ed Canaan et sikato lay 75 años tan si Sara so 65 años. Siansian anggapo ni anak da. (Genesis 12:4, 5) Sanen manga 75 años si Sara, nibaga ton akulaw la pian naikdan toy Abraham na sakey ya anak. Kanian, unong ed kaugalian ed saman a panaon, inter toy aripen ton bii a Hagar ed si Abraham, tan diad sikato et awalaan na anak a laki. Balet aliwan saya imay insipan ya ugaw. Diad kaunoran et si Hagar tan say anak ton Ismael, so pinataynan. Anggaman ontan et sanen akikasi Abraham ed biang da, insipan nen Jehova a bendisionan toy Ismael.—Genesis 16:1-4, 10; 17:15, 16, 18-20; 21:8-21.
6 Diad nigeter a panaon na Dios—abaybayag a panaon kayari inmunan impakadngel da ed sipan—say 100 años ya Abraham tan 90 años a Sara so awalaan na anak a laki, si Isaac. Maseguron agaylan makapakelkelaw itan! Parad sayan matakken lan sanasawa, singano itan sakey a kioli sanen say “inatey la” a laman da so amawala na sakey a balon bilay. (Roma 4:19-21) Abayag ya inalagar, balet sanen asumpal diad kaunoran so sipan, walay gunggunay impanalagar.
7. Panon a nisisiglaot so pananisia ed panagsungdo?
7 Ipapanonot ed sikatayo na alimbawa nen Abraham a say pananisia so kaukolan ya aliwan parad antikey labat a panaon. Insiglaot nen Pablo so pananisia ed sungdo sanen insulat to: “Wala so pakapankaukolan yo ed anos, pian, dia ed kayari na panggawa yo na linaway Dios, awaten yo so sipan. . . . Sikami aliwa kami ya iba na saray onsener pian pakabalangan; noag ingen iba na saray walaan na pananisia ed kilalaban na kamarerwa.” (Hebreos 10:36-39) Dakel so abayaglan nanalagar ed pakasumpal na say sipan. Arum ni ingen so nanalagar anggad impatey da. Say mabiskeg a pananisia ra so anustuni la ed sikara. Tan, singa si Abraham, seguradon naawat day tumang diad nigeter a panaon nen Jehova.—Habacuc 2:3.
Itatalineng ed Dios
8. Panon tayon talinengen so Dios natan, tan akin a mamabiskeg itan ed pananisia tayo?
8 Ag-onkulang ed apatiran bengatla so amabiskeg ed pananisia nen Abraham, tan saratan met so makatulong ed sikatayo. Unona, indemostra ton ‘sisiaen toy Dios’ diad intalineng to sanen nansalita si Jehova. Kanian, sikatoy midumaan ed saramay Judio ed agew nen Jeremias, a manisia ed si Jehova balet agda sisiaen iray salita to. (Jeremias 44:15-19) Natan, si Jehova so mansasalita ed sikatayo diad panamegley na saray pahina na Biblia, say apuyanan a Salita to, ya unong ed si Pedro et singa “sakey a silewan ya onsisinag ed pasen ya ambilunget . . . ed kapusoan yo.” (2 Pedro 1:19) Sano babasaen tayon maong so Biblia, sikatayo so “naiwi ed saray salita na pananisia.” (1 Timoteo 4:6; Roma 10:17) Niarum ni, diad sarayan kaunoran ya agew et mangitatarya so “matoor tan makabat ya aripen” na espiritual a “tagano ed panaon a kinepeg to,” a giya ed pangiyaplika ed saray prinsipyo na Biblia tan pakatalos ed propesiya na Biblia. (Mateo 24:45-47) Say italineng ed si Jehova diad sarayan paraan so makanakana pian nawalaan na mabiskeg a pananisia.
9. Antoy resulta no talagan panisiaan tayoy Makristianon ilalo?
9 Nisiglaot a tuloy so pananisia nen Abraham ed ilalo to. “Sikatoy anisia ed ilalo sumpa ed ilalo, pian sikato komon so magmaliw ya ama na dakel a nasyon.” (Roma 4:18) Saya so komaduan bengatlan makatulong ed sikatayo. Agtayon balot lilingwanan a si Jehova so “mananumang ed saray mananap ed sikato.” Oniay inkuan nen apostol Pablo: “Mansagpot tan mantepel kami, lapu ed wala kamin manilalo ed Dios a mabilay.” (1 Timoteo 4:10) No talagan panisiaan tayo so Makristianon ilalo, say intiron kurso na bilay tayo so mangipatnag na pananisia tayo, a singa ed kipapasen nen Abraham.
Pitotongtong ed Dios
10. Anton nengneng na pikakasi so mamabiskeg ed pananisia tayo?
10 Akitongtong si Abraham ed Dios, tan saya so komatlon bengatlan amabiskeg ed pananisia to. Natan et makapitongtong tayo met ed si Jehova, diad pangusar na langkap a pikakasi diad panamegley nen Jesu-Kristo. (Juan 14:6; Efeso 6:18) Kayari impanongtong ed parabolon angidanet ed pankaukolan na naynay a panpikasi, insan intepet nen Jesus: “Sano onla dia so Anak na too, makaromog kasi na pananisia ed dalin?” (Lucas 18:8) Say pikakasin makapabiskeg na pananisia so aliwan bengatbengat odino automatiko. Makabaliksan a tuloy itan. Alimbawa, say impapuson pikakasi so makana sano wala iray importantin dedesisyonan tayo odino sano sikatayoy naaburidon maong.—Lucas 6:12, 13; 22:41-44.
11. (a) Panon ya apabiskeg si Abraham sanen nilukasan toy puso to ed Dios? (b) Antoy naaralan tayo manlapud eksperiensia nen Abraham?
11 Sanen onmamasiken la si Abraham tan siansian agni inikdan nen Jehova na nisipan a bini, intongtong to ed Dios so kapagaan to. Sikatoy pinaseguroan nen Jehova. Say resulta? Si Abraham so “anisia ed Jehova; tan imbilang to ed sikato a katunongan.” Insan, inikdan nen Jehova na tanda pian pekderan iray manamaseguron salita to. (Genesis 15:1-18) No ilukas tayoy kapusoan tayo ed si Jehova diad pikakasi, awaten iray panamaseguro nen Jehova a walad Salita to, say Biblia, tan sikatoy tuloken tekep na sigpot a pananisia, diad ontan et pabiskegen met nen Jehova so pananisia tayo.—Mateo 21:22; Judas 20, 21.
12, 13. (a) Panon ya abendisionan si Abraham sanen tinumbok toy panangigiya nen Jehova? (b) Antoran nengneng na eksperiensia so mamabiskeg ed pananisia tayo?
12 Say komapat a bengatlan amabiskeg ed pananisia nen Abraham et say suportan inter nen Jehova ed sikato sanen tinumbok toy panangigiya na Dios. Sanen linmay Abraham pian iyagel si Lot manlapud managlusob ya arari, sikatoy impanalo nen Jehova. (Genesis 14:16, 20) Anggaman nambilay si Abraham a singa temporaryon residenti ed dalin a tawiren na bini to, sikatoy benendisionan nen Jehova diad materyal a paraan. (Ikompara so Genesis 14:21-23.) Inwanwan nen Jehova iray sagpot na mayurdomo to pian makaromog na matukoy ya asawan bii parad si Isaac. (Genesis 24:10-27) On, ‘pinapalar nen Jehova si Abraham ed amin a bengabengatla.’ (Genesis 24:1) Bilang resulta et ontanlay kabiskeg na pananisia to tan kaapit na relasyon to ed si Jehova a Dios a sikatoy tinawag nen Jehova a “kaarok.”—Isaias 41:8; Santiago 2:23.
13 Nawalaan tayo ta na ontan met a kabiskeg na pananisia natan? On. No sikatayo, a singa si Abraham et suboken tayoy Jehova diad panulok ed saray ganggan to, bendisionan to itayo met, tan satan so mamabiskeg ed pananisia tayo. Alimbawa, no imanoen tayon magano so 1998 Serbisyon Taon a Report et ipanengneng ton dakel iray abendisionan diad makapakelaw a paraan sanen tinulok day ganggan to ya ipulong so maong a balita.—Marcos 13:10.
Sakey a Rekord na Pananisia Natan
14. Panon a benendisionan nen Jehova so kampanya na Kingdom News No. 35?
14 Nen Oktubre 1997, say sankamundoan a kampanya na Kingdom News Nu. 35 so makatantandan tinmalona, lapud seseg tan entusiasmo na minilyon a sinansakey a Tastasi. Kaslakan lay agawa ed Ghana. Ngalngali 2.5 milyon a kopya so nibunog ed apatiran lenguahe, tan bilang resulta et ngalngali 2,000 a panangiyaral na Biblia so kinerew. Diad Cyprus, naimano na duaran Tasi a mangibubunog na Kingdom News a sikaray tutumboken na pari. Ag-apaleenan, sikatoy inopresian da na Kingdom News. Wala lay kopya to tan inkuanto: “Pandinayewan kon tuloy so mensahen lugan na saya a labay kon pisalamatay totoon angiparaan ed satan.” Diad Denmark, 1.5 milyon a kopya na Kingdom News so nibunog tekep na marakep resulta. Sakey a biin mantratrabaho ed opisina na public relations diman so nankuan: “Say tract so walaan na mensahen parad amin, tan pakiwasen to ka, panpilaleken to kan mangamta na nagkalalo ni. Talagan matukotukoy!”
15. Antoray eksperiensian mangipanengneng a benendisionan nen Jehova so sagpot a sabien so totoo ed inerman a pasen?
15 Nen 1998 et nanggunaetay pakapanpulong ed totoo aliwa lambengat ed ayaman da noagta ed inerman a pasen. Diad Côte d’Ivoire, sakey a sanasawan misionaryo so akabisitay 322 a barkon walad daungan. Akapangipalima ira na 247 a libro, 2,284 a magasin, 500 a brosyur, tan nilasus a tract, ontan met na saray video ed saray marino pian bantayan da legay panlalayag da. Diad Canada et walay sakey a Tasin linma ed talyer. Say akankien so interesado, tan say agi so nansiansia ed loob na apatira tan kapalduay oras, anggaman say aktual ya oras a nausar ya impanpulong et sakey ya oras odino onsulok ni lapud pansasbi na saray kustomer. Diad kaunoran et niyuksoy so panagaral diad 10:00 n.l. Balet no maminsan et agni nigapo itan anggad pegley labi tan mansumpal itan ed alas dos na palbangon. Talagan say eskedyul et sakey ya angat, balet agamoran iray maong a resulta. Denisidi na akankien ya ikapot so talyer ed saray Simba ta pian naatendian iray miting. Ag-abayag et maabig so iyaaligwas dan sankapamilyaan.
16. Antoran eksperiensia so mangipanengneng a say brosyur a Kakaukolanen tan say libron Pikakabat so mabiskeg iran uusaren diad panagpulong tan panagbangat a kimey?
16 Say brosyur ya Antoy Kakaukolanen na Dios ed Sikatayo? tan say libron Pikakabat a Mangitonton ed Andi-Anggaan a Bilay so tuloytuloy nin mabiskeg iran instrumento ed panagpulong tan panagbangat a kimey. Diad Italya et sakey a madre a manatalaran na bus so angawat na kopyay Kingdom News. Tinmumbok ya agew, sikatoy inasinggeran lamet tan inawat toy brosyur a Kakaukolanen. Kada agew nanlapulad saman, sikatoy inyaralan na Biblia ed loob na 10 ya anggad 15 minuto diad istasyon na bus. Kayari sakey bulan tan kapaldua, denisidi ton taynan lay kombento tan onsempet ed Guatemala pian ituloy so panagaral diman. Diad Malawi, sakey a mapamisa a manngaran na Lobina so ag-aliketan sanen saray marikit to so nanaral ed Biblia a kaibay Tastasi nen Jehova. Siansia, inanabang na bibii so katuaan na Biblia ed ina ra sano nayarian da. Nen Hunyo 1997, anengneng nen Lobina so libron Pikakabat tan asagyat ed balikas a “Pikakabat a Mangitonton.” Nen Hulyo et inmabobon a paiyaralay Biblia. Kasabi Agosto inatendian toy distriton kombension tan tinmalineng a maong ed intiron program. Diad pansamposampot na saman a bulan, inmekal la’d relihyon to tan kinmualipika bilang agbautismadon manangipalapag. Sikatoy abautismoan nen Nobyembre 1997.
17, 18. Panon a napapaneknekan a saray video na Sosyedad et mausar diad panulong ed saray sinansakey pian “nanengneng” iray espiritual a bengatla?
17 Natutulongan na saray video na Sosyedad so dakel pian ‘nanengneng’ iray espiritual a bengatla. Walay sakey a laki ed Mauritius ya inmekal ed relihyon to lapud agpantutunosan diman. Impanengneng ed sikato na sakey a misionaryo so pankakasakey na Tastasi nen Jehova, diad impangusar ed video ya United by Divine Teaching. Lapud asagyat, inkuan na laki: “Sikayoran Tastasi nen Jehova so wala la’d Paraiso!” Sikatoy impaiyaralan na Biblia. Impabantayan na sakey ya agi ed Hapon ed agmananisian masiken to imay video a Jehovah’s Witnesses—The Organization Behind the Name, tan sikatoy apakiwas a paiyaralan a regular na Biblia. Kayari impakabantay ed United by Divine Teaching, labay to lay magmaliw a sakey ed Tastasi nen Jehova. Say nankatlon-kabiangan a serye ya apauloan na The Bible—A Book of Fact and Prophecy so akatulong ed sikaton mangiyaplika ed saray prinsipyo na Biblia ed bilay to. Kaunoran, anengneng to’d video a Jehovah’s Witnesses Stand Firm Against Nazi Assault a papabiskegen nen Jehova iray totoo To sumpad saray panangataki nen Satanas. Satan a laki so abautismoan nen Oktubre 1997.
18 Pigara labat iraya ed dakerakel ya eksperiensian nanggayagaan legay apalabas a serbisyon taon. Ipapanengneng na saraya a saray Tastasi nen Jehova et walaan na aktibon pananisia tan papabiskegen nen Jehova itan a pananisia diad pamebendision to’d kimey da.—Santiago 2:17.
Bayuboay Pananisia Natan
19. (a) Panon a magmaong so kipapasen tayo nen say si Abraham? (b) Pigaray nandaragup nen katantaon pian nodnonotey masakripisyon impatey nen Jesus? (c) Antoran bansa so matalonggaring ed bilang na inmatendi ed Memoryal katantaon? (Nengnengey tsart ed pahina 12 ya anggad 15.)
19 Diad dakel a paraan et magmaong so kipapasen tayo natan nen say si Abraham. Amta tayon sinumpal nen Jehova so amin ya insipan to’d si Abraham. Talagan atawir na ilalak nen Abraham so Canaan, tan peteg a nagmaliw iran baleg a nasyon. (1 Arari 4:20; Hebreos 11:12) Niarum ni, manga 1,971 taon kayari intaynan nen Abraham ed Haran, say poli to, si Jesus, so binautismoan nen Juan a Managbautismo ed danum tan insan diad masanton espiritu nen Jehova a mismo pian magmaliw a Mesias, say Bini nen Abraham diad nagnap tan ed espiritual a pantalos. (Mateo 3:16, 17; Galacia 3:16) Nen Nisan 14, 33 K.P., inyapay nen Jesus so bilay to bilang panondon ed saramay mangagamil na pananisia ed sikato. (Mateo 20:28; Juan 3:16) Minilyon la natan so nabebendisionan diad panamegley to. Katantaon, 13,896,312 so nandaragup nen Nisan 14 pian nodnonoten iyan makapakelaw a gawa na aro. Agaylan panangiyalangon ed si Jehova, say Baleg a Mananoor ed sipasipan!
20, 21. Panon a bebenditoen na totoo so inkasikara ed amin a nasyon panamegley na Bini nen Abraham diad inmunan siglo, tan panon a bebenditoen day inkasikara natan?
20 Nen inmunan siglo, dakel a nanlalapud amin a nasyon—manlapud literal ya Israel—so angagamil na pananisia ed sayan Bini nen Abraham tan nagmaliw ya alanaan ya ananak na Dios, membro na say balo tan espiritual ya “Israel na Dios.” (Galacia 3:26-29; 6:16; Gawa 3:25, 26) Walaan ira na apaseguroan ya iilaloan, salanti say imortal ya espiritun bilay diad katawenan bilang kaiban manuley diad Panariay Dios. Say nabendisionan ed onian dalan et 144,000 lambengat, tan pigpigara labat lay nakekeraan ed sikara. (Apocalipsis 5:9, 10; 7:4) Katantaon, pinaneknekan na 8,756 so panisia ran sikaray kabiangan na sayan bilang diad impibiang ed saray emblema legan na selebrasyon na Memoryal.
21 Ngalngalin amin ed Tastasi nen Jehova natan so kabiangay “baleg ya ulop” a nipropesiya ed Apocalipsis 7:9-17. Lapud bebenditoen day inkasikara diad panamegley nen Jesus, walaan ira na ilalon maandon bilay diad paraison dalin. (Apocalipsis 21:3-5) Say 5,888,650 ya akibiang ed panagpulong nen 1998 so ebidensian sayan ulop so talagan “baleg.” Nagkalalo lan makapaliket so pakaimanon say Russia tan Ukraine so angireport na masulok a 100,000 a manangipalapag ed sankaunaan a pankanawnawa. Matalonggaring met so report na Estados Unidos—1,040,283 a manangipalapag nen Agosto! Talora labat iraya ed 19 a bansan angireport na masulok a 100,000 a manangipalapag nen katantaon.
Ilalon Asingger lan Nasumpal
22, 23. (a) Akin a kaukolan tayon pabiskegen so kapusoan tayo natan? (b) Panon tayon napaneknekan a singa itayo si Abraham, aliwan singa saray andiay pananisian sinalambit nen Pablo?
22 Apanonotan iray inmatendi ed Memoryal no kawalaan ti la ed pakakasumpal na sipasipan nen Jehova. Nen 1914, nitrono si Jesus bilang Ari na mangatatawen a Panarian na Dios, a nigapoy kiwawala to ed pakayari na Panarian. (Mateo 24:3; Apocalipsis 11:15) On, say Bini nen Abraham so manuuley la ed tawen! Oniay inkuan nen Santiago ed saray Kristiano ed panaon to: “Maanos kayo met komon; iteen [“pabiskegen,” NW] yoray puspuso yo: ta say isasabi Katawan manasingger.” (Santiago 5:8) Bueno, satan a kiwawala so nagagawa la natan! Nagkalalon makatunongan a pakabiskegay kapusoan tayo!
23 Komon ta say kompiyansa tayo ed saray sipan na Dios so lawas pasimbaloen diad regular a panaral na Biblia tan makabaliksan a pikakasi. Komon ta ag-ontunday pakaeksperiensia tayo ed panamendision nen Jehova legan a tutuloken tayoy Salita to. Diad ontan et magmaliw itayon singa si Abraham, aliwan singa saramay say pananisia ra et kinmapuy tan inatey, a singa sinalambit nen Pablo. Anggapo so makapangisian ed sikatayo ed sankasantosan a pananisia tayo. (Judas 20) Ipikasi min magmaliw iyan tua ed amin a lingkor nen Jehova legay 1999 a serbisyon taon tan manpatuloy ed maandon arapen.
◻ Panon tayon natalineng so Dios natan?
◻ Antoran gungguna so resulta na makabaliksan iran pikakasi ed Dios?
◻ No situtulok tayon tumbokey panangigiya nen Jehova, panon a napabiskeg so pananisia tayo?
◻ Antoray aspekto na tinaon a report (pahina 12 ya anggad 15) so nagkalalo lan makapainteres ed sika?
[Tepetepet Parad Panagaral]
[Tsart ed pahina 12-15]
1998 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Litrato ed pahina 16]
No talinengen tayoy Salita nen Jehova, say kompiyansa tayo ed sipasipan to so napasimbalo
[Litrato ed pahina 18]
Say pananisia tayo so napabiskeg sano mibiang itayo ed ministeryo