Kasin Nanonotan Yo?

Aromog mo ta’n praktikal a makagungguna’d sika so agano niran paway na Say Panag-Bantayan? Sirin akin ya agmo suboken so memoryam ed onggendan a tepetepet?

◻ Anto so pandumaan na “agew na Katawan” tan “agew nen Jehova”? (Apocalipsis 1:10; Joel 2:11)

Lalaktipen na “agew na Katawan” so kasumpalan na 16 a pasingawey ya adeskribe ed Apocalipsis kapitulo 1 ya anggad 22 tan saray importantin ebenton impasakbay nen Jesus bilang ebat ed tepet na saray babangatan to nipaakar ed tanda na kiwawala to. Kaleganay kapantokan na agew na Katawan, ombetag so makapataktakot a tuloy ya agew nen Jehova sano ipaakseb to so panangukom ed abulok a mundo nen Satanas. (Mateo 24:3-14; Lucas 21:11)—12/15, pahina 11.

◻ Antoray pigaran matalonggaring a nengneng na Biblian Makarios?

Say ngaran a Jehova so nausar a masulok a 3,500 a danay diad Biblian Makarios. Inkuan na sakey ya iskolar na relihyoson literatura a Ruso: “[Say] patalos to so intumbok to’d Hebreon teksto, tan say inkisalita na patalos et dalisay tan matukoy ed tema.”—12/15, pahina 27.

◻ Anto so “katuaan” ya inkuan nen Jesus a mangibulos ed sikatayo? (Juan 8:32)

Say tutukoyen nen Jesus a “katuaan” et say madibinon apuyanan ya impormasyon—nagkalalo la’d say impormasyon a nipaakar ed linawa na Dios—a nipreserba diad Biblia.—1/1, pahina 3.

◻ Sioparay modernon-agew a Jehu tan Jehonadab?

Ililitrato nen Jehu si Jesu-Kristo, a nilalaman ed dalin na say “Israel na Dios,” alanaan a Kristianos. (Galacia 6:16; Apocalipsis 12:17) No panon a si Jehonadab et pinmaway pian miabet ed si Jehu, ompapaway so “baleg ya ulop” a nanlalapud nasyones a manuporta ed saray mangaraldalin a manangilaman nen Jesus. (Apocalipsis 7:9, 10; 2 Arari 10:15)—1/1, pahina 13.

◻ Anto so kabaliksan na ‘panakar a kaibay Dios’? (Genesis 5:24; 6:9)

Labay ton ibaga a saraman so manggawa ed satan, singa di Enoc tan Noe, so kinmiwas diad paraan a pakapatnagay mabiskeg a pananisia ed Dios. Ginawa ra so ingganggan nen Jehova ed sikara tan intunos day bilay da unong ed pikakabat da ed sikato diad saray impideneng to ed sankatooan.—1/15, pahina 13, 14.

◻ Akin a kaukolan ya iplano la na sakey parad posibilidad na ipatey to?

Diad sakey a pantalos, say panggawa ed ontan iran uksoyan so regalo ed pamilya na sakey. Panangipanengneng itan na panangaro. Mamaneknek itan a pilalek pian ‘taganoen so kaamong a dili na sakey’ anggano agto lara katuyaw. (1 Timoteo 5:8)—1/15, pahina 22.

◻ Anto so agawaan na “daan a sipanan”? (2 Corinto 3:14)

Intarok toray pataway na balon sipanan tan, tekep na saray naulit-ulit a bagat et angidemostra ed pirmin pankaukolan na too ed kibulos manlapud kasalanan tan ipapatey. Satan so ‘managbangat a mangitarok ed Kristo.’ (Galacia 3:24)—2/1, pahina 14.

◻ Diad antoran dalan a say balon sipanan et maando? (Hebreos 13:20)

Unona, aliwan singa say Ganggan a sipanan, agbalot itan nasalatan. Komadua, saray resulta na inkikurang to so permanenti. Tan komatlo, mantultuloy a nagunggunaan iray mangaraldalin ya uuleyan na Panariay Dios ed aregloy balon sipanan angga ed Milenyo.—2/1, pahina 22.

◻ Antoran gungguna so resulta na pagmaliw a misalsalamat?

Say ligsa a naeeksperiensia na too lapud impapuson pisasalamat so mangarum na liket tan kareenan ed sikato. (Ikompara so Uliran 15:13, 15.) Bilang sakey a positibon kualidad, say otang a linawa so manasalimbeng ed sakey ed negatibo iran liknaan a singa say sanok, pan-imon, tan panimbel.—2/15, pahina 4.

◻ Diad antoran sipanan a kabiangan iray nailalak ed espiritu?

Say balon sipanan, a satan so ginawa nen Jehova ed saray membro na espiritual ya Israel, tan say sipanan parad Panarian, a ginawa nen Jesus ed alanaan a papatumbok na bakat to. (Lucas 22:20, 28-30)—2/15, pahina 16.

◻ Antoran taloran baleg a piesta so ingganggan ya atendian na Israelitas?

Say Piesta na Andi-lebaduran Tinapay, a tinmumbok a tampol ed Paskua na Nisan 14; say Piesta na Simsimba, diad koma-50 agew manlapud Nisan 16; tan say Piesta na Panag-ulor, odino Piesta na Kobongkobong, diad komapiton bulan. (Deuteronomio 16:1-15)—3/1, pahina 8, 9.

◻ Akin a pribilihyo so pakaatendi ed Kristianon pandaragup?

Inkuan nen Jesus: “No iner so kawalaan na duara ono talora a nantitipon nisengeg ed ngaran ko, siak wala ak ed nanleleetan da.” (Mateo 18:20; 28:20) Ontan met, say importantin paraan ed ontan a katagano’d espiritual et diad saray miting ed kongregasyon tan saray babaleg a pandaragup. (Mateo 24:45)—3/1, pahina 14.

◻ Anto so gapoan na ngaran a Nimrod?

Pigaran iskolar so mipakna’d opinyon a say ngaran a Nimrod et aliwan peteg a ngaran to. Imbes, ipapasen dan ipangaran ed saginonor pian tukoyay rebelyoson walna to kayarin apatnagan itan.—3/15, pahina 25.

◻ Panon kaimportanti so pamilya ed sosyedad na too?

Say pamilya et kaukolan na too. Ipapanengneng na awaran a legan a nakukusbo so uksoyan na pamilya, onkakapuy so biskeg na saray komunidad tan nasyon. Kanian say pamilya so walaan na direktan epekto ed inkaligen na sosyedad tan say pankaabigan na ananak tan arapen iran kailalakan.—4/1, pahina 6.

◻ Antoray taloran linya na prueba a say Biblia et Salitay Dios?

(1) Satan so sientipikon susto; (2) lugan toray ag-onkupas a prinsipyon praktikal ed modernon panagbilay; (3) lugan toray espisipikon propesiya a nasusumpal la, a singa paneknekan na saray katuaan ed awaran.—4/1, pahina 15.