Ariripen na Totoo Odino Lingkor na Dios?

“ANGGAN panon et napandinayewan iray Tastasi nen Jehova.” Ontan so inkuan na Aleman a libron Seher, Grübler, Enthusiasten (Saray Managparles, Manag-imatlek, Entusiastiko). Anggaman kritiko ed Tastasi, aawaten to: “Diad inkalapagan, manbibilay iran andi-kabalawan, kabkaabigay panagbilay da. Sikaray makuli tan mapeleng ed trabaho ra, mareen iran mibabaley tan matuan managbayar na buis. Papaliisan day alablabas a pangegemtan ed kaykayamanan. . . . Say disiplina ra diad saray kombension et makapadinayew. Say dilin-panagsakripisyo ra so mipara ed dinanman a relihyoson grupo; no nipaakar ed ministeryo et palumbasan day arum ni. Balet, say inkipasen dan matalona ed arum nin Kristianon relihyon tan grupo ed panaon tayo et say sigpot ya agnabuyak a determinasyon a maslak ed sikara so mangiyaabawag ed saray doktrina ra ed silong na amin a sirkumstansia tan diad arap na amin a kapeligroan.”a

Anggaman ed ontan a positibon panangirayew, arum ya opinyon so manasalin mangiparungtal ed Tastasi nen Jehova ed duman tuloy a panmoria. Diad dakel a bansa ed sankamundoan, parungtalan a gagawaen na Tastasi so relihyoson serbisyo ra ed loob na saray dekada ya anggapoy panangisebel. Minilyon a totoo so makapikabat ed sikara, manrerespeto ed sikara, tan onabobon a sikaray walaan na kanepegan ya agamilen so relihyon da. Akin sirin a wala ni so panduaruwa nipaakar ed no sioparay Tastasi nen Jehova?

Anganko say sakey a rason parad panduaruwa et diad agano niran panaon pigara ed arum a relihyoson grupo so alanor ed panag-abusoy ugaw, amayamay ya impanbikkel, tan panangataki na terorista. Siempre, say mauges ya ugali a singa saraya so naromog ed inerman a pasen, aliwa labat ed limog na saramay relihyoso. Balet, no nipaakar ed relihyon, dakel a totoo so nagmaliw a manduaruwa, arum so maramsak ni ingen.

Kapeligroan ed Itutumbok ed Totoo

Say sakey a “sekta” so naukeran la bilang “sakey a grupon ontutumbok ed sakey a nikabkabiig a doktrina odino ed sakey a lider.” Mipadpara, saramay kabiangan na sakey a “kulto” so walaan na “baleg a debosyon ed sakey a too, ideya, odino bengatla.” Diad tua et saray membro na antokaman a relihyoson grupon pirmin manutumbok ed saray atooan a lider pati iray ideya ra, saray membro na saray sekta tan kulto so mamepeligro’d pagmaliw ya ariripen na totoo. Say mabiskeg a siglaotan ya akasentro’d lider so mangitonton ed maletey ya emosyonal tan espiritual a pandedependi. Say kapeligroan so nayarin onloor sano say too so binmaleg ed panatikon atmospera nanlapu la’d kaugawan.

Saramay walaay ontan a kapagaan nipaakar ed relihyon so mankaukolan na napanmatalkan ya impormasyon. Nayarin nibaga la’d arum a saray Tastasi nen Jehova et kabiangan na relihyoson organisasyon a mangaaripen ed saray membro to, mangaagamil na autoritaryanon panangontrol ed sikara, pepegetan a tuloy so kawayangan da, tan pagmamaliwen iran agmikompormi ed sosyedad bilang intiraminti.

Amta na Tastasi nen Jehova a sarayan kapagaan so agmakatunongan. Kanian, iimbitaan da ka a manusisan mismo. Kayari maalwar a panangonsidera, manggawa ka lay dilin konklusyon mo. Kasin saray Tastasi so lingkor na Dios, a singa ibabaga ra, odino ariripen na totoo? Anto so lapuan na biskeg da? Say duaran artikulo ed pahina 12-23 so mangiter na makapenek iran ebat ed ontan iran tepet.

[Paimano ed leksab]